បេសកកម្មទៅកាន់ស្រុកយូដាដែលប្រកបដោយសេចក្ដីមេត្ដាករុណា
ជំពូកទី៨៩
បេសកកម្មទៅកាន់ស្រុកយូដាដែលប្រកបដោយសេចក្ដីមេត្ដាករុណា
ប៉ុន្មានសប្ដាហ៍មុននេះ ក្នុងកំឡុងពេលមានពិធីបុណ្យឧទ្ទិសថ្វាយព្រះវិហារនៅក្នុងក្រុងយេរូសាឡិម នោះពួកសាសន៍យូដាបានខំរកធ្វើគុតព្រះយេស៊ូ។ ដូច្នេះ ព្រះយេស៊ូធ្វើដំណើរទៅទិសខាងជើង ជាកន្លែងដែលមិនឆ្ងាយប៉ុន្មានពីសមុទ្រកាលីឡេ។
នៅពេលថ្មីៗនេះ ទ្រង់បានយាងដំណើរទៅទិសខាងត្បូងឆ្ពោះទៅក្រុងយេរូសាឡិម ដោយផ្សព្វផ្សាយដំណឹងល្អតាមផ្លូវក្នុងស្រុកប៉េរ៉េ ដែលជាតំបន់នៅទិសខាងកើតនៃទន្លេយ័រដាន់។ ក្រោយពីបានប្រាប់រឿងប្រៀបប្រដូចអំពីបុរសអ្នកមាននិងឡាសាររួចមក ព្រះយេស៊ូបង្រៀនពួកសិស្សថែមទៀតពីអ្វីដែលទ្រង់បានបង្រៀនមុននេះកាលនៅស្រុកកាលីឡេ។
ជាក់ស្តែង ព្រះយេស៊ូមានបន្ទូលថា មានប្រយោជន៍ជាងបើបុគ្គលម្នាក់ «យកថ្មត្បាល់កិនយ៉ាងធំ ទៅចងកអ្នកនោះ ទំលាក់ចុះទៅក្នុងសមុទ្រ»ជាជាងឲ្យគាត់បណ្ដាលឲ្យ«កូនតូចណាមួយ»របស់ព្រះរវាតចិត្តនោះ។ ទ្រង់ក៏បានដៅបញ្ជាក់អំពីតម្រូវការឲ្យអត់ឱនទោសដែរ ដោយពន្យល់ថា៖ «បើ[បងប្អូនម្នាក់]ធ្វើបាបនឹងអ្នក៧ដងក្នុង១ថ្ងៃ ហើយត្រឡប់មកនិយាយនឹងអ្នក៧ដងថា ខ្ញុំប្រែចិត្តហើយ នោះត្រូវឲ្យអ្នកអត់ទោសដល់គាត់ជាកុំខាន»។
នៅពេលដែលពួកសិស្សទូលសុំថា៖ «សូមទ្រង់ចំរើនសេចក្ដីជំនឿដល់យើងខ្ញុំទៀតផង»។ នោះព្រះយេស៊ូមានបន្ទូលថា៖ «បើអ្នករាល់គ្នាមានសេចក្ដីជំនឿដូចគ្រាប់ពូជ១យ៉ាងល្អិត នោះនឹងនិយាយទៅដើមមននេះថា ‹ចូរឯងរលើងទៅដុះក្នុងសមុទ្រទៅ!› នោះគង់តែនឹងស្ដាប់បង្គាប់អ្នកដែរ»។ ដូច្នេះ សូម្បីតែមានជំនឿតិច ក៏អាចសម្រេចបានច្រើនដែរ។
