នៅក្នុងផ្ទះស៊ីម៉ូនភូមិបេថានី
ជំពូកទី១០១
នៅក្នុងផ្ទះស៊ីម៉ូនភូមិបេថានី
ពេលព្រះយេស៊ូយាងចេញពីក្រុងយេរីខូរ នោះទ្រង់យាងឆ្ពោះទៅភូមិបេថានី។ ការធ្វើដំណើរនេះអស់រយៈពេលមួយថ្ងៃ ដ្បិតការធ្វើដំណើរឡើងចំណោតដែលមានចម្ងាយ១៩គីឡូម៉ែត្រ គឺជាផ្លូវដ៏ពិបាកមែន។ ក្រុងយេរីខូរគឺនៅក្រោមកំពស់សមុទ្រប្រហែលជា២៥០ម៉ែត្រ ហើយភូមិបេថានីគឺនៅខាងលើកំពស់សមុទ្រប្រហែល៧៦០ម៉ែត្រ។ អ្នកប្រហែលជានៅនឹកចាំបានថា ភូមិបេថានីជាលំនៅរបស់ឡាសារនិងបងស្រីរបស់គាត់។ ភូមិតូចនេះគឺនៅលើជម្រាលភ្នំដើមអូលីវទិសខាងកើត មានចំងាយប្រមាណបីគីឡូម៉ែត្រពីទីក្រុងយេរូសាឡិម។
មនុស្សជាច្រើនបានមកដល់ក្រុងយេរូសាឡិមរួចទៅហើយ ដើម្បីធ្វើបុណ្យរំលង។ ពួកគេបានមកមុន ដើម្បីសំអាតខ្លួនតាមទំលាប់ពិធីបុណ្យ។ ប្រហែលជាពួកគេបានពាល់សព ឬបានប្រព្រឹត្តអ្វីមួយដែលធ្វើឲ្យពួកគេមិនស្អាត។ ដូច្នេះ ពួកគេក៏ធ្វើតាមទំលាប់សំអាតខ្លួន ដើម្បីធ្វើពិធីបុណ្យរំលងតាមរបៀបដ៏ថ្លៃថ្នូរនោះ។ ពេលដែលពួកគេផ្ដុំគ្នានៅឯព្រះវិហារ នោះពួកគេជាច្រើនស្ទង់មតិគ្នាថា តើព្រះយេស៊ូមកធ្វើបុណ្យរំលងនេះឬក៏យ៉ាងណា។
ក្រុងយេរូសាឡិមជាកន្លែងដែលមានមនុស្សច្រើនតែឈ្លោះប្រកែកគ្នាអំពីរឿងព្រះយេស៊ូ។ គេដឹងជាទូទៅថាពួកមេដឹកនាំសាសនាចង់ចាប់ព្រះយេស៊ូមកធ្វើគុត។ ជាងនោះទៅទៀត ពួកមេដឹកនាំសាសនាបានបញ្ជាថា បើអ្នកណាម្នាក់ដឹងថាទ្រង់នៅកន្លែងណា នោះត្រូវមករាយការណ៍ប្រាប់ឲ្យពួកគេដឹងជាដាច់ខាត។ នៅខែមុនៗនេះ បីដងហើយដែលពួកអ្នកដឹកនាំទាំងនេះខំធ្វើគុតទ្រង់ លើកទីមួយនៅឯពិធីបុណ្យបារាំ លើកទីពីរនៅពេលមានបុណ្យឧទ្ទិសថ្វាយ និងលើកទីបីក្រោយពីទ្រង់ប្រោសឡាសាររស់ឡើងវិញ។ ដូច្នេះ បណ្ដាជនឆ្ងល់ថា តើព្រះយេស៊ូនឹងបង្ហាញខ្លួននៅកន្លែងសាធារណៈម្ដងទៀតឬទេ? ពួកគេសួរគ្នីគ្នាថា៖ «តើគិតដូចម្ដេច?»។
