ព្រះយេស៊ូបញ្ចប់នូវកិច្ចការទាំងអស់ដែលព្រះបង្គាប់
ជំពូកទី១៣៣
ព្រះយេស៊ូបញ្ចប់នូវកិច្ចការទាំងអស់ដែលព្រះបង្គាប់
ព្រះយេស៊ូគ្រីស្ទជាស្តេចហើយជាអ្នកចម្បាំង ពេលទ្រង់បំផ្លាញចោលសាតាំងនិងពិភពលោកដ៏ទុច្ចរិតរបស់វា នោះនឹងនាំឲ្យមានសេចក្ដីអំណរយ៉ាងណាទៅហ្ន៎! នៅទីបំផុត ព្រះយេស៊ូនឹងចាប់ផ្ដើមសោយរាជ្យអស់រយៈពេលមួយពាន់ឆ្នាំដែលពោរពេញទៅដោយភាពក្សេមក្សាន្ត!
នៅក្រោមការដឹកនាំរបស់ព្រះយេស៊ូនិងអ្នកដែលរួមគ្រប់គ្រងជាមួយទ្រង់ ពួកអ្នករួចរស់ជីវិតពីសង្គ្រាមអើម៉ាគេដូននឹងបោសសំអាតកំទេចកំទី ដែលសេសសល់ពីសង្គ្រាមដ៏សុចរិតនេះ។ ហើយទំនងជាពួកអ្នករួចរស់ជីវិតនៅលើផែនដីនឹងបង្កើតកូនចៅអស់មួយរយៈ ហើយពួកអ្នកទាំងនេះនឹងចូលរួមធ្វើកិច្ចការដ៏គាប់ចិត្ត ជាការរៀបចំផែនដីឲ្យទៅជាសួនឧទ្យានដ៏ស្រស់បំព្រង។
ក្រោយមក ព្រះយេស៊ូនឹងប្រោសមនុស្សស្លាប់រាប់សិបលាននាក់ពីផ្នូរ ដើម្បីឲ្យសប្បាយនឹងសួនមនោរម្យដ៏ស្រស់បំព្រងនេះដែរ។ ទ្រង់នឹងធ្វើការនេះ ដែលសម្រេចតាមការធានារ៉ាប់រងរបស់ទ្រង់ ដែលថា៖ «ដ្បិតមានពេលវេលាមក ដែលអស់ទាំងខ្មោចនៅក្នុងផ្នូរ . . . នឹងចេញមក»។
ក្នុងចំណោមពួកអ្នកដែលព្រះយេស៊ូប្រោសឲ្យរស់ឡើងវិញ គឺមានអតីតជនឧក្រិដ្ឋម្នាក់ ដែលស្លាប់នៅជិតទ្រង់លើបង្គោលឈើទារុណកម្ម។ សូមនឹកចាំនូវអ្វីដែលព្រះយេស៊ូបានសន្យាចំពោះគាត់ថា៖ «ខ្ញុំប្រាប់អ្នកជាប្រាកដថា ថ្ងៃនេះ អ្នកនឹងនៅក្នុង[ទីមនោរម្យ]ជាមួយនឹងខ្ញុំដែរ»។ ព្រះយេស៊ូនឹងមិនយកបុរសនេះទៅស្ថានសួគ៌ឲ្យសោយរាជ្យជាមួយនឹងទ្រង់នោះទេ ហើយព្រះយេស៊ូក៏នឹងមិនក្លាយជាបុរសធម្មតាម្ដងទៀត ហើយរស់នៅលើផែនដីមនោរម្យជាមួយគាត់នោះដែរ។ ផ្ទុយទៅវិញ ព្រះយេស៊ូនឹងគង់នៅជាមួយអតីតជនឧក្រិដ្ឋម្នាក់នេះ ក្នុងន័យថា ទ្រង់នឹងប្រោសឲ្យគាត់រស់ឡើងវិញក្នុងសួនមនោរម្យ និងធានាមើលថែរក្សានូវតម្រូវការខាងរាងកាយនិងខាងវិញ្ញាណរបស់គាត់ ដូចបានបង្ហាញក្នុងទំព័រជាបន្ទាប់។
