ព្រះយេស៊ូមានព្រះជន្មរស់!
ជំពូកទី១២៨
ព្រះយេស៊ូមានព្រះជន្មរស់!
នៅពេលពួកស្ត្រីឃើញថា ផ្នូររបស់ព្រះយេស៊ូនៅទទេ នោះម៉ារាម៉ាក់ដាឡារត់ទៅប្រាប់ពេត្រុសនិងយ៉ូហាន។ ប៉ុន្តែ តាមមើលទៅ ស្ត្រីឯទៀតនៅចាំនៅឯផ្នូរ។ ភ្លាមនោះ ទេវតាមួយរូបក៏លេចខ្លួនឲ្យពួកគេឃើញ ហើយអញ្ជើញពួកគេចូលក្នុង។
ពួកស្ត្រីឃើញទេវតាមួយរូបទៀតនៅខាងក្នុង ហើយទេវតាមួយរូបនោះពោលទៅកាន់ស្ត្រីថា៖ «កុំឲ្យភ័យអី! ដ្បិតខ្ញុំដឹងហើយថា នាងរកព្រះយេស៊ូវដែលត្រូវ[ព្យួរ] តែទ្រង់មិនគង់នៅទីនេះទេ ដ្បិតទ្រង់មានព្រះជន្មរស់ឡើងវិញហើយ ដូចជាទ្រង់បានមានបន្ទូលទុក ចូរមកមើលកន្លែងដែលទ្រង់បានផ្ទំចុះ! រួចទៅឲ្យឆាប់ ប្រាប់ដល់ពួកសិស្សទ្រង់ថា ទ្រង់មានព្រះជន្មរស់ពីស្លាប់ឡើងវិញហើយ»។ ដូច្នេះស្ត្រីទាំងនោះប្រញាប់ប្រញាល់ចេញពីផ្នូរទាំងភ័យផងអរផង។
ឥឡូវនេះ ម៉ារារកឃើញពេត្រុសនិងយ៉ូហានហើយ ភ្លាមនោះគាត់ប្រាប់ពេត្រុសនិងយ៉ូហានថា៖ «គេបានយកព្រះអម្ចាស់ចេញពីផ្នូរហើយ យើងខ្ញុំមិនដឹងជាគេយកទៅទុកឯណាទេ»។ ភ្លាមនោះ ពួកសាវ័កពីរនាក់ក៏រត់ទៅមើល។
យ៉ូហានរត់លឿនជាង គឺដោយសារតែគាត់ក្មេងជាង ដូច្នេះគាត់បានទៅដល់ផ្នូរមុន។ ពេលទៅដល់ ពួកស្ត្រីចេញទៅអស់ហើយ ឥតមានអ្នកណានៅទីនោះទេ។ ដោយចាំនៅខាងក្រៅយ៉ូហានក៏អើតមើលទៅក្នុងផ្នូរ ហើយឃើញតែសំពត់ស្នបនៅក្នុងនោះ។
ពេលពេត្រុសមកដល់ នោះគាត់ឥតស្ទាក់ស្ទើរទេក៏ចូលទៅក្នុងផ្នូរភ្លាម។ គាត់ឃើញសំពត់ស្នបនៅក្នុងនោះ ហើយឃើញកន្សែងដែលគ្របព្រះសិរសារបស់ព្រះយេស៊ូ គឺបានបត់ដាក់នៅម្ខាងវិញ។ ឥឡូវនេះ យ៉ូហានក៏ចូលក្នុង ហើយក៏ជឿសំដីរបស់ម៉ារា។ ប៉ុន្តែ ពេត្រុសនិងយ៉ូហានមិនយល់ថា ព្រះយេស៊ូមានព្រះជន្មឡើងវិញទេ ទោះជាព្រះយេស៊ូបានមានបន្ទូលប្រាប់ពួកគាត់រឿងនេះច្រើនដងថាទ្រង់នឹងមានព្រះជន្មរស់ឡើងវិញក៏ដោយ។ ពួកគេត្រឡប់ទៅផ្ទះវិញទាំងឆ្ងល់ ប៉ុន្តែម៉ារាឥតទៅណាទេ នាងបានត្រឡប់មកផ្នូរវិញ។
