បញ្ជូនទៅក្រុមប្រឹក្សាជាន់ខ្ពស់ រួចបញ្ជូនទៅលោកពីឡាត់
ជំពូកទី១២១
បញ្ជូនទៅក្រុមប្រឹក្សាជាន់ខ្ពស់ រួចបញ្ជូនទៅលោកពីឡាត់
ឥឡូវនេះមេឃជិតភ្លឺហើយ។ ពេត្រុសបានបដិសេធមិនទទួលស្គាល់ព្រះយេស៊ូជាលើកទីបី ហើយក្រុមប្រឹក្សាជាន់ខ្ពស់បានចប់ការវិនិច្ឆ័យទោសក្លែងក្លាយរបស់ពួកគេ និងពួកគេក៏បានចាកចេញទៅ។ ប៉ុន្តែ លុះព្រឹកឡើងថ្ងៃសុក្រ ពួកគេជួបជុំគ្នាទៀត ហើយលើកនេះពួកគេជួបជុំគ្នានៅសាលាក្រុមប្រឹក្សាជាន់ខ្ពស់។ ក្រុមប្រឹក្សាជាន់ខ្ពស់ទំនងជាធ្វើយ៉ាងនេះ ដើម្បីឲ្យទង្វើយប់មិញរបស់ពួកគេអាចមើលទៅដូចជាស្របច្បាប់វិញ។ ពេលគេនាំព្រះយេស៊ូចូលទៅឈរខាងមុខពួកនេះ ពួកគេនិយាយដូចដែលបាននិយាយនៅយប់នោះថា៖ «បើឯងជាព្រះគ្រីស្ទមែន ចូរប្រាប់មកយើងចុះ!»។
ព្រះយេស៊ូមានបន្ទូលឆ្លើយទៅគេថា៖ «បើសិនជាខ្ញុំជំរាបដល់លោករាល់គ្នា នោះលោកក៏មិនព្រមជឿ ហើយបើខ្ញុំសួរលោកវិញ នោះក៏មិនព្រមឆ្លើយមកខ្ញុំ»។ ប៉ុន្តែ ដោយសេចក្ដីក្លាហានព្រះយេស៊ូបានបញ្ជាក់នូវអត្តសញ្ញាណរបស់ទ្រង់ ដោយមានបន្ទូលថា៖ «អំណឹះទៅមុខ កូនមនុស្សនឹងអង្គុយខាងស្ដាំព្រះចេស្ដានៃព្រះ»។
ពួកគេទាំងអស់គ្នាចង់ដឹង ក៏ពោលថា៖ «ដូច្នេះ ឯងជាព្រះរាជបុត្រានៃព្រះឬ?»។
ព្រះយេស៊ូមានបន្ទូលឆ្លើយថា៖ «លោករាល់គ្នាមានប្រសាសន៍ដូច្នោះ នោះគឺខ្ញុំនេះហើយ»។
ព្រះយេស៊ូមានបន្ទូលឆ្លើយដូចនេះគឺគ្រប់គ្រាន់ហើយ ដ្បិតពួកបុរសទាំងនេះមានបំណងចង់ធ្វើគុតទ្រង់។ ពួកគេចាត់ទុកការនិយាយនេះ ជាការប្រមាថព្រះ។ ពួកគេក៏សួរថា៖ «តើចាំបាច់ត្រូវការនឹងទីបន្ទាល់អ្វីទៀត? ព្រោះយើងបានឮចេញពីមាត់ខ្លួនវាមកស្រាប់ហើយ»។ ដូច្នេះ ពួកគេចងព្រះយេស៊ូ បញ្ជូនទ្រង់ទៅលោកប៉ុនទាស-ពីឡាត់ ជាអភិបាលរ៉ូម។
យូដាសដែលជាអ្នកក្បត់ព្រះយេស៊ូ បានមើលពាក្យបណ្ដឹងទាំងនោះ។ គាត់សោកស្ដាយយ៉ាងខ្លាំង ពេលគាត់ឃើញពួកគេកាត់ទោសព្រះយេស៊ូដូច្នេះ។ ដូច្នេះ គាត់ក៏យកប្រាក់៣០ដុំទៅឲ្យពួកសង្គ្រាជនិងពួកចាស់ទុំវិញ ទាំងពោលថា៖ «ខ្ញុំបានជាធ្វើបាប ដោយបញ្ជូនឈាមឥតមានទោសហួសទៅហើយ»។
