នៅឯសមុទ្រកាលីឡេ
ជំពូកទី១៣០
នៅឯសមុទ្រកាលីឡេ
ឥឡូវនេះ ពួកសាវ័កត្រឡប់ទៅស្រុកកាលីឡេវិញ តាមបន្ទូលដែលព្រះយេស៊ូបានបង្គាប់។ ប៉ុន្តែ ពួកគាត់ឥតប្រាកដក្នុងចិត្តថា ពួកគាត់នឹងត្រូវធ្វើអ្វីនៅទីនោះទេ។ ក្រោយមក ពេត្រុសប្រាប់ថូម៉ាស ណាថាណែល យ៉ាកុប និងប្អូនគាត់យ៉ូហាន និងសាវ័កពីរនាក់ទៀតថា៖ «ខ្ញុំទៅនេសាទត្រី»។
សាវ័កប្រាំមួយនាក់នោះឆ្លើយថា៖ «យើងទៅដែរ»។
ប៉ុន្តែអស់មួយយប់នោះ ពួកគាត់នេសាទមិនបានអ្វីសោះ។ ប៉ុន្តែ ដល់ជិតភ្លឺហើយ នោះព្រះយេស៊ូលេចខ្លួននៅឆ្នេរសមុទ្រ តែពួកសាវ័កមិនដឹងថាជាព្រះយេស៊ូទេ។ ទ្រង់មានបន្ទូលថា៖ «កូនរាល់គ្នាអើយ! តើមានអ្វីបរិភោគឬទេ?»។
ពួកគាត់ទូលឆ្លើយថា៖ «គ្មានទេ!»។
ទ្រង់មានបន្ទូលប្រាប់ថា៖ «ចូរទំលាក់អួនទៅខាងស្ដាំទូក នោះទើបបាន»។ ពេលពួកគាត់ទំលាក់អួនទៅ តែទាញអួនមកវិញមិនរួច ព្រោះជាប់ត្រីសន្ធឹកណាស់។
យ៉ូហានក៏ពោលឡើងថា៖ «នេះគឺជាព្រះអម្ចាស់ហើយ!»។
ពេលពេត្រុសបានឮថាជាព្រះអម្ចាស់ នោះគាត់ក៏ស្លៀកពាក់ ព្រោះគាត់នៅខ្លួនទទេ ក៏លោតចុះទៅក្នុងទឹក។ ហើយត្រូវហែលទឹកអស់ចំងាយ៩០ម៉ែត្រដើម្បីទៅដល់ឆ្នេរសមុទ្រ។ ពួកសាវ័កឯទៀតជិះទូកតូចទៅតាម ទាំងទាញអួនដែលមានត្រីពេញទៅជាមួយផង។
ពេលពួកគាត់ឡើងលើគោក ឃើញរងើកភ្លើង មានដាក់ត្រីអាំងពីលើនិងនំប៉័ងផងដែរ។ ព្រះយេស៊ូមានបន្ទូលទៅពួកគាត់ថា៖ «ចូរយកត្រីខ្លះ ដែលទើបនឹងចាប់នោះមក»។ ពេត្រុសចុះទៅក្នុងទូក ទាញអួនដែលមានត្រីពេញមកដាក់លើគោក។ អួននោះមានត្រីធំៗ១៥៣ក្បាល!
ព្រះយេស៊ូអញ្ជើញពួកគាត់ថា៖ «ចូរមកពិសាសិន»។
ប៉ុន្តែ គ្មានសិស្សណាម្នាក់ហ៊ានទូលសួរទ្រង់ថា «តើអ្នកណានុ៎ះ?»។ ពីព្រោះពួកគាត់ដឹងថាជាព្រះយេស៊ូហើយ។ ក្រោយពីទ្រង់មានព្រះជន្មរស់ឡើងវិញ នេះជាលើកទីប្រាំពីរហើយ ដែលទ្រង់បង្ហាញខ្លួនឲ្យពួកគាត់ឃើញ ហើយនេះជាលើកទីបី ដែលទ្រង់បង្ហាញខ្លួនឲ្យពួកសាវ័កជាក្រុមឃើញ។ ឥឡូវនេះ ទ្រង់យកនំប៉័ងនិងត្រីមកប្រទានឲ្យពួកគាត់ម្នាក់ៗ។
កាលពួកគាត់បានបរិភោគរួចហើយ ប្រហែលជាព្រះយេស៊ូសម្លឹងទៅមើលត្រីធំៗដែលនេសាទបាននោះ ហើយទ្រង់សួរពេត្រុសថា៖ «ស៊ីម៉ូន! កូនយ៉ូណាសអើយ! តើអ្នកស្រឡាញ់ខ្ញុំជាជាងរបស់ទាំងនេះឬ?»។ ទ្រង់ច្បាស់ជាមានន័យថា តើអ្នកស្រឡាញ់ការនេសាទត្រីច្រើនជាងកិច្ចការ ដែលខ្ញុំបានរៀបចំឲ្យអ្នកធ្វើឬ?
