ព្រះយេស៊ូនិងពួកហោរ
ជំពូកទី៧
ព្រះយេស៊ូនិងពួកហោរ
បុរសមួយក្រុមកំពុងតែធ្វើដំណើរមកពីទិសខាងកើត។ ពួកគេជាពួកហោរ គឺជាអ្នកដែលអះអាងថា ចេះទាយអំពីដំណើរនៃទីតាំងរបស់ផ្កាយនានា។ កាលដែលពួកគេកំពុងតែនៅឯផ្ទះរបស់ពួកគេនៅទិសខាងកើតនោះ ពួកគេបានឃើញផ្កាយថ្មីមួយ ហើយពួកគេក៏បានធ្វើដំណើរតាមផ្កាយនោះអស់រាប់រយគីឡូម៉ែត្រទើបបានមកដល់ទីក្រុងយេរូសាឡិម។
នៅពេលដែលពួកហោរបានមកដល់ទីក្រុងយេរូសាឡិម នោះពួកគេសួរថា៖ «តើព្រះអង្គដែលប្រសូតមក ធ្វើជាស្តេចសាសន៍យូដា ទ្រង់គង់នៅឯណា? ពីព្រោះយើងបានឃើញផ្កាយរបស់ទ្រង់ ពីទិសខាងកើតមក ហើយយើងមកថ្វាយបង្គំទ្រង់»។
កាលស្តេចហេរ៉ូឌនៅទីក្រុងយេរូសាឡិមបានឮអំពីដំណឹងនេះ នោះទ្រង់រកាំព្រះទ័យណាស់។ ដូច្នេះ ទ្រង់ក៏ហៅពួកសង្គ្រាជមកសាកសួរពីទីកន្លែងដែលព្រះគ្រីស្ទប្រសូត។ ដោយសំអាងលើការតបឆ្លើយរបស់គេលើបទគម្ពីរ នោះគេឆ្លើយថា៖ «នៅឯភូមិបេថ្លេហិម»។ ភ្លាមនោះ ស្តេចហេរ៉ូឌក៏បញ្ជាឲ្យគេនាំពួកហោរមកឯទ្រង់ ហើយមានបន្ទូលប្រាប់ពួកគេថា៖ «ចូរអ្នករាល់គ្នាទៅស៊ើបដំណឹង ពីកូនតូចនោះឲ្យច្បាស់លាស់ កាលណាបានឃើញហើយ នោះត្រូវមកប្រាប់ដល់យើងវិញ ដើម្បីឲ្យយើងបានទៅថ្វាយបង្គំដែរ»។ ប៉ុន្តែ តាមពិតទៅ ស្តេចហេរ៉ូឌចង់រកព្រះឱរសនេះដើម្បីធ្វើគុតទេ!
ក្រោយពីពួកគេចេញទៅ នោះមានអ្វីដ៏អស្ចារ្យកើតឡើង។ ផ្កាយដែលពួកគេបានឃើញពីទិសខាងកើតនោះកំពុងតែនាំផ្លូវពួកគេ។ យ៉ាងច្បាស់ណាស់ នេះមិនមែនជាផ្កាយធម្មតាទេ ក៏ប៉ុន្តែគឺបានមានមកយ៉ាងវិសេសដើម្បីនាំផ្លូវពួកគេ។ ពួកហោរធ្វើដំណើរតាមផ្កាយនោះ ដរាបដល់ផ្កាយឈប់ចំពីលើផ្ទះដែលយ៉ូសែបនិងម៉ារាកំពុងតែស្នាក់នៅ។
នៅពេលដែលពួកហោរចូលទៅក្នុងផ្ទះ នោះពួកគេឃើញម៉ារានៅជាមួយបុត្រតូចនេះ គឺជាព្រះឱរសយេស៊ូ។ រួចពួកគេក៏ក្រាបថ្វាយបង្គំព្រះអង្គ។ ហើយពួកគេក៏បើកហឹបយកទ្រព្យមកថ្វាយតង្វាយជាមាស កំញាន និងជ័រល្វីងទេស។ ក្រោយមក នៅពេលពួកគេរៀបនឹងត្រឡប់ទៅវិញ ដើម្បីទៅប្រាប់ស្តេចហេរ៉ូឌអំពីទីកន្លែងនៃបុត្រដ៏តូចនេះ នោះព្រះបានព្រមានប្រាប់ពួកគេក្នុងសុបិនមិនឲ្យពួកគេប្រាប់ទេ។ ដូច្នេះ ពួកគេក៏វិលត្រឡប់ទៅស្រុករបស់ខ្លួនវិញតាមផ្លូវមួយផ្សេងទៀត។
តើនរណាដែលអ្នកគិតថា បានឲ្យផ្កាយមួយនេះធ្វើដំណើរនៅលើមេឃ ដើម្បីនាំផ្លូវពួកហោរនោះ? សូមចាំថា ផ្កាយនេះមិនបាននាំផ្លូវពួកគេទៅដល់ភូមិបេថ្លេហិម ជាកន្លែងដែលព្រះយេស៊ូប្រសូតមកភ្លាមៗនោះទេ។ ផ្ទុយទៅវិញ គឺនាំផ្លូវពួកគេទៅក្រុងយេរូសាឡិម ដើម្បីឲ្យពួកគេបានមកជួបស្តេចហេរ៉ូឌដែលមានព្រះទ័យចង់ធ្វើគុតដល់ព្រះយេស៊ូនោះ។ ហើយស្តេចនេះនឹងធ្វើគុតមែន ប្រសិនបើព្រះមិនបានធ្វើអន្តរាគមន៍ ហើយព្រមានប្រាប់ពួកហោរ មិនឲ្យប្រាប់ស្តេចហេរ៉ូឌអំពីទីកន្លែងដែលព្រះយេស៊ូគង់នៅនោះទេ។ ប៉ុន្តែ សត្រូវរបស់ព្រះគឺអារក្សសាតាំងចង់ធ្វើគុតដល់ព្រះយេស៊ូ ហើយវាបានប្រើផ្កាយនោះ ដើម្បី នឹងសម្រេចគោលបំណងរបស់វា។ ម៉ាថាយ ២:១-១២; មីកា ៥:១
▪ តើអ្វីដែលបង្ហាញថា ផ្កាយដែលពួកហោរបានឃើញ មិនមែនជាផ្កាយធម្មតានោះ?
▪ តើព្រះឱរសយេស៊ូគង់នៅកន្លែងណា ពេលពួកហោររកឃើញទ្រង់នោះ?
▪ ហេតុអ្វីក៏យើងដឹងថា សាតាំងជាអ្នកធ្វើឲ្យមានផ្កាយនេះដើម្បីនាំផ្លូវពួកហោរ?
