ជំនឿដ៏ខ្លាំង របស់មេទ័ពម្នាក់
ជំពូកទី៣៦
ជំនឿដ៏ខ្លាំង របស់មេទ័ពម្នាក់
នៅពេលដែលព្រះយេស៊ូប្រទានសេចក្ដីបង្រៀនរបស់ទ្រង់នៅលើភ្នំ នោះគឺមកដល់ពាក់កណ្ដាលនៃកិច្ចបំរើសាធារណៈរបស់ទ្រង់ទៅហើយ។ នេះបានសេចក្ដីថា ទ្រង់មានតែមួយឆ្នាំនិងប្រាំបួនខែទៀតទេ ដើម្បីនឹងបញ្ចប់កិច្ចការរបស់ទ្រង់នៅលើផែនដីនេះ។
ឥឡូវនេះ ព្រះយេស៊ូយាងចូលទៅក្នុងទីក្រុងកាពើណិម គឺជាកន្លែងសំរាប់រៀបចំសកម្មភាពរបស់ទ្រង់។ នៅទីនេះ ពួកអ្នកចាស់ទុំជនជាតិយូដាខ្លះមករកទ្រង់ដើម្បីសុំឲ្យជួយរឿងមួយ។ មេទ័ពរ៉ូម៉ាំងជាសាសន៍ដទៃ បានបញ្ជូនពួកគេឲ្យមក ហើយមេទ័ពនោះជាបុរសម្នាក់ដែលមានពូជអំបូរមិនមែនជាសាសន៍យូដា។
អ្នកបំរើសំណប់ចិត្តរបស់មេទ័ពនេះមានជំងឺជាទម្ងន់ជិតដល់ក្ដីមរណា ហើយគាត់ចង់ឲ្យព្រះយេស៊ូប្រោសអ្នកបំរើរបស់គាត់ឲ្យជាវិញ។ ពួកអ្នកចាស់ទុំជនជាតិយូដាបានទៅគាល់ព្រះយេស៊ូឲ្យមេទ័ពនោះ ហើយទទូចអង្វរថា៖ «មេទ័ពនោះមានបំណាច់ណាស់ គួរឲ្យប្រោសមេត្ដាដែរ ដ្បិតគាត់ស្រឡាញ់ដល់សាសន៍យើង ហើយបានសង់សាលាប្រជុំ១សំរាប់យើងរាល់គ្នា»។
ព្រះយេស៊ូក៏យាងចេញទៅជាមួយពួកបុរសទាំងនេះ ដោយឥតមានព្រះទ័យស្ទាក់ស្ទើរឡើយ។ ក៏ប៉ុន្តែ កាលហៀបនឹងដល់ផ្ទះគាត់ទៅហើយ ភ្លាមនោះមេទ័ពនេះក៏ចាត់ពួកសំឡាញ់ឲ្យមកទូលទ្រង់ថា៖ «ព្រះអម្ចាស់អើយ! សូមកុំព្រួយព្រះទ័យឡើយ មិនគួរនឹងឲ្យទូលបង្គំទទួលទ្រង់នៅក្នុងផ្ទះទូលបង្គំទេ គឺដោយហេតុនោះបានជា ទូលបង្គំមិនបានរាប់ខ្លួនថា គួរនឹងមកឯទ្រង់ដែរ»។
ចំពោះមេទ័ពដែលធ្លាប់តែបញ្ជាគេ នេះគឺជាការសម្ដែងដែលបង្ហាញថាគាត់មានចិត្តរាបទាបមែន! ប៉ុន្តែគាត់ក៏ប្រហែលជាគិតអំពីព្រះយេស៊ូដោយដឹងថា តាមទំនៀមទម្លាប់ សាសន៍យូដាម្នាក់មិនអាចរាប់អានជាមួយពួកអ្នកដែលមិនមែនជាសាសន៍យូដាបានទេ។ សូម្បីតែពេត្រុសក៏ធ្លាប់មានប្រសាសន៍ថា៖ «អ្នករាល់គ្នាដឹងថា មនុស្សសាសន៍យូដាគ្មានច្បាប់នឹងសេពគប់នឹងសាសន៍ដទៃ ឬនឹងចូលទៅជិតគេឡើយ»។
