ពេលឡាសារបានត្រូវប្រោសឲ្យរស់ឡើងវិញ
ជំពូកទី៩១
ពេលឡាសារបានត្រូវប្រោសឲ្យរស់ឡើងវិញ
ព្រះយេស៊ូនិងពួកអ្នកដែលទៅជាមួយទ្រង់ ឥឡូវក៏មកដល់ផ្នូររបស់ឡាសារ។ តាមការពិត ផ្នូរនេះគឺជារូងភ្នំដែលមានផ្ទាំងថ្មបាំងនៅមាត់រូង។ ព្រះយេស៊ូមានបន្ទូលថា៖ «ចូរយកថ្មចេញ!»។
តែម៉ាថាជំទាស់ ដ្បិតនាងមិនទាន់យល់នូវអ្វីដែលព្រះយេស៊ូបំរុងនឹងធ្វើទេ។ ម៉ាថាទូលថា៖ «ព្រះអម្ចាស់អើយ! ខ្មោចនេះធុំក្លិនហើយ ព្រោះស្លាប់កន្លងមកបាន៤ថ្ងៃ»។
ប៉ុន្តែព្រះយេស៊ូមានបន្ទូលសួរថា៖ «តើខ្ញុំមិនបានប្រាប់នាងថា បើសិនជានាងជឿ នោះនាងនឹងឃើញសិរីល្អនៃព្រះទេឬ?»។
ដូច្នេះ គេក៏ប្រមៀលផ្ទាំងថ្មចេញ។ រួចព្រះយេស៊ូងើបព្រះនេត្រទៅលើ មានបន្ទូលថា៖ «ឱព្រះវរបិតាអើយ! ទូលបង្គំអរព្រះគុណដល់ព្រះអង្គ ដោយព្រោះទ្រង់បានអនុញ្ញាតតាមទូលបង្គំ ទូលបង្គំដឹងថា ទ្រង់អនុញ្ញាតតាមទូលបង្គំជាដរាប តែដែលទូលបង្គំទូលដូច្នេះ គឺដោយព្រោះតែបណ្ដាមនុស្សដែលឈរនៅជុំវិញទេ ដើម្បីឲ្យគេជឿថា ទ្រង់បានចាត់ឲ្យទូលបង្គំមកមែន»។ ព្រះយេស៊ូអធិស្ឋានជាសាធារណៈដើម្បីឲ្យមនុស្សដឹងថា អ្វីដែលទ្រង់ហៀបនឹងធ្វើនោះបានសម្រេចមកពីព្រះចេស្ដារបស់ព្រះទេ។ រួចមកព្រះយេស៊ូបន្លឺព្រះសូរសៀងឡើងថា៖ «ឡាសារអើយ! ចូរចេញមក!»។
ភ្លាមនោះ ឡាសារក៏ចេញមក មានទាំងសំពត់ស្នបរុំជាប់នៅជើងដៃផង ហើយមានកន្សែងគ្របមុខដែរ។ ព្រះយេស៊ូមានបន្ទូលថា៖ «ចូរស្រាយគាត់ឲ្យដើរទៅចុះ!»។
ជនជាតិយូដាជាច្រើននាក់ដែលមកជួយរំលែកទុក្ខម៉ារានិងម៉ាថា បានឃើញអព្ភូតហេតុនេះក៏មានជំនឿលើព្រះយេស៊ូ។ ប៉ុន្តែ មានអ្នកខ្លះទៅប្រាប់ពួកផារីស៊ីនូវអ្វីដែលបានកើតឡើង។ ពួកផារីស៊ីនិងពួកសង្គ្រាជប្រមូលក្រុមប្រឹក្សាជាន់ខ្ពស់មកប្រជុំគ្នាភ្លាម។
ក្រុមប្រឹក្សាជាន់ខ្ពស់រួមបញ្ចូលសម្ដេចសង្ឃ លោកកៃផា ពួកផារីស៊ី ពួកសាឌូស៊ី ពួកសង្គ្រាជ និងអតីតពួកសង្គ្រាជដែរ។ ពួកអ្នកទាំងនេះនិយាយថា៖ «តើយើងត្រូវធ្វើដូចម្ដេច ព្រោះមនុស្សនេះធ្វើទីសំគាល់ច្រើនណាស់ បើយើងទុកឲ្យធ្វើតែយ៉ាងដូច្នេះទៅ នោះមុខជាមនុស្សទាំងអស់នឹងជឿតាមវាហើយ រួចសាសន៍រ៉ូមនឹងមកចាប់យកទាំងស្រុក នឹងជាតិយើងផង»។