សូមគិតទៅមើល! ក្រោមការដឹកនាំដែលប្រកបដោយសេចក្ដីស្រឡាញ់របស់ព្រះយេស៊ូ មនុស្សជាតិទាំងឡាយទៅជាក្រុមគ្រួសារតែមួយ ពួកគេជាពួកអ្នករួចរស់ជីវិតពីសង្គ្រាមអើម៉ាគេដូន កូនចៅរបស់ពួកគេ និងមនុស្សរាប់ពាន់លាននាក់ដែលត្រូវប្រោសឲ្យរស់ឡើងវិញដែលស្ដាប់បង្គាប់តាមទ្រង់ ពួកគេនឹងចំរើនលូតលាស់រហូតដល់បានគ្រប់ល័ក្ខណ៍។ តាមរយៈព្រះយេស៊ូគ្រីស្ទជារាជបុត្រារបស់ទ្រង់ ព្រះយេហូវ៉ានឹងគង់នៅ ក្នុងន័យខាងវិញ្ញាណ ជាមួយនឹងមនុស្សលោក។ ដូចជាសម្លេងដែលយ៉ូហានបានឮពីស្ថានសួគ៌នោះថា៖ «ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ នឹងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ»។ គ្មានមនុស្សណាម្នាក់នៅលើផែនដីនឹងរងទុក្ខឬឈឺនោះឡើយ។
ពេលការសោយរាជ្យមួយពាន់ឆ្នាំរបស់ព្រះយេស៊ូចប់ទៅ នោះស្ថានភាពនឹងបានដូចដើមវិញតាមដែលព្រះមានបំណងមក ពេលទ្រង់មានបន្ទូលប្រាប់មនុស្សមួយគូដំបូង អ័ដាមនិងអេវ៉ា ឲ្យបង្កើតកូនជាច្រើនឲ្យពេញផែនដីនោះ។ ត្រូវហើយ ផែនដីនេះនឹងមានពេញដោយសាសន៍មួយដ៏សុចរិត ហើយគ្រប់ល័ក្ខណ៍។ នេះគឺពីព្រោះមនុស្សគ្រប់គ្នានឹងទទួលនូវប្រយោជន៍នៃយញ្ញបូជាលោះរបស់ព្រះយេស៊ូ។ គ្រានោះនឹងលែងមានសេចក្ដីស្លាប់ដោយសារអំពើបាបរបស់អ័ដាមទៀតហើយ!
ដូច្នេះហើយ ព្រះយេស៊ូនឹងសម្រេចការទាំងអស់ ដែលព្រះយេហូវ៉ាបង្គាប់ទ្រង់ឲ្យធ្វើ។ ដូច្នេះ នៅទីបញ្ចប់នៃរយៈពេលមួយពាន់ឆ្នាំនោះ ព្រះយេស៊ូនឹងប្រគល់ព្រះរាជាណាចក្រនិងក្រុមគ្រួសារដ៏គ្រប់ល័ក្ខណ៍ទៅព្រះវរបិតាវិញ។ រួចមក ព្រះនឹងដោះលែងសាតាំងនិងពួកបិសាចរបស់វាចេញពីជង្ហុកធំ ជាស្ថានភាពដែលគ្មានសកម្មភាពដូចសេចក្ដីស្លាប់នោះ។ តើសំរាប់បំណងអ្វីទៅ?
