មេរៀនអំពីចិត្តរាបទាប
ជំពូកទី៦២
មេរៀនអំពីចិត្តរាបទាប
ក្រោយពីព្រះយេស៊ូបានប្រោសក្មេងប្រុសដែលអារក្សចូលឲ្យជាក្នុងតំបន់ជិតភូមិសេសារាភីលីពមក ទ្រង់មានព្រះទ័យចង់ត្រឡប់ទៅផ្ទះនៅក្រុងកាពើណិមវិញ។ ក៏ប៉ុន្តែ ព្រះយេស៊ូមានព្រះទ័យចង់ធ្វើដំណើរតែជាមួយពួកសិស្សទេ ដើម្បីឲ្យទ្រង់អាចបង្វឹកបង្វឺនពួកគាត់ និងឲ្យពួកគាត់មើលខុសត្រូវភារកិច្ចផ្សេងៗដែលពួកគាត់នឹងមានក្រោយមក ពេលដែលទ្រង់សោយទិវង្គតទៅ។ ព្រះយេស៊ូពន្យល់ប្រាប់ពួកសិស្សថា៖ «កូនមនុស្សត្រូវបញ្ជូនទៅក្នុងកណ្ដាប់ដៃនៃមនុស្សលោក គេនឹងសំឡាប់លោក រួចដល់៣ថ្ងៃក្រោយដែលគេសំឡាប់ នោះលោកនឹងរស់ឡើងវិញ»។
ពួកសិស្សរបស់ទ្រង់នៅតែមិនយល់អំពីរឿងនេះទៀត ថ្វីបើព្រះយេស៊ូបានមានបន្ទូលអំពីរឿងនេះនៅពេលមុនក្ដី ហើយសូម្បីតែសាវ័កបីនាក់ធ្លាប់បានឃើញដោយផ្ទាល់ភ្នែកនូវការផ្លាស់ប្រែទ្រង់ទ្រាយ ដែលបានពិគ្រោះអំពី«ការចាកចេញ»របស់ទ្រង់ក៏ដោយ។ ទោះជាគ្មានអ្នកណាម្នាក់នឹងបដិសេធថាទ្រង់នឹងសោយទិវង្គត ដូចពេត្រុសធ្លាប់ធ្វើពីមុនក៏ដោយ ក៏ពួកសិស្សមានចិត្តខ្លាចឥតហ៊ានទូលសួរទ្រង់ថែមទៀតអំពីរឿងនេះទេ។
ជាយថាហេតុ ព្រះយេស៊ូនិងពួកសិស្សមកដល់ក្រុងកាពើណិម ដែលជាទីស្នាក់អាស្រ័យក្នុងកំឡុងកិច្ចបំរើរបស់ទ្រង់។ ហើយក្រុងកាពើណិមក៏ជាភូមិកំណើតរបស់ពេត្រុសនិងសាវ័កឯទៀតដែរ។ នៅទីនោះ ពួកអ្នកដែលទារពន្ធព្រះវិហារក៏មកឯពេត្រុស។ ពួកគេប្រហែលជាចង់ឲ្យព្រះយេស៊ូប្រព្រឹត្តបទល្មើសប្រឆាំងនឹងទំនៀមទំលាប់ នោះពួកគេសួរថា៖ «តើគ្រូអ្នកមិនបង់ពន្ធព្រះវិហារទេឬ?»។
ពេត្រុសឆ្លើយថា៖ «បង់ដែរ»។
ព្រះយេស៊ូប្រហែលជាបានយាងចូលទៅក្នុងផ្ទះបន្ដិចក្រោយមក ទ្រង់ក៏បានជ្រាបអំពីអ្វីដែលបានកើតឡើងដែរ។ ដូច្នេះមុននឹងពេត្រុសលើករឿងនេះមកនិយាយ នោះព្រះយេស៊ូមានបន្ទូលសួរគាត់ថា៖ «នែ! ស៊ីម៉ូន អ្នកគិតដូចម្ដេច? តើអស់ទាំងស្តេចនៅផែនដីហូតសួយរៃ ឬពន្ធដារពីអ្នកណា ពីកូនចៅ ឬពីអ្នកដទៃ?»។
