ពួកគេចាប់ព្រះយេស៊ូពុំបាន
ជំពូកទី១០៨
ពួកគេចាប់ព្រះយេស៊ូពុំបាន
ដោយសារព្រះយេស៊ូបានបង្រៀននៅឯព្រះវិហារ និងទើបតែបានប្រាប់ពួកសត្រូវរបស់ទ្រង់នូវរឿងប្រៀបប្រដូចបី ដែលលាតត្រដាងនូវអំពើអាក្រក់របស់ពួកគេ នោះពួកផារីស៊ីខឹងយ៉ាងខ្លាំង ហើយក៏ពិគ្រោះគ្នារិះរកមធ្យោបាយចាប់កំហុសទ្រង់ ដើម្បីឲ្យទ្រង់មានបន្ទូលអំពីអ្វីមួយ ដែលពួកគេអាចចាប់ទ្រង់ដាក់គុក។ ពួកគេរិះរកមធ្យោបាយមួយ ហើយចាត់ពួកសិស្សរបស់គេឲ្យរួមដៃជាមួយពួកដែលនៅខាងស្តេចហេរ៉ូឌដើម្បីចាប់ព្រះយេស៊ូ។
ពួកអ្នកទាំងនេះពោលថា៖ «លោកគ្រូ! យើងខ្ញុំដឹងថា លោកពិតត្រង់ ហើយថា លោកបង្រៀនពីផ្លូវព្រះដោយសេចក្ដីពិត ឥតមានអំពល់ដល់អ្នកណាឡើយ ព្រោះលោកមិនយល់មុខមនុស្សណាទេ ដូច្នេះ សូមប្រាប់យើងខ្ញុំដែលលោកគិតដូចម្ដេច តើមានច្បាប់នឹងបង់ពន្ធថ្វាយសេសារឬទេ?»។
ព្រះយេស៊ូមិនចាញ់បញ្ឆោតនឹងពាក្យបញ្ជោរនោះទេ។ ទ្រង់ជ្រាបថា ប្រសិនបើទ្រង់មានបន្ទូលថា ‹អត់ទេ! គឺមិនមានច្បាប់ ឬមិនត្រូវបង់ពន្ធ› នោះទ្រង់នឹងជាប់ទោសពីការនាំបំបះបំបោរប្រឆាំងពួករាជការរ៉ូម។ តែបើទ្រង់មានបន្ទូលថា ‹ត្រូវហើយ! អ្នកត្រូវបង់ពន្ធ› នោះពួកសាសន៍យូដាដែលស្អប់នូវការចុះចូលនឹងអំណាចរបស់ពួករាជការរ៉ូម ពួកគេនឹងស្អប់ទ្រង់ជាក់ជាពុំខាន។ ដូច្នេះទ្រង់ក៏មានបន្ទូលតបថា៖ «មនុស្សកំពុតអើយ! ហេតុអ្វីបានជាអ្នករាល់គ្នាល្បងខ្ញុំដូច្នេះ? ចូរបង្ហាញប្រាក់ដែលបង់ពន្ធមកឲ្យខ្ញុំមើលចុះ!»។
ពេលពួកគេយកប្រាក់កាក់មកថ្វាយទ្រង់ទត នោះទ្រង់មានបន្ទូលសួរថា៖ «រូបនេះ នឹងឈ្មោះនេះ តើជារបស់អ្នកណា?»។
ពួកគេទូលឆ្លើយថា៖ «របស់សេសារ»។
«ដូច្នេះ ចូរថ្វាយរបស់សេសារ ទៅសេសារទៅ ឯរបស់ព្រះ ចូរថ្វាយទៅព្រះវិញ»។ ពេលពួកបុរសនេះឮចម្លើយដ៏វាងវៃរបស់ព្រះយេស៊ូ នោះពួកគេកោតស្ងើចយ៉ាងខ្លាំង រួចក៏ចេញពីទ្រង់ទៅឲ្យទ្រង់គង់នៅម្នាក់ឯង។
