ការតបឆ្លើយចំពោះពួកអ្នកចោទប្រកាន់ទ្រង់
ជំពូកទី៣០
ការតបឆ្លើយចំពោះពួកអ្នកចោទប្រកាន់ទ្រង់
នៅពេលដែលមេដឹកនាំសាសនាយូដាចោទប្រកាន់ព្រះយេស៊ូថា ទ្រង់បានបំពានថ្ងៃឈប់សំរាក នោះព្រះយេស៊ូឆ្លើយតបថា៖«ព្រះវរបិតាខ្ញុំ ទ្រង់ធ្វើការដរាបមកដល់ឥឡូវនេះ ហើយខ្ញុំក៏ធ្វើការដែរ»។
ទោះជាពួកផារីស៊ីចោទយ៉ាងណាក៏ដោយ តែកិច្ចការរបស់ព្រះយេស៊ូគឺមិនមែនជាកិច្ចការដែលត្រូវហាមឃាត់ដោយច្បាប់នៃថ្ងៃឈប់សំរាកនោះឡើយ។ កិច្ចការផ្សព្វផ្សាយនិងការប្រោសឲ្យជា គឺជាកិច្ចការពីព្រះ។ ហើយក្នុងការធ្វើតម្រាប់តាមគំរូរបស់ព្រះ នោះព្រះយេស៊ូក៏នៅតែធ្វើកិច្ចការនេះជារៀងរាល់ថ្ងៃ។ ក៏ប៉ុន្តែ ការមានបន្ទូលតបឆ្លើយរបស់ទ្រង់ធ្វើឲ្យពួកយូដាកាន់តែខឹងខ្លាំងជាងមុនទៅទៀត ហើយពួកគេរិះរកវីធីដើម្បីធ្វើគុតទ្រង់។ តើហេតុអ្វី?
ពីព្រោះឥឡូវពួកគេជឿថា ព្រះយេស៊ូមិនគ្រាន់តែបំពានលើថ្ងៃឈប់សំរាកប៉ុណ្ណោះទេ ក៏ប៉ុន្តែពួកគេចាត់ទុកការអះអាងរបស់ទ្រង់ដែលថាទ្រង់ជារាជបុត្រាផ្ទាល់របស់ព្រះនោះ ជាការប្រមាថដល់ព្រះ។ យ៉ាងណាក៏ដោយ ព្រះយេស៊ូឥតមានព្រះទ័យខ្លាចឡើយ ទ្រង់មានបន្ទូលតបឆ្លើយទៅពួកគេថែមទៀតអំពីទំនាក់ទំនងដ៏ជិតស្និទ្ធរវាងទ្រង់និងព្រះ។ ព្រះយេស៊ូមានបន្ទូលថា៖ «ព្រះវរបិតាទ្រង់ស្រឡាញ់ព្រះរាជបុត្រា ហើយក៏បង្ហាញ ឲ្យព្រះរាជបុត្រាឃើញអស់ទាំងការដែលទ្រង់ធ្វើដែរ»។
ព្រះយេស៊ូមានបន្ទូលបន្តថា៖ «ដ្បិតដែលព្រះវរបិតាទ្រង់ប្រោសមនុស្សស្លាប់ . . . នោះព្រះរាជបុត្រានឹងប្រោសដល់អ្នកណា ដែលទ្រង់សព្វព្រះហឫទ័យក៏យ៉ាងដូច្នោះដែរ»។ ប្រាកដហើយ ព្រះរាជបុត្រានេះបានប្រោសមនុស្សស្លាប់តាមរបៀបខាងវិញ្ញាណរួចទៅហើយ! ទ្រង់មានបន្ទូលថា៖ «អ្នកណាដែលស្ដាប់ពាក្យខ្ញុំ ហើយជឿដល់ព្រះអង្គ ដែលចាត់ឲ្យខ្ញុំមក . . . គឺបានកន្លងហួសពីសេចក្ដីស្លាប់ ទៅដល់ជីវិតវិញ»។ ត្រូវហើយ ទ្រង់មានបន្ទូលទៀតថា៖ «នឹងមានពេលវេលាមក ក៏មកដល់ហើយ ដែលមនុស្សស្លាប់នឹងឮសំឡេងព្រះរាជបុត្រានៃព្រះ ហើយអស់អ្នកណាដែលឮនឹងបានរស់វិញ»។
ទោះជាមិនទាន់មានកំណត់ហេតុណាថាព្រះយេស៊ូពិតជាបានប្រោសឲ្យមនុស្សណាម្នាក់ពីស្លាប់នៅឡើយក្ដី តែទ្រង់មានបន្ទូលប្រាប់ពួកអ្នកប្រឆាំងទ្រង់ថា មនុស្សស្លាប់នឹងរស់ឡើងវិញពិតមែន។ ទ្រង់មានបន្ទូលថា៖ «កុំឲ្យឆ្ងល់ពីសេចក្ដីនេះឡើយ ដ្បិតមានពេលវេលាមក ដែលអស់ទាំងខ្មោចនៅក្នុងផ្នូរ នឹងឮសំឡេងទ្រង់ ហើយនឹងចេញមក»។
