ភាគទី៧
ជីវិតដ៏គាប់ចិត្តម្ដេចក៏ពិបាករកបានម្ល៉េះ?
ហេតុអ្វីក៏មនុស្សជាច្រើនខំពុះពារទាំងលំបាក តែឥតរកឃើញអត្ថន័យដ៏ពិតប្រាកដក្នុងជីវិតរបស់គេបានអ៊ីចឹង? «មនុស្សដែលកើតពីស្រីមក សុទ្ធតែមានអាយុខ្លីទាំងអស់ ហើយក៏មានសេចក្ដីលំបាកជានិច្ចផង គេចេញមកដូចជាផ្កា រួចត្រូវកាត់ដាច់ទៅ គេរួញថយបាត់ទៅ ដូចជាស្រមោល ឥតនៅស្ថិតស្ថេរឡើយ»។ (យ៉ូប ១៤:១, ២) អ្វីមួយដែលបានធ្វើឲ្យសេចក្ដីសង្ឃឹមដ៏ត្រចះត្រចង់របស់មនុស្សលោកបាត់បង់ទៅ គឺដោយសារមនុស្សមួយគូដំបូងនៅក្នុងសួនមនោរម្យ។
២ ដើម្បីឲ្យក្រុមគ្រួសារជាមនុស្សលោកមានសុភមង្គលពិតប្រាកដ នោះពួកគេត្រូវតែមានទំនាក់ទំនងដ៏ល្អជាមួយព្រះ ដែលជាទំនាក់ទំនងដ៏ស្ម័គ្រពីចិត្ត មិនមែនដោយបង្ខំទេ។ (ចោទិយកថា ៣០:១៥-២០; យ៉ូស្វេ ២៤:១៥) ព្រះយេហូវ៉ាចង់បានការស្ដាប់បង្គាប់និងការថ្វាយបង្គំដែលចេញពីចិត្ត គឺដោយសេចក្ដីស្រឡាញ់។ (ចោទិយកថា ៦:៥) ដូច្នេះហើយនៅក្នុងសួនច្បារអេដែន ព្រះយេហូវ៉ាបានដាក់ល័ក្ខខ័ណ្ឌមួយ ដែលតម្រូវឲ្យបុរសទីមួយនូវឱកាសដើម្បីបង្ហាញជាភស្តុតាងនូវភក្ដីភាពដ៏ស្មោះរបស់គាត់។ ព្រះទ្រង់បានមានបន្ទូលប្រាប់អ័ដាមថា៖ «ឯងនឹងស៊ីផ្លែឈើទាំងអស់ក្នុងសួនច្បារនេះបានតាមចិត្ត តែឯត្រង់ដើមដឹងខុសត្រូវ នោះមិនត្រូវឲ្យឯងស៊ីផលឡើយ ដ្បិតនៅថ្ងៃណាដែលឯងស៊ី នោះនឹងត្រូវស្លាប់ជាមិនខាន»។ (លោកុប្បត្តិ ២:១៦, ១៧) នេះជាការសាកល្បងមួយដ៏ស្រួល។ ព្រះយេហូវ៉ាបានហាមមិនឲ្យអ័ដាមបរិភោគផ្លែពីដើមឈើតែមួយដើមគត់ ក្នុងចំណោមដើមឈើជាច្រើនក្នុងសួនច្បារនោះ។ ដើមឈើនោះបានតំណាងសិទ្ធិរបស់ព្រះអាទិទេពដែលមានសព្វប្រាជ្ញា ក្នុងការសម្រេចអ្វីដែលល្អនិងអ្វីដែលអាក្រក់។ បុរសដំបូងបានប្រាប់បញ្ញត្ដិដែលព្រះប្រទានឲ្យនេះដល់ភរិយាខ្លួន ដែលព្រះយេហូវ៉ាបានឲ្យជា«គូបង្គ្រប់ចំពោះ[អ័ដាម]»នោះ។ (លោកុប្បត្តិ ២:១៨, ព.