ពិធីជ្រមុជទឹករបស់ព្រះយេស៊ូ
ជំពូកទី១២
ពិធីជ្រមុជទឹករបស់ព្រះយេស៊ូ
ប្រមាណប្រាំមួយខែក្រោយពីយ៉ូហានចាប់ផ្ដើមផ្សព្វផ្សាយ នោះព្រះយេស៊ូដែលឥឡូវមានព្រះជន្មាយុ៣០ឆ្នាំ ទ្រង់ក៏មកឯយ៉ូហាននៅត្រង់ទន្លេយ័រដាន់។ តើដោយមូលហេតុអ្វី? តើដើម្បីមកលេងជាមួយនឹងគាត់ឬ? តើព្រះយេស៊ូគ្រាន់តែចាប់អារម្មណ៍នឹងកិច្ចការរបស់យ៉ូហានដែលកំពុងតែរីកចំរើនឬ? មិនមែនទេ! ព្រះយេស៊ូបានសុំយ៉ូហានឲ្យធ្វើបុណ្យជ្រមុជទឹកឲ្យទ្រង់។
ភ្លាមនោះ យ៉ូហានប្រកែកថា៖ «ដូចម្ដេចបានជាទ្រង់យាងមកឯទូលបង្គំ គឺទូលបង្គំដែលត្រូវទទួលបុណ្យជ្រមុជពីទ្រង់វិញទេតើ?»។ យ៉ូហានដឹងថាប្អូនជីដូនមួយរបស់គាត់ គឺព្រះយេស៊ូជាបុត្រដ៏ពិសេសរបស់ព្រះ។ ដ្បិតយ៉ូហានបានបង្រះដោយសេចក្ដីអំណរនៅក្នុងផ្ទៃម្ដាយរបស់គាត់ កាលដែលម៉ារាមាតាព្រះយេស៊ូកំពុងតែមានទ្រង់ក្នុងផ្ទៃនៅឡើយបានទៅលេងនោះ! ម្ដាយរបស់យ៉ូហានឈ្មោះអេលីសាបិត ប្រាកដជាបានប្រាប់អំពីរឿងទាំងអស់នេះដល់គាត់ហើយ។ ហើយម្ដាយរបស់គាត់ក៏ច្បាស់ជាបានប្រាប់គាត់អំពីសេចក្ដីប្រកាសរបស់ទេវតា អំពីកំណើតរបស់ព្រះយេស៊ូ និងអំពីពួកទេវតាដែលលេចខ្លួនឲ្យពួកអ្នកគង្វាលឃើញ នៅក្នុងរាត្រីដែលព្រះយេស៊ូបានប្រសូតមកដែរ។
ដូច្នេះព្រះយេស៊ូមិនមែនជាបុគ្គលដែលប្លែកមុខចំពោះយ៉ូហាននោះឡើយ។ ហើយយ៉ូហានក៏ដឹងថាពិធីជ្រមុជទឹកដែលគាត់ធ្វើឡើង គឺមិនមែនសំរាប់ព្រះយេស៊ូនោះទេ។ នេះគឺសំរាប់អស់អ្នកដែលប្រែចិត្តពីអំពើបាបរបស់គេ ប៉ុន្តែព្រះយេស៊ូឥតមានបាបឡើយ។ ក៏ប៉ុន្តែ ទោះជាយ៉ូហានប្រកែកយ៉ាងណាក្ដី ព្រះយេស៊ូទទូចថា៖ «ចូរធ្វើម្ដងនេះចុះ! ដ្បិតគួរឲ្យយើងធ្វើសំរេចតាមគ្រប់ទាំងសេចក្ដីសុចរិតយ៉ាងដូច្នេះ»។
ហេតុអ្វីក៏ជាការត្រឹមត្រូវដែលព្រះយេស៊ូបានទទួលបុណ្យជ្រមុជទឹកនោះ? ពីព្រោះពិធីជ្រមុជទឹករបស់ព្រះយេស៊ូជានិមិត្តរូបមួយ មិនមែនជាការប្រែចិត្តពីអំពើបាបទេ ប៉ុន្តែគឺជាការថ្វាយអង្គទ្រង់ ដើម្បីធ្វើតាមបំណងព្រះហឫទ័យនៃព្រះវរបិតារបស់ទ្រង់។ ព្រះយេស៊ូធ្លាប់ធ្វើជាជាងឈើ ប៉ុន្តែឥឡូវគឺដល់ពេលឲ្យទ្រង់ចាប់ផ្ដើមកិច្ចបំរើ ដែលព្រះយេហូវ៉ាបានចាត់ទ្រង់ឲ្យមកធ្វើនៅលើផែនដីហើយ។ តើអ្នកគិតថា យ៉ូហានសង្ឃឹមថានឹងមានអ្វីមួយដ៏ចម្លែកនឹងកើតឡើង ពេលគាត់ធ្វើបុណ្យជ្រមុជទឹកឲ្យព្រះយេស៊ូឬទេ?
