ការក្បត់និងការចាប់
ជំពូកទី១១៨
ការក្បត់និងការចាប់
ពេលយូដាសនាំពួកទាហាន ពួកសង្គ្រាជ ពួកផារីស៊ី និងអ្នកឯទៀតមកដល់សួនច្បារគែតសេម៉ានី នោះគឺហួសពាក់កណ្ដាលអាធ្រាត្រហើយ។ ពួកសង្ឃបានឯកភាពបង់ប្រាក់៣០ដុំឲ្យយូដាសក្នុងការក្បត់នឹងព្រះយេស៊ូ។
តាមមើលទៅ មុននេះ យូដាសបានទៅជួបពួកសង្គ្រាជភ្លាម ក្រោយពីបានត្រូវបណ្ដេញចេញពីពិធីបុណ្យរំលង។ ភ្លាមនោះពួកសង្គ្រាជបានប្រមូលពួកមន្ត្រី និងទាហានមួយក្រុមដែរ។ ប្រហែលជាមុនដំបូង យូដាសនាំពួកគេទៅកន្លែងដែលព្រះយេស៊ូ និងពួកសាវ័ករបស់ទ្រង់បានធ្វើបុណ្យរំលងនោះ។ តែដោយឃើញថាព្រះយេស៊ូនិងពួកសាវ័កចេញទៅបាត់ហើយ នោះបណ្ដាជនដែលកាន់អាវុធ កាន់គោមកាន់ចន្លុះក៏នាំគ្នាដើរតាមយូដាស ចេញពីក្រុងយេរូសាឡិមឆ្លងទៅជ្រលងភ្នំកេដ្រុន។
កាលយូដាសនាំហ្វូងមនុស្សឡើងទៅភ្នំអូលីវ គាត់ប្រាកដក្នុងចិត្តថានឹងរកឃើញព្រះយេស៊ូ។ ក្នុងកំឡុងសប្ដាហ៍មុននេះ កាលព្រះយេស៊ូនិងពួកសាវ័កបានធ្វើដំណើរទៅវិញទៅមក ពីភូមិបេថានីនិងក្រុងយេរូសាឡិម ពួកគាត់តែងឈប់សំរាកជជែកគ្នាលេងនៅឯសួនច្បារគែតសេម៉ានី។ ប៉ុន្តែ ឥឡូវនេះ ដោយព្រះយេស៊ូប្រហែលជាបាំងក្នុងភាពងងឹតក្រោមដើមអូលីវ តើពួកទាហាននឹងសម្គាល់ទ្រង់យ៉ាងណាទៅ បើពួកគេខ្លះមិនដែលឃើញទ្រង់ពីមុនផងនោះ? ដូច្នេះហើយ យូដាសក៏ប្រាប់សញ្ញាមួយ ដោយពោលថា៖ «អ្នកណាដែលខ្ញុំថើប គឺអ្នកនោះហើយ ចូរចាប់វានាំទៅដោយប្រយ័តប្រយែងចុះ!»។
យូដាសនាំបណ្ដាជនចូលក្នុងសួនច្បារនេះ ឃើញព្រះយេស៊ូនៅជាមួយពួកសាវ័ក ក៏ដើរតម្រង់ទៅរកទ្រង់។ យូដាសទូលថា៖ «ជំរាបសួរលោកគ្រូ» រួចក៏ថើបទ្រង់ថ្នមៗ។
ព្រះយេស៊ូមានបន្ទូលតបថា៖ «សំឡាញ់អើយ! ឯងមកធ្វើអី?»។ រួចមក ទ្រង់ឆ្លើយសំនួររបស់ទ្រង់ ដោយថា៖ «យូដាសអើយ! អ្នកបញ្ជូនកូនមនុស្សទៅ ដោយថើប១ខ្សឺតឬ?»។ ប៉ុន្តែ ព្រះយេស៊ូមានព្រះទ័យធុញទ្រាន់នឹងអ្នកក្បត់នេះណាស់! ព្រះយេស៊ូក៏យាងទៅមុខចេញទៅកន្លែងភ្លឺដោយពន្លឺគោមនិងចន្លុះ ហើយមានបន្ទូលសួរពួកគេថា៖ «តើមករកអ្នកណា?»។
ពួកគេទូលឆ្លើយថា៖ «រកយេស៊ូវ ជាអ្នកស្រុកណាសារ៉ែត»។
