ការរើសតាំងសិស្សបួនរូប
ជំពូកទី២២
ការរើសតាំងសិស្សបួនរូប
បន្ទាប់ពីបណ្ដាជនប៉ុនប៉ងចង់ធ្វើគុតព្រះយេស៊ូនៅក្នុងភូមិណាសារ៉ែត ជាភូមិរបស់ទ្រង់ នោះទ្រង់ក៏យាងចេញទៅក្រុងកាពើណិមជិតសមុទ្រកាលីឡេ។ ការយាងចេញនេះក៏បានសម្រេចទំនាយមួយទៀតរបស់ព្យាការីអេសាយដែរ។ នេះគឺជាទំនាយដែលបានទាយប្រាប់ថា បណ្ដាជននៃស្រុកកាលីឡេដែលរស់នៅជិតតំបន់មាត់សមុទ្រ នឹងឃើញពន្លឺយ៉ាងចិញ្ចាចចិញ្ចែង។
នៅពេលព្រះយេស៊ូបន្តកិច្ចការបញ្ចាំងពន្លឺនៃការផ្សាយអំពីព្រះរាជាណាចក្រនៅទីនោះ ទ្រង់បានរកឃើញសិស្សរបស់ទ្រង់បួនរូប។ ពួកសិស្សទាំងនេះធ្លាប់បានធ្វើដំណើរជាមួយទ្រង់ពីពេលមុនរួចមកហើយ ក៏ប៉ុន្តែពេលពួកគេវិលមកស្រុកយូដាជាមួយព្រះយេស៊ូវិញ ពួកគេក៏ទៅប្រកបរបរនេសាទរបស់ខ្លួនវិញដែរ។ ប្រហែលជាឥឡូវនេះ ព្រះយេស៊ូកំពុងតែស្វែងរកពួកគេ ពីព្រោះនេះជាគ្រាដែលទ្រង់ត្រូវការអ្នកជំនួយនៅជាប់ជាមួយនឹងទ្រង់ជានិច្ច ដើម្បីអប់រំពួកគេឲ្យចេះបន្តធ្វើកិច្ចការនេះ ក្រោយពេលដែលទ្រង់លែងមានវត្តមានទៀត។
ដូច្នេះ កាលដែលព្រះយេស៊ូកំពុងតែយាងតាមឆ្នេរសមុទ្រ ទ្រង់ឃើញស៊ីម៉ូនពេត្រុស និងពួកគូកនរបស់គាត់កំពុងតែបង់សំណាញ់នេសាទត្រី ឃើញដូច្នោះទ្រង់ក៏យាងឆ្ពោះទៅរកពួកគេ។ ទ្រង់យាងឡើងទូករបស់ពេត្រុស ហើយសុំឲ្យគាត់ច្រានទូកចេញពីឆ្នេរទៅ។ នៅពេលដែលចេញឆ្ងាយបន្ដិច ព្រះយេស៊ូគង់នៅក្នុងទូក ហើយចាប់ផ្ដើមបង្រៀនបណ្ដាជនដែលអង្គុយនៅតាមឆ្នេរសមុទ្រ។
ក្រោយមក ព្រះយេស៊ូមានបន្ទូលទៅពេត្រុសថា៖ «ឲ្យចេញទូកទៅឯកន្លែងទឹកជ្រៅទំលាក់អួនចាប់ត្រីចុះ!»។
ពេត្រុសទូលឆ្លើយថា៖ «លោកគ្រូអើយ! យប់មិញ យើងខ្ញុំបានខំដឹកអួនទាល់ភ្លឺ គ្មានបានអ្វីសោះ តែខ្ញុំនឹងទំលាក់អួន តាមពាក្យលោកមើល»។
នៅពេលពួកគេទំលាក់អួនទៅ នោះក៏ជាប់បានត្រីយ៉ាងសន្ធឹកដល់ម្ល៉េះបានជាអួនចាប់ផ្ដើមធ្លាយ។ ពួកបុរសទាំងនេះក៏បក់ដៃហៅទូកមិត្តភក្ដិដែលនេសាទនៅជិតនោះឲ្យមកជួយជាប្រញាប់។ ភ្លាមនោះ ទូកទាំងពីរក៏ដាក់ពេញទៅដោយត្រីច្រើនដល់ម្ល៉េះ ដែលទូកទាំងពីរស្ទើរតែនឹងលិច។ ពេលឃើញដូច្នេះ នោះពេត្រុសក៏ក្រាបទៀបព្រះជង្ឃព្រះយេស៊ូ ហើយទូលថា៖ «ព្រះអម្ចាស់អើយ! សូមថយចេញពីទូលបង្គំ ដ្បិតទូលបង្គំជាមនុស្សមានបាប»។
ព្រះយេស៊ូតបឆ្លើយថា៖ «កុំខ្លាចអី! ពីនេះទៅមុខ អ្នកនឹងចាប់មនុស្សវិញ»។
ព្រះយេស៊ូក៏អញ្ជើញអនទ្រេជាប្អូនរបស់ពេត្រុសឲ្យទៅជាមួយដែរ។ ទ្រង់ដាស់តឿនគាត់ថា៖ «ចូរមកតាមខ្ញុំៗនឹងតាំងអ្នក ឲ្យជាអ្នកនេសាទមនុស្សវិញ»។ អ្នកនេសាទដែលជាគូកូនរបស់ពួកគាត់ គឺយ៉ាកុបនិងយ៉ូហានជាកូនរបស់សេបេដេ ក៏បានទទួលនូវសេចក្ដីអញ្ជើញនេះដែរ ហើយពួកគាត់បានយល់ព្រមដោយឥតស្ទាក់ស្ទើរឡើយ។ ដូច្នេះទាំងបួននាក់នេះក៏លះបង់ចោលរបរនេសាទត្រីរបស់ពួកគាត់ ហើយក៏ក្លាយទៅជាសិស្សបួននាក់ដំបូង ដែលកាន់តាមព្រះយេស៊ូនិងនៅជាប់ជាមួយទ្រង់រហូត។ លូកា ៥:១-១១; ម៉ាថាយ ៤:១៣-២២; ម៉ាកុស ១:១៦-២០; អេសាយ ៩:១, ២
▪ ហេតុអ្វីក៏ព្រះយេស៊ូអញ្ជើញពួកសិស្សទ្រង់ឲ្យមកតាមទ្រង់? ហើយតើពួកគាត់ជាអ្នកណាខ្លះ?
▪ តើអព្ភូតហេតុអ្វីដែលធ្វើឲ្យពេត្រុសខ្លាច?
▪ តើការនេសាទអ្វី ដែលព្រះយេស៊ូអញ្ជើញពួកសិស្សទ្រង់ឲ្យធ្វើ?