ពួកគេឆ្លើយដោយគ្មានមេត្ដាថា៖ «តើនោះអំពល់អ្វីដល់យើង? ការនោះស្រេចនៅឯងទេតើ!»។ យូដាសក៏បាចប្រាក់នោះនៅក្នុងព្រះវិហារ ហើយចេញទៅក្រៅ ដោយប៉ុនប៉ងចងកសម្លាប់ខ្លួន។ ប៉ុន្តែ តាមមើលទៅ មែកឈើនោះដែលយូដាសយកខ្សែទៅចងក៏បាក់ ដែលធ្វើឲ្យគាត់ធ្លាក់ទៅក្រោមប៉ះថ្មធ្លាយពោះស្លាប់ទៅ។
ពួកសង្គ្រាជមិនដឹងថា នឹងយកប្រាក់នេះទៅធ្វើអ្វីទេ។ ពួកគេសន្និដ្ឋានថា៖ «ប្រាក់នេះគ្មានច្បាប់នឹងដាក់ទុកក្នុងឃ្លាំងទេ ពីព្រោះជាថ្លៃឈាម»។ ដូច្នេះ ក្រោយពីពិគ្រោះជាមួយគ្នារួចហើយ នោះពួកគេយកប្រាក់នេះទៅទិញដីវាលរបស់ជាងស្មូន ទុកសំរាប់ជាកន្លែងបញ្ចុះសពជនបរទេស។ ដូច្នេះ វាលនេះគេហៅថា«វាលឈាម»។
ពេលគេយកព្រះយេស៊ូទៅដំណាក់លោកអភិបាល គឺនៅព្រលឹមនៅឡើយ។ ប៉ុន្តែ ពួកយូដាដែលទៅជាមួយទ្រង់ បដិសេធមិនព្រមចូលទេ ពីព្រោះពួកគេជឿថា ការចូលទៅជិតស្និទ្ធជាមួយសាសន៍ដទៃបែបនេះ នឹងធ្វើឲ្យគេក្រខ្វក់។ ដូច្នេះ ដើម្បីតម្រូវចិត្តគេ លោកពីឡាត់ក៏ចេញទៅក្រៅជួបពួកគេ។ លោកសួរថា៖ «តើអ្នករាល់គ្នាចោទប្រកាន់មនុស្សនេះពីរឿងអ្វី?»។
ពួកគេឆ្លើយថា៖ «បើវាមិនមែនជាមនុស្សអាក្រក់ នោះយើងខ្ញុំមិនបានបញ្ជូនវាមកទេ»។
លោកពីឡាត់មិនចង់ប្រឡូកប្រឡាក់នឹងរឿងនេះទេ ដូច្នេះគាត់ក៏មានប្រសាសន៍ថា៖ «ចូរយកទៅជំនុំជំរះតាមច្បាប់របស់អ្នករាល់គ្នាចុះ!»។
ដោយលាតត្រដាងនូវបំណងចង់ធ្វើគុតទ្រង់ នោះពួកសាសន៍យូដាអះអាងថា៖ «យើងខ្ញុំគ្មានច្បាប់នឹងសំឡាប់អ្នកណាទេ»។ ប្រាកដហើយ ប្រសិនបើពួកគេធ្វើគុតព្រះយេស៊ូក្នុងកំឡុងបុណ្យរំលង នេះនឹងនាំឲ្យបណ្ដាជនជំទាស់ប្រឆាំងជាពុំខាន ពីព្រោះមនុស្សជាច្រើនគោរពព្រះយេស៊ូណាស់។ ប៉ុន្តែ បើពួកគេអាចឲ្យពួករ៉ូមប្រហារជីវិតទ្រង់ ដោយសារការចោទប្រកាន់ខាងនយោបាយ នេះនឹងជួយពួកគេឲ្យរួចខ្លួនពីការទទួលខុសត្រូវនៅចំពោះប្រជាជន។
