រឿងប្រៀបប្រដូចអំពីប្រាក់ម៉ាយណា
ជំពូកទី១០០
រឿងប្រៀបប្រដូចអំពីប្រាក់ម៉ាយណា
ព្រះយេស៊ូប្រហែលជាបានសំរាកនៅផ្ទះរបស់សាខេនៅឡើយ ព្រោះផ្ទះរបស់គាត់នៅតាមផ្លូវទៅទីក្រុងយេរូសាឡិម។ ពួកសិស្សរបស់ទ្រង់ជឿថា ពេលពួកគេទៅដល់ក្រុងយេរូសាឡិម ព្រះយេស៊ូនឹងប្រកាសថា ទ្រង់ជាព្រះមេស្ស៊ី ហើយទ្រង់នឹងស្ថាបនាព្រះរាជាណាចក្ររបស់ទ្រង់។ ព្រះយេស៊ូមានបន្ទូលប្រាប់នូវរឿងប្រៀបប្រដូចមួយ ដើម្បីកែតម្រូវគំនិតនេះ និងបង្ហាញថាការគ្រប់គ្រងព្រះរាជាណាចក្រគឺនៅយូរទៀត។
ព្រះយេស៊ូមានបន្ទូលថា៖ «មានបុរសត្រកូលខ្ពស់ម្នាក់ រៀបនឹងចេញទៅឯស្រុកឆ្ងាយ ដើម្បីគ្រងរាជ្យ រួចត្រឡប់មកវិញ»។ ព្រះយេស៊ូជា«បុរសត្រកូលខ្ពស់ម្នាក់» ហើយស្ថានសួគ៌ជា«ស្រុកឆ្ងាយ»។ នៅពេលព្រះយេស៊ូទៅដល់ទីនោះ នោះព្រះវរបិតារបស់ទ្រង់ នឹងប្រទានឲ្យព្រះយេស៊ូគ្រងរាជ្យ។
ប៉ុន្តែមុននឹងចេញដំណើរទៅ បុរសត្រកូលខ្ពស់នេះ ក៏ហៅអ្នកបំរើរបស់លោកដប់នាក់ ប្រគល់ប្រាក់ម៉ាយណាឲ្យគេម្នាក់ៗ ដោយថា៖ «ចូរឯងរាល់គ្នាធ្វើជំនួញ ដរាបដល់អញត្រឡប់មកវិញ»។ ក្នុងសេចក្ដីសម្រេចដំបូង នោះអ្នកបំរើដប់នាក់តំណាងពួកសិស្សដំបូងរបស់ព្រះយេស៊ូ។ ប៉ុន្តែក្នុងន័យដ៏ទូលំទូលាយ នោះពួកគេតំណាងអស់អ្នកដែលនឹងគ្រងមរតកជាមួយទ្រង់ ក្នុងព្រះរាជាណាចក្រនៅស្ថានសួគ៌។
ប្រាក់ម៉ាយណាគឺមានតម្លៃណាស់ ដ្បិតមួយម៉ាយណាគឺស្មើនឹងប្រាក់ឈ្នួលបីខែចំពោះកសិករនៅស្រែចំការ។ ក៏ប៉ុន្តែ តើប្រាក់ម៉ាយណាតំណាងអ្វី? ហើយតើអ្នកបំរើត្រូវប្រើប្រាក់ម៉ាយណានេះសំរាប់ជំនួញអ្វី?