ពួកមេដឹកនាំសាសនាខ្វល់ខ្វាយតែឋានៈនិងអំណាចរបស់ពួកគេតែប៉ុណ្ណោះ ទោះជាពួកគេសារភាពថាព្រះយេស៊ូបាន«ធ្វើទីសំគាល់ច្រើនណាស់»ក៏ដោយ។ ការប្រោសឡាសារឲ្យរស់ឡើងវិញ ជាអ្វីដែលធ្វើឲ្យអបកិត្ដិយសដល់ពួកសាឌូស៊ី ពីព្រោះពួកគេឥតជឿលើដំណើររស់ឡើងវិញទេ។
សម្ដេចសង្ឃកៃផា ដែលប្រហែលជាសាឌូស៊ីម្នាក់ ឥឡូវនេះក៏មានប្រសាសន៍ថា៖ «អ្នករាល់គ្នាមិនដឹងអ្វីសោះ ក៏មិនគិតពិចារណាឃើញថា បើមានមនុស្សម្នាក់ស្លាប់ជំនួសបណ្ដាជន នោះមានប្រយោជន៍ ដល់អ្នករាល់គ្នាជាជាង ដើម្បីកុំឲ្យជាតិយើងនេះត្រូវវិនាសទាំងអស់ឡើយ»។
ព្រះបានបណ្ដាលឲ្យលោកកៃផាមានប្រសាសន៍ដូច្នេះ ដ្បិតក្រោយមកសាវ័កយ៉ូហានបានសរសេរថា៖ «តែលោក[កៃផា]មិននិយាយសេចក្ដីនោះ ដោយអាងតែខ្លួនលោកទេ»។ លោកកៃផាចង់មានន័យថា ពួកគេគួរធ្វើគុតព្រះយេស៊ូ ដើម្បីបង្ការទ្រង់កុំឲ្យបង្អាប់បង្អោនឋានៈ អំណាចនិងអានុភាពរបស់ពួកគេថែមទៀត។ ក៏ប៉ុន្តែ យោងទៅតាមសាវ័កយ៉ូហាន ‹លោកកៃផាបានទាយថា ព្រះយេស៊ូនឹងសោយទិវង្គត មិនគ្រាន់តែសំរាប់សាសន៍មួយប៉ុណ្ណោះ តែដើម្បីឲ្យកូនរបស់ព្រះបានប្រមូលមកជុំគ្នា›។ ប្រាកដហើយ ព្រះមានបំណងឲ្យបុត្រារបស់ទ្រង់សោយទិវង្គត ជាតម្លៃលោះសំរាប់មនុស្សលោកទាំងអស់។
ឥឡូវនេះ លោកកៃផាបានបញ្ចុះបញ្ចូលឲ្យក្រុមប្រឹក្សាជាន់ខ្ពស់ រៀបគម្រោងការធ្វើគុតព្រះយេស៊ូបានសម្រេចហើយ។ តែព្រះយេស៊ូយាងចេញពីទីនោះទៅ ប្រហែលដោយជ្រាបអំពីរឿងនេះពីលោកនីកូដេមដែលជាសមាជិកម្នាក់នៃក្រុមប្រឹក្សាជាន់ខ្ពស់ ដែលស្រឡាញ់រាប់អានទ្រង់។ យ៉ូហាន ១១:៣៨-៥៤
▪ ហេតុអ្វីបានជាព្រះយេស៊ូអធិស្ឋានជាសាធារណៈ មុននឹងប្រោសឡាសារឲ្យរស់ឡើងវិញ?
▪ តើពួកអ្នកដែលឃើញដំណើររស់ឡើងវិញនេះមានទឹកចិត្តយ៉ាងណា?
▪ តើអ្វីដែលលាតត្រដាងនូវអំពើកំណាចនៃសមាជិកក្នុងក្រុមប្រឹក្សាជាន់ខ្ពស់?
▪ តើលោកកៃផាមានបំណងយ៉ាងណា? ប៉ុន្តែ តើព្រះប្រើលោកឲ្យទាយអំពីអ្វី?