បន្ទាប់មក ព្រះយេស៊ូរៀបរាប់ស្ថានការណ៍ពិតក្នុងជីវិត ដែលបញ្ជាក់នូវអាកប្បកិរិយាដ៏ត្រឹមត្រូវនៃអ្នកបំរើរបស់ព្រះដ៏មានព្រះចេស្ដាបំផុត។ ព្រះយេស៊ូមានបន្ទូលថា៖ «ក្នុងពួកអ្នករាល់គ្នា បើអ្នកណាមានបាវកំពុងតែភ្ជួរ ឬឃ្វាលសត្វ លុះកាលណាវាវិលមកពីចំការ តើនឹងនិយាយទៅវាភ្លាមថា មកអង្គុយស៊ីបាយសិនឬអី? គឺនឹងប្រាប់វាយ៉ាងនេះវិញទេតើថា ‹ចូររៀបចំអាហារឲ្យអញ រួចក្រវាត់ខ្លួនមកបំរើអញដែលកំពុងតែស៊ី រួចសឹមឯងស៊ីជាក្រោយចុះ!›។ តើចៅហ្វាយដឹងគុណបាវនោះ ដោយព្រោះវាធ្វើតាមបង្គាប់ឬដូចម្ដេច? ខ្ញុំយល់ថា មិនមែនទេ! ឯអ្នករាល់គ្នា ក៏ដូច្នោះដែរ កាលណាអ្នករាល់គ្នាបានធ្វើតាមបង្គាប់គ្រប់ជំពូកហើយ នោះត្រូវរាប់ថា យើងជាបាវបំរើឥតកំរៃដល់ម្ចាស់ទេ ដ្បិតយើងបានធ្វើត្រឹមតែការដែលយើងត្រូវធ្វើប៉ុណ្ណោះ»។ ដូច្នេះហើយ ពួកអ្នកបំរើរបស់ព្រះ មិនគប្បីមានអារម្មណ៍ថា ពួកគេជាអ្នកជួយព្រះដោយបំរើទ្រង់នោះទេ។ ផ្ទុយទៅវិញ ពួកគេគួរតែនឹកចាំជានិច្ចនូវឯកសិទ្ធិដែលពួកគេមានចំពោះការថ្វាយបង្គំទ្រង់ ជាសមាជិកដ៏គួរឲ្យទុកចិត្តក្នុងក្រុមគ្រួសាររបស់ទ្រង់វិញ។
តាមមើលទៅ ក្រោយពីព្រះយេស៊ូប្រទាននូវរឿងប្រៀបប្រដូចនេះ មានអ្នកនាំសារម្នាក់មកដល់។ នាងម៉ារានិងម៉ាថាជាបងស្រីរបស់ឡាសារ ដែលរស់នៅភូមិបេថានីនៅស្រុកយូដា បានបញ្ជូនអ្នកនាំសារនេះមក។ អ្នកនាំសារនេះទូលថា៖ «ព្រះអម្ចាស់អើយ! មើល! អ្នកដែលទ្រង់ស្រឡាញ់នោះគាត់ឈឺ»។
ព្រះយេស៊ូមានបន្ទូលឆ្លើយថា៖ «ជំងឺនេះមិនមែនដល់ស្លាប់ទេ គឺសំរាប់ជាកិត្ដិសព្ទដល់ព្រះវិញ ដើម្បីនឹងលើកដំកើងដល់ព្រះរាជបុត្រានៃព្រះ ដោយសារជំងឺនេះឯង»។ ក្រោយពីបានស្នាក់នៅកន្លែងនោះអស់ពីរថ្ងៃ នោះព្រះយេស៊ូមានបន្ទូលទៅពួកសិស្សរបស់ទ្រង់ថា៖ «ចូរយើងត្រឡប់ទៅឯស្រុកយូដាវិញ»។ ក៏ប៉ុន្តែ ពួកសិស្សទូលរំឭកទ្រង់ថា៖ «លោកគ្រូ! ពួកសាសន៍យូដាទើបនឹងរកចោលលោកនឹងថ្មពីមុននោះ ដូច្នេះ តើលោកគិតទៅឯណោះទៀតឬ?»។
ព្រះយេស៊ូមានបន្ទូលឆ្លើយថា៖ «ក្នុង១ថ្ងៃមាន១២ម៉ោងទេតើ បើអ្នកណាដើរនៅពេលថ្ងៃ នោះមិនជំពប់ជើងទេ ព្រោះឃើញពន្លឺលោកីយនេះ តែបើអ្នកណាដើរនៅពេលយប់ នោះត្រូវជំពប់ជើងវិញ ពីព្រោះគ្មានពន្លឺនៅក្នុងខ្លួនសោះ»។
