ការជ្រើសរើសពួកសាវ័ករបស់ទ្រង់
ជំពូកទី៣៤
ការជ្រើសរើសពួកសាវ័ករបស់ទ្រង់
គឺប្រហែលជាមួយឆ្នាំកន្លះហើយតាំងពីយ៉ូហានជាអ្នកដែលធ្វើបុណ្យជ្រមុជទឹក បាននាំមនុស្សឲ្យស្គាល់ព្រះយេស៊ូជាកូនចៀមរបស់ព្រះ ហើយព្រះយេស៊ូបានចាប់ផ្ដើមកិច្ចបំរើសាធារណៈរបស់ទ្រង់។ នៅពេលនោះ អនទ្រេ ស៊ីម៉ូនពេត្រុស យ៉ូហាន ហើយប្រហែលជាយ៉ាកុប(ដែលទំនងជាបងរបស់យ៉ូហាន) ព្រមទាំងភីលីព និងណាថាណែល(ក៏មានឈ្មោះថាបារថូល៉ូមេ) បានក្លាយទៅជាពួកសិស្សដំបូងរបស់ទ្រង់។ ក្រោយមក មានជាច្រើននាក់ទៀតបានចូលរួមជាមួយពួកគេក្នុងការកាន់តាមព្រះគ្រីស្ទ។
ឥឡូវនេះ ព្រះយេស៊ូប្រុងប្រៀបជ្រើសរើសពួកសាវ័កទ្រង់ហើយ។ ពួកអ្នកទាំងនេះនឹងទៅជាមិត្តដ៏ជិតស្និទ្ធរបស់ទ្រង់ ដែលនឹងទទួលការហ្វឹកហ្វឺនពិសេស។ ក៏ប៉ុន្តែមុននឹងជ្រើសរើសពួកសាវ័ក ព្រះយេស៊ូយាងឡើងទៅលើភ្នំ និងបានចំណាយពេលអធិស្ឋានពេញមួយយប់ ប្រហែលជាសុំប្រាជ្ញានិងពរពីព្រះ។ លុះភ្លឺឡើង ទ្រង់ហៅពួកសិស្សមក ហើយពីចំណោមពួកគេ នោះទ្រង់បានរើសយក១២នាក់។ ក៏ប៉ុន្តែ ដោយព្រោះពួកគេបន្តធ្វើជាពួកអ្នកកាន់តាមព្រះយេស៊ូ ពួកគេក៏បានត្រូវហៅជាសិស្សរបស់ទ្រង់ផងដែរ។
សិស្សប្រាំមួយនាក់ដែលមានឈ្មោះនៅខាងលើនេះជាសិស្សដែលព្រះយេស៊ូបានជ្រើសរើស គឺជាពួកអ្នកដែលបានក្លាយទៅជាសិស្សដំបូងរបស់ទ្រង់។ ម៉ាថាយ ដែលព្រះយេស៊ូបានហៅពីការិយាល័យពន្ធរបស់គាត់ ក៏បានត្រូវជ្រើសរើសដែរ។ សិស្សប្រាំនាក់ទៀតដែលព្រះយេស៊ូបានជ្រើសរើសគឺជាយូដាស(ក៏មានឈ្មោះជាថាដេ) យូដាស-អ៊ីស្ការីយ៉ុត ស៊ីម៉ូនជាសាសន៍កាណាន ថូម៉ាស និងយ៉ាកុបជាកូនអាល់ផាយ។ យ៉ាកុបម្នាក់នេះក៏បានត្រូវហៅថាយ៉ាកុបដ៏តូច ប្រហែលជាដោយសារតែគាត់មានមាឌតូចជាង ឬក៏ក្មេងជាងសាវ័កយ៉ាកុបម្នាក់ទៀត។