ពួកសាឌូស៊ីដែលពុំជឿលើដំណើររស់ឡើងវិញ ពេលឃើញថា ពួកផារីស៊ីបរាជ័យពីការរកចាប់កំហុសព្រះយេស៊ូហើយនោះ ពួកគេក៏ចូលមកគាល់ទ្រង់ ហើយទូលសួរទ្រង់ថា៖ «លោកគ្រូ! លោកម៉ូសេបានផ្ដាំថា ‹បើអ្នកណាស្លាប់ទៅឥតមានកូន នោះ ប្អូនត្រូវយកប្រពន្ធរបស់បង ដើម្បីនឹងបង្កើតពូជឲ្យបងខ្លួន›។ រីឯនៅក្នុងពួកយើងខ្ញុំ មានបងប្អូន៧នាក់ បងច្បងបានយកប្រពន្ធ ហើយស្លាប់ទៅគ្មានកូនសោះ បានទុកប្រពន្ធឲ្យប្អូន ប្អូនបន្ទាប់ក៏ធ្វើដូចគ្នា រួចប្អូនទី៣ ដរាបដល់ប្អូនពៅបំផុត ក្រោយបង្អស់មក ស្ត្រីនោះក៏ស្លាប់ទៅដែរ ដូច្នេះ ដល់គ្រារស់ឡើងវិញ តើនាងនោះនឹងត្រូវធ្វើជាប្រពន្ធរបស់អ្នកណា ក្នុងបណ្ដាបងប្អូនទាំង៧នាក់នោះ ដ្បិតសុទ្ធតែបានយកនាងធ្វើជាប្រពន្ធគ្រប់ៗគ្នា»។
ព្រះយេស៊ូមានបន្ទូលឆ្លើយទៅពួកគេថា៖ «ដូច្នេះ អ្នករាល់គ្នាភាន់ច្រឡំទេតើ ពីព្រោះមិនស្គាល់គម្ពីរ ឬព្រះចេស្ដានៃព្រះ ដ្បិតកាលណាមនុស្សរស់ពីស្លាប់ឡើងវិញ នោះមិនដែលយកគ្នាជាប្ដីប្រពន្ធទៀតទេ គេបានដូចជាទេវតានៅស្ថានសួគ៌វិញ ឯដំណើរដែលមនុស្សស្លាប់រស់ឡើងវិញ នោះតើអ្នករាល់គ្នាមិនបានមើលរឿងពីគុម្ពបន្លា ដែលមាននៅក្នុងគម្ពីររបស់លោកម៉ូសេទេឬ? . . . ដែលព្រះទ្រង់មានបន្ទូលនឹងលោកថា ‹អញជាព្រះនៃអ័ប្រាហាំ ជាព្រះនៃអ៊ីសាក ហើយជាព្រះនៃយ៉ាកុប› ទ្រង់មិនមែនជាព្រះនៃមនុស្សស្លាប់ទេ គឺជាព្រះនៃមនុស្សរស់វិញទេតើ អ្នករាល់គ្នាភាន់ច្រឡំខ្លាំងណាស់»។
ពួកបណ្ដាជនបានកោតស្ងើចនឹងចម្លើយរបស់ព្រះយេស៊ូម្ដងទៀត។ សូម្បីតែពួកអាចារ្យខ្លះក៏ទទួលស្គាល់ថា៖ «លោកគ្រូ! លោកមានប្រសាសន៍ត្រូវណាស់!»។
ពេលពួកផារីស៊ីឃើញថា ព្រះយេស៊ូធ្វើឲ្យពួកសាឌូស៊ីទ័លប្រាជ្ញាដូច្នេះ នោះពួកគេនាំគ្នាមកគាល់ទ្រង់ជាក្រុមតែមួយ។ ដើម្បីល្បងលព្រះយេស៊ូទៀត នោះមានអាចារ្យស្ក្រែបម្នាក់ទូលសួរថា៖ «លោកគ្រូ! ក្នុងបណ្ដាក្រិត្យវិន័យ តើបញ្ញត្តណាដែលយ៉ាងសំខាន់បំផុត?»។
