គាត់ពាល់ព្រះពស្ត្ររបស់ព្រះយេស៊ូ
ជំពូកទី៤៦
គាត់ពាល់ព្រះពស្ត្ររបស់ព្រះយេស៊ូ
ដំណឹងថាព្រះយេស៊ូត្រឡប់មកវិញពីស្រុកដេកាប៉ូល បានឮទៅដល់អ្នកក្រុងកាពើណិម ហើយបណ្ដាជននាំគ្នាមកទទួលស្វាគមន៍ទ្រង់នៅឯមាត់សមុទ្រ។ ប្រាកដហើយ ពួកគេបានឮថាទ្រង់បានធ្វើឲ្យព្យុះសង្ឃរាស្ងប់ ហើយឮថាទ្រង់បានប្រោសពួកបុរសដែលមានអារក្សចូលឲ្យបានជាឡើងវិញ។ ឥឡូវនេះ កាលដែលទ្រង់យាងចុះពីទូក នោះបណ្ដាជនមកចោមរោមជុំវិញទ្រង់ ទាំងមានសេចក្ដីសង្ឃឹមដ៏រំភើបចិត្តទៀតផង។
លោកយ៉ៃរ៉ុសដែលជាអ្នកមើលខុសត្រូវលើសាលាប្រជុំ ចង់ជួបព្រះយេស៊ូណាស់។ លោកទំលាក់ខ្លួនក្រាបនៅទៀបព្រះបាទព្រះយេស៊ូ ទូលអង្វរទ្រង់ថា៖ «កូនស្រីទូលបង្គំជិតស្លាប់ហើយ សូមទ្រង់យាងទៅដាក់ព្រះហស្តលើវាឲ្យបានជា នោះវានឹងបានរស់វិញ»។ ដោយព្រោះលោកមានកូនស្រីតែមួយ អាយុទើបតែ១២ឆ្នាំ នោះកូនស្រីនេះពិតជាជាទីស្រឡាញ់ណាស់ចំពោះលោកយ៉ៃរ៉ុស។
ព្រះយេស៊ូយល់ព្រមយាងទៅផ្ទះរបស់លោកយ៉ៃរ៉ុស ហើយបណ្ដាជនក៏ទៅជាមួយដែរ។ យើងអាចនឹកក្នុងចិត្តថា បណ្ដាជនមានការរំភើបចិត្តយ៉ាងខ្លាំង កាលដែលគេទន្ទឹងចាំមើលនូវអព្ភូតហេតុមួយទៀត។ ប៉ុន្តែ មានស្ត្រីម្នាក់ក្នុងចំណោមបណ្ដាជនកំពុងផ្ចង់អារម្មណ៍ទៅលើបញ្ហាសុខភាពមិនល្អរបស់គាត់។
ស្ត្រីនេះមានជំងឺធ្លាក់ឈាមអស់១២ឆ្នាំមកហើយ។ គាត់បានទៅជួបគ្រូពេទ្យជាច្រើនហើយ និងចំណាយលុយកាក់ជាច្រើនសំរាប់ការព្យាបាល។ ក៏ប៉ុន្តែ គាត់មិនទាន់ជានោះទេ ផ្ទុយទៅវិញ បញ្ហារបស់គាត់កាន់តែធ្ងន់ធ្ងរឡើងៗ។
ដូចជាអ្នកដឹងស្រាប់ហើយ ជំងឺនេះមិនគ្រាន់តែធ្វើឲ្យគាត់ចុះខ្សោយប៉ុណ្ណោះទេ ប៉ុន្តែក៏ធ្វើឲ្យគាត់ខ្មាសគេទៀតផង។ ធម្មតា មនុស្សមិននិយាយអំពីជំងឺបែបនេះជាសាធារណៈឡើយ។ ម្យ៉ាងវិញទៀត នៅក្រោមក្រិត្យវិន័យលោកម៉ូសេ ការមករដូវខុសពីធម្មតាដូច្នេះធ្វើឲ្យស្ត្រីនោះស្ថិតក្នុងភាពមិនស្អាត ហើយអ្នកណាដែលប៉ះគាត់ឬប៉ះសំលៀកបំពាក់ដែលប្រឡាក់ឈាមនោះ គឺតម្រូវឲ្យបោកសំលៀកបំពាក់ខ្លួនហើយងូតទឹកចេញ រួចនៅជាមិនស្អាតរហូតដល់ល្ងាច។
ស្ត្រីនេះបានឮអំពីអព្ភូតហេតុរបស់ព្រះយេស៊ូ ហើយឥឡូវគាត់មករកទ្រង់។ ទោះជាមានភាពមិនស្អាតក៏ដោយ គាត់បានបន្លំចូលទៅក្នុងហ្វូងមនុស្សដោយលួចលាក់ ហើយគិតថា៖ «បើគ្រាន់តែពាល់ព្រះពស្ត្រទ្រង់ប៉ុណ្ណោះ នោះនឹងបានជាហើយ»។ នៅពេលដែលគាត់ពាល់ព្រះពស្តរបស់ទ្រង់ ខណៈនោះគាត់ដឹងភ្លាមថាក្នុងខ្លួនគាត់ឈាមឈប់ធ្លាក់ហើយ!
