ភាពខ្នះខ្នែងចំពោះការថ្វាយបង្គំព្រះយេហូវ៉ា
ជំពូកទី១៦
ភាពខ្នះខ្នែងចំពោះការថ្វាយបង្គំព្រះយេហូវ៉ា
កូនផ្សេងៗទៀតរបស់ម៉ារាដែលត្រូវជាប្អូនប្រុសៗរបស់ព្រះយេស៊ូនោះមានឈ្មោះថា យ៉ាកុប យ៉ូសែប ស៊ីម្មាន និងយូដាស។ មុននឹងពួកគាត់ទាំងអស់គ្នាធ្វើដំណើរទៅជាមួយព្រះយេស៊ូនិងពួកសិស្សរបស់ទ្រង់ទៅក្រុងកាពើណិមជិតសមុទ្រកាលីឡេ នោះពួកគាត់ប្រហែលជាបានឈប់សំរាកនៅផ្ទះរបស់ខ្លួនក្នុងភូមិណាសារ៉ែតជាមុនសិន ដើម្បីឲ្យគ្រួសារអាចរៀបចំអីវ៉ាន់ដែលពួកគាត់ត្រូវការ។
ក៏ប៉ុន្តែ ហេតុអ្វីក៏ព្រះយេស៊ូយាងទៅក្រុងកាពើណិមមុនគេ ជាជាងចាប់ផ្ដើមកិច្ចបំរើរបស់ទ្រង់នៅក្នុងភូមិកាណា ភូមិណាសារ៉ែត ឬក៏នៅកន្លែងផ្សេងៗទៀតនៅម្ដុំតំបន់ភ្នំនៃស្រុកកាលីឡេទៅវិញ? ចំពោះហេតុមួយ គឺក្រុងកាពើណិមជាកន្លែងដែលលេចធ្លោជាង ហើយអាចឃើញយ៉ាងច្បាស់ថាជាទីក្រុងដ៏ធំជាងគេដែរ។ ម្យ៉ាងទៀត ពួកសិស្សថ្មីរបស់ទ្រង់ភាគច្រើនរស់នៅក្នុងក្រុងនោះ ឬក៏នៅជិតៗកន្លែងនោះ ដូច្នេះហើយពួកសិស្សរបស់ទ្រង់មិនចាំ បាច់ចាកចេញពីផ្ទះរបស់ពួកគាត់ ដើម្បី ទទួលការហ្វឹកហ្វឺនពីទ្រង់នោះឡើយ។
ក្នុងកំឡុងពេលដែលស្នាក់នៅក្រុងកាពើណិមនោះ ព្រះយេស៊ូបានធ្វើអព្ភូតហេតុដ៏អស្ចារ្យ ដូចទ្រង់បញ្ជាក់ប្រាប់ប៉ុន្មានខែក្រោយមក។ ក៏ប៉ុន្តែ មិនយូរប៉ុន្មានទៀត ព្រះយេស៊ូនិងគូកនរបស់ទ្រង់ នឹងត្រូវធ្វើដំណើរបន្តទៅមុខទៀត។ នេះជានិទាឃរដូវ ហើយព្រះយេស៊ូនិងពួកសិស្សរបស់ទ្រង់កំពុងតែធ្វើដំណើរទៅទីក្រុងយេរូសាឡិម ដើម្បីធ្វើបុណ្យរំលងនៅឆ្នាំ៣០ ស.យ.។ កាលបាននៅទីនោះហើយ ពួកសិស្សរបស់ទ្រង់ឃើញលក្ខណៈមួយអំពីព្រះយេស៊ូ ដែលពួកគាត់ប្រហែលជាមិនធ្លាប់ឃើញពីមុនមកឡើយ។
