នៅឯពិធីបុណ្យបារាំ
ជំពូកទី៦៦
នៅឯពិធីបុណ្យបារាំ
អស់រយៈពេលជិតបីឆ្នាំ តាំងពីទ្រង់ទទួលបុណ្យជ្រមុជទឹកមក កិត្ដិនាមរបស់ព្រះយេស៊ូបានល្បីសុសសាយគ្រប់ទីកន្លែង។ មនុស្សរាប់ពាន់នាក់បានឃើញអព្ភូតហេតុរបស់ទ្រង់ ហើយគេនិយាយរៀបរាប់ប្រាប់តៗគ្នាអំពីសកម្មភាពរបស់ទ្រង់ទូទាំងស្រុកនោះ។ ឥឡូវនេះ កាលមនុស្សប្រមូលគ្នាមកឯបុណ្យបារាំនៅក្នុងក្រុងយេរូសាឡិម នោះពួកគេក៏ស្វែងរកទ្រង់។ ពួកគេចង់ដឹងថា៖ «តើលោកនៅឯណា?»។
ហ្វូងមនុស្សជជែកគ្នាពីព្រះយេស៊ូ។ អ្នកខ្លះនិយាយថា៖ «លោកជាមនុស្សល្អ»។ មនុស្សខ្លះទៀតពោលអះអាងថា៖ «ទេ! អ្នកនោះជាអ្នកបញ្ឆោតប្រជាជនទេតើ!»។ គឺមានការនិយាយខ្សឹបខ្សៀវគ្នាជាច្រើនក្នុងថ្ងៃបើកកម្មវិធីបុណ្យនេះ។ ប៉ុន្តែគ្មាននរណាហ៊ាននិយាយសរសើរព្រះយេស៊ូនៅមុខគេឡើយ ពីព្រោះបណ្ដាជនខ្លាចមេដឹកនាំសាសន៍យូដាធ្វើអាក្រក់បកទៅលើពួកគេវិញ។
លុះដល់ពាក់កណ្ដាលពិធីបុណ្យនេះ នោះព្រះយេស៊ូក៏យាងទៅដល់។ ទ្រង់យាងឡើងទៅព្រះវិហារ ហើយបណ្ដាជនមានការភ្ញាក់ផ្អើលយ៉ាងខ្លាំងនឹងការបង្រៀនដ៏ប៉ិនប្រសប់របស់ទ្រង់។ ដោយព្រោះព្រះយេស៊ូមិនដែលបានរៀននៅសាលានៃពួករ៉ាប៊ី នោះពួកសាសន៍យូដានឹកឆ្ងល់ថា៖ «ធ្វើដូចម្ដេចឲ្យអ្នកនេះចេះគម្ពីរដូច្នេះ ពីព្រោះគាត់មិនដែលរៀនសូត្រសោះ?»។
ព្រះយេស៊ូពន្យល់ថា៖ «សេចក្ដីដែលខ្ញុំបង្រៀននេះ មិនមែនជារបស់ខ្ញុំទេ គឺជារបស់ផងព្រះ ដែលចាត់ឲ្យខ្ញុំមកនោះវិញ បើអ្នកណាចង់ធ្វើតាមព្រះហឫទ័យទ្រង់ នោះនឹងបានដឹងជាសេចក្ដីបង្រៀននេះមកពីព្រះ ឬជាខ្ញុំនិយាយដោយអាងខ្លួនខ្ញុំ»។ ព្រះយេស៊ូបង្រៀនដោយកាន់តាមយ៉ាងខ្ជាប់ខ្ជួននូវក្រិត្យវិន័យរបស់ព្រះ ដូច្នេះនេះបង្ហាញថាព្រះយេស៊ូថ្វាយកិត្ដិយសចំពោះព្រះ មិនមែនចំពោះអង្គទ្រង់ទេ។ ព្រះយេស៊ូមានបន្ទូលសួរថា៖ «ឯលោកម៉ូសេ តើមិនបានឲ្យក្រិត្យវិន័យមកអ្នករាល់គ្នាទេឬ?»។ ហើយទ្រង់ស្តីបន្ទោសពួកគេថា៖ «ប៉ុន្តែក្នុងពួកអ្នករាល់គ្នា គ្មានអ្នកណាមួយប្រព្រឹត្តតាមក្រិត្យវិន័យនោះទេ»។
រួចមកព្រះយេស៊ូមានបន្ទូលសួរថា៖ «ហេតុអ្វីបានជាអ្នករាល់គ្នារកសំឡាប់ខ្ញុំដូច្នេះ?»។
ហ្វូងមនុស្សភាគច្រើនជាអ្នកមកចូលរួមពិធីបុណ្យនេះ មិនបានដឹងនូវការប៉ុនប៉ងនេះទេ។ អ្នកមកចូលរួមទាំងនេះគិតថា នេះជាអ្វីដ៏មិនគួរឲ្យជឿសោះដែលមានគេចង់សម្លាប់គ្រូបង្រៀនដ៏ឧត្តមបែបនេះ។ ដូច្នេះ ពួកគេជឿថាច្បាស់ជាព្រះយេស៊ូមានស្មារតីមិននឹងហើយដែលទ្រង់គិតដូច្នេះ។ ពួកគេនិយាយថា៖ ‹អ្នកមានអារក្សចូលទេដឹង? តើមានអ្នកណារកសំឡាប់អ្នក?›។