ដំណាលពេលនោះ ដូចជាទេវតាបង្គាប់ឲ្យធ្វើ នោះស្ត្រីឯទៀតក៏ប្រញាប់ប្រញាល់រត់ទៅប្រាប់ពួកសិស្ស ថាព្រះយេស៊ូបានត្រូវរស់ឡើងវិញ។ តែកាលពួកគាត់កំពុងតែរត់យ៉ាងលឿន នោះព្រះយេស៊ូទ្រង់យាងមកជួបពួកគាត់ មានបន្ទូលថា៖ «ជំរាបសួរ!»។ រួចអ្នកទាំងពីរក៏ចូលទៅឱបព្រះបាទទ្រង់ហើយគោរព។ រួចមកព្រះយេស៊ូមានបន្ទូលថា៖ «កុំខ្លាចអី! ចូរទៅប្រាប់ដល់បងប្អូនខ្ញុំផង ឲ្យគេទៅឯស្រុកកាលីឡេទៅ គេនឹងឃើញខ្ញុំនៅស្រុកនោះហើយ»។
មុននេះ ពេលមានកក្រើកដីនិងមានទេវតាលេចខ្លួនឲ្យឃើញ នោះពួកទាហានដែលនៅចាំយាមភ័យញ័រជាខ្លាំង ហើយក៏សន្លប់បាត់ស្មារតីដូចមនុស្សស្លាប់។ ពេលដឹងខ្លួនវិញ ពួកគេក៏រត់ទៅទីក្រុងប្រាប់ពួកសង្គ្រាជនូវអ្វីដែលបានកើតឡើង។ ក្រោយពីប្រជុំពិភាក្សាគ្នាជាមួយ«ពួកចាស់ទុំ»ក្នុងសាសន៍យូដា នោះពួកគេសម្រេចចិត្តយកប្រាក់ទៅសូកពួកទាហានកុំឲ្យប្រាប់ការពិត។ ពួកគេបង្គាប់ទាហាននោះថា៖ «ចូរឯងរាល់គ្នានិយាយថា ‹ក្នុងកាលដែលយើងខ្ញុំកំពុងតែដេកលក់ នោះពួកសិស្សរបស់វា បានមកលួចយកខ្មោចវា ទាំងយប់បាត់ទៅហើយ›»។
ពួកទាហានរ៉ូមអាចមានទោសដល់ស្លាប់ បើពួកគេដេកលក់ពេលចាំយាមនោះ ដូច្នេះពួកសង្គ្រាជបានសន្យាថា៖ «បើសេចក្ដីនោះ[ការរាយការណ៍ថាពួកអ្នកយាមដេកលក់]ឮទៅដល់លោកចៅហ្វាយ នោះយើងនឹងទៅពន្យល់លោក ឲ្យឯងរាល់គ្នាបានរួចពីទោស»។ ពួកទាហានធ្វើតាមសេចក្ដីដែលពួកគេបង្គាប់ ពីព្រោះដោយសារប្រាក់សំណូកច្រើន។ ជាលទ្ធផល ការរាយការណ៍ក្លែងក្លាយអំពីចោរមកយកសពរបស់ព្រះយេស៊ូ ក៏ឮសុសសាយពេញស្រុកយូដា។
ម៉ារាម៉ាក់ដាឡា ដែលនៅឯផ្នូរក៏សោកសៅយ៉ាងខ្លាំង។ តើព្រះយេស៊ូនៅឯណាទៅ? ពេលគាត់អើតមើលក្នុងផ្នូរ គាត់ឃើញទេវតាពីររូបស្លៀកពាក់ស ដែលបានលេចខ្លួនឲ្យឃើញម្ដងទៀត។ ទេវតាមួយរូបអង្គុយខាងព្រះសិរសា ម្នាក់ទៀតអង្គុយខាងចុងព្រះបាទា ត្រង់កន្លែងដែលតំកល់ព្រះសពព្រះយេស៊ូ។ ទេវតានោះសួរថា៖ «នាងអើយ! ហេតុអ្វីបានជាយំ?»។
ម៉ារាឆ្លើយថា៖ «ពីព្រោះគេបានយកព្រះអម្ចាស់ខ្ញុំទៅបាត់ ហើយខ្ញុំមិនដឹងជាគេទុកទ្រង់នៅឯណាទេ»។ នាងនិយាយដូច្នោះ រួចបែរខ្លួនទៅក្រោយ ឃើញបុគ្គលម្នាក់ទៀតដែលសួរសំនួរដូចគ្នាថា៖ «នាងអើយ! ហេតុអ្វីបានជាយំ?»។ បុគ្គលម្នាក់នេះក៏សួរថា៖ «នាងរកអ្នកណា?»។