យោងទៅតាមក្រិត្យវិន័យរបស់ព្រះ ជនជាតិអ៊ីស្រាអែលបានតម្រូវឲ្យយកសត្វមកថ្វាយជាយញ្ញបូជា។ ដូច្នេះ ដើម្បីងាយស្រួលដល់បណ្ដាជន នោះពួកអ្នកលក់ដូរក៏លក់ដូរនៅក្នុងទីក្រុងយេរូសាឡិមតែម្ដង ដែលក្នុងនោះគេលក់សត្វចតុប្បាទឬសត្វស្លាបសំរាប់ធ្វើយញ្ញបូជា។ ក៏ប៉ុន្តែ ពួកគេកំពុងតែលក់នៅក្នុងព្រះវិហារតែម្ដង គឺពួកគេបានបោកប្រាស់បណ្ដាជន ដោយលក់ក្នុងតម្លៃមួយយ៉ាងថ្លៃបំផុត។
ដោយការក្រោធយ៉ាងខ្លាំងនោះ ព្រះយេស៊ូក៏យកខ្សែធ្វើជារំពាត់ ហើយដេញពួកអ្នកលក់ដូរឲ្យចេញ។ ទ្រង់ក៏ចាក់ប្រាក់របស់ពួកអ្នកដូរលុយចោល ព្រមទាំងផ្កាប់តុរបស់គេផង។ ទ្រង់តម្លើងសំឡេងទៅពួកអ្នកលក់ព្រាបថា៖ «ចូរយករបស់ទាំងនេះចេញទៅ! កុំឲ្យយកដំណាក់នៃព្រះវរបិតាខ្ញុំ ធ្វើជាផ្ទះជំនួញឡើយ!»។
នៅពេលដែលពួកសិស្សរបស់ព្រះយេស៊ូឃើញហេតុការណ៍នេះ នោះពួកគាត់នឹកចាំនូវទំនាយមួយអំពីបុត្រារបស់ព្រះដែលថា៖ «សេចក្ដីឧស្សាហ៍ដល់ដំណាក់ទ្រង់ បានស៊ីបង្ហិនទូលបង្គំ»។ ក៏ប៉ុន្តែ ពួកសាសន៍យូដាទូលសួរថា៖ «ដែលលោកធ្វើយ៉ាងដូច្នេះ នោះតើនឹងសំដែងទីសំគាល់ណា ឲ្យយើងខ្ញុំឃើញផង?»។ ព្រះយេស៊ូមានបន្ទូលឆ្លើយថា៖ «ចូរបំផ្លាញព្រះវិហារនេះចុះ! រួចក្នុងរវាង៣ថ្ងៃ ខ្ញុំនឹងសង់ឡើងវិញ»។
ពួកសាសន៍យូដាស្មានថា ព្រះយេស៊ូកំពុងតែមានបន្ទូលអំពីព្រះវិហារមែនទែន ដូច្នេះហើយពួកគេក៏ទូលសួរថា៖ «គេសង់ព្រះវិហារនេះ ពេញ ៤៦ ឆ្នាំគត់ តែលោកនឹងសង់ឡើងវិញ ក្នុងរវាង ៣ ថ្ងៃឬ?»។ ប៉ុន្តែ ព្រះយេស៊ូកំពុងមានបន្ទូលអំពីព្រះវិហារ ដែលជារូបកាយរបស់ទ្រង់ឯណោះវិញទេ។ ហើយបីឆ្នាំក្រោយមក នោះពួកសិស្សរបស់ទ្រង់ក៏នឹកចាំពាក្យបន្ទូលនេះរបស់ទ្រង់ នៅពេលដែលទ្រង់បានត្រូវប្រោសឲ្យរស់ឡើងវិញនោះ។ យ៉ូហាន ២:១២-២២; ម៉ាថាយ ១៣:៥៥; លូកា ៤:២៣
▪ ក្រោយពីពិធីមង្គលការនៅភូមិកាណា តើព្រះយេស៊ូយាងទៅកន្លែងណាខ្លះ?
▪ ហេតុអ្វីក៏ព្រះយេស៊ូមានព្រះទ័យក្រោធ? ហើយតើទ្រង់ធ្វើយ៉ាងណា?
▪ តើពួកសិស្សរបស់ព្រះយេស៊ូនឹកចាំអ្វី ពេលដែលឃើញការប្រព្រឹត្តរបស់ទ្រង់នោះ?
▪ តើព្រះយេស៊ូមានបន្ទូលយ៉ាងណាអំពី «ព្រះវិហារនេះ»? ហើយតើទ្រង់ចង់មានន័យយ៉ាងណា?
