ពីការយំសោក ត្រឡប់ទៅជាការសប្បាយរីករាយយ៉ាងខ្លាំង
ជំពូកទី៤៧
ពីការយំសោក ត្រឡប់ទៅជាការសប្បាយរីករាយយ៉ាងខ្លាំង
នៅពេលដែលលោកយ៉ៃរ៉ុសឃើញថា ស្ត្រីដែលមានជំងឺធ្លាក់ឈាមបានជាវិញ នោះទំនុកចិត្តរបស់លោកលើព្រះចេស្ដាដ៏គួរឲ្យស្ញប់ស្ញែងរបស់ព្រះយេស៊ូ ច្បាស់ជាបានបង្កើនឡើងមែន។ នៅដើមថ្ងៃនោះ លោកយ៉ៃរ៉ុសបានសុំឲ្យព្រះយេស៊ូទៅជួយកូនស្រីដ៏ជាទីស្រឡាញ់របស់គាត់ទើបតែមានអាយុ១២ឆ្នាំ ដែលកំពុងតែជិតស្លាប់ហើយនោះ។ ប៉ុន្តែ ឥឡូវនេះ អ្វីដែលលោកយ៉ៃរ៉ុសខ្លាចនោះបានកើតឡើងមែន។ កាលដែលព្រះយេស៊ូកំពុងតែមានបន្ទូលនឹងស្ត្រីនេះ នោះមានបុរសខ្លះមកជំរាបលោកយ៉ៃរ៉ុសថា៖ «កូនស្រីលោកស្លាប់ហើយ នៅតែរំខានចិត្តលោកគ្រូធ្វើអីទៀត»។
ការទទួលដំណឹងនេះច្បាស់ធ្វើឲ្យលោករន្ធត់ចិត្តមែន! សូមគិតមើលចុះ: បុរសនេះដែលមនុស្សក្នុងសហគមន៍គោរពយ៉ាងខ្លាំង ឥឡូវនេះអស់សង្ឃឹមទាំងស្រុង ពេលលោកឮអំពីមរណភាពរបស់កូនស្រីលោក។ ប៉ុន្តែ ព្រះយេស៊ូឮការសន្ទនានោះ។ ដូច្នេះ ទ្រង់បែរទៅលោកយ៉ៃរ៉ុស រួចមានបន្ទូលលើកទឹកចិត្តថា៖ «កុំខ្លាចអី! ឲ្យគ្រាន់តែជឿប៉ុណ្ណោះ»។
ព្រះយេស៊ូក៏យាងទៅជាមួយបុរសដែលមានទុក្ខយ៉ាងខ្លាំងនេះ ធ្វើដំណើរឆ្ពោះទៅផ្ទះរបស់លោកវិញ។ ពេលមកដល់ នោះឃើញមានមនុស្សជ្រួលច្របល់ ហើយទ្រហោយំយ៉ាងខ្លាំង។ ពួកបណ្ដាជនក៏បានមកទីនោះដែរ ថែមទាំងសោកសង្រេងជាខ្លាំង។ នៅពេលដែលព្រះយេស៊ូយាងចូល ទ្រង់មានបន្ទូលសួរថា៖ «ហេតុអ្វីបានជាកើតវឹកវរ ហើយយំដូច្នេះ កូននេះមិនមែនស្លាប់ទេ គឺវាដេកលក់ទេតើ?»។
ពេលឮដូច្នេះ បណ្ដាជនចំអកដាក់ព្រះយេស៊ូ ពីព្រោះគេដឹងច្បាស់ថានាងបានស្លាប់ពិតមែន។ ក៏ប៉ុន្តែ ព្រះយេស៊ូមានបន្ទូលថា នាងគ្រាន់តែដេកលក់ប៉ុណ្ណោះ។ ដោយព្រោះព្រះចេស្ដាដែលព្រះប្រទានមក នោះទ្រង់នឹងបង្ហាញបណ្ដាជនថា ទ្រង់អាចប្រោសមនុស្សស្លាប់ឲ្យរស់ឡើងវិញ ដូចជាការដាស់ពួកគេឲ្យភ្ញាក់ពីការដេកលក់ស៊ប់ដែរ។
ឥឡូវនេះ ព្រះយេស៊ូឲ្យបណ្ដាជនចេញទៅខាងក្រៅ លើកលែងតែពេត្រុស យ៉ាកុប យ៉ូហាន និងឪពុកម្ដាយក្មេងស្រីនោះប៉ុណ្ណោះ។ រួចមក ទ្រង់ឲ្យមនុស្សទាំងប្រាំនាក់នេះដែលនៅជាមួយទ្រង់ ឲ្យចូលទៅជិតគ្រែដែលក្មេងស្រីនេះគេង។ ព្រះយេស៊ូចាប់ដៃនាងមានបន្ទូលថា៖ «តាលីថាគូមី»ស្រាយថា កូនស្រីអើយ! អញប្រាប់ឲ្យឯងក្រោកឡើង!»។ រំពេចនោះកូនស្រីនេះក៏ក្រោកឡើងដើរទៅ! ពេលឃើញដូច្នេះ ឪពុកម្ដាយនាងមានសេចក្ដីអស្ចារ្យក្រៃលែង។
ក្រោយមកទ្រង់ប្រាប់គេឲ្យយកចំណីអាហារមកឲ្យក្មេងស្រីនេះបរិភោគ ថែមទាំងទ្រង់ហាមយ៉ៃរ៉ុសនិងប្រពន្ធលោកមិនឲ្យប្រាប់នរណាដឹងពីរឿងនេះឡើយ។ ប៉ុន្តែ ទោះជាព្រះយេស៊ូមានបន្ទូលដូច្នេះក៏ដោយ តែការនិយាយអំពីរឿងនេះគឺឮសុសសាយគ្រប់តំបន់ទាំងអស់។ នេះជាការប្រោសឲ្យរស់ឡើងវិញលើកទីពីរដែលព្រះយេស៊ូបានធ្វើ។ ម៉ាថាយ ៩:១៨-២៦; ម៉ាកុស ៥:៣៥-៤៣; លូកា ៨:៤១-៥៦
▪ តើលោកយ៉ៃរ៉ុសទទួលដំណឹងអ្វី? ហើយតើព្រះយេស៊ូលើកទឹកចិត្តគាត់យ៉ាងណា?
▪ ពេលព្រះយេស៊ូនិងលោកយ៉ៃរ៉ុសមកដល់ផ្ទះ តើមានស្ថានការណ៍យ៉ាងណា?
▪ ហេតុអ្វីបានជាព្រះយេស៊ូមានបន្ទូលថា ក្មេងស្លាប់នេះគ្រាន់តែដេកលក់ប៉ុណ្ណោះ?
▪ តើមនុស្សប្រាំនាក់ដែលឃើញព្រះយេស៊ូប្រោសក្មេងស្រីឲ្យរស់ឡើងវិញនេះ ជាអ្នកណាខ្លះ?