កំណើតនៃអ្នករៀបចំផ្លូវ
ជំពូកទី៣
កំណើតនៃអ្នករៀបចំផ្លូវ
អេលីសាបិតជិតសម្រាលកូនរបស់គាត់ហើយ។ ក្នុងរយៈបីខែកន្លងទៅនេះ ម៉ារាបាននៅជាមួយនឹងគាត់។ ប៉ុន្តែ ឥឡូវនេះក៏ដល់ពេលដែលម៉ារាត្រូវជំរាបលា ហើយធ្វើដំណើរដ៏ឆ្ងាយត្រឡប់ទៅផ្ទះរបស់នាងវិញនៅភូមិណាសារ៉ែត។ ប្រមាណប្រាំមួយខែទៀតនោះ ម៉ារាក៏នឹងសម្រាលកូនដែរ។
មិនយូរប៉ុន្មានក្រោយពីម៉ារាចាកចេញទៅនោះ អេលីសាបិតក៏សម្រាលបានកូនមួយ។ មនុស្សគ្រប់គ្នាមានអំណរណាស់ ពេលដែលការសម្រាលនេះគ្មានគ្រោះថ្នាក់ ថែមទាំងអេលីសាបិតនិងកូនមានសុខភាពល្អទៀតផង។ នៅពេលដែលអេលីសាបិតបង្ហាញកូនង៉ានេះទៅអ្នកជិតខាងនិងញាតិសន្ដាន នោះពួកគេមានសេចក្ដីរីករាយអរសប្បាយជាមួយនឹងគាត់។
ស្របតាមក្រិត្យវិន័យរបស់ព្រះក្នុងប្រទេសអ៊ីស្រាអែល គឺត្រូវកាត់ស្បែកឲ្យទារកប្រុសដែលទើបតែកើតបានអាយុប្រាំបីថ្ងៃ។ សំរាប់គ្រានេះ ជាធម្មតាគឺមានមិត្តនិងញាតិសន្ដានទាំងប៉ុន្មានមកលេង។ ពួកគេនិយាយថា ទារកប្រុសនេះត្រូវដាក់ឈ្មោះថាសាការី ដូចឈ្មោះឪពុកដែរ។ ប៉ុន្តែ អេលីសាបិតបាននិយាយថា៖ «ទេ! ត្រូវឲ្យឈ្មោះយ៉ូហានវិញ»។ នឹកចាំទេ នេះគឺជាឈ្មោះដែលទេវតាកាព្រីយ៉ែលបានពោលថានឹងត្រូវដាក់ឲ្យកូននេះ។
ប៉ុន្តែ មិត្តភក្ដិរបស់ពួកគាត់បានប្រកែកថា៖ «ក្នុងពួកញាតិសន្ដានអ្នក គ្មានអ្នកណាដែលមានឈ្មោះនោះទេ!»។ រួចមក ពួកគេប្រើភាសាមនុស្សគ សួរដល់ឪពុកថាលោកចង់ដាក់ឈ្មោះអ្វីឲ្យទារកប្រុសនេះ។ លោកសាការីសូមក្ដារឆ្នួនមកសរសេរថា៖ «វាឈ្មោះយ៉ូហាន»។ ការនេះនាំឲ្យពួកគេគ្រប់គ្នាមានសេចក្ដីអស្ចារ្យជាខ្លាំង។
រួចមកដោយអព្ភូតហេតុ លោកសាការីនិយាយបានដូចដើមវិញ។ អ្នកច្បាស់ជានៅចាំថា លោកបានទៅជាគនិយាយមិនរួច ពេលលោកមិនជឿចំពោះសេចក្ដីប្រកាសរបស់ទេវតា ដែលថាអេលីសាបិតនឹងមានកូនមួយនោះ។ នៅពេលដែលសាការីពោលពាក្យឡើង មនុស្សគ្រប់គ្នាដែលរស់នៅម្ដុំនោះមានចិត្តភ្ញាក់ផ្អើលជាខ្លាំង ហើយពួកគេនឹកក្នុងចិត្តថា៖ «ដូច្នេះ តើកូននេះនឹងបានជាអ្វី?»។