មកដល់ឥឡូវនេះ សិស្ស១២នាក់នេះបាននៅជាមួយព្រះយេស៊ូអស់មួយរយៈហើយៗទ្រង់ក៏ស្គាល់ពួកគាត់បានយ៉ាងច្បាស់។ តាមការពិត ពួកគាត់មួយចំនួនជាញាតិវង្សរបស់ទ្រង់ ដូចជាយ៉ាកុបនិងប្អូនរបស់គាត់ឈ្មោះយ៉ូហានជាបងប្អូនជីដូនមួយរបស់ព្រះយេស៊ូ។ នេះប្រហែលជាដោយសារអាល់ផាយ ជាប្អូនរបស់យ៉ូសែបត្រូវជាបិតាចិញ្ចឹមរបស់ព្រះយេស៊ូហើយមើលទៅ។ ដូច្នេះកូនរបស់អាល់ផាយ គឺសាវ័កយ៉ាកុប ជាបងប្អូនជីដូនមួយរបស់ព្រះយេស៊ូ។
ប្រាកដហើយ ព្រះយេស៊ូឥតមានបញ្ហាក្នុងការចងចាំឈ្មោះរបស់សាវ័កទ្រង់នោះទេ។ ក៏ប៉ុន្តែ តើអ្នកអាចចាំឈ្មោះរបស់ពួកសាវ័កបានទេ? បើដូច្នេះ ចូរគ្រាន់តែចងចាំថាមានបុគ្គលពីរនាក់ឈ្មោះស៊ីម៉ូន បុគ្គលពីរនាក់ឈ្មោះយ៉ាកុប ហើយបុគ្គលពីរនាក់ឈ្មោះយូដាស និងស៊ីម៉ូនមានប្អូនឈ្មោះអនទ្រេ ថែមទាំងយ៉ាកុបមានប្អូនឈ្មោះយ៉ូហាន។ នោះហើយជាចំណុចសំខាន់នៃការចងចាំឈ្មោះសាវ័កប្រាំបីនាក់។ សាវ័កបួននាក់ទៀត រួមបញ្ចូលអ្នកយកពន្ធ(ឈ្មោះម៉ាថាយ) សិស្សដែលក្រោយមកមានចិត្តសង្ស័យ(ឈ្មោះថូម៉ាស) បុគ្គលម្នាក់ដែលបានត្រូវហៅពីក្រោមដើមឈើ(ឈ្មោះណាថាណែល) ហើយមិត្តរបស់គាត់ឈ្មោះភីលីព។
ពួកសាវ័ក១១នាក់គឺមកពីស្រុកកាលីឡេ ជាស្រុកកំណើតរបស់ព្រះយេស៊ូ។ ណាថាណែលគឺមកពីភូមិកាណា។ ភីលីព ពេត្រុស និងអនទ្រេមកពីក្រុងបេតសៃដា តែក្រោយមកពេត្រុសនិងអនទ្រេបានផ្លាស់ទីលំនៅទៅក្រុងកាពើណិមវិញ ដែលតាមមើលទៅជាកន្លែងម៉ាថាយធ្លាប់រស់នៅ។ យ៉ាកុបនិងយ៉ូហានមានរបរជាអ្នកនេសាទត្រី ហើយក៏ប្រហែលជាធ្លាប់រស់នៅក្នុងក្រុងកាពើណិមឬក៏នៅជិតក្រុងនោះដែរ។ តាមមើលទៅគឺហាក់ដូចជាយូដាស-អ៊ីស្ការីយ៉ុត ដែលក្រោយមកបានក្បត់ព្រះយេស៊ូ គឺជាសាវ័កតែម្នាក់ប៉ុណ្ណោះដែលមកពីស្រុកយូដា។ ម៉ាកុស ៣:១៣-១៩; លូកា ៦:១២-១៦
▪ តើពួកសាវ័កណាខ្លះប្រហែលជាញាតិវង្សរបស់ព្រះយេស៊ូនោះ?
▪ តើនរណាខ្លះជាពួកសាវ័ករបស់ព្រះយេស៊ូ? ហើយតើតាមរបៀបណាដែលអ្នកអាចចងចាំឈ្មោះរបស់ពួកគាត់បាន?
▪ តើពួកសាវ័កមកពីតំបន់ណាខ្លះ?
