ការអញ្ជើញម៉ាថាយឲ្យមកដើរតាមទ្រង់
ជំពូកទី២៧
ការអញ្ជើញម៉ាថាយឲ្យមកដើរតាមទ្រង់
មិនយូរប៉ុន្មានក្រោយពីប្រោសឲ្យមនុស្សស្លាប់ដៃស្លាប់ជើងឲ្យជាហើយនោះ ព្រះយេស៊ូក៏យាងចេញពីក្រុងកាពើណិមទៅតាមសមុទ្រកាលីឡេ។ ម្ដងនេះទៀត ហ្វូងមនុស្សក៏បន្តដើរតាមទ្រង់ដដែល ហើយទ្រង់ក៏ចាប់ផ្ដើមបង្រៀនពួកគេ។ កាលទ្រង់កំពុងតែយាងកាត់តាមនោះ ទ្រង់ទតឃើញម៉ាថាយ ដែលគាត់ក៏មានឈ្មោះមួយទៀតហៅលេវីដែរ កំពុងតែអង្គុយនៅកន្លែងយកពន្ធ។ ព្រះយេស៊ូអញ្ជើញគាត់ ដោយមានបន្ទូលថា៖ «ចូរមកតាមខ្ញុំ!»។
ប្រហែលជាម៉ាថាយបានដឹងអំពីសេចក្ដីបង្រៀនរបស់ព្រះយេស៊ូរួចទៅហើយ។ ក៏ដូចជាពេត្រុស អនទ្រេ យ៉ាកុប និងយ៉ូហានដែរ ពួកគេបានដឹងអំពីសេចក្ដីបង្រៀនរបស់ព្រះយេស៊ូជាមុន នៅពេលដែលព្រះយេស៊ូអញ្ជើញពួកគេឲ្យមកដើរតាមទ្រង់នោះ។ ហើយដូចពួកគេដែរ ម៉ាថាយក៏បានប្រព្រឹត្តតបចំពោះសេចក្ដីអញ្ជើញនេះភ្លាម។ គាត់ក៏ក្រោកឡើង ទុកចោលមុខងាររបស់គាត់ជាអ្នកយកពន្ធ ហើយទៅតាមព្រះយេស៊ូ។
ក្រោយមក ម៉ាថាយក៏ធ្វើពិធីជប់លៀងដ៏ធំមួយនៅក្នុងផ្ទះរបស់គាត់ នេះប្រហែលជាពីព្រោះគាត់មានអំណរដោយសារព្រះយេស៊ូបានអញ្ជើញគាត់ឲ្យដើរតាមទ្រង់ហើយមើលទៅ។ ក្រៅពីព្រះយេស៊ូនិងពួកសិស្សរបស់ទ្រង់ ក៏មានអតីតមិត្តភក្ដិរបស់ម៉ាថាយមានវត្តមាននៅឯពិធីជប់លៀងនោះដែរ។ សាសន៍យូដាជាធម្មតាស្អប់ពួកបុរសទាំងនេះ ពីព្រោះពួកគេយកពន្ធឲ្យពួកអាជ្ញាធររ៉ូម៉ាំង ដែលសាសន៍យូដាស្អប់អាជ្ញាធរនោះខ្លាំងណាស់។ ម្យ៉ាងវិញទៀត ដោយឥតទៀងត្រង់ ពួកគេទារលុយពន្ធពីបណ្ដាជនច្រើនហួសលើសពីច្បាប់ពន្ធកំនត់ឲ្យនោះទៅទៀត។