ពេត្រុសទូលឆ្លើយថា៖ «ទ្រង់ជ្រាបថា ទូលបង្គំពេញចិត្តនឹងទ្រង់ហើយ»។
ព្រះយេស៊ូមានបន្ទូលថា៖ «ចូរឲ្យចំណីដល់កូនចៀមខ្ញុំស៊ីផង»។
រួចទ្រង់សួរពេត្រុសម្ដងទៀតថា៖ «ស៊ីម៉ូន! កូនយ៉ូណាសអើយ! តើស្រឡាញ់ខ្ញុំឬ?»។
ពេត្រុសខំទូលឆ្លើយថា៖ «ព្រះករុណាវិសេសព្រះអម្ចាស់ ទ្រង់ជ្រាបថា ទូលបង្គំពេញចិត្តនឹងទ្រង់ហើយ»។
ព្រះយេស៊ូបង្គាប់ម្ដងទៀតថា៖ «ចូរឃ្វាលហ្វូងចៀមរបស់ខ្ញុំចុះ!»។
រួចទ្រង់មានបន្ទូលជាគំរប់បីដងថា៖ «ស៊ីម៉ូន! កូនយ៉ូណាសអើយ! តើពេញចិត្តនឹងខ្ញុំមែនឬ?»។
ឥឡូវនេះពេត្រុសមានចិត្តព្រួយ។ គាត់ប្រហែលជាឆ្ងល់ ច្បាស់ជាព្រះយេស៊ូសង្ស័យនឹងភក្ដីភាពរបស់គាត់ហើយ។ ដ្បិតពេលគេវិនិច្ឆ័យទោសធ្វើគុតព្រះយេស៊ូនោះ ពេត្រុសបដិសេធមិនស្គាល់ទ្រង់បីដង។ ដូច្នេះពេត្រុសទូលថា៖ «ព្រះអម្ចាស់អើយ! ទ្រង់ជ្រាបគ្រប់ការទាំងអស់ គឺទ្រង់ជ្រាបថា ទូលបង្គំពេញចិត្តនឹងទ្រង់ហើយ»។
ព្រះយេស៊ូបង្គាប់លើកទីបីថា៖ «ចូរឲ្យចំណីដល់ហ្វូងចៀមខ្ញុំស៊ីផង»។
ដូច្នេះ ព្រះយេស៊ូយកពេត្រុសធ្វើជាគោលក្នុងការធ្វើឲ្យសាវ័កដទៃទៀតចាំជាប់នូវកិច្ចការដែលទ្រង់ចង់ឲ្យពួកគាត់ធ្វើ។ បន្ដិចទៀត ទ្រង់នឹងយាងចេញពីផែនដីនេះ ហើយទ្រង់ចង់ឲ្យពួកគាត់នាំមុខក្នុងការបំរើអស់អ្នកដែលត្រូវយកចូលក្នុងក្រោលចៀមរបស់ព្រះ។
ដូចជាព្រះយេស៊ូត្រូវគេចាប់និងប្រហារជីវិត ដោយព្រោះទ្រង់ធ្វើកិច្ចការដែលព្រះបញ្ជាឲ្យធ្វើ នោះទ្រង់មានបន្ទូលប្រាប់ពេត្រុសថា គាត់នឹងរងទុក្ខដូចទ្រង់ដែរ។ ព្រះយេស៊ូមានបន្ទូលប្រាប់គាត់ថា៖ «កាលអ្នកនៅពីក្មេងនៅឡើយ នោះបានក្រវាត់ខ្លួនឯង ទាំងដើរទៅតាមតែចិត្ត តែកាលណាចាស់ហើយ នោះអ្នកនឹងសន្ធឹងដៃទៅ ហើយម្នាក់ទៀតនឹងក្រវាត់ឲ្យអ្នកវិញ ទាំងនាំអ្នកទៅឯកន្លែង ដែលអ្នកមិនចង់ទៅផង»។ ទោះជាពេត្រុសនឹងទទួលសេចក្ដីស្លាប់ជាទុក្ករបុគ្គលម្នាក់ក៏ដោយ ព្រះយេស៊ូដាស់តឿនគាត់ថា៖ «ចូរតាមខ្ញុំចុះ!»។