ពេលដល់ទីបញ្ចប់នៃរយៈពេលមួយពាន់ឆ្នាំ មនុស្សភាគច្រើនដែលរស់នៅក្នុងសួនមនោរម្យជាមនុស្សដែលត្រូវបានប្រោសឲ្យរស់ឡើងវិញ តែពួកគេមិនដែលបានត្រូវសាកល្បងជំនឿទេ។ ពីមុនស្លាប់ ពួកគេមិនដែលឮនូវសេចក្ដីសន្យារបស់ព្រះ ហើយក៏មិនអាចបង្ហាញនូវជំនឿរបស់ពួកគេលើសេចក្ដីសន្យាទាំងនោះដែរ។ រួចមក ក្រោយពីបានត្រូវប្រោសឲ្យរស់ឡើងវិញ ហើយទទួលសេចក្ដីពិតពីព្រះគម្ពីរ នោះគឺជាការស្រួលចំពោះពួកគេរស់នៅក្នុងសួនមនោរម្យ ដោយឥតមានការប្រឆាំងដើម្បីបំរើព្រះ។ ប៉ុន្តែ ប្រសិនបើអនុញ្ញាតឲ្យសាតាំងមានឱកាសខំបញ្ឈប់ពួកគេពីការបំរើព្រះ តើពួកគេនឹងនៅស្មោះត្រង់ក្រោមការសាកល្បងឬទេ? ដើម្បីនឹងដោះស្រាយនូវសំនួរនេះ គឺត្រូវដោះលែងសាតាំង។
ការបើកចំហដែលយ៉ូហានបានឃើញ បង្ហាញថាក្រោយពីការសោយរាជ្យមួយពាន់ឆ្នាំរបស់ព្រះយេស៊ូ សាតាំងបានជោគជ័យក្នុងការបំបែរមនុស្សមួយចំនួនធំពីការបំរើព្រះ។ ប៉ុន្តែក្រោយមក ពេលការសាកល្បងចុងក្រោយចប់ទៅ សាតាំងនិងពួកបិសាចរបស់វា និងអស់អ្នកដែលវានាំឲ្យវង្វេង នឹងត្រូវបំផ្លាញចោលជារៀងរហូត។ ម្យ៉ាងវិញទៀត ពួកអ្នកស្មោះត្រង់ដែលរួចរស់ជីវិតពីការសាកល្បងនឹងបន្តរស់នៅ ហើយថែមទាំងទទួលពរពីព្រះវរបិតានៅស្ថានសួគ៌ជារៀងរហូតតទៅ។
យ៉ាងច្បាស់ណាស់ ព្រះយេស៊ូមានមុខនាទីដ៏សំខាន់ ហើយនិងបន្តនូវមុខនាទីដ៏សំខាន់នេះតទៅទៀត ក្នុងការសម្រេចគោលបំណងដ៏រុងរឿងរបស់ព្រះ។ ដោយសារអ្វីៗដែលទ្រង់បានសម្រេច ជាស្តេចដ៏ឧត្តមរបស់ព្រះនៅស្ថានសួគ៌ នេះជាអនាគតដ៏ល្អអស្ចារ្យមែនដែលយើងនឹងទទួល។ ប៉ុន្តែ យើងក៏នៅចាំមិនភ្លេចនូវអ្វីដែលទ្រង់បានសម្រេចពេលទ្រង់នៅជាមនុស្ស។
ព្រះយេស៊ូយាងមកផែនដីដោយស្ម័គ្រព្រះទ័យ និងបង្រៀនយើងអំពីព្រះវរបិតារបស់ទ្រង់។ ហួសពីនេះទៅទៀត ទ្រង់បានឆ្លុះបញ្ចាំងនូវគុណសម្បត្ដិដ៏សំខាន់បំផុតរបស់ព្រះ។ យើងមានចិត្តរំភើបរីករាយឥតឧបមា ពេលយើងគិតអំពីសេចក្ដីក្លាហាន ប្រាជ្ញាដែលគ្មានគូប្រៀប សមត្ថភាពរបស់ទ្រង់ជាគ្រូបង្រៀន ជាមេដឹកនាំដ៏ក្លាហាន មានសេចក្ដីមេត្ដាករុណា ថែមទាំងចេះយល់ចិត្តអ្នកដទៃ។ ពេលយើងគិតនូវរបៀបដែលទ្រង់រងទុក្ខយ៉ាងសាហាវព្រៃផ្សៃដែលគ្មានអ្វីមកពិពណ៌នាបាន និងពេលទ្រង់ប្រទាននូវតម្លៃលោះ ដែលជាមធ្យោបាយតែមួយគត់ដែលនាំឲ្យយើងមានជីវិត នោះប្រាកដជាធ្វើឲ្យចិត្តយើងចង់បង្ហាញនូវអំណរគុណចំពោះទ្រង់មែន!