ទោះជាហ្វូងមនុស្សឥតដឹងអ្វីសោះក៏ដោយ តាមពិតគឺជាពួកមេដឹកនាំសាសនាយូដាដែលចង់ធ្វើគុតព្រះយេស៊ូនោះ។ កាលពីមួយឆ្នាំកន្លះមុននេះ ព្រះយេស៊ូប្រោសបុរសម្នាក់ឲ្យជានៅថ្ងៃឈប់សំរាក បណ្ដាលឲ្យពួកមេដឹកនាំសាសនាចង់ធ្វើគុតទ្រង់។ ដូច្នេះ ឥឡូវនេះ ព្រះយេស៊ូបញ្ជាក់ប្រាប់នូវភាពមិនសមហេតុផលរបស់ពួកគេ ដោយមានបន្ទូលសួរថា៖ «ដូច្នេះ បើមនុស្សទទួលកាត់ស្បែក នៅថ្ងៃឈប់សំរាក ដើម្បីមិនឲ្យរំលងក្រិត្យវិន័យរបស់លោកម៉ូសេ នោះតើអ្នករាល់គ្នាខឹងនឹងខ្ញុំ ដោយព្រោះខ្ញុំបានធ្វើឲ្យមនុស្សម្នាក់បានជាស្រឡះ នៅថ្ងៃឈប់សំរាកឬអី? កុំឲ្យជំនុំជំរះតាមភាពដែលមើលឃើញតែខាងក្រៅឡើយ ត្រូវជំនុំជំរះតាមសេចក្ដីសុចរិតវិញ»។
បណ្ដាជននៅក្រុងយេរូសាឡិមដែលដឹងអំពីស្ថានការណ៍នេះ ឥឡូវក៏ពោលថា៖ «គឺអ្នកនេះទេតើ ដែលគេរកសំឡាប់នោះ? ហើយមើល! គាត់និយាយនៅកណ្ដាលចំណោម តែគ្មានអ្នកណាថាអ្វីឲ្យសោះ តើពួកនាម៉ឺនបានយល់ឃើញហើយថា អ្នកនេះជាព្រះគ្រីស្ទមែនឬ?»។ ពួកអ្នកស្រុកនៅក្រុងយេរូសាឡិមពន្យល់នូវហេតុដែលពួកគេមិនជឿថាព្រះយេស៊ូគឺជាព្រះគ្រីស្ទ ដោយស្រដីថា៖ «ឯអ្នកនេះ យើងដឹងជាមកពីណា តែព្រះគ្រីស្ទវិញ កាលណាទ្រង់យាងមក នោះគ្មានអ្នកណាដឹងជាមកពីណាទេ»។
ព្រះយេស៊ូមានបន្ទូលឆ្លើយថា៖ «អ្នករាល់គ្នាស្គាល់ខ្ញុំ ហើយដឹងជាខ្ញុំមកពីណាផង តែខ្ញុំមិនបានមក ដោយអាងខ្លួនខ្ញុំទេ ឯព្រះដែលចាត់ឲ្យខ្ញុំមក ទ្រង់ពិតត្រង់ហើយ អ្នករាល់គ្នាមិនស្គាល់ទ្រង់ទេ តែខ្ញុំស្គាល់ទ្រង់ ពីព្រោះខ្ញុំមកពីទ្រង់ គឺទ្រង់ពិត ដែលចាត់ឲ្យខ្ញុំមក»។ ខណៈនោះពួកគេរកចាប់ទ្រង់ ប្រហែលជាចង់ចាប់ទ្រង់ដាក់គុក ឬធ្វើគុតដល់ទ្រង់។ ប៉ុន្តែ ពួកគេឥតបានជោគជ័យទេ ពីព្រោះនេះមិនមែនជាពេលដែលព្រះយេស៊ូត្រូវសោយទិវង្គតឡើយ។
ក៏ប៉ុន្តែ មនុស្សជាច្រើនបានជឿដល់ព្រះយេស៊ូ មែនហើយ ពួកគេគួរជឿដូច្នេះមែន។ ដ្បិតព្រះយេស៊ូបានយាងលើទឹក ធ្វើឲ្យខ្យល់ព្យុះស្ងប់ និងធ្វើអព្ភូតហេតុចំអែតមនុស្សរាប់ពាន់នាក់ដោយប្រើនំប៉័ងនិងត្រីបន្ដិចបន្តួចប៉ុណ្ណោះ ថែមទាំងប្រោសមនុស្សឈឺឲ្យជា ប្រោសមនុស្សពិការឲ្យដើរបាន ប្រោសមនុស្សខ្វាក់ឲ្យមើលឃើញវិញ ប្រោសមនុស្សឃ្លង់ឲ្យជា ហើយព្រមទាំងប្រោសមនុស្សស្លាប់ឲ្យរស់ឡើងវិញផង។ ដូច្នេះ ពួកគេសួរថា៖ «កាលណាព្រះគ្រីស្ទយាងមក តើទ្រង់នឹងធ្វើទីសំគាល់ច្រើនជាងលោកនេះឬ?»។
នៅពេលពួកផារីស៊ីបានឮថាបណ្ដាជនកំពុងជជែកគ្នាអំពីរឿងទាំងនេះ ពួកគេនិងពួកសម្ដេចសង្ឃក៏ចាត់ពួកអាជ្ញាឲ្យទៅចាប់ព្រះយេស៊ូ។ យ៉ូហាន ៧:១១-៣២
▪ តើពេលណាដែលព្រះយេស៊ូបានមកដល់ពិធីបុណ្យនេះ? ហើយតើមនុស្សកំពុងជជែកគ្នាយ៉ាងណាអំពីទ្រង់?
▪ ហេតុអ្វីបានជាមនុស្សខ្លះនិយាយថា ព្រះយេស៊ូមានអារក្សចូល?
▪ តើបណ្ដាជននៅក្រុងយេរូសាឡិមមានទស្សនៈយ៉ាងណាអំពីព្រះយេស៊ូ?
▪ ហេតុអ្វីបានជាមនុស្សជាច្រើនមានជំនឿលើព្រះយេស៊ូ?