ក្រោយមក យ៉ូហានរាយការណ៍ថា៖ «ព្រះដែលចាត់ឲ្យខ្ញុំមកធ្វើបុណ្យជ្រមុជដោយទឹក ទ្រង់មានបន្ទូលមកខ្ញុំថា៖ ‹ដែលឯងឃើញព្រះវិញ្ញាណ យាងចុះមក សណ្ឋិតលើអ្នកណា គឺអ្នកនោះហើយ ដែលធ្វើបុណ្យជ្រមុជ ដោយព្រះវិញ្ញាណបរិសុទ្ធ›»។ ដូច្នេះយ៉ូហានដឹងយ៉ាងប្រាកដថានឹងមានវិញ្ញាណរបស់ព្រះ មកសណ្ឋិតលើបុគ្គលណាម្នាក់ដែលលោកធ្វើបុណ្យជ្រមុជទឹកឲ្យនោះ។ ដូច្នេះ គាត់មិនមានចិត្តភ្ញាក់ផ្អើលប៉ុន្មានទេ កាលដែលព្រះយេស៊ូយាងឡើងពីទឹក ហើយគាត់បានឃើញ «ព្រះវិញ្ញាណនៃព្រះ យាងចុះមកដូចជាសត្វព្រាប ក៏សណ្ឋិតលើទ្រង់»។
ក៏ប៉ុន្តែមានអ្វីច្រើនជាងនោះបានកើតមានឡើង ពេលដែលព្រះយេស៊ូបានទទួលបុណ្យជ្រមុជទឹក។ ‹មេឃក៏បើកឡើង› នៅចំពោះទ្រង់។ តើនេះមានន័យយ៉ាងដូចម្ដេច? តាមមើលទៅ នេះមានន័យថា កាលដែលទ្រង់កំពុងតែទទួលបុណ្យជ្រមុជទឹក នោះស្មារតីនឹកចាំអំពីជីវិតនៅស្ថានសួគ៌មុនទ្រង់កើតជាមនុស្ស បានមានឡើងវិញ។ ដូច្នេះហើយ ឥឡូវនេះព្រះយេស៊ូអាចនឹកចាំបានទាំងអស់អំពីជីវិតរបស់ទ្រង់ ជាបុត្រវិញ្ញាណរបស់ព្រះយេហូវ៉ា រួមបញ្ចូលអ្វីៗទាំងអស់ដែលព្រះបានមានបន្ទូលប្រាប់ទ្រង់នៅស្ថានសួគ៌ ក្នុងកំឡុងពេលដែលទ្រង់មានអត្ថិភាព មុននឹងទ្រង់កើតជាមនុស្ស។
លើសពីនេះទៅទៀត នៅក្នុងពេលដែលទ្រង់ទទួលបុណ្យជ្រមុជទឹក នោះមានសម្លេងចេញពីមេឃមកថា៖ «នេះជាកូនស្ងួនភ្ងារបស់អញ ជាទីពេញចិត្តអញណាស់!»។ តើនេះជាសម្លេងរបស់អ្នកណា? តើសម្លេងរបស់ព្រះយេស៊ូផ្ទាល់ឬ? ប្រាកដជាមិនមែនទេ! នេះគឺជាសម្លេងរបស់ព្រះ។ យ៉ាងច្បាស់ណាស់ ព្រះយេស៊ូជាបុត្រារបស់ព្រះ មិនមែនជាព្រះតែម្ដង ដូចមនុស្សខ្លះអះអាងនោះទេ។