ដោយឈរយ៉ាងក្លាហាននៅពីមុខពួកគេ ព្រះយេស៊ូមានបន្ទូលតបថា៖ «គឺខ្ញុំនេះហើយ»។ ពួកគេបានភ្ញាក់ផ្អើលនឹងភាពក្លាហានរបស់ទ្រង់ ហើយមិនដឹងជាទ្រង់នឹងធ្វើយ៉ាងណាទេ នោះពួកបុរសថយក្រោយហើយដួលដាច់ផ្ងារទាំងអស់គ្នា។
ព្រះយេស៊ូមានបន្ទូលឆ្លើយថា៖ «ខ្ញុំបានប្រាប់អ្នករាល់គ្នាថា គឺខ្ញុំនេះហើយ ដូច្នេះ បើអ្នករាល់គ្នារកខ្ញុំ នោះចូរបើកឲ្យអ្នកទាំងនេះទៅចុះ!»។ បន្ដិចមុននេះនៅក្នុងបន្ទប់ខាងលើ ព្រះយេស៊ូបានមានបន្ទូលប្រាប់ព្រះវរបិតាតាមរយៈសេចក្ដីអធិស្ឋាន ថាទ្រង់បានរក្សាការពារពួកសាវ័កដ៏ស្មោះត្រង់របស់ទ្រង់ ហើយគ្មាននរណាម្នាក់បានវង្វេងលើកលែងតែ«១នាក់នោះដែលបានដំរូវឲ្យត្រូវវិនាស»ប៉ុណ្ណោះ។ ដូច្នេះ ដើម្បីឲ្យពាក្យបន្ទូលរបស់ទ្រង់បានសម្រេច នោះទ្រង់សុំឲ្យគេលែងអ្នកកាន់តាមទ្រង់ឲ្យទៅ។
ពួកទាហានក្រោកឈរនិងតាំងជំហរឡើងវិញ ហើយចាប់ផ្ដើមចងព្រះយេស៊ូ ពេលនោះពួកសាវ័កយល់ដឹងនូវព្រឹត្ដិការណ៍ដែលហៀបនឹងកើតឡើង។ ពួកគេទូលសួរថា៖«ព្រះអម្ចាស់អើយ! តើត្រូវឲ្យយើងខ្ញុំកាប់នឹងដាវឬ?»។ មុននឹងព្រះយេស៊ូតបឆ្លើយ នោះពេត្រុសយកដាវមួយដែលពួកសាវ័កយកមកជាមួយ កាប់អ្នកបំរើរបស់សម្ដេចសង្ឃឈ្មោះម៉ាលកុស។ ពេត្រុសកាប់ខុសក្បាល តែដាច់ស្លឹកត្រចៀកស្ដាំ។
ព្រះយេស៊ូក៏ធ្វើអន្តរាគមន៍ហើយមានបន្ទូលថា៖ «ចូរឈប់ប៉ុណ្ណឹងចុះ!»។ ទ្រង់ពាល់ត្រចៀកម៉ាលកុស ហើយទ្រង់ប្រោសឲ្យជាវិញ។ រួចមក ព្រះយេស៊ូបង្រៀនមេរៀនដ៏សំខាន់មួយ ដោយបង្គាប់ពេត្រុសថា៖ «ចូរស៊កដាវអ្នកទៅក្នុងស្រោមវិញទៅ ដ្បិតអស់អ្នកដែលយកដាវ នោះត្រូវស្លាប់ដោយដាវដែរ តើអ្នកស្មានថា ខ្ញុំមិនអាចនឹងសូមដល់ព្រះវរបិតាខ្ញុំឥឡូវ ដែលទ្រង់នឹងចាត់ពួកទេវតា១២កងមកខ្ញុំជា១រំពេចទេឬ?»។
ព្រះយេស៊ូសុខព្រះទ័យឲ្យគេចាប់ទ្រង់ ដ្បិតទ្រង់ពន្យល់ថា៖ «ធ្វើដូចម្ដេចនឹងបានសំរេចតាមគម្ពីរ ដែលថាត្រូវតែកើតមានដូច្នេះ?»។ ហើយទ្រង់មានបន្ទូលទៀតថា៖ «តើមិនត្រូវឲ្យខ្ញុំទទួលពែង ដែលព្រះវរបិតាបានប្រទានមកខ្ញុំទេឬ?»។ ទ្រង់ឯកភាពទាំងស្រុងនឹងបំណងព្រះហឫទ័យរបស់ព្រះ ដែលមានចំពោះទ្រង់!