ពេត្រុសទូលឆ្លើយថា៖ «ពីមនុស្សដទៃទេ!»។
ព្រះយេស៊ូមានបន្ទូលថា៖ «ដូច្នេះ កូនចៅបានរួចហើយ»។ ដោយព្រោះព្រះវរបិតារបស់ព្រះយេស៊ូ ជាព្រះមហាក្សត្រនៃសកលលោកនេះ ជាព្រះដែលមនុស្សថ្វាយបង្គំនៅព្រះវិហារ នោះគឺមិនមែនជាតម្រូវការតាមច្បាប់ទេ ដែលបុត្រារបស់ព្រះគប្បីបង់ពន្ធព្រះវិហារនោះ។ ព្រះយេស៊ូមានបន្ទូលថា៖ «ប៉ុន្តែចូរអ្នកទៅឯសមុទ្រ ហើយបោះសន្ទូច ចាប់យកត្រីដែលជាប់មុនដំបូងមកបើកមាត់វា នោះអ្នកនឹងឃើញប្រាក់១រៀល ឲ្យយកប្រាក់នោះទៅបង់សំរាប់ខ្ញុំ ហើយនឹងអ្នកទៅ ដើម្បីកុំឲ្យយើងបានជាទីអាក់អន់ចិត្តដល់គេ»។
លុះពួកសិស្សមកជួបជុំគ្នាក្រោយពីធ្វើដំណើរមកដល់ក្រុងកាពើណិមវិញ ប្រហែលជានៅផ្ទះរបស់ពេត្រុស នោះពួកគាត់សួរថា៖ «តើអ្នកណាធំជាងគេក្នុងនគរស្ថានសួគ៌?»។ ព្រះយេស៊ូជ្រាបនូវហេតុអ្វីបានជាពួកគាត់សួរដូច្នេះ ដ្បិតទ្រង់បានដឹងនូវអ្វីដែលបានកើតឡើងក្នុងចំណោមពួកគាត់ កាលដែលពួកគាត់ធ្វើដំណើរពីក្រោយទ្រង់ ពេលត្រឡប់មកពីភូមិសេសារាភីលីព។ ដូច្នេះព្រះយេស៊ូមានបន្ទូលសួរថា៖ «តើរឿងអ្វីដែលអ្នករាល់គ្នាជជែកគ្នាតាមផ្លូវមកនោះ?»។ ពួកសិស្សនៅស្ងៀមដោយមានសេចក្ដីខ្មាស ព្រោះពួកគាត់បានប្រកែកគ្នាចង់ដឹងថា ក្នុងចំណោមពួកគេ អ្នកណាធំជាងគេ។
ជិតបីឆ្នាំមកហើយដែលព្រះយេស៊ូបង្រៀនពួកគាត់ តើនេះទំនងឲ្យជឿបានទេដែលពួកសិស្សមានការប្រកែកបែបនេះ? នេះគឺបង្ហាញថាភាពឥតគ្រប់ល័ក្ខណ៍មានអានុភាពដ៏ខ្លាំង ដែលមកពីទំនៀមទំលាប់សាសនារបស់ពួកគាត់ពីមុនដែរ។ សាសនាយូដាដែលពួកសិស្សធ្លាប់មានពីមុននោះ ឲ្យតម្លៃយ៉ាងខ្លាំងទៅលើរឿងឋានៈឬបុណ្យសក្ដិចំពោះគ្រប់អ្វីៗទាំងអស់។ ម្យ៉ាងវិញទៀត ពីព្រោះព្រះយេស៊ូសន្យាថានឹងប្រទាន«កូនសោ»នៃព្រះរាជាណាចក្រឲ្យពេត្រុស នោះគាត់ប្រហែលជាមានអារម្មណ៍ថាខ្លួនធំជាងគេ។ យ៉ាកុបនិងយ៉ូហានក៏ប្រហែលជាមានគំនិតដូចនេះដែរ ដោយព្រោះមានឯកសិទ្ធិឃើញការផ្លាស់ប្រែទ្រង់ទ្រាយរបស់ព្រះយេស៊ូ។