យ៉ាងណាក៏ដោយ ព្រះយេស៊ូក៏ជាបុត្ររបស់ព្រះដែលមានសណ្ឋានជាមនុស្ស ដូចនឹងបុរសទីមួយអ័ដាមនោះដែរ។ លូកាជាសិស្សម្នាក់ ក្រោយរៀបរាប់អំពីបុណ្យជ្រមុជទឹករបស់ព្រះយេស៊ូ នោះគាត់សរសេរថា៖ «ឯព្រះយេស៊ូវ កាលទ្រង់ចាប់តាំងប្រារព្ធការ នោះទ្រង់មានព្រះជន្មប្រហែលជា៣០ឆ្នាំ ហើយតាមដែលគេគិតស្មាន នោះថាទ្រង់ជាកូនយ៉ូសែប ដែលជាកូនហេលី . . . ជាកូនដាវីឌ . . . ជាកូនអ័ប្រាហាំ . . . ជាកូនណូអេ . . . ជាកូនអ័ដាម អ័ដាមជាកូនព្រះ»។
ដូចអ័ដាមជាមនុស្សម្នាក់ «ជាកូនព្រះ» ដូច្នេះព្រះយេស៊ូក៏ជាបុត្រារបស់ព្រះដែរ។ ព្រះយេស៊ូជាបុរសឧត្តមបំផុតដែលធ្លាប់រស់នៅ ដែលបានឃើញជាក់ស្តែង ពេលយើងពិនិត្យមើលព្រះជន្មរបស់ព្រះយេស៊ូ។ ក៏ប៉ុន្តែ នៅឯបុណ្យជ្រមុជទឹករបស់ទ្រង់ នោះព្រះយេស៊ូក៏មានទំនាក់ទំនងថ្មីជាមួយព្រះម្ដងទៀត គឺដោយទ្រង់ក្លាយទៅជាបុត្រខាងវិញ្ញាណរបស់ព្រះមួយសាទៀត។ បើនិយាយប្រៀបធៀប ឥឡូវព្រះហៅព្រះយេស៊ូឲ្យមកស្ថានសួគ៌វិញ ដោយឲ្យទ្រង់ចាប់ផ្ដើមបំពេញកិច្ចការរបស់ព្រះហើយដល់ចុងបញ្ចប់នៃកិច្ចការនោះ គឺទ្រង់នឹងត្រូវបូជាព្រះជន្មជាមនុស្ស ទុកសំរាប់មនុស្សលោកដែលត្រូវបានផ្ដន្ទាទោស។ ម៉ាថាយ ៣:១៣-១៧; លូកា ៣:២១-៣៨; ១:៣៤-៣៦, ៤៤; ២:១០-១៤; យ៉ូហាន ១:៣២-៣៤; ហេព្រើរ ១០:៥-៩
▪ ហេតុអ្វីក៏ព្រះយេស៊ូមិនមែនជាមនុស្សប្លែកមុខចំពោះយ៉ូហាន?
▪ ដោយព្រោះទ្រង់ឥតប្រព្រឹត្តអំពើបាបសោះនោះ ហេតុអ្វីក៏ព្រះយេស៊ូទទួលបុណ្យជ្រមុជទឹក?
▪ ដោយយ៉ូហានដឹងនូវអ្វីដែលនឹងកើតឡើងចំពោះព្រះយេស៊ូ ហេតុអ្វីក៏គាត់ប្រហែលជាមិនភ្ញាក់ផ្អើល ពេលវិញ្ញាណរបស់ព្រះសណ្ឋិតលើព្រះយេស៊ូនោះ?
