តើព្រះយេស៊ូគឺពិតជាអ្នកណា?
ជំពូកទី៥៩
តើព្រះយេស៊ូគឺពិតជាអ្នកណា?
ពេលព្រះយេស៊ូនិងពួកសិស្សជិះទូកមកដល់ក្រុងបេតសៃដា នោះមានគេនាំមនុស្សខ្វាក់ម្នាក់មកគាល់ទ្រង់ ហើយទូលអង្វរឲ្យទ្រង់ពាល់គាត់ និងប្រោសគាត់ឲ្យជា។ ព្រះយេស៊ូក៏ដឹកដៃមនុស្សខ្វាក់នោះនាំចេញទៅក្រៅភូមិ រួចស្ដោះដាក់ភ្នែកគាត់ ព្រមទាំងសួរថា៖ ‹តើអ្នកឃើញអ្វីឬទេ?›។
បុរសនេះទូលឆ្លើយថា៖ «ខ្ញុំឃើញមនុស្សដើរ មើលទៅដូចជាដើមឈើ»។ ព្រះយេស៊ូក៏ដាក់ព្រះហស្តលើភ្នែកបុរសនេះ រួចទ្រង់ក៏ប្រោសឲ្យភ្នែកគាត់បានជា ហើយមើលឃើញបានយ៉ាងច្បាស់។ រួចមក ព្រះយេស៊ូឲ្យបុរសនេះវិលត្រឡប់ទៅផ្ទះគាត់វិញ ដោយបង្គាប់គាត់កុំឲ្យចូលទៅក្នុងក្រុងនោះ។
ឥឡូវនេះ ព្រះយេស៊ូនិងពួកសិស្សរបស់ទ្រង់ចេញទៅភូមិសេសារាភីលីព ដែលនៅទិសខាងជើងនៃស្រុកប៉ាឡេស្ទីនយ៉ាងឆ្ងាយដាច់ស្រយាល។ ភូមិសេសារាភីលីពជាកន្លែងដ៏ស្អាតដែលនៅតំបន់ខ្ពង់រាបមានកំពស់ពីលើសមុទ្រប្រមាណ៣៥០ម៉ែត្រ ហើយគេត្រូវឡើងតាមផ្លូវចោតដែលមានចម្ងាយប្រមាណ៤៨គីឡូម៉ែត្រ។ ការធ្វើដំណើរទៅកន្លែងនេះត្រូវប្រើពេលវេលាប្រហែលជាបីបួនថ្ងៃទើបទៅដល់។
នៅតាមផ្លូវ ព្រះយេស៊ូបានចេញទៅកន្លែងដាច់ពីគេដើម្បីអធិស្ឋាន។ ទ្រង់មានព្រះទ័យខ្វល់ខ្វាយចំពោះពួកសិស្សរបស់ទ្រង់ ដ្បិតនៅសល់តែប្រាំបួនឬដប់ខែទៀតទេ ដែលទ្រង់នឹងសោយទិវង្គតហើយ។ មនុស្សជាច្រើនបានចាកចេញហើយលែងកាន់តាមទ្រង់។ រីឯអ្នកផ្សេងទៀតទៅជាច្របូកច្របល់ក្នុងចិត្តនិងបានតូចចិត្ត ពីព្រោះទ្រង់មិនព្រមធ្វើតាមពួកគេ ពេលដែលពួកគេចង់តែងតាំងទ្រង់ឲ្យធ្វើជាស្តេចនោះ។ ហើយក៏តូចចិត្ត ពេលពួកសត្រូវបានសុំឲ្យទ្រង់ផ្ដល់ទីសម្គាល់ពីស្ថានសួគ៌ឲ្យគេឃើញថា ទ្រង់មានសិទ្ធិធ្វើជាស្តេច តែទ្រង់ពុំបានធ្វើនោះ។ តើពួកសាវ័ករបស់ទ្រង់ជឿយ៉ាងណាអំពីអត្តសញ្ញាណរបស់ទ្រង់? ពេលពួកសាវ័កបានមកដល់កន្លែងដែលទ្រង់កំពុងអធិស្ឋាន នោះព្រះយេស៊ូមានបន្ទូលសួរថា៖ «តើហ្វូងមនុស្សទាំងឡាយថាខ្ញុំជាអ្នកណា?»។
ពួកសិស្សទូលឆ្លើយថា៖ «ខ្លះថាជាយ៉ូហាន-បាទីស្ទ ខ្លះទៀតថាជាអេលីយ៉ា ហើយខ្លះទៀតថាជាយេរេមា ឬហោរាណាមួយ»។ ត្រូវហើយ មនុស្សគិតថាព្រះយេស៊ូជាបុគ្គលម្នាក់ក្នុងចំណោមបុរសទាំងនេះ ដែលបានប្រោសឲ្យរស់ឡើងវិញនោះ!