ប្រាក់ម៉ាយណាតំណាងធនធាន ដែលពួកសិស្សដែលតែងតាំងដោយវិញ្ញាណ អាចយកមកប្រើដើម្បីបង្កើតឲ្យមានអ្នកគ្រងមរតកថែមទៀតក្នុងព្រះរាជាណាចក្រនៅស្ថានសួគ៌ ទំរាំព្រះយេស៊ូយាងមកជាស្តេចក្នុងព្រះរាជាណាចក្រដែលបានសន្យានឹងមកនោះ។ ក្រោយពីដំណើររស់ឡើងវិញនិងការលេចខ្លួនឲ្យពួកសិស្សឃើញ នោះទ្រង់ប្រទានឲ្យគេនូវប្រាក់ម៉ាយណានិមិត្តរូបនេះ ដើម្បីពួកគេអាចធ្វើឲ្យមានសិស្សច្រើន ដែលនឹងចូលរួមក្នុងក្រុមដែលនឹងសោយរាជ្យក្នុងព្រះរាជាណាចក្រនៅស្ថានសួគ៌។
ព្រះយេស៊ូមានបន្ទូលទៀតថា៖ «ប៉ុន្តែ ពួកអ្នកស្រុករបស់លោក គេស្អប់លោក[បុរសត្រកូលខ្ពស់]ណាស់ ក៏ចាត់សារឲ្យទៅតាមក្រោយលោក ទូលថា ‹យើងរាល់គ្នាមិនចង់ឲ្យមនុស្សនេះសោយរាជ្យលើយើងទេ›»។ ពួកអ្នកស្រុកតំណាងជនជាតិអ៊ីស្រាអែលឬសាសន៍យូដា តែមិនរួមបញ្ចូលពួកសិស្សរបស់ទ្រង់ទេ។ ក្រោយពីព្រះយេស៊ូយាងទៅស្ថានសួគ៌ នោះពួកយូដាទាំងនេះបង្ហាញឲ្យឃើញថា ពួកគេមិនចង់ឲ្យទ្រង់ជាស្តេចរបស់ពួកគេទេ ដោយសារពួកគេបៀតបៀនពួកសិស្សរបស់ទ្រង់។ តាមរបៀបនេះ ពួកគេប្រព្រឹត្តដូចជាពួកអ្នកស្រុក ដែលចាត់អ្នកនាំសារឲ្យទៅតាមក្រោយ។
តើអ្នកបំរើដប់នាក់នេះប្រើប្រាក់ម៉ាយណារបស់ពួកគេយ៉ាងដូចម្ដេច? ព្រះយេស៊ូពន្យល់ថា៖ «លុះត្រឡប់មកវិញ ក្រោយដែលបានគ្រងរាជ្យហើយ នោះទ្រង់បង្គាប់ឲ្យហៅពួកបាវទាំងនោះ ដែលទ្រង់បានប្រគល់ប្រាក់ដល់គេឲ្យមក ដើម្បីចង់ដឹង ពីអ្នកនិមួយៗ ដែលជួញបានចំណេញប៉ុន្មានម្នាក់។ អ្នកមុនដំបូងក៏មកទូលថា ‹ព្រះអម្ចាស់អើយ! ប្រាក់[ម៉ាយណា]របស់ទ្រង់បានចំណេញ១០[ម៉ាយណា]ទៀត›។ រួចទ្រង់មានបន្ទូលថា ‹ប្រពៃហើយបាវល្អអើយ!› ដោយព្រោះឯងមានចិត្តស្មោះចំពោះ ក្នុងការបន្ដិចបន្តួចនេះ នោះចូរឯងត្រួតលើទីក្រុង១០ចុះ!›។ អ្នកទី២ក៏មកទូលថា ‹ព្រះអម្ចាស់អើយ! ប្រាក់[ម៉ាយណា]របស់ទ្រង់បានចំណេញ៥[ម៉ាយណា]ទៀត›។ រួចទ្រង់មានបន្ទូលទៅអ្នកនេះដែរថា ‹ឯឯង ចូរឯងត្រួតលើទីក្រុង៥ចុះ!›»។
អ្នកបំរើដែលមានប្រាក់ម៉ាយណាដប់តំណាងក្រុមឬគណៈសិស្សដែលមានតាំងពីបុណ្យថ្ងៃទី៥០នៅឆ្នាំ៣៣ ស.យ.រហូតមកដល់ឥឡូវនេះ ដែលរួមបញ្ចូលពួកសាវ័កផងដែរ។ ពួកអ្នកបំរើដែលបានចំណេញប្រាក់ម៉ាយណាប្រាំ ក៏តំណាងក្រុមមួយទៀតក្នុងកំឡុងពេលដដែលនោះ ហើយយោងទៅតាមឱកាសនិងសមត្ថភាពរបស់គេ បានបង្កើនធនធានរបស់ស្តេចនៅលើផែនដីនេះ។ ក្រុមទាំងពីរនេះផ្សព្វផ្សាយដំណឹងល្អយ៉ាងខ្នះខ្នែង ហើយជាលទ្ធផល មនុស្សដែលមានចិត្តស្មោះបានក្លាយទៅជាគ្រីស្ទាន។ អ្នកបំរើប្រាំបួននាក់បានធ្វើជំនួញយ៉ាងជោគជ័យ និងបង្កើននូវទ្រព្យរបស់គេ។