យ៉ាងជាក់ស្តែងណាស់ តាំងពីមុនមក ព្រះយេស៊ូមិនធ្លាប់រៀបរាប់ជាសាធារណៈអំពីមុខនាទីដ៏សំខាន់របស់ទ្រង់ ក្នុងគោលបំណងរបស់ព្រះតាមរបៀបដ៏ជាក់លាក់នោះទេ។ ក៏ប៉ុន្តែសូម្បីតែពួកអ្នកប្រឆាំងព្រះយេស៊ូក៏មានអ្នកដែលអាចធ្វើជាសាក្សីច្រើនទៀតអំពីរឿងនេះដែរ មិនគ្រាន់តែពួកសាក្សីរបស់ទ្រង់ប៉ុណ្ណោះនោះទេ។ ព្រះយេស៊ូរំឭកពួកគេថា៖ «អ្នករាល់គ្នាបានចាត់គេ ឲ្យទៅឯលោកយ៉ូហាន លោកក៏ធ្វើបន្ទាល់តាមសេចក្ដីពិត»។
គ្រាន់តែពីរឆ្នាំមុននេះ យ៉ូហានជាអ្នកដែលធ្វើបុណ្យជ្រមុជទឹកឲ្យគេបានប្រាប់ពួកមេដឹកនាំសាសនាទាំងនេះ អំពីបុគ្គលដែលនឹងយាងមកក្រោយលោក។ ដោយរំឭកពួកគេអំពីយ៉ូហានដែលបានជាប់គុកនិងជាបុគ្គលដែលពួកគេធ្លាប់គោរពយ៉ាងជ្រាលជ្រៅនោះ ព្រះយេស៊ូមានបន្ទូលថា៖ «អ្នករាល់គ្នាក៏ចូលចិត្ត ឲ្យបានអរសប្បាយក្នុងពន្លឺរបស់លោក ក្នុង១គ្រានោះដែរ»។ ព្រះយេស៊ូរំឭកពួកគេឲ្យនឹកចាំរឿងទាំងនេះឡើងវិញ ដោយសង្ឃឹមថាអាចជួយហើយសង្គ្រោះពួកគេ។ ក៏ប៉ុន្តែទ្រង់ឥតពឹងយ៉ូហានធ្វើបន្ទាល់ឲ្យទ្រង់នោះឡើយ។
ព្រះយេស៊ូមានបន្ទូលថា៖ «ការដែលខ្ញុំធ្វើទាំងប៉ុន្មាននេះឯង[រួមបញ្ចូលនឹងអព្ភូតហេតុដែលទ្រង់ទើបតែបានធ្វើ] នោះបានធ្វើបន្ទាល់ពីខ្ញុំហើយ ថាព្រះវរបិតាបានចាត់ឲ្យខ្ញុំមក»។ ក៏ប៉ុន្តែក្រៅពីនេះ ព្រះយេស៊ូមានបន្ទូលទៀតថា៖ «ឯព្រះវរបិតា ដែលចាត់ឲ្យខ្ញុំមក ទ្រង់ក៏ធ្វើបន្ទាល់ពីខ្ញុំដែរ»។ តួយ៉ាងដូចជា ព្រះបានធ្វើបន្ទាល់ពីព្រះយេស៊ូកាលព្រះយេស៊ូទទួលបុណ្យជ្រមុជទឹក ដោយមានបន្ទូលថា៖ «នេះជាកូនស្ងួនភ្ងារបស់អញ ជាទីពេញចិត្តអញណាស់!»។
ពិតមែនហើយ ពួកអ្នកប្រឆាំងព្រះយេស៊ូឥតមានហេតុដោះសាដើម្បីបដិសេធទ្រង់ឡើយ។ បទគម្ពីរទាំងឡាយដែលពួកគេអះអាងនោះ គឺបញ្ជាក់ភស្តុតាងអំពីទ្រង់! ព្រះយេស៊ូមានបន្ទូលបញ្ចប់ថា៖ «បើសិនជាអ្នករាល់គ្នាជឿដល់លោកម៉ូសេពិត នោះនឹងបានជឿដល់ខ្ញុំដែរ ពីព្រោះលោកបានចែងទុកពីខ្ញុំ ប៉ុន្តែ បើអ្នករាល់គ្នាមិនជឿសេចក្ដី ដែលលោកបានចែងទុកមកទេ នោះធ្វើដូចម្ដេចឲ្យជឿពាក្យខ្ញុំទៅបាន?»។ យ៉ូហាន ៥:១៧-៤៧; ១:១៩-២៧; ម៉ាថាយ ៣:១៧
▪ ហេតុអ្វីក៏កិច្ចការរបស់ព្រះយេស៊ូឥតបំពានថ្ងៃឈប់សំរាក?
▪ តើព្រះយេស៊ូរៀបរាប់យ៉ាងណា ពីមុខនាទីដ៏សំខាន់របស់ទ្រង់ក្នុងគោលបំណងរបស់ព្រះ?
▪ ដើម្បីបញ្ជាក់ថាទ្រង់ជារាជបុត្រារបស់ព្រះ តើព្រះយេស៊ូបញ្ជាក់ប្រាប់អំពីអ្នកធ្វើបន្ទាល់ណាខ្លះ?