«តើអ្នកណាពាល់ខ្ញុំ?»។ ពាក្យបន្ទូលរបស់ព្រះយេស៊ូច្បាស់ជាធ្វើឲ្យគាត់ភ័យយ៉ាងណាទៅហ្ន៎! តើទ្រង់អាចជ្រាបដឹងយ៉ាងដូចម្ដេចទៅ? ពេត្រុសប្រកែកថា៖ ‹លោកគ្រូ! បណ្ដាមនុស្សកំពុងប្រជ្រៀតគ្នាត្បៀតទ្រង់យ៉ាងនេះ ម្ដេចក៏ទ្រង់មានបន្ទូលថា«អ្នកណាពាល់ទ្រង់ធ្វើអី?»›។
ដោយចង់រកស្ត្រីនោះ ព្រះយេស៊ូពន្យល់ថា៖ «ច្បាស់ជាមានអ្នកណាពាល់ខ្ញុំពិត ដ្បិតខ្ញុំដឹងថា មានឫទ្ធិផ្សាយចេញពីខ្ញុំទៅហើយ»។ ប្រាកដហើយ នេះមិនមែនជាការពាល់ធម្មតាទេ ដ្បិតការជានេះបានបន្ថយកម្លាំងរបស់ព្រះយេស៊ូ។
ដោយដឹងថាគាត់លាក់ខ្លួនមិនបាន នោះស្ត្រីនេះក៏មកក្រាបទៀបព្រះបាទព្រះយេស៊ូ ទាំងភ័យញ័ររន្ធត់។ ស្ត្រីនេះទូលទ្រង់នៅមុខមនុស្សទាំងអស់ ពីហេតុការណ៍ពិតអំពីជំងឺគាត់ និងអំពីរបៀបដែលគាត់បានជាវិញ។
ដោយមានព្រះទ័យអាណិតចំពោះការសារភាពរបស់គាត់ នោះព្រះយេស៊ូសម្រាលទុក្ខគាត់ដោយមេត្ដាប្រណីថា៖ «កូនស្រីអើយ! សេចក្ដីជំនឿនាង បានជួយសង្គ្រោះនាងហើយ ចូរទៅឲ្យបានប្រកបដោយសេចក្ដីសុខចុះ! ហើយឲ្យនាងបានរួចពីសេចក្ដីវេទនារបស់នាងទៅ»។ ជាការគួរឲ្យសប្បាយរីករាយមែន! ដោយដឹងថា បុគ្គលដែលព្រះបានរើសតាំងឲ្យគ្រប់គ្រងទៅលើផែនដី ជាបុគ្គលដែលមានសេចក្ដីមេត្ដាយ៉ាងកក់ក្ដៅហើយយកព្រះទ័យទុកដាក់នឹងប្រជាជន ព្រមទាំងមានព្រះចេស្ដាដើម្បីជួយមនុស្សដែរ។ ម៉ាថាយ ៩:១៨-២២; ម៉ាកុស ៥:២១-៣៤; លូកា ៨:៤០-៤៨; លេវីវិន័យ ១៥:២៥-២៧
▪ តើលោកយ៉ៃរ៉ុសជាអ្នកណា? ហេតុអ្វីបានជាគាត់មករកព្រះយេស៊ូ?
▪ តើស្ត្រីម្នាក់មានបញ្ហាអ្វី? ហើយហេតុអ្វីបានជាការមករកជំនួយពីព្រះយេស៊ូ ជាអ្វីដ៏ពិបាកម្ល៉េះចំពោះគាត់?
▪ តើស្ត្រីនេះបានជាឡើងវិញយ៉ាងដូចម្ដេច? ហើយតើព្រះយេស៊ូសម្រាលទុក្ខគាត់យ៉ាងដូចម្ដេច?