ដោយសារផ្នូររបស់ព្រះយេស៊ូនៅក្នុងសួនច្បារ នាងស្មានថាបុគ្គលនោះជាអ្នកថែរក្សាសួនច្បារ ទើបនាងនិយាយទៅកាន់គាត់ថា៖ «លោកនាយអើយ! បើលោកបានយកព្រះសពចេញទៅឯណា នោះសូមប្រាប់ខ្ញុំឲ្យដឹងកន្លែងដែលបានទុកផង ខ្ញុំនឹងទៅនាំយក»។
បុគ្គលនេះពោលទៅនាងថា៖ «ម៉ារាអើយ!»។ ភ្លាមនោះម៉ារាដឹងថា គឺជាព្រះយេស៊ូ ដោយស្គាល់សម្លេងដែលទ្រង់មានបន្ទូលដល់នាង។ នាងលាន់មាត់ទូលទ្រង់ថា៖ «រ៉ាបូនី!» (ដែលមានន័យថា «លោកគ្រូ!»)។ ម៉ារាមានចិត្តត្រេកអរជាខ្លាំង គាត់ក៏លូកដៃទៅពាល់ព្រះយេស៊ូ។ ប៉ុន្តែ ព្រះយេស៊ូមានបន្ទូលទៅនាងថា៖ «កុំពាល់ខ្ញុំ ព្រោះខ្ញុំមិនទាន់ឡើងទៅឯព្រះវរបិតាខ្ញុំនៅឡើយ ចូរនាងទៅឯពួកបងប្អូនខ្ញុំប្រាប់គេថា‹ខ្ញុំឡើងទៅឯព្រះវរបិតាខ្ញុំ ជាព្រះវរបិតានៃអ្នករាល់គ្នា គឺជាព្រះនៃខ្ញុំ ហើយជាព្រះនៃអ្នករាល់គ្នាដែរ›»។
ឥឡូវនេះ ម៉ារារត់នៅកន្លែងដែលពួកសាវ័កនិងសិស្សឯទៀតបានជួបជុំគ្នា។ គាត់បាននិយាយថែមទៀតពីការរាយការណ៍ ដែលស្ត្រីឯទៀតធ្លាប់ប្រាប់រួចហើយ ថាបានឃើញព្រះយេស៊ូទ្រង់មានព្រះជន្មរស់ឡើងវិញ។ ប៉ុន្តែ ពួកបុរសទាំងនេះមិនជឿពាក្យសំដីពួកស្ត្រីដែលមកប្រាប់កាលពីដំបូងទេ ហើយតាមមើលទៅពួកគាត់ក៏នៅតែមិនជឿរឿងដែលម៉ារាប្រាប់នោះដែរ។ ម៉ាថាយ ២៨:៣-១៥; ម៉ាកុស ១៦:៥-៨; លូកា ២៤:៤-១២; យ៉ូហាន ២០:២-១៨
▪ តើម៉ារាម៉ាក់ដាឡាធ្វើអ្វី ពេលឃើញផ្នូរនៅទទេ? តើពួកស្ត្រីឯទៀតបានឃើញអ្វីខ្លះ?
▪ តើពេត្រុសនិងយ៉ូហានបានមានប្រតិកម្មយ៉ាងណា ពេលឃើញផ្នូរនៅទទេ?
▪ តើស្ត្រីឯទៀតជួបអ្នកណាពេលទៅប្រាប់ពួកសិស្ស ថាព្រះយេស៊ូមានព្រះជន្មរស់ឡើងវិញ?
▪ តើមានអ្វីកើតឡើងដល់ពួកទាហានដែលយាមនៅទីនោះ? តើពួកសង្ឃបានប្រព្រឹត្តយ៉ាងណាពេលពួកទាហាន ជាអ្នកយាមរ៉ាយរ៉ាប់ប្រាប់អំពីរឿងនេះ?
▪ តើមានអ្វីកើតឡើងពេលម៉ារាម៉ាក់ដាឡានៅឯផ្នូរម្នាក់ឯង? តើពួកសិស្សមានប្រតិកម្មតបយ៉ាងណាចំពោះការរាយការណ៍របស់ស្រីៗនោះ?