ដំណើរទៅទីក្រុងយេរូសាឡិម
ជំពូកទី១០
ដំណើរទៅទីក្រុងយេរូសាឡិម
និទាឃរដូវបានមកដល់ហើយ។ នេះគឺជាពេលដែលក្រុមគ្រួសាររបស់លោកយ៉ូសែប ព្រមទាំងញាតិមិត្តទាំងឡាយធ្វើដំណើរទៅទីក្រុងយេរូសាឡិមមួយឆ្នាំម្ដងដើម្បីធ្វើបុណ្យរំលង។ ពួកគេតែងតែមានចិត្តរំភើបដូចរាល់ដង ពេលពួកគេធ្វើដំណើរក្នុងចម្ងាយផ្លូវ១០០គីឡូម៉ែត្រ។ ព្រះឱរសយេស៊ូ ឥឡូវគឺមានព្រះជន្មាយុ១២ឆ្នាំហើយ ហើយទ្រង់ទន្ទឹងចាំដោយយកព្រះទ័យទុកដាក់ជាពិសេសចំពោះបុណ្យនេះ។
ចំពោះព្រះកុមារយេស៊ូនិងក្រុមគ្រួសារ នោះបុណ្យរំលងមិនមែនសំរាប់តែមួយថ្ងៃនោះទេ។ ពួកគេនឹងស្នាក់នៅប្រាំពីរថ្ងៃទៀតសំរាប់បុណ្យនំប៉័ងឥតដំបែ ដែលពួកគេចាត់ទុកជាផ្នែកនៃរដូវបុណ្យរំលងដែរ។ ជាលទ្ធផល ក្នុងការធ្វើដំណើរសរុបទាំងអស់ គឺចាប់តាំងពីផ្ទះរបស់ពួកគេនៅភូមិណាសារ៉ែត រួមទាំងការស្នាក់នៅក្នុងទីក្រុងយេរូសាឡិម នោះមានរយៈពេលពីរសប្ដាហ៍។ ប៉ុន្តែនៅឆ្នាំនេះ ដោយព្រោះមានអ្វីមួយដែលទាក់ទងនឹងព្រះកុមារយេស៊ូ នោះធ្វើឲ្យពន្យាពេលយូរជាង។
បញ្ហានេះគឺបានឃើញច្បាស់ ពេលពួកគេធ្វើដំណើរពីទីក្រុងយេរូសាឡិមត្រឡប់ទៅវិញ។ លោកយ៉ូសែបនិងនាងម៉ារាស្មានថា ព្រះកុមារយេស៊ូនៅជាមួយក្រុមញាតិមិត្តទាំងឡាយដែលរួមដំណើរជាមួយគ្នានោះដែរ។ ក៏ប៉ុន្តែ ទ្រង់មិនបាននៅជាមួយទេ ពេលដែលពួកគេឈប់សំរាកនៅយប់នោះ។ ដូច្នេះហើយពួកគេក៏នាំគ្នារកទ្រង់ក្នុងចំណោមអ្នករួមដំណើរជាមួយគ្នានោះ។ ពួកគេរកទ្រង់មិនឃើញសោះ។ ដូច្នេះ លោកយ៉ូសែបនិងម៉ារាក៏ត្រឡប់ទៅរកទ្រង់នៅក្នុងទីក្រុងយេរូសាឡិមវិញ។
លោកយ៉ូសែបនិងម៉ារាបានចំណាយពេលមួយថ្ងៃរកទ្រង់ តែរកមិនឃើញសោះ។ នៅថ្ងៃទីពីរ ក៏ពួកគាត់រកទ្រង់មិនឃើញដែរ។ តែនៅទីបំផុត ថ្ងៃទីបីពួកគាត់ក៏ទៅឯព្រះវិហារវិញ។ នៅទីនោះក្នុងបន្ទប់មួយ នោះពួកគាត់ឃើញព្រះកុមារយេស៊ូគង់នៅកណ្ដាលចំណោមពួកអាចារ្យជនជាតិយូដា កំពុងតែស្ដាប់ហើយនិងសួរសំនួរផ្សេងៗដល់ពួកគេផង។
ម៉ារាសួរថា៖ «កូនអើយ! ហេតុអ្វីបានជាអ្នកប្រព្រឹត្តនឹងយើងដូច្នេះ? មើល! ឪពុកអ្នក នឹងម្ដាយ បានខំដើររកអ្នកទាំងថប់ព្រួយ?»។
ព្រះកុមារយេស៊ូមានព្រះហឫទ័យភ្ញាក់ផ្អើល ដែលមាតាបិតាទ្រង់មិនដឹងទ្រង់នៅកន្លែងណា។ ទ្រង់សួរថា៖ «អ្នកម្ដាយរកខ្ញុំធ្វើអី តើមិនជ្រាបថា គួរឲ្យខ្ញុំនៅក្នុងព្រះវិហាររបស់ព្រះវរបិតានៃខ្ញុំទេឬ?»។
ព្រះកុមារយេស៊ូមិនអាចយល់នូវមូលហេតុដែលមាតាបិតាទ្រង់ឥតដឹងអំពីរឿងនេះទេ។ បន្ទាប់មក ព្រះកុមារយេស៊ូក៏យាងត្រឡប់ទៅផ្ទះវិញជាមួយមាតាបិតាទ្រង់ ហើយបន្តធ្វើតាមឱវាទរបស់ពួកគាត់ទាំងពីរ។ ព្រះកុមារយេស៊ូក៏កាន់តែធំ ប្រកបដោយប្រាជ្ញារឹតតែច្រើនឡើង ហើយជាទីគាប់ព្រះហឫទ័យចំពោះព្រះនិងចិត្តមនុស្សផង។ ត្រូវហើយ តាំងពីកុមារមក នោះព្រះយេស៊ូបានទុកគំរូដ៏ល្អប្រសើរមួយ មិនគ្រាន់តែចំពោះការរកប្រយោជន៍ខាងវិញ្ញាណប៉ុណ្ណោះទេ តែក្នុងការបង្ហាញការគោរពចំពោះមាតាបិតាទ្រង់ដែរ។ លូកា ២:៤០-៥២; ២២:៧
▪ តើការធ្វើដំណើរមួយណាក្នុងនិទាឃរដូវ ដែលព្រះកុមារយេស៊ូធ្វើដំណើរទៅជាមួយនឹងក្រុមគ្រួសាររាល់ដងនោះ? ហើយតើការធ្វើដំណើរនេះមានចម្ងាយប៉ុន្មាន?
▪ តើមានអ្វីកើតឡើងក្នុងកំឡុងពេលធ្វើដំណើរ ពេលព្រះកុមារយេស៊ូមានព្រះជន្មាយុ១២ឆ្នាំនោះ?
▪ តើគំរូអ្វីដែលព្រះកុមារយេស៊ូទុកសំរាប់យុវជនសព្វថ្ងៃនេះ?