យ៉ូហានរៀបចំផ្លូវ
ជំពូកទី១១
យ៉ូហានរៀបចំផ្លូវ
ជប់ប្រាំពីរឆ្នាំបានកន្លងទៅហើយ តាំងពីព្រះឱរសយេស៊ូនៅជាព្រះកុមារដែលមានព្រះជន្មាយុ១២ឆ្នាំបានសួរសំនួរពួកគ្រូអាចារ្យនៅក្នុងព្រះវិហារនោះ។ នេះគឺជានិទាឃរដូវនៅក្នុងឆ្នាំ២៩ ស.យ. ហើយមនុស្សគ្រប់គ្នាហាក់ដូចជា កំពុងតែនិយាយអំពីបងជីដូនមួយរបស់ព្រះយេស៊ូ គឺយ៉ូហានដែលគាត់កំពុងតែផ្សព្វផ្សាយទូទាំងស្រុកនៅក្រវល់ជុំវិញទន្លេយ័រដាន់។
យ៉ូហានគឺប្រាកដជាបុរសដែលគួរឲ្យចាប់អារម្មណ៍មែន ទាំងការស្លៀកពាក់ទាំងពាក្យសំដី។ សំលៀកបំពាក់របស់គាត់ធ្វើពីរោមអូដ្ឋ ហើយគាត់ពាក់ខ្សែក្រវាត់ស្បែកនៅចង្កេះ។ រីឯអាហាររបស់គាត់គឺជាកណ្ដូបនិងទឹកឃ្មុំព្រៃ។ ហើយតើអ្វីទៅជាដំណឹងរបស់គាត់? «ចូរឲ្យប្រែចិត្តចុះ! ដ្បិតនគរស្ថានសួគ៌ជិតដល់ហើយ!»។
ដំណឹងនេះគឺធ្វើឲ្យពួកអ្នកស្ដាប់រំភើបចិត្តណាស់។ មនុស្សជាច្រើនទទួលស្គាល់ថា ពួកគេត្រូវប្រែចិត្ត ពោលគឺជាការកែប្រែអាកប្បកិរិយារបស់ពួកគេ ហើយលះបង់ចោលការប្រព្រឹត្តក្នុងជីវិតរស់នៅដ៏មិនសមរម្យដែលពួកគេធ្លាប់ធ្វើពីមុន។ ដូច្នេះពីតំបន់នៅក្រវល់ជុំវិញទន្លេយ័រដាន់ និងពីទីក្រុងយេរូសាឡិមដែរ នោះបណ្ដាជនបានមកឯយ៉ូហានទាំងហ្វូងៗ ហើយគាត់ធ្វើបុណ្យជ្រមុជទឹកឲ្យពួកគេ ដោយពន្លិចពួកគេទៅក្នុងទឹកទន្លេយ័រដាន់។ តើហេតុអ្វី?
យ៉ូហានធ្វើបុណ្យជ្រមុជទឹកឲ្យមនុស្សគឺជានិមិត្តរូប ឬក៏ជាការទទួលស្គាល់នូវការប្រែចិត្តដ៏ស្មោះរបស់ពួកគេ ពីអំពើបាបប្រឆាំងនឹងកិច្ចព្រមព្រៀងខាងក្រិត្យវិន័យរបស់ព្រះ។ ដូច្នេះហើយ នៅពេលដែលពួកផារីស៊ីនិងពួកសាឌូស៊ីខ្លះបានមកឯទន្លេយ័រដាន់ នោះយ៉ូហានបានផ្ដន្ទាទោសដល់ពួកគេ។ គាត់មានប្រសាសន៍ថា៖ «ឱពូជពស់វែកអើយ! . . . ចូរអ្នករាល់គ្នាបង្កើតផល ដែលសំណំនឹងសេចក្ដីប្រែចិត្តនោះចុះ! ហើយកុំឲ្យគិតក្នុងចិត្តថា ‹មានលោកអ័ប្រាហាំជាឪពុកខ្លួននោះឡើយ›។ ដ្បិតខ្ញុំប្រាប់អ្នករាល់គ្នាថា ព្រះទ្រង់អាចនឹងបង្កើតកូនឲ្យលោកអ័ប្រាហាំ ពីថ្មទាំងនេះក៏បានដែរ ប៉ុន្តែ ឥឡូវនេះ ពូថៅបានដាក់នៅឫសដើមឈើហើយ ដូច្នេះ អស់ទាំងដើមណាដែលកើតផ្លែមិនល្អ នោះត្រូវកាប់បោះចោលទៅក្នុងភ្លើង»។
ដោយព្រោះមនុស្សចាប់អារម្មណ៍នឹងសាររបស់យ៉ូហានជាខ្លាំង នោះពួកសាសន៍យូដាបានបញ្ជូនពួកសង្ឃនិងពួកលេវីឲ្យមកជួបគាត់។ ពួកគេទាំងនេះសួរថា៖ «តើលោកជាអ្នកណា?»។
យ៉ូហានសារភាពថា៖ «ខ្ញុំមិនមែនជាព្រះគ្រីស្ទទេ!»។
នោះពួកគេសួរថា៖ «ចុះលោកជាអ្នកណា ជាលោកអេលីយ៉ាឬ?»។
គាត់បានតបឆ្លើយថា៖ «មិនមែនទេ!»។
«តើលោកជាហោរានោះឬ»?
«ទេ!»។
ដូច្នេះពួកគេក៏ទទូចសួរថា៖ «តើលោកជាអ្នកណាទៅវិញ លោកនឹងមានប្រសាសន៍ពីខ្លួនលោកដូចម្ដេច ដើម្បីឲ្យយើងរាល់គ្នាបាននាំពាក្យទៅជំរាបដល់លោក ដែលចាត់ឲ្យយើងខ្ញុំមកផង?»។
យ៉ូហានពន្យល់ថា៖ «ខ្ញុំជាសំឡេង ដែលបន្លឺឡើងនៅទីរហោស្ថានថា ‹ចូរដំរង់ផ្លូវថ្វាយព្រះអម្ចាស់› ដូចជាហោរាអេសាយបានទាយទុក»។
នោះពួកគេចង់ដឹងថា៖ «បើលោកមិនមែនជាព្រះគ្រីស្ទ ឬលោកអេលីយ៉ា ឬហោរានោះទេ ចុះហេតុអ្វីបានជាលោកធ្វើបុណ្យជ្រមុជទឹកដូច្នេះ?»។
យ៉ូហានបានតបឆ្លើយថា៖ «ឯខ្ញុំៗធ្វើបុណ្យជ្រមុជដោយទឹក ប៉ុន្តែនៅកណ្ដាលពួកអ្នករាល់គ្នា នោះមានព្រះ១អង្គ ដែលអ្នករាល់គ្នាមិនស្គាល់ គឺព្រះអង្គនោះហើយ ដែលមកក្រោយខ្ញុំ»។
យ៉ូហានគឺកំពុងតែរៀបចំផ្លូវដើម្បីឲ្យមនុស្សមានទឹកចិត្តត្រឹមត្រូវ ក្នុងការទទួលព្រះមេស្ស៊ីដែលនឹងក្លាយទៅជាស្តេចនោះ។ ចំពោះស្តេចមួយអង្គនេះ យ៉ូហានមានប្រសាសន៍ថា៖ «តែព្រះអង្គដែលយាងមកក្រោយខ្ញុំ ទ្រង់មានអំណាចលើសជាងខ្ញុំទៅទៀត ខ្ញុំមិនគួរនឹងកាន់សុព័ណ៌បាទទ្រង់ទេ!»។ តាមពិត យ៉ូហានថែមទាំងមានប្រសាសន៍ថា៖ «ព្រះអង្គដែលយាងមកក្រោយខ្ញុំ ទ្រង់បានត្រឡប់ជាមុនខ្ញុំវិញ ដ្បិតទ្រង់គង់នៅមុនខ្ញុំ»។
ដូច្នេះហើយ ដំណឹងរបស់យ៉ូហានដែលថា «នគរស្ថានសួគ៌ជិតដល់ហើយ» ទុកជាការប្រកាសសាធារណៈថាកិច្ចបំរើរបស់ព្រះយេស៊ូគ្រីស្ទជាស្តេច ដែលបានតែងតាំងឡើងដោយព្រះយេហូវ៉ា នឹងជិតចាប់ផ្ដើមហើយ។ យ៉ូហាន ១:៦-៨, ១៥-២៨; ម៉ាថាយ ៣:១-១២; លូកា ៣:១-១៨; កិច្ចការ ១៩:៤
▪ តើយ៉ូហានជាបុរសបែបណា?
▪ ហេតុអ្វីក៏យ៉ូហានធ្វើបុណ្យជ្រមុជទឹកឲ្យមនុស្ស?
▪ ហេតុអ្វីក៏យ៉ូហានអាចនិយាយថា ព្រះរាជាណាចក្រជិតមកដល់ហើយនោះ?