ដូច្នេះ ពួកមេដឹកនាំសាសនា មិនបានប្រាប់នូវការកាត់ក្ដីដំបូង ដែលពួកគេកាត់ទោសព្រះយេស៊ូចំពោះការប្រមាថព្រះនោះទេ តែឥឡូវនេះពួកមេដឹកនាំសាសនាក៏ចាប់តាំងចោទប្រកាន់រឿងផ្សេងវិញទៀត។ ពួកគេបានចោទប្រកាន់បីយ៉ាង គឺថា៖ «យើងខ្ញុំបានឃើញមនុស្សនេះ [១]នាំបំភាន់សាសន៍យើងឲ្យវង្វេងចេញ [២]ក៏ហាមមិនឲ្យបង់ពន្ធថ្វាយសេសារផង [៣]ដោយលើកខ្លួនថាជាព្រះគ្រីស្ទ គឺជាស្តេចដែរ»។
ការចោទប្រកាន់ដែលថា ព្រះយេស៊ូអះអាងខ្លួនជាស្តេច ធ្វើឲ្យលោកពីឡាត់ព្រួយបារម្ភជាខ្លាំង។ ដូច្នេះលោកពីឡាត់ក៏ចូលទៅក្នុងសាលាជំនុំវិញ រួចហៅព្រះយេស៊ូមកសួរថា៖ «តើអ្នកជាស្តេចសាសន៍យូដាឬ?»។ បើនិយាយឲ្យចំទៅ គឺថាតើអ្នកបានបំពានច្បាប់ដោយប្រកាសថាខ្លួនជាស្តេចប្រឆាំងនឹងសេសារឬ?
ព្រះយេស៊ូចង់ដឹងថា លោកពីឡាត់ដឹងច្រើនប៉ុណ្ណាហើយអំពីទ្រង់ ដូច្នេះទ្រង់ក៏មានបន្ទូលសួរថា៖ «តើលោកមានប្រសាសន៍ដូច្នេះដោយខ្លួនលោក ឬមានអ្នកណាជំរាបលោកពីខ្ញុំ?»។
លោកពីឡាត់ពោលអះអាងថាមិនស្គាល់ទ្រង់ ហើយគាត់ប្រាប់ថាគាត់ចង់ដឹងហេតុការណ៍ពិតទាំងអស់។ លោកឆ្លើយថា៖ «តើខ្ញុំជាសាសន៍យូដាឬ? . . . គឺសាសន៍របស់អ្នកឯង នឹងពួកសង្គ្រាជទេតើ ដែលបញ្ជូនអ្នកមកខ្ញុំ ចុះអ្នកបានធ្វើអ្វី?»។
ព្រះយេស៊ូច្បាស់ជាមិនចង់បំបែរអារម្មណ៍គេចេញពីសាច់រឿងនៃអំណាចគ្រប់គ្រងជាស្តេចនោះទេ។ ចម្លើយដែលព្រះយេស៊ូប្រាប់គឺប្រាកដជាធ្វើឲ្យលោកពីឡាត់ភ្ញាក់ផ្អើលហើយ។ លូកា ២២:៦៦–២៣:៣; ម៉ាថាយ ២៧:១-១១; ម៉ាកុស ១៥:១; យ៉ូហាន ១៨:២៨-៣៥; កិច្ចការ ១:១៦-២០
▪ តើក្រុមប្រឹក្សាជាន់ខ្ពស់ជួបគ្នាម្ដងទៀតនៅព្រឹកថ្ងៃបន្ទាប់សំរាប់បំណងអ្វី?
▪ តើយូដាសស្លាប់យ៉ាងដូចម្ដេច? ហើយតើពួកសង្គ្រាជបានយកប្រាក់៣០ដុំទៅធ្វើអ្វី?
▪ ជាជាងធ្វើគុតទ្រង់ដោយខ្លួនឯង ហេតុអ្វីបានជាសាសន៍យូដាចង់ឲ្យពួករ៉ូមធ្វើគុតព្រះយេស៊ូ?
▪ តើពួកសាសន៍យូដាចោទប្រកាន់ព្រះយេស៊ូយ៉ាងណា?