កាលពេត្រុសងាកមើលក្រោយហើយបានឃើញយ៉ូហាន នោះក៏ទូលសួរទ្រង់ថា៖ «ព្រះអម្ចាស់អើយ! តើអ្នកនោះនឹងបានដូចម្ដេចទៅ?»។
ព្រះយេស៊ូមានបន្ទូលឆ្លើយថា៖ «បើសិនជាខ្ញុំចង់ឲ្យអ្នកនោះនៅ ទាល់តែខ្ញុំមក នោះតើអំពល់អ្វីដល់អ្នក ចូរឲ្យអ្នកមកតាមខ្ញុំចុះ!»។ ពួកសិស្សជាច្រើនយល់ពាក្យបន្ទូលរបស់ព្រះយេស៊ូ ថាយ៉ូហាននឹងមិនស្លាប់ទេ។ ប៉ុន្តែ ដូចជាសាវ័កយ៉ូហានបានពន្យល់ក្រោយមក ព្រះយេស៊ូមិនមានបន្ទូលថា លោកនឹងមិនស្លាប់នោះទេ តែទ្រង់គ្រាន់តែមានបន្ទូលថា៖ «បើសិនជាខ្ញុំចង់ឲ្យអ្នកនោះនៅ ទាល់តែខ្ញុំមក នោះតើអំពល់អ្វីដល់អ្នកវិញប៉ុណ្ណោះ?»។
ក្រោយមក យ៉ូហានបានសង្កេតឃើញថា៖ «មានការជាច្រើនទៀត ដែលព្រះយេស៊ូវបានធ្វើដែរ ខ្ញុំស្មានថា បើនឹងសរសេរទុក ដោយលំដាប់តមក នោះលោកីយទាំងមូលក៏មិនល្មមគ្រាន់ ដើម្បីនឹងដាក់អស់ទាំងសៀវភៅ ដែលត្រូវសរសេរនោះផង»។ យ៉ូហាន ២១:១-២៥; ម៉ាថាយ ២៦:៣២; ២៨:៧, ១០
▪ តើអ្វីដែលបង្ហាញថា សាវ័កឥតប្រាកដក្នុងចិត្តថាពួកគេនឹងធ្វើអ្វីនៅស្រុកកាលីឡេ?
▪ តើដោយដូចម្ដេចដែលពួកសាវ័ក ទទួលស្គាល់ព្រះយេស៊ូនៅឯសមុទ្រកាលីឡេ?
▪ តើព្រះយេស៊ូបានលេចខ្លួនឲ្យឃើញប៉ុន្មានដងហើយ តាំងពីទ្រង់មានព្រះជន្មរស់ឡើងវិញ?
▪ តើព្រះយេស៊ូបញ្ជាក់យ៉ាងណា នូវអ្វីដែលទ្រង់ចង់ឲ្យពួកសាវ័កធ្វើនោះ?
▪ តើតាមរបៀបណាដែលព្រះយេស៊ូបញ្ជាក់របៀបដែលពេត្រុសនឹងស្លាប់នោះ?
▪ តើពួកសាវ័កយល់ខុសយ៉ាងណា អំពីអ្វីដែលព្រះយេស៊ូមានបន្ទូលសំដៅទៅយ៉ូហាននោះ?