ថ.) ពួកគេបានពេញចិត្តនឹងរបៀបរៀបចំនេះ គឺការរស់នៅក្រោមការគ្រប់គ្រងរបស់ព្រះ ទាំងចុះចូលដោយអបអរក្នុងការធ្វើតាមព្រះហឫទ័យទ្រង់។ ហើយតាមរបៀបនេះ គឺអាចសម្ដែងសេចក្ដីស្រឡាញ់របស់គេចំពោះព្រះអាទិទេព ដ៏ជាព្រះដែលប្រទានឲ្យជីវិត។
៣ រួចមក នៅថ្ងៃមួយ ពស់មួយបាននិយាយជាមួយនាងអេវ៉ា ហើយបានសួរថា៖ «តើព្រះមានបន្ទូលហាមមិនឲ្យអ្នកបរិភោគផ្លែឈើណានៅក្នុងសួនច្បារមែនឬ?»។ នាងអេវ៉ាបានឆ្លើយថា ពួកគេបានត្រូវហាមមិនឲ្យ បរិភោគផ្លែពី«ដើមឈើ១ដែលនៅកណ្ដាលសួនច្បារនោះ» គឺដើមដឹងខុសត្រូវ ‹ក្រែងលោពួកគេនឹងស្លាប់ទៅ›។—លោកុប្បត្តិ ៣:១-៣
៤ តើពស់នេះជាអ្នកណា? សៀវភៅវិវរណៈក្នុងព្រះគម្ពីរសម្គាល់«ពស់ពីបុរាណ»ជា«អារក្ស ហើយសាតាំងផង ដែលបាននាំលោកីយទាំងមូលឲ្យវង្វេងចេញ»។ (វិវរណៈ ១២:៩) តើព្រះបានបង្កើតអារក្សសាតាំងមែនឬ? អត់ទេ! កិច្ចការរបស់ព្រះយេហូវ៉ាសុទ្ធតែគ្រប់ល័ក្ខណ៍និងល្អ។ (ចោទិយកថា ៣២:៤) បុគ្គលវិញ្ញាណនេះបានលើកខ្លួនវាជាអារក្ស ដែលមានន័យថា«អ្នកនិយាយបង្ខូច» និងសាតាំង ដែលមានន័យថា«អ្នកប្រឆាំង»។ វាបានត្រូវ«កើតមានសេចក្ដីល្បួង នោះគឺដោយសារតែសេចក្ដីប៉ងប្រាថ្នារបស់ខ្លួន» គឺសេចក្ដីប៉ងប្រាថ្នាចង់បានឋានៈរបស់ផងព្រះ។ អ៊ីចឹងហើយ វាក៏ចាប់ផ្ដើមបះបោរប្រឆាំងនឹងព្រះអាទិទេពទៅ។—យ៉ាកុប ១:១៤
៥ អារក្សសាតាំងបាននិយាយទៅនាងអេវ៉ាទៀតថា៖ «អ្នកមិនស្លាប់ជាពិតមែនទេ ដ្បិតព្រះទ្រង់ជ្រាបថា នៅថ្ងៃណាដែលអ្នកបរិភោគ នោះភ្នែកអ្នកនឹងបានភ្លឺឡើង ហើយអ្នកនឹងបានដូចជាព្រះដែរ ព្រមទាំងដឹងការខុសត្រូវផង»។ (លោកុប្បត្តិ ៣:៤, ៥) សាតាំងបានធ្វើឲ្យការបរិភោគពីដើមដឹងខុសត្រូវ ទៅជាអ្វីដ៏គួរឲ្យចូលចិត្តណាស់។ ជាគោល វាបាននិយាយប្រឆាំងថា៖ ‹ព្រះទ្រង់កំពុងដកហូតយកអ្វីល្អពីអ្នកហើយ។ ចូរបរិភោគពីដើមឈើនោះទៅ! ហើយអ្នកនឹងបានដូចព្រះ និងអាចសម្រេចចិត្តសំរាប់ខ្លួនឯងនូវអ្វីដែលល្អនិងអ្វីដែលអាក្រក់›។ សព្វថ្ងៃនេះ សាតាំងនៅតែប្រើការវែកញែកបែបនេះ ដើម្បីរារាំងមនុស្សជាច្រើនពីការបំរើព្រះ។ វានិយាយថា៖ ‹ចូរធ្វើអ្វីតាមតែចិត្តខ្លួនទៅ! ចូរកុំអើពើនឹងអ្វីដែលអ្នកជំពាក់គុណព្រះ ដែលបានផ្ដល់ជីវិតដល់អ្នកចុះ!›។—វិវរណៈ ៤:១១
៦ ភ្លាមនោះ ផ្លែពីដើមឈើនោះបានក្លាយទៅជាអ្វីដែលចង់បានជាខ្លាំង ជាអ្វីដែលពុំអាចទប់បានឡើយ! នាងអេវ៉ាបានបេះផ្លែឈើនោះ ហើយក៏បរិភោគទៅ រួចមក ក៏បានផ្ដល់ខ្លះឲ្យស្វាមីបរិភោគដែរ។ ថ្វីបើអ័ដាមបានដឹងយ៉ាងច្បាស់នូវលទ្ធផលនេះ តែគាត់បានស្ដាប់តាមភរិយារបស់គាត់ ហើយក៏បានបរិភោគផ្លែឈើនោះទៅ។ តើបានមានលទ្ធផលយ៉ាងណា? ចំពោះស្ត្រីនេះ ព្រះយេហូវ៉ាបានដាក់ទោសដោយថា៖ «អញនឹងចំរើនឲ្យឯងមានសេចក្ដីព្រួយលំបាកជាច្រើនឡើង ក្នុងវេលាដែលមានផ្ទៃពោះ ឯងនឹងបង្កើតកូនដោយឈឺចាប់ ចិត្តឯងនឹងប្រាថ្នាខាងឯប្ដី ហើយប្ដីនឹងត្រួតត្រាលើឯង»។ ហើយចំពោះបុរសវិញគឺ៖ «នោះដីត្រូវបណ្ដាសាដោយព្រោះឯង ឯងត្រូវរកស៊ីពីដីដោយនឿយហត់អស់១ជីវិត ដីនឹងដុះជាបន្លាហើយនឹងអញ្ចាញឲ្យឯង ឯងត្រូវស៊ីអស់ទាំងតិណជាតិដែលដុះនៅស្រែចំការ ឯងនឹងបានអាហារស៊ីដោយការបែកញើស ដរាបដល់ឯងត្រឡប់ទៅជាដីវិញ ពីព្រោះអញបានយកឯងពីដីមក ដ្បិតឯងជាធូលីដី ក៏ត្រូវត្រឡប់ ទៅជាធូលីដីវិញ»។ ឥឡូវនេះ អ័ដាមនិងនាងអេវ៉ាបានស្វែងរកសុភមង្គលនិងសេចក្ដីស្កប់ចិត្តតាមផ្លូវរបស់គេ។ តើការខំប្រឹងរបស់មនុស្សដើម្បីប្រកបជីវិតដ៏គាប់ចិត្ត ដោយមិនសមស្របតាមព្រះហឫទ័យព្រះអាចបានជោគជ័យឬទេ? កិច្ចការដ៏សប្បាយជាការមើលថែរក្សាសួនមនោរម្យ និងការពង្រីកសួនមនោរម្យទៅគ្រប់ទិសទីលើផែនដី បានត្រូវជំនួសដោយការងារដ៏នឿយហត់ ថែមទាំងគួរឲ្យធុញទ្រាន់ព្រោះគ្រាន់តែឲ្យបានរស់ ទាំងឥតធ្វើអ្វីដើម្បីតម្កើងព្រះអាទិទេពគេឡើយ។—លោកុប្បត្តិ ៣:៦-១៩