ឥឡូវ លោកសាការីគឺបានពេញដោយវិញ្ញាណបរិសុទ្ធ ហើយលោកច្រៀងសរសើរឡើងថា៖ «សូមឲ្យព្រះអម្ចាស់ ជាព្រះនៃសាសន៍អ៊ីស្រាអែល បានប្រកបដោយព្រះគុណ ពីព្រោះទ្រង់បានទតមើល ហើយប្រោសលោះរាស្ត្រទ្រង់ ព្រមទាំងបង្កើតព្រះដ៏មានឥទ្ធិឫទ្ធិ នៅក្នុងពូជហ្លួងដាវីឌ ជាអ្នកបំរើទ្រង់ សំរាប់នឹងជួយសង្គ្រោះយើងផង»។ ប្រាកដហើយ ‹អ្នកបំរើសំរាប់នឹងជួយសង្គ្រោះ› គឺព្រះអម្ចាស់ជាព្រះយេស៊ូ ដែលមិនទាន់ប្រសូតមកនៅឡើយ។ តាមរយៈទ្រង់ នោះលោកសាការីមានប្រសាសន៍ថា ព្រះនឹង «បើកឲ្យយើងបានសង្គ្រោះ រួចពីកណ្ដាប់ដៃពួកខ្មាំងសត្រូវ ដើម្បីឲ្យបានបំរើទ្រង់ ឥតភ័យខ្លាច ដោយសេចក្ដីបរិសុទ្ធ នឹងសេចក្ដីសុចរិត នៅចំពោះទ្រង់ អស់១ជីវិតយើង»។
រួចមក លោកសាការីក៏ទាយប្រាប់អំពីយ៉ូហាន ដែលជាកូនរបស់លោកថា៖ «ឯឯងទារកអើយ! គេនឹងហៅឯងជាហោរានៃព្រះដ៏ខ្ពស់បំផុត ដ្បិតឯងនឹងដើរចំពោះព្រះអម្ចាស់ ដើម្បី នឹងរៀបចំផ្លូវថ្វាយទ្រង់ ប្រយោជន៍ឲ្យរាស្ត្រទ្រង់បានស្គាល់សេចក្ដីសង្គ្រោះ ជាការប្រោសឲ្យគេរួចពីបាប ដោយព្រោះព្រះហឫទ័យមេត្ដាករុណារបស់ព្រះនៃយើង ដែលបណ្ដាលឲ្យបច្ចូសកាល ភ្លឺមកដល់យើងពីស្ថានដ៏ខ្ពស់ ដើម្បី នឹងបំភ្លឺដល់ពួកអ្នកដែលអង្គុយក្នុងសេចក្ដីងងឹត ហើយក្នុងម្លប់នៃសេចក្ដីស្លាប់ ប្រយោជន៍ឲ្យបានដំរង់ជើងយើង តាមផ្លូវសុខសាន្តវិញ»។
មកដល់ពេលនេះ ម៉ារាបានត្រឡប់មកដល់ភូមិណាសារ៉ែតវិញហើយៗតាមមើលទៅ នាងមិនទាន់រៀបការនៅឡើយទេ។ តើអ្វីនឹងកើតឡើងដល់នាង ពេលឃើញយ៉ាងជាក់ច្បាស់ថានាងមានផ្ទៃពោះនោះ? លូកា ១:៥៦-៨០; លេវីវិន័យ ១២:២, ៣
▪ តើយ៉ូហានមានអាយុបងព្រះយេស៊ូប៉ុន្មានឆ្នាំ?
▪ តើអ្វីបានកើតឡើង ពេលយ៉ូហានមានអាយុប្រាំបីថ្ងៃនោះ?
▪ តើព្រះបានយកព្រះទ័យទុកដាក់ទៅលើរាស្ត្ររបស់ទ្រង់យ៉ាងដូចម្ដេច?
▪ តើកិច្ចការអ្វីដែលយ៉ូហានត្រូវធ្វើ ដែលបានទាយមកនោះ?