ទោះជាយ៉ាងណាក៏ដោយ ព្រះយេស៊ូបង្ហាញនូវគំរូមួយដ៏ជំរុញចិត្ត ដើម្បីខំកែតម្រូវអាកប្បកិរិយារបស់ពួកគាត់។ ព្រះយេស៊ូហៅក្មេងម្នាក់ឲ្យមកឈរនៅកណ្ដាលពួកសិស្ស ទ្រង់ឱបក្មេងនេះ ហើយមានបន្ទូលថា៖ «បើអ្នករាល់គ្នាមិនផ្លាស់គំនិត ហើយត្រឡប់ដូចជាកូនតូចនេះ នោះនឹងចូលទៅក្នុងនគរស្ថានសួគ៌ពុំបានឡើយ ដូច្នេះ អ្នកណាដែលបន្ទាបខ្លួន ឲ្យបានដូចកូនតូចនេះ អ្នកនោះឯងឈ្មោះថា ធំជាងគេក្នុងនគរស្ថានសួគ៌ហើយ អ្នកណាដែលទទួលកូនតូចណាមួយដូចកូននេះ ដោយនូវឈ្មោះខ្ញុំ នោះក៏ឈ្មោះថាទទួលខ្ញុំដែរ»។
នេះជាវិធីដ៏អស្ចារ្យមែន ដើម្បីប្រដៅពួកសិស្សរបស់ទ្រង់! ព្រះយេស៊ូមិនមានព្រះទ័យខ្ញាល់នឹងពួកគាត់ ឬក៏ហៅពួកគាត់ជាពួកក្រអឺត ពួកលោភលន់ឬពួកដែលមានមហិច្ឆតានោះឡើយ។ តែព្រះយេស៊ូពន្យល់ដោយការប្រៀនប្រដៅនេះ ដោយប្រើគំរូរបស់កូនក្មេង ដែលជាធម្មតាមានលក្ខណៈសុភាព ហើយឥតមានមហិច្ឆតានិងមិនដែលគិតអំពីអ្នកណាធំជាងអ្នកណានោះទេ។ ហេតុនេះហើយ ព្រះយេស៊ូរៀបរាប់អំពីក្មេងដ៏រាបទាបនេះដើម្បីបង្ហាញថា ពួកសិស្សរបស់ទ្រង់គប្បីបណ្ដុះនូវគុណសម្បត្ដិទាំងនេះ។ ដូចជាព្រះយេស៊ូមានបន្ទូលបញ្ចប់ថា៖ «អ្នកណាដែលតូចជាងគេ ក្នុងពួកអ្នករាល់គ្នា គឺអ្នកនោះហើយ ជាអ្នកធំវិញ»។ ម៉ាថាយ ១៧:២២-២៧; ១៨:១-៥; ម៉ាកុស ៩:៣០-៣៧; លូកា ៩:៤៣-៤៨
▪ ពេលត្រឡប់ទៅក្រុងកាពើណិមវិញ តើព្រះយេស៊ូបង្រៀនអ្វីម្ដងទៀត? ហើយតើមនុស្សទទួលយកការបង្រៀននេះយ៉ាងណា?
▪ ហេតុអ្វីក៏ព្រះយេស៊ូមិនចាំបាច់បង់ពន្ធព្រះវិហារ? ប៉ុន្តែហេតុអ្វីបានជាទ្រង់បង់ពន្ធព្រះវិហារទៅវិញ?
▪ តើអ្វីដែលបណ្ដាលឲ្យពួកសិស្សប្រកែកទាស់ទែងគ្នា? ហើយតើព្រះយេស៊ូប្រដៅពួកគាត់យ៉ាងដូចម្ដេច?