យ៉ាងពិតណាស់ នេះជាបុរសដ៏អស្ចារ្យមែន! ដែលយើងឃើញតាមរយៈការសិក្សាពីដំណើរព្រះជន្មរបស់ព្រះយេស៊ូ! ភាពឧត្តុង្គឧត្តមរបស់ទ្រង់គឺឃើញជាក់ស្តែងនិងគួរធ្វើឲ្យយើងកោតស្ញប់ស្ញែង។ យើងបានត្រូវជំរុញឲ្យពោលពាក្យរបស់ចៅហ្វាយខេត្តរ៉ូម គឺលោកប៉ុនទាស-ពីឡាត់ថា៖ «មើលចុះ! មនុស្សនេះ!»។ ប្រាកដហើយ «មនុស្សនេះ»គឺជាបុរសឧត្តមបំផុតដែលធ្លាប់រស់នៅ!
ដោយយើងទទួលយកនូវសំវិធានការនៃយញ្ញបូជាលោះរបស់ទ្រង់ នោះបន្ទុកនៃអំពើបាបនិងសេចក្ដីស្លាប់ ដែលបានទទួលមរតកពីអ័ដាមអាចត្រូវដកចេញពីយើងបាន ហើយព្រះយេស៊ូអាចក្លាយទៅជា«ព្រះវរបិតាដ៏គង់នៅអស់កល្ប»។ អស់អ្នកដែលនឹងទទួលជីវិតអស់កល្បជានិច្ច នឹងត្រូវក្រេបយកចំណេះដឹងអំពីព្រះ និងអំពីព្រះយេស៊ូគ្រីស្ទជាបុត្ររបស់ទ្រង់ផងដែរ។ សូមឲ្យការអាននិងការសិក្សាសៀវភៅនេះ ជួយលោកអ្នកឲ្យក្រេបយកចំណេះដឹងដែលផ្ដល់ឲ្យយើងនូវជីវិត! យ៉ូហានទី១ ២:១៧; ១:៧; យ៉ូហាន ៥:២៨, ២៩; ៣:១៦; ១៧:៣; ១៩:៥; លូកា ២៣:៤៣; លោកុប្បត្តិ ១:២៨; កូរិនថូសទី១ ១៥:២៤-២៨; វិវរណៈ ២០:១-៣, ៦-១០; ២១:៣, ៤; អេសាយ ៩:៦
▪ តើពួកអ្នករួចរស់ជីវិតពីសង្គ្រាមអើម៉ាគេដូននិងកូនរបស់អ្នកទាំងនោះ នឹងមានឯកសិទ្ធិដ៏សប្បាយអ្វី?
▪ ក្រៅពីពួកអ្នករួចរស់ជីវិតនិងកូនចៅរបស់ពួកគេ តើអ្នកណាទៀតដែលនឹងបានរស់នៅក្នុងសួនមនោរម្យដែរ? ហើយតើព្រះយេស៊ូនឹងគង់ជាមួយពួកគេក្នុងន័យយ៉ាងណា?
▪ តើនឹងមានស្ថានភាពយ៉ាងណានៅទីបញ្ចប់នៃរយៈពេលមួយពាន់ឆ្នាំ? ហើយរួចមក តើព្រះយេស៊ូនឹងធ្វើអ្វី?
▪ ហេតុអ្វីក៏ត្រូវដោះលែងសាតាំងចេញពីជង្ហុកធំ? នៅទីបំផុត តើអ្វីនឹងកើតឡើងដល់វានិងអស់អ្នកដែលដើរតាមវា?
▪ តើតាមរបៀបណាដែលព្រះយេស៊ូនឹងទៅជា«ព្រះវរបិតាដ៏គង់នៅអស់កល្ប»របស់យើង?