ព្រះយេស៊ូមានបន្ទូលសួរថា៖ «ចុះឯអ្នករាល់គ្នាវិញ តើថាខ្ញុំជាអ្នកណា?»។
ពេត្រុសទូលឆ្លើយភ្លាមថា៖ «ទ្រង់ជាព្រះគ្រីស្ទ ជាព្រះរាជបុត្រានៃព្រះដ៏មានព្រះជន្មរស់»។
ក្រោយពីព្រះយេស៊ូសម្ដែងនូវការយល់ព្រមចំពោះការតបឆ្លើយរបស់ពេត្រុស នោះទ្រង់មានបន្ទូលថា៖ «ខ្ញុំប្រាប់អ្នកថា អ្នកឈ្មោះពេត្រុស ខ្ញុំនឹងតាំងពួកជំនុំខ្ញុំនៅលើថ្មដានេះ ហើយទ្វារស្ថានឃុំព្រលឹងមនុស្សស្លាប់នឹងមិនដែលឈ្នះពួកជំនុំឡើយ»។ នេះជាលើកដំបូង ដែលព្រះយេស៊ូប្រកាសថាទ្រង់នឹងសង់ក្រុមជំនុំ ហើយសូម្បីតែសេចក្ដីស្លាប់នឹងមិនអាចលេបត្របាក់ពួកសមាជិកដែលជាអ្នកបំរើបាននោះទេ ឲ្យតែគេបានកាន់តាមយ៉ាងស្មោះត្រង់នៅលើផែនដីនេះ។ រួចមក ទ្រង់មានបន្ទូលទៅកាន់ពេត្រុសថា៖ «ខ្ញុំនឹងឲ្យកូនសោនៃនគរស្ថានសួគ៌ដល់អ្នក»។
ដូច្នេះហើយ ព្រះយេស៊ូបានមានបន្ទូលប្រាប់ថា ពេត្រុសនឹងទទួលនូវឯកសិទ្ធិដ៏ពិសេស។ ត្រូវហើយ ពេត្រុសមិនមែនមានឋានៈលេខមួយក្នុងចំណោមពួកសាវ័កទេ ហើយគាត់ក៏មិនមែនជាគ្រឹះនៃក្រុមជំនុំនោះដែរ។ គឺជាព្រះយេស៊ូទេដែលជាថ្មដាហើយជាគ្រឹះ ដែលក្រុមជំនុំនឹងសាងសង់ពីលើនោះ។ ក៏ប៉ុន្តែ បើនិយាយប្រៀបប្រដូចវិញ នោះពេត្រុសបានទទួលកូនសោបីដើម្បីបើកឱកាសសំរាប់ក្រុមមនុស្សឲ្យចូលក្នុងព្រះរាជាណាចក្រនៅស្ថានសួគ៌។
ពេត្រុសនឹងប្រើកូនសោទីមួយនៅបុណ្យថ្ងៃទី៥០នៅឆ្នាំ៣៣ ស.យ. ដើម្បីបង្ហាញថាពួកយូដាដែលប្រែចិត្ត គប្បីធ្វើយ៉ាងណាដើម្បីឲ្យបានសង្គ្រោះ។ គាត់នឹងប្រើកូនសោទីពីរបន្ដិចក្រោយមក ដើម្បីបើកឱកាសឲ្យពួកសាម៉ារីដែលជឿព្រះ ឲ្យគេចូលក្នុងព្រះរាជាណាចក្ររបស់ព្រះដែរ។ រួចមក នៅឆ្នាំ៣៦ ស.យ. គាត់នឹងប្រើកូនសោទីបី ដើម្បីឲ្យឱកាសចំពោះពួកសាសន៍ដទៃដែលមិនកាត់ស្បែក ដូចជាកូនេលាសនិងមិត្តរបស់គាត់នូវឱកាសដូចគ្នានេះដែរ។