ចន្លោះពេលនោះ ព្រះយេស៊ូយាងមកដល់ភូមិបេថានីប្រាំមួយថ្ងៃមុននឹងបុណ្យរំលង ដែលត្រូវប្រារព្ធឡើងនៅថ្ងៃទី១៤ខែណែសាន យោងទៅតាមប្រក្រតិទិនសាសន៍យូដា។ ព្រះយេស៊ូយាងមកដល់ភូមិបេថានីនៅថ្ងៃសុក្រពេលល្ងាច ដែលជាដើមថ្ងៃទី៨ ខែណែសាន។ ទ្រង់មិនអាចធ្វើដំណើរបន្តពីភូមិបេថានីទៅមុខទៀតនៅថ្ងៃសៅរ៍បានទេ ពីព្រោះការធ្វើដំណើរនៅថ្ងៃឈប់សំរាក ដែលចាប់គិតពីពេលថ្ងៃលិចនៅថ្ងៃសុក្រដល់ពេលថ្ងៃលិចនៅថ្ងៃសៅរ៍ យោងទៅតាមក្រិត្យវិន័យសាសនាយូដាគឺបានហាមឃាត់ជាដាច់ខាត។ ព្រះយេស៊ូប្រហែលជាយាងទៅផ្ទះរបស់ឡាសារស្នាក់នៅទីនោះនៅយប់ថ្ងៃសុក្រ ដូចរាល់ដង។
ប៉ុន្តែ មានបុរសម្នាក់នៅភូមិបេថានីបានអញ្ជើញព្រះយេស៊ូនិងគូកនរបស់ទ្រង់ ឲ្យទៅសោយព្រះស្ងោយនៅល្ងាចថ្ងៃសៅរ៍។ បុរសនេះគឺឈ្មោះស៊ីម៉ូន ដែលពីមុនគាត់កើតឃ្លង់ តែប្រហែលជាព្រះយេស៊ូប្រោសគាត់ឲ្យជានៅពេលមុន។ នាងម៉ាថាកំពុងតែបំរើភ្ញៀវ ដែលសមនឹងលក្ខណៈដ៏ឧស្សាហ៍របស់នាង។ រីឯនាងម៉ារាវិញ ជាធម្មតាជាអ្នកដែលយកចិត្តទុកដាក់នឹងព្រះយេស៊ូរាល់លើក តែលើកនេះម៉ារាធ្វើអ្វីមួយដែលគួរឲ្យទាស់ចិត្តគេណាស់។
នាងម៉ារាបើកដបថ្មកែវ ឬដបតូចមួយដែលមានប្រេងក្រអូប គឺជា«ទេព្វិរូសុទ្ធ»។ ប្រេងនេះគឺមានតម្លៃថ្លៃណាស់។ ប្រាកដហើយ តម្លៃប្រេងនេះគឺស្មើនឹងប្រាក់ខែមួយឆ្នាំ! នៅពេលនាងម៉ារាចាក់លាបព្រះសិរនិងព្រះបាទព្រះយេស៊ូ នាងក៏យកសក់នាងជូតផងដែរ ការធ្វើបែបនេះនាំឲ្យក្លិនប្រេងក្រអូបសាយភាយពេញផ្ទះ។
តែពួកសិស្សខឹង ហើយទូលថា៖ «ធ្វើបង្ខាតដូច្នេះ តើមានប្រយោជន៍អ្វី?»។ រួចមក យូដាសអ៊ីស្ការីយ៉ុតក៏ពោលថា៖ «ម្ដេចឡើយក៏មិនបានលក់ប្រេងក្រអូបនេះជាដំឡៃ[«ប្រាក់ឌីណារី៣០០កាក់», ព.ថ.] ដើម្បីចែកឲ្យដល់មនុស្សក្រីក្រវិញ?»។ ប៉ុន្តែ តាមពិតយូដាសមិនបានខ្វល់ខ្វាយចំពោះមនុស្សក្រីក្រទេ ដ្បិតគាត់តែងលួចយកប្រាក់ពីថង់ ដែលពួកសិស្សទុកនោះ។
