រៀនពីការល្បួងដែលព្រះយេស៊ូធ្លាប់ពិសោធ
ជំពូកទី១៣
រៀនពីការល្បួងដែលព្រះយេស៊ូធ្លាប់ពិសោធ
ក្រោយពីបុណ្យជ្រមុជទឹករបស់ទ្រង់ភ្លាម នោះព្រះយេស៊ូបានត្រូវវិញ្ញាណរបស់ព្រះនាំទៅឯទីរហោស្ថាននៅក្នុងស្រុកយូដា។ ទ្រង់មានអ្វីជាច្រើនដើម្បី នឹងគិត ដ្បិតពេលទ្រង់បានទទួលបុណ្យជ្រមុជទឹក នោះ «មេឃក៏បើកឡើង» ដើម្បីឲ្យទ្រង់អាចយល់អំពីអ្វីនៅស្ថានសួគ៌។ ប្រាកដហើយ គឺមានអ្វីជាច្រើនដើម្បីឲ្យទ្រង់រំពឹងគិត!
ព្រះយេស៊ូចំណាយពេល៤០ថ្ងៃនិង៤០យប់នៅក្នុងទីរហោស្ថាន ហើយមិនបានសោយអ្វីសោះក្នុងកំឡុងពេលនោះ។ រួចមក នៅពេលដែលព្រះយេស៊ូទ្រង់ឃ្លានយ៉ាងខ្លាំង នោះអារក្សក៏ចូលមកល្បួងទ្រង់ ដោយពោលថា៖ «បើអ្នកជាព្រះរាជបុត្រានៃព្រះមែន ចូរបង្គាប់ឲ្យថ្មទាំងនេះត្រឡប់ជានំប៉័ងទៅ!»។ ប៉ុន្តែព្រះយេស៊ូជ្រាបថា គឺជាការខុសក្នុងការប្រើអំណាចធ្វើអព្ភូតហេតុដើម្បី ផ្គាប់តាមសេចក្ដីប្រាថ្នាផ្ទាល់ខ្លួននោះ។ ដូច្នេះទ្រង់បដិសេធដោយមិនធ្វើតាមការបោកបញ្ឆោតរបស់អារក្សឡើយ។
ក៏ប៉ុន្តែ អារក្សមិនព្រមចុះចាញ់ទេ។ វាក៏សាកប្រើឧបាយកលមួយទៀត។ វាល្បងលឲ្យព្រះយេស៊ូលោតទម្លាក់ខ្លួនពីកំផែងព្រះវិហារ ដើម្បីឲ្យពួកទេវតារបស់ព្រះសង្គ្រោះទ្រង់។ ប៉ុន្តែ ព្រះយេស៊ូមិនឲ្យវាល្បួង ដើម្បីធ្វើការបង្ហាញដ៏អស្ចារ្យនោះទេ។ ដោយស្រង់ឃ្លាពីបទគម្ពីរ នោះព្រះយេស៊ូបង្ហាញថា គឺជាការខុសក្នុងការល្បងលព្រះតាមរបៀបនេះ។
នៅក្នុងការល្បួងទីបី តាមរបៀបជាអព្ភូតហេតុ នោះអារក្សបង្ហាញព្រះរាជាណាចក្រទាំងប៉ុន្មានក្នុងពិភពលោកឲ្យព្រះយេស៊ូទត ហើយទូលថា៖ «បើសិនជាអ្នកក្រាបថ្វាយបង្គំខ្ញុំ នោះខ្ញុំនឹងឲ្យរបស់ទាំងនេះដល់អ្នក»។ ក៏ប៉ុន្តែម្ដងនេះទៀត នោះព្រះយេស៊ូបដិសេធដោយមិនបន្ទន់ទៅតាមការល្បួងរបស់វាដែលឲ្យធ្វើខុសនោះឡើយ ដោយទ្រង់សម្រេចព្រះទ័យនៅស្មោះត្រង់ចំពោះព្រះដដែល។
យើងអាចរៀនពីការល្បួងទាំងនេះដែលព្រះយេស៊ូបានពិសោធ។ ជាឧទាហរណ៍ ការល្បួងទាំងនេះបង្ហាញថា អារក្សមិនមែនគ្រាន់តែជាគុណវិបត្ដិដ៏អាក្រក់ ដូចមនុស្សខ្លះតែងតែអះអាងនោះប៉ុណ្ណោះទេ ប៉ុន្តែវាជាបុគ្គលពិតម្នាក់ ដែលមនុស្សមើលមិនឃើញ។ ការល្បួងរបស់វាចំពោះព្រះយេស៊ូក៏បង្ហាញថា រដ្ឋាភិបាលទាំងប៉ុន្មានក្នុងពិភពលោកនេះ ជាទ្រព្យរបស់ផងអារក្ស។ ដ្បិតតើតង្វាយរបស់អារក្សដែលថ្វាយចំពោះព្រះយេស៊ូ អាចជាការល្បួងពិតយ៉ាងដូចម្ដេចបាន បើរបស់ទាំងនេះមិនមែនជាទ្រព្យរបស់ផងវានោះ?
ហើយចូរគិតមើលអំពីរឿងនេះ៖ អារក្សបានទូលថា វាសុខចិត្តឲ្យរង្វាន់ព្រះយេស៊ូ ប្រសិនបើទ្រង់ថ្វាយបង្គំវាតែម្ដងប៉ុណ្ណោះ នោះវានឹងព្រមឲ្យទ្រង់នូវអស់ទាំងព្រះរាជាណាចក្រក្នុងលោកីយ៍។ អារក្សក៏ប្រហែលជាសាកល្បួងយើងតាមរបៀបស្រដៀងគ្នានេះដែរ ប្រហែលជាវាឲ្យនូវឱកាសដ៏គួរឲ្យទាក់ទាញចិត្តនៅពីមុខយើង ដើម្បីទទួលទ្រព្យសម្បត្ដិ អំណាច និងឋានៈខាងលោកីយ៍។ ក៏ប៉ុន្តែយើងនឹងមានប្រាជ្ញាមែនហ្ន៎! ក្នុងការធ្វើតាមគំរូរបស់ព្រះយេស៊ូ ដោយរក្សាភាពស្មោះត្រង់ចំពោះព្រះ ទោះជាការល្បួងនោះជាអ្វីក៏ដោយ។ ម៉ាថាយ ៣:១៦; ៤:១-១១; ម៉ាកុស ១:១២, ១៣; លូកា ៤:១-១៣
▪ តាមមើលទៅ តើព្រះយេស៊ូរំពឹងគិតពីអ្វីខ្លះ ក្នុងកំឡុង៤០ថ្ងៃនៅទីរហោស្ថាន?
▪ តើតាមរបៀបណាដែលអារក្សសាកល្បួងព្រះយេស៊ូនោះ?
▪ តើយើងអាចរៀនអ្វីពីការល្បួងដែលព្រះយេស៊ូបានពិសោធនោះ?