ប្រហែលជានាយទាហាននេះមិនចង់ឲ្យព្រះយេស៊ូ ទទួលទោសនៃការបំពានលើទំនៀមទំលាប់នេះឡើយ បានជាគាត់ចាត់មិត្តរបស់គាត់ឲ្យមកអង្វរទ្រង់ថា៖ «សូមទ្រង់គ្រាន់តែមានបន្ទូល១ព្រះឱស្ឋប៉ុណ្ណោះចុះ នោះបាវទូលបង្គំបានជាហើយ ដ្បិតទូលបង្គំនៅក្រោមអំណាចគេដែរ ក៏មានទាហាននៅក្រោមឱវាទទូលបង្គំ ទូលបង្គំប្រាប់ទៅម្នាក់ថា ទៅ! វាក៏ទៅ ប្រាប់ទៅម្នាក់ទៀតថា មក! វាក៏មក ហើយប្រាប់ទៅបាវថា ធ្វើការនេះចុះ! នោះវាក៏ធ្វើតាម»។
នៅពេលដែលព្រះយេស៊ូឮអំពីរឿងនេះ នោះទ្រង់មានព្រះទ័យស្ងើចខ្លាំងណាស់។ ទ្រង់មានបន្ទូលថា៖ «ខ្ញុំប្រាប់អ្នករាល់គ្នាជាប្រាកដថា ខ្ញុំមិនដែលឃើញសេចក្ដីជំនឿជាខ្លាំងដល់ម្ល៉េះទេ ទោះទាំងនៅក្នុងសាសន៍អ៊ីស្រាអែលផង»។ ក្រោយពីប្រោសអ្នកបំរើរបស់នាយទាហាននោះឲ្យជាមក ព្រះយេស៊ូប្រើឱកាសនេះ ដើម្បីប្រាប់ដល់អ្នកដែលមិនមែនជាជនជាតិយូដាថា គេនឹងបានការអនុគ្រោះដោយសារពរពីព្រះ ដែលពួកគេបានត្រូវបដិសេធចោលដោយពួកយូដាគ្មានជំនឿនោះ។
ព្រះយេស៊ូមានបន្ទូលថា៖ «នឹងមានមនុស្សជាច្រើន ពីទិសខាងកើត នឹងទិសខាងលិច មកអង្គុយជាមួយនឹងលោកអ័ប្រាហាំ លោកអ៊ីសាក នឹងលោកយ៉ាកុប នៅក្នុងនគរស្ថានសួគ៌ តែអស់ទាំងមនុស្សរបស់នគរនោះ នឹងត្រូវបោះចោល ទៅក្នុងសេចក្ដីងងឹតខាងក្រៅវិញ នៅទីនោះនឹងមានយំ ហើយសង្កៀតធ្មេញ»។
«មនុស្សរបស់នគរនោះ នឹងត្រូវបោះចោល ទៅក្នុងសេចក្ដីងងឹតខាងក្រៅវិញ» នេះសំដៅទៅពួកយូដាមែនទែន ដែលមិនទទួលយកឱកាសដែលបានប្រគល់ឲ្យមុនគេក្នុងការធ្វើជាអ្នកគ្រប់គ្រងជាមួយនឹងព្រះគ្រីស្ទនោះ។ លោកអ័ប្រាហាំ អ៊ីសាក និងយ៉ាកុបតំណាងការរៀបចំខាងព្រះរាជាណាចក្ររបស់ព្រះ។ ដូច្នេះហើយ ព្រះយេស៊ូកំពុងតែប្រាប់នូវរបៀបដែលពួកសាសន៍ដទៃនឹងត្រូវបានការទទួលស្វាគមន៍ឲ្យមកអង្គុយនៅឯតុខាងស្ថានសួគ៌ គឺ«នៅក្នុងនគរស្ថានសួគ៌» បើនិយាយជាអត្ថបដិរូប។ លូកា ៧:១-១០; ម៉ាថាយ ៨:៥-១៣; កិច្ចការ ១០:២៨
▪ ហេតុអ្វីបានជាពួកជនជាតិយូដាអង្វរឲ្យមេទ័ពម្នាក់ជាសាសន៍ដទៃនោះ?
▪ តើអ្វីជាមូលហេតុដែលនាយទាហាននេះ មិនបានអញ្ជើញព្រះយេស៊ូឲ្យចូលក្នុងផ្ទះរបស់គាត់នោះ?
▪ តើព្រះយេស៊ូចង់មានន័យយ៉ាងណា ដោយពាក្យបញ្ចប់របស់ទ្រង់នោះ?