រួចមក ព្រះយេស៊ូមានបន្ទូលទៅបណ្ដាជនថា៖ «តើអ្នករាល់គ្នាបានចេញមកចាប់ខ្ញុំ ដោយកាន់ដាវ កាន់ដំបង ដូចជាមកចាប់ចោរឬ? . . . ខ្ញុំបានអង្គុយជាមួយនឹងអ្នករាល់គ្នា ហើយបង្រៀនក្នុងព្រះវិហាររាល់តែថ្ងៃ តែអ្នករាល់គ្នាមិនបានចាប់ខ្ញុំទេ ប៉ុន្តែ ការទាំងនេះបានកើតមក ដើម្បីឲ្យបានសំរេចតាមទំនាយពួកហោរាវិញ»។
ភ្លាមនោះ ក្រុមទាហាន មេទ័ពនិងនាយទាហានសាសន៍យូដា ក៏ចាប់ចងព្រះយេស៊ូ។ ពេលឃើញដូច្នេះ ពួកសាវ័កក៏រត់ចោលព្រះយេស៊ូទៅ។ ប៉ុន្តែ យុវបុរសម្នាក់ ប្រហែលជាម៉ាកុសបាននៅក្នុងចំណោមបណ្ដាជននោះនៅឡើយ។ គាត់ប្រហែលជានៅឯផ្ទះ ដែលព្រះយេស៊ូធ្វើបុណ្យរំលងនោះដែរហើយ ដែលក្រោយមកគាត់បានដើរតាមបណ្ដាជនពីកន្លែងនោះ។ តែឥឡូវនេះ បណ្ដាជនមើលគាត់ស្គាល់ហើយ ដូច្នេះគេបំរុងនឹងចាប់គាត់ដែរ។ តែគាត់រត់រួចចោលសំពត់នោះទៅ។ ម៉ាថាយ ២៦:៤៧-៥៦; ម៉ាកុស ១៤:៤៣-៥២; លូកា ២២:៤៧-៥៣; យ៉ូហាន ១៧:១២; ១៨:៣-១២
▪ ហេតុអ្វីក៏យូដាសប្រាកដក្នុងចិត្តថា គាត់នឹងរកឃើញព្រះយេស៊ូនៅក្នុងសួនច្បារគែតសេម៉ានី?
▪ តើព្រះយេស៊ូសម្ដែងព្រះទ័យខ្វល់ខ្វាយចំពោះពួកសាវ័កទ្រង់យ៉ាងដូចម្ដេច?
▪ តើពេត្រុសបានធ្វើអ្វីដើម្បីការពារព្រះយេស៊ូ? ប៉ុន្តែ តើព្រះយេស៊ូមានបន្ទូលយ៉ាងណាដល់ពេត្រុសអំពីរឿងនេះ?
▪ តើតាមរបៀបណាដែលព្រះយេស៊ូបញ្ជាក់ថា ទ្រង់ឯកភាពទាំងស្រុងនឹងបំណងព្រះហឫទ័យរបស់ព្រះចំពោះទ្រង់?
▪ នៅពេលពួកសាវ័ករត់ចោលព្រះយេស៊ូ តើអ្នកណាដែលមិនបានរត់ចោល? ហើយតើមានអ្វីកើតឡើងដល់គាត់?