៧ នៅថ្ងៃដែលបរិភោគពីដើមដឹងខុសត្រូវ នោះមនុស្សមួយគូដំបូងបានស្លាប់ចំពោះព្រះនេត្រព្រះ និងក៏បានទ្រុឌទ្រោមទៅដល់សេចក្ដីស្លាប់ខាងរូបកាយ។ តើមានអ្វីកើតឡើងដល់គេពេលដែលគេបានស្លាប់នៅទីបំផុតនោះ? ព្រះគម្ពីរផ្ដល់នូវការយល់ធ្លុះអំពីស្ថានភាពនៃមនុស្សស្លាប់។ «ដ្បិតមនុស្សដែលរស់ គេដឹងថាខ្លួននឹងស្លាប់ជាមិនខាន តែមនុស្សស្លាប់ឥតដឹងអ្វីឡើយ គេក៏គ្មានរង្វាន់អ្វីទៀតដែរ ពីព្រោះសេចក្ដីនឹកចាំពីគេបានសូន្យបាត់ហើយ»។ (សាស្ដា ៩:៥; ទំនុកដំកើង ១៤៦:៤) គឺគ្មានអ្វីមួយដូចជា«ព្រលឹង»ដែលរស់នៅជាបន្តក្រោយពេលស្លាប់នោះទេ។ បាបនាំឲ្យទទួលទណ្ឌកម្មជាសេចក្ដីស្លាប់ មិនមែនជាទារុណកម្មជារៀងរហូតក្នុងស្ថាននរកនោះឡើយ។ ម្យ៉ាងវិញទៀត សេចក្ដីស្លាប់មិននាំទៅឯស្ថានភាពបរមសុខជារៀងរហូតក្នុងស្ថានសួគ៌ទេ។ a
៨ ដូចជាចានដែកនំមួយដែលមានស្នាមពៀចនោះ អាចធ្វើបានតែនំដែលមានស្នាម នោះបុរសនិងស្ត្រីដ៏ឥតគ្រប់ល័ក្ខណ៍ឥឡូវ អាចបង្កើតបានតែកូនចៅឥតគ្រប់ល័ក្ខណ៍តែប៉ុណ្ណោះ។ ព្រះគម្ពីរពន្យល់អំពីដំណើរនេះថា៖ «ដូច្នេះ ដែលបាបបានចូលមកក្នុងលោកីយ ដោយសារមនុស្សតែម្នាក់ ហើយក៏មានសេចក្ដីស្លាប់ចូលមកដែរ ដោយសារអំពើបាបនោះជាយ៉ាងណា នោះសេចក្ដីស្លាប់បានឆ្លងរាលដាល ដល់មនុស្សគ្រប់គ្នាយ៉ាងនោះដែរ ដ្បិតគ្រប់គ្នាបានធ្វើបាបហើយ»។ (រ៉ូម ៥:១២) ដូច្នេះហើយ យើងទាំងអស់គ្នាកើតមកដោយមានបាប បានត្រូវចុះចូលនឹងសេចក្ដីឥតប្រយោជន៍។ ជីវិតសំរាប់កូនចៅអ័ដាមបានក្លាយទៅជាជីវិតដ៏ច្រំដែលនិងធុញទ្រាន់។ ប៉ុន្តែ តើមានផ្លូវដោះស្រាយឬទេ?
a អ្នកនឹងរកឃើញពត៌មានដ៏គួរឲ្យចាប់អារម្មណ៍អំពីស្ថានភាពនៃមនុស្សស្លាប់ ក្នុងសៀវភៅស្តើង តើមានអ្វីកើតឡើងដល់យើងពេលយើងស្លាប់ទៅ? (ជាភាសាអង់គ្លេស) បោះពុម្ពដោយសមាគមប៉មយាមខាងព្រះគម្ពីរនិងខិត្តប័ណ្ណនៃរដ្ឋញូវយ៉ក។