ពេលឃើញព្រះយេស៊ូនៅក្នុងពិធីជប់លៀងជាមួយនឹងមនុស្សបែបនេះ នោះពួកផារីស៊ីសួរពួកសិស្សរបស់ទ្រង់ថា៖ «ហេតុអ្វីបានជាលោកបរិភោគជាមួយនឹងពួកអ្នកយកពន្ធ ហើយនឹងមនុស្សមានបាបដូច្នេះ?»។ ព្រះយេស៊ូឮសំនួរនោះ ក៏មានបន្ទូលតបទៅពួកផារីស៊ីថា៖ «ពួកអ្នកដែលជាសុខសប្បាយ មិនត្រូវការនឹងគ្រូពេទ្យទេ គឺជាពួកដែលមានជំងឺវិញទេតើ! ចូរឲ្យអ្នករាល់គ្នាទៅរៀនន័យបទ ដែលថា ‹អញចង់បានសេចក្ដីមេត្ដាករុណា មិនមែនយញ្ញបូជាទេ!›។ ពីព្រោះខ្ញុំមិនបានមក ដើម្បី នឹងហៅមនុស្សសុចរិតទេ គឺមកហៅមនុស្សមានបាប ឲ្យប្រែចិត្តវិញ»។
តាមមើលទៅ ម៉ាថាយបានអញ្ជើញពួកអ្នកយកពន្ធនេះមកផ្ទះរបស់គាត់ ដើម្បីឲ្យពួកគេអាចស្ដាប់ការបង្រៀនរបស់ព្រះយេស៊ូ និងទទួលការប្រោសឲ្យជាខាងវិញ្ញាណ។ ដូច្នេះព្រះយេស៊ូចូលរួមជាមួយពួកគេ ដើម្បីជួយគេឲ្យមានទំនាក់ទំនងដ៏ជិតស្និទ្ធជាមួយព្រះ។ មិនដូចពួកផារីស៊ីដែលជាអ្នកចាត់ទុកខ្លួនគេជាមនុស្សសុចរិត ព្រះយេស៊ូមិនស្អប់មនុស្សបែបនេះទេ។ ផ្ទុយទៅវិញ ដោយមានចិត្តមេត្ដា នោះទ្រង់បំរើពួកគេជាគ្រូពេទ្យខាងវិញ្ញាណ។
ដូច្នេះព្រះយេស៊ូផ្ដល់ឲ្យនូវក្ដីមេត្ដាករុណាដល់ពួកអ្នកដែលមានបាប គឺមិនមែនលុបលាងបាបរបស់ពួកគេឡើយ ក៏ប៉ុន្តែនេះជាការសម្ដែងនូវសេចក្ដីស្រឡាញ់ ដូចទ្រង់បានសម្ដែងដល់ពួកអ្នកឈឺខាងរូបកាយនោះដែរ។ ជាឧទាហរណ៍ សូមនឹកចាំនៅពេលដែលទ្រង់បង្ហាញនូវចិត្តសណ្ដោសមេត្ដា ពេលទ្រង់លូកព្រះហស្តទៅពាល់មនុស្សឃ្លង់ម្នាក់ ដោយមានបន្ទូលថា៖ «ខ្ញុំចង់ដែរ ចូរឲ្យជាស្អាតចុះ!»។ ដូច្នេះ សូមឲ្យយើងបង្ហាញចិត្តសណ្ដោសមេត្ដាផងដែរ ដោយជួយមនុស្សដែលក្រខ្សត់ ជាពិសេសជួយគេខាងវិញ្ញាណ។ ម៉ាថាយ ៨:៣; ៩:៩-១៣; ម៉ាកុស ២:១៣-១៧; លូកា ៥:២៧-៣២
▪ តើលោកម៉ាថាយនៅឯណា ពេលដែលព្រះយេស៊ូទតឃើញលោកនោះ?
▪ តើម៉ាថាយមានមុខងារអ្វី? ហើយហេតុអ្វីក៏មនុស្សបែបនេះត្រូវសាសន៍យូដាស្អប់ខ្លាំងម្ល៉េះ?
▪ តើពួកផារីស៊ីរកចាប់កំហុសព្រះយេស៊ូយ៉ាងណា? ហើយតើទ្រង់តបឆ្លើយយ៉ាងដូចម្ដេច?
▪ ហេតុអ្វីក៏ព្រះយេស៊ូចូលរួមក្នុងពិធីជាមួយពួកអ្នកមានបាប?