ព្រះយេស៊ូមានបន្ទូលទៀតថា៖ «អ្នក១ទៀតមកទូលថា ‹ព្រះអម្ចាស់អើយ! នេះនែប្រាក់[ម៉ាយណា]របស់ទ្រង់ ដែលទូលបង្គំបានវេចទុកក្នុងកន្សែង ដ្បិតទូលបង្គំនឹកខ្លាចទ្រង់ ព្រោះទ្រង់ជាមនុស្សប្រិតប្រៀប ទ្រង់លើកយករបស់ដែលទ្រង់មិនបានដាក់ ហើយច្រូតចំរូតដែលទ្រង់មិនបានសាបព្រោះ›។ នោះទ្រង់មានបន្ទូលទៅអ្នកនោះថា ‹បាវអាក្រក់អើយ! អញនឹងជំនុំជំរះឯង តាមសំដីឯង ចុះបើឯងដឹងថា អញជាមនុស្សប្រិតប្រៀប ទាំងលើកយករបស់ដែលអញមិនបានដាក់ ហើយច្រូតចំរូតដែលអញមិនបានសាបព្រោះ ដូច្នេះ តើហេតុអ្វីបានជាឯងមិនបានយកប្រាក់អញនោះ ទៅដាក់នៅឯផ្ទះចងការវិញ ដើម្បីដល់អញត្រឡប់មកវិញ នោះអញនឹងបានទាំងដើមទាំងការផង?›។ ទ្រង់ក៏មានបន្ទូលទៅពួកអ្នក ដែលឈរនៅមុខលោកថា ‹ចូរដកយកប្រាក់១[ម៉ាយណា]ពីវាចេញ ហើយឲ្យដល់អ្នកដែលមាន១០[ម៉ាយណា]វិញ›»។
ចំពោះអ្នកបំរើអាក្រក់នេះ ដោយគាត់បាត់បង់នូវប្រាក់ម៉ាយណាដែលជានិមិត្តរូបនេះ ក៏មានន័យថាគាត់បាត់បង់កន្លែងក្នុងព្រះរាជាណាចក្រនៅស្ថានសួគ៌ដែរ។ ត្រូវហើយ គាត់បាត់បង់នូវឯកសិទ្ធិសោយរាជ្យលើទីក្រុងដប់ឬទីក្រុងប្រាំ បើនិយាយជាអត្ថបដិរូប។ ចូរកត់សម្គាល់ដែរ គេមិនបានប្រកាសថាគាត់ជាអ្នកបំរើអាក្រក់ដែលបានប្រព្រឹត្តនូវអំពើអាក្រក់នោះទេ ផ្ទុយទៅវិញគឺអាក្រក់ ដោយមិនបានធ្វើការ ដើម្បីបង្កើនទ្រព្យសម្បត្ដិនៃព្រះរាជាណាចក្ររបស់ចៅហ្វាយគាត់។
ពេលប្រាក់ម៉ាយណារបស់អ្នកបំរើអាក្រក់នេះ យកទៅឲ្យអ្នកបំរើទីមួយ នោះពួកគេប្រកែកថា៖ «ព្រះអម្ចាស់អើយ! អ្នកនោះមាន១០[ម៉ាយណា]ហើយ!»។ តែព្រះយេស៊ូមានបន្ទូលតបថា៖ «គេនឹងឲ្យដល់អស់អ្នកណាដែលមាន តែអ្នកណាដែលគ្មាន នោះគេនឹងហូតយកទាំងរបស់ដែលអ្នកនោះមានចេញផង មួយទៀត ឯពួកខ្មាំងសត្រូវ ដែលមិនចង់ឲ្យអញសោយរាជ្យលើគេ នោះចូរនាំគេមកសំឡាប់ទាំងអស់ នៅមុខអញនេះវិញ»។ លូកា ១៩:១១-២៧; ម៉ាថាយ ២៨:១៩, ២០
▪ តើអ្វីដែលជំរុញឲ្យព្រះយេស៊ូមានបន្ទូលប្រាប់ អំពីរឿងប្រៀបប្រដូចនៃប្រាក់ម៉ាយណា?
▪ តើអ្នកណាជាបុរសដែលមានត្រកូលខ្ពស់? ហើយតើគាត់ទៅស្រុកណា?
▪ តើពួកអ្នកបំរើតំណាងអ្នកណា? ហើយតើប្រាក់ម៉ាយណាតំណាងអ្វី?
▪ តើពួកអ្នកស្រុកតំណាងអ្នកណា? ហើយតើពួកគេបង្ហាញនូវសេចក្ដីស្អប់របស់ពួកគេយ៉ាងដូចម្ដេច?
▪ ហេតុអ្វីក៏អ្នកបំរើម្នាក់ក្លាយទៅជាអាក្រក់? ហើយគាត់បាត់បង់ប្រាក់ម៉ាយណារបស់គាត់មានន័យយ៉ាងណា?