ព្រះយេស៊ូមានបន្ទូលជាមួយពួកសាវ័កទ្រង់ជាបន្ត។ ទ្រង់បានធ្វើឲ្យពួកគេមិនសប្បាយចិត្តទេ ដោយព្រោះទ្រង់បានប្រាប់ពួកគេពីការរងទុក្ខនិងការសោយទិវង្គត ដែលទ្រង់នឹងត្រូវជួបប្រទះនៅក្រុងយេរូសាឡិមបន្ដិចទៀតនោះ។ ពេត្រុសមិនបានយល់ថា ព្រះយេស៊ូនឹងត្រូវប្រោសឲ្យរស់ឡើងវិញហើយយាងទៅរស់នៅស្ថានសួគ៌ទេ ដូច្នេះពេត្រុសចូលទៅជិតព្រះយេស៊ូដោយឡែក រួចទូលថា៖ «ឱព្រះអម្ចាស់អើយ! សូមទ្រង់ប្រណីអង្គទ្រង់វិញ ការនោះមិនត្រូវមកដល់ទ្រង់ឡើយ»។ ព្រះយេស៊ូបែរចេញហើយមានបន្ទូលនឹងគាត់ថា៖ «សាតាំងអើយ! ចូរថយទៅក្រោយអញទៅ ឯងជាសេចក្ដីបង្អាក់ដល់ចិត្តអញ ព្រោះមិនចេះគិតតាមគំនិតនៃព្រះសោះ គឺគិតតាមតែគំនិតរបស់មនុស្សលោកវិញ»។
តាមមើលទៅ ក្រៅពីពួកសាវ័ក ក៏មានអ្នកឯទៀតរួមដំណើរជាមួយព្រះយេស៊ូដែរ ដូច្នេះឥឡូវនេះ ទ្រង់ហៅគេហើយពន្យល់ថា ការធ្វើជាអ្នកកាន់តាមទ្រង់គឺមិនស្រួលនោះទេ។ ទ្រង់មានបន្ទូលថា៖ «អ្នកណាដែលចង់មកតាមខ្ញុំ ត្រូវឲ្យអ្នកនោះលះកាត់ចិត្តខ្លួនឯងចោល ទាំងផ្ទុកឈើឆ្កាងខ្លួនមកតាមខ្ញុំចុះ ដ្បិតអ្នកណាដែលចង់ឲ្យរួចជីវិត នោះនឹងបាត់ជីវិតទៅ តែអ្នកណាដែលបាត់ជីវិតដោយព្រោះយល់ដល់ខ្ញុំ ហើយនឹងដំណឹងល្អ នោះនឹងបានជីវិតវិញ»។
ត្រូវហើយ ពួកអ្នកកាន់តាមរបស់ព្រះយេស៊ូគប្បីមានចិត្តក្លាហាននិងសុខចិត្តពលីខ្លួន បើពួកគេចង់បានសេចក្ដីអនុគ្រោះពីទ្រង់។ ទ្រង់មានបន្ទូលដោយរៀបរាប់ថា៖ «ដ្បិតអ្នកណាដែលមានសេចក្ដីខ្មាស ដោយព្រោះខ្ញុំ នឹងពាក្យខ្ញុំ នៅក្នុងដំណមនុស្សកំផិត ហើយមានបាបនេះ នោះកូនមនុស្សនឹងមានសេចក្ដីខ្មាស ដោយព្រោះអ្នកនោះដែរ ក្នុងកាលដែលលោកមកក្នុងសិរីល្អរបស់ព្រះវរបិតា ជាមួយនឹងពួកទេវតាបរិសុទ្ធ»។ ម៉ាកុស ៨:២២-៣៨; ម៉ាថាយ ១៦:១៣-២៨; លូកា ៩:១៨-២៧
▪ ហេតុអ្វីក៏ព្រះយេស៊ូមានព្រះទ័យខ្វល់ខ្វាយចំពោះសិស្សរបស់ទ្រង់?
▪ តើមនុស្សមានទស្សនៈយ៉ាងណាអំពីអត្តសញ្ញាណរបស់ព្រះយេស៊ូ?
▪ តើពេត្រុសទទួលកូនសោអ្វីខ្លះ? ហើយនឹងត្រូវប្រើកូនសោនោះយ៉ាងដូចម្ដេច?
▪ តើពេត្រុសទទួលដំបូន្មានអ្វី? ហើយហេតុអ្វី?