តាមមើលទៅ ព្រះយេស៊ូមានន័យថា«ពេលថ្ងៃ» ឬពេលវេលាដែលព្រះបានរៀបទុកសំរាប់កិច្ចបំរើផ្សាយរបស់ព្រះយេស៊ូ គឺមិនទាន់កន្លងផុតនៅឡើយទេ ហើយបើមិនទាន់កន្លងផុត នោះគ្មានអ្នកណាអាចធ្វើអាក្រក់ចំពោះទ្រង់បានឡើយ។ ដូច្នេះទ្រង់ត្រូវឆ្លៀតយកឱកាសដែលសល់បន្ដិចបន្តួចពីនេះដែលជា«ពេលថ្ងៃ» ដ្បិតក្រោយមកនឹងមាន«ពេលយប់» គឺជាពេលដែលពួកសត្រូវរបស់ទ្រង់នឹងធ្វើគុតទ្រង់។
ព្រះយេស៊ូមានបន្ទូលទៀតថា៖ «ឡាសារ ជាសំឡាញ់យើង គាត់បានដេកលក់ទៅហើយ ខ្ញុំទៅដើម្បីនឹងដាស់គាត់ឡើង»។
យ៉ាងជាក់ស្តែងណាស់ ពួកសិស្សរបស់ទ្រង់គិតថា បើឡាសារកំពុងតែសម្រាន្ត នោះពិតជាល្អហើយ ដ្បិតគាត់នឹងងើបពីដេកវិញ ហើយពួកសិស្សក៏ទូលថា៖ «ព្រះអម្ចាស់អើយ! បើគាត់ដេកលក់ នោះគាត់នឹងបានជាវិញ»។
រួចមកព្រះយេស៊ូមានបន្ទូលទៅគេយ៉ាងច្បាស់ថា៖ «ឡាសារស្លាប់ហើយ ខ្ញុំក៏អរណាស់ ដោយយល់ដល់អ្នករាល់គ្នា ព្រោះខ្ញុំមិនបាននៅឯណោះ ដើម្បីឲ្យអ្នករាល់គ្នាបានជឿឥឡូវ ចូរយើងទៅឯគាត់ចុះ!»។
ថូម៉ាសដឹងថា មនុស្សអាចធ្វើគុតព្រះយេស៊ូនៅស្រុកយូដាបាន តែលោកចង់ការពារទ្រង់ណាស់ លោកក៏លើកទឹកចិត្តពួកសិស្សជាគូកនថា៖ «ចូរយើងរាល់គ្នាទៅដែរ ដើម្បីនឹងប្ដូរស្លាប់ជាមួយនឹងលោក»។ ដូច្នេះ ពួកសិស្សប្រថុយជីវិតរបស់ពួកគេ ដើម្បីទៅជាមួយព្រះយេស៊ូក្នុងបេសកកម្មទៅកាន់ស្រុកយូដាដែលប្រកបដោយសេចក្ដីមេត្ដាករុណា។ លូកា ១៣:២២; ១៧:១-១០; យ៉ូហាន ១០:២២, ៣១, ៤០-៤២; ១១:១-១៦
▪ នៅពេលថ្មីៗនេះ តើព្រះយេស៊ូបានផ្សព្វផ្សាយនៅកន្លែងណា?
▪ តើព្រះយេស៊ូបានបង្រៀនអ្វីម្ដងទៀត? តើស្ថានភាពពិតអ្វីដែលព្រះយេស៊ូរៀបរាប់? ហើយដើម្បីបញ្ជាក់នូវចំណុចអ្វី?
▪ តើព្រះយេស៊ូទទួលដំណឹងអ្វី? ហើយតើទ្រង់ចង់មានន័យយ៉ាងណា ដោយប្រើពាក្យ«ពេលថ្ងៃ»និង«ពេលយប់»នោះ?
▪ តើសំដីថូម៉ាសមានន័យយ៉ាងណា ពេលលោកនិយាយថា ‹ចូរយើងរាល់គ្នាទៅជាមួយទ្រង់ដែរ ដើម្បីនឹងប្ដូរស្លាប់ជាមួយនឹងទ្រង់›?