ព្រះយេស៊ូមានបន្ទូលឆ្លើយថា៖ «ឯបញ្ញត្តដែលសំខាន់ជាងគេ នោះគឺថា‹ចូរស្ដាប់ចុះ! អ៊ីស្រាអែលអើយ! [ព្រះយេហូវ៉ា] ជាព្រះនៃយើងខ្ញុំ ទ្រង់ជា[ព្រះយេហូវ៉ា]តែ១ព្រះអង្គទ្រង់ ហើយឯងត្រូវស្រឡាញ់ ដល់[ព្រះយេហូវ៉ា] ជាព្រះនៃឯង ឲ្យអស់អំពីចិត្ត អស់អំពីព្រលឹង អស់អំពីគំនិត ហើយអស់អំពីកំឡាំងនៃឯង›។ នោះហើយជាបញ្ញត្តទី១ ឯបញ្ញត្តទី២ ក៏បែបដូចគ្នា គឺថា‹ត្រូវឲ្យស្រឡាញ់អ្នកជិតខាងដូចខ្លួនឯង›គ្មានបញ្ញត្តណាទៀតធំជាងបទទាំង២នេះទេ»។ តាមការពិត ព្រះយេស៊ូមានបន្ទូលបន្ថែមថា៖ «បណ្ដាក្រិត្យវិន័យ នឹងអស់ទាំងទំនាយហោរាទាំងប៉ុន្មាន ក៏សំរេចនៅបទបញ្ញត្តទាំង២ប្រការនេះឯង»។
អាចារ្យនោះក៏ឯកភាព ហើយទូលទ្រង់ថា៖ «មែនហើយ! លោកគ្រូ លោកមានប្រសាសន៍ត្រូវណាស់ថា ‹មានព្រះតែ១ ហើយក្រៅពីទ្រង់ គ្មានព្រះណាទៀតសោះ› ហើយដែលស្រឡាញ់ទ្រង់អស់ពីចិត្ត អស់ពីប្រាជ្ញា អស់ពីព្រលឹង នឹងអស់ពីកំឡាំង ហើយដែលស្រឡាញ់អ្នកជិតខាងដូចខ្លួនឯង នោះវិសេសលើសជាងអស់ទាំងដង្វាយដុត នឹងយញ្ញបូជាទាំងប៉ុន្មានទៅទៀត»។
កាលព្រះយេស៊ូបានឃើញថា អាចារ្យនេះឆ្លើយដោយប្រាជ្ញា នោះទ្រង់ក៏មានបន្ទូលទៅគាត់ថា៖ «អ្នកមិនឆ្ងាយពីនគរព្រះទេ»។
ព្រះយេស៊ូបានបង្រៀននៅឯព្រះវិហារអស់រយៈពេលបីថ្ងៃហើយ គឺថ្ងៃអាទិត្យ ថ្ងៃច័ន្ទ និងថ្ងៃអង្គារ។ បណ្ដាជនបានស្ដាប់ទ្រង់ទាំងមានចិត្តរីករាយ តែពួកមេដឹកនាំសាសនាចង់ធ្វើគុតទ្រង់។ ប៉ុន្តែ មកដល់ឥឡូវនេះ ការប៉ុនប៉ងធ្វើគុតនេះតែងបរាជ័យរាល់លើក។ ម៉ាថាយ ២២:១៥-៤០; ម៉ាកុស ១២:១៣-៣៤; លូកា ២០:២០-៤០
▪ តើពួកផារីស៊ីរិះរកមធ្យោបាយអ្វីដើម្បីចាប់ព្រះយេស៊ូ? ហើយបើទ្រង់ឆ្លើយថា ត្រូវឬក៏មិនត្រឹមត្រូវ នោះតើនឹងមានលទ្ធផលយ៉ាងណា?
▪ តើតាមរបៀបណាដែលព្រះយេស៊ូធ្វើឲ្យបរាជ័យនូវការប៉ុនប៉ងរបស់ពួកសាឌូស៊ី ដែលរកចាប់កំហុសទ្រង់នោះ?
▪ តើពួកផារីស៊ីល្បងលព្រះយេស៊ូយ៉ាងណាទៀត? ហើយតើមានលទ្ធផលយ៉ាងណា?
▪ ក្នុងកំឡុងកិច្ចបំរើចុងក្រោយនៅក្រុងយេរូសាឡិម តើព្រះយេស៊ូបង្រៀនប៉ុន្មានថ្ងៃនៅក្នុងព្រះវិហារ? ហើយតើមានលទ្ធផលយ៉ាងណា?