ប៉ុន្តែព្រះយេស៊ូមានបន្ទូលគាំទ្រនាងម៉ារា។ ទ្រង់មានបន្ទូលថា៖ «កុំធ្វើនាង ហេតុអ្វីបានជានាំបង្អាក់ចិត្តនាងដូច្នេះ នាងបានធ្វើការនេះ ជាការល្អដល់ខ្ញុំណាស់ ពីព្រោះអ្នករាល់គ្នាមានពួកអ្នកក្រនៅជាមួយជាដរាប ហើយកាលណាអ្នករាល់គ្នាចង់ធ្វើគុណនឹងគេ នោះចេះតែធ្វើបាន តែចំណែកខ្ញុំ មិននៅជាមួយ ជាដរាបទេ នាងបានធ្វើការអ្វីដែលនាងធ្វើបាន គឺបានមកមុនពេលកំណត់ នឹងលាបខ្លួនខ្ញុំ ជាការសំរាប់កប់ខ្មោចខ្ញុំ ខ្ញុំប្រាប់អ្នករាល់គ្នាជាប្រាកដថា កន្លែងណាដែលគេនឹងផ្សាយដំណឹងល្អនេះទួទៅ គ្រប់ក្នុងលោកីយទាំងមូល នោះគេតែងនឹងដំណាលពីការដែលនាងបានធ្វើ ហើយនេះទុកសំរាប់ជាកេរ្ដិ៍នាងតទៅ»។
ឥឡូវនេះ ព្រះយេស៊ូស្នាក់នៅភូមិបេថានីជាង២៤ម៉ោងហើយ ហើយវត្តមានរបស់ទ្រង់គឺឮសុសសាយ។ ដូច្នេះហើយ មនុស្សជាច្រើនបានមកផ្ទះស៊ីម៉ូនដើម្បីមើលព្រះយេស៊ូ តែពួកគេក៏ចង់ឃើញឡាសារ ដែលមានវត្តមាននៅទីនោះដែរ។ ដូច្នេះ សម្ដេចសង្ឃបានសម្រេចចិត្តថាត្រូវសម្លាប់ព្រះយេស៊ូ ព្រមទាំងឡាសារដែរ។ នេះគឺព្រោះតែមនុស្សមានជំនឿលើព្រះយេស៊ូ ដោយគេឃើញបុគ្គលដែលទ្រង់ប្រោសពីស្លាប់នោះនៅរស់! ពិតមែន ពួកមេដឹកនាំសាសនាទាំងនេះគឺអាក្រក់ជួជាតិមែន! យ៉ូហាន ១១:៥៥–១២:១១; ម៉ាថាយ ២៦:៦-១៣; ម៉ាកុស ១៤:៣-៩; កិច្ចការ ១:១២
▪ តើមានការជជែកគ្នាអ្វីនៅឯព្រះវិហារក្នុងក្រុងយេរូសាឡិម? ហើយហេតុអ្វី?
▪ ហេតុអ្វីបានជាព្រះយេស៊ូត្រូវយាងមកដល់ភូមិបេថានីនៅថ្ងៃសុក្រមិនមែននៅថ្ងៃសៅរ៍?
▪ ពេលព្រះយេស៊ូយាងមកដល់ភូមិបេថានី តើទ្រង់ប្រហែលជាស្នាក់នៅកន្លែងណានៅថ្ងៃឈប់សំរាក?
▪ តើនាងម៉ារាធ្វើអ្វីដែលនាំឲ្យគេទាស់ចិត្ត? ហើយតើព្រះយេស៊ូគាំទ្រនាងយ៉ាងណា?
▪ តើអ្វីដែលបង្ហាញថាសម្ដេចសង្ឃគឺអាក្រក់ជួជាតិនោះ?
