សេចក្ដីសង្ឃឹមចំពោះដំណើររស់ឡើងវិញ
ជំពូកទី៩០
សេចក្ដីសង្ឃឹមចំពោះដំណើររស់ឡើងវិញ
នៅទីបំផុត ព្រះយេស៊ូយាងមកដល់ជាយភូមិបេថានី ជាភូមិមួយដែលមានចម្ងាយបីគីឡូម៉ែត្រពីក្រុងយេរូសាឡិម។ មរណភាពនិងការបញ្ចុះសពរបស់ឡាសារគឺកន្លងទៅបីបួនថ្ងៃទៅហើយ។ ម៉ាថានិងម៉ារាជាបងស្រីរបស់គាត់ កំពុងតែកាន់ទុក្ខ ហើយមានមនុស្សជាច្រើនបានមកជួយរំលែកទុក្ខនៅផ្ទះរបស់ពួកគាត់។
កាលដែលម៉ាថានិងម៉ារាកំពុងតែកាន់ទុក្ខ នោះមានមនុស្សប្រាប់ម៉ាថាថា ព្រះយេស៊ូកំពុងតែយាងមក។ នោះនាងក៏ចេញទៅទទួលព្រះយេស៊ូទាំងប្រញាប់ ហើយតាមមើលទៅឥតប្រាប់ប្អូនស្រីរបស់នាងទេ។ ពេលមកជួបព្រះយេស៊ូ នោះនាងម៉ាថាទូលទ្រង់នូវអ្វីដែលនាងនិងប្អូនស្រីនាង បាននិយាយច្រើនដងក្នុងកំឡុងពេលបួនថ្ងៃកន្លងទៅនេះ ដោយទូលថា៖ «ព្រះអម្ចាស់អើយ! បើសិនជាទ្រង់បានគង់នៅទីនេះ នោះប្អូនខ្ញុំម្ចាស់មិនបានស្លាប់ទេ»។
ប៉ុន្តែ ម៉ាថាសម្ដែងនូវសេចក្ដីសង្ឃឹម ដោយបង្ហើបថាព្រះយេស៊ូអាចធ្វើអ្វីមួយដើម្បីជួយប្អូនប្រុសរបស់នាង។ នាងទូលថា៖ «ខ្ញុំម្ចាស់ដឹងថា . . . នោះការអ្វីដែលទ្រង់នឹងសូមពីព្រះ គង់តែព្រះនឹងប្រទានមកទ្រង់ជាមិនខាន»។
ព្រះយេស៊ូមានបន្ទូលសន្យាដល់នាងថា៖ «ប្អូននាងនឹងរស់ឡើងវិញ»។
ម៉ាថាយល់ថាព្រះយេស៊ូមានបន្ទូលអំពីដំណើររស់ឡើងវិញនាអនាគតកាល ដែលនឹងមានឡើងនៅលើផែនដីនេះ ជាសេចក្ដីសង្ឃឹមដែលលោកអ័ប្រាហាំនិងអ្នកបំរើឯទៀតទន្ទឹងចាំនោះ។ ម៉ាថាទូលទ្រង់ថា៖ «ខ្ញុំដឹងថា នៅថ្ងៃចុងបំផុត កាលណាមនុស្សត្រូវរស់ពីស្លាប់ឡើងវិញ នោះប្អូនខ្ញុំម្ចាស់នឹងរស់ឡើងដែរ»។
ប៉ុន្តែ ព្រះយេស៊ូប្រទាននូវសេចក្ដីសង្ឃឹមចំពោះការសម្រាលទុក្ខភ្លាម ដោយមានបន្ទូលទៅនាងថា៖ «ខ្ញុំជាសេចក្ដីរស់ឡើងវិញ ហើយជាជីវិត»។ ព្រះយេស៊ូរំឭកនាងម៉ាថាថា ព្រះវរបិតារបស់ទ្រង់បានប្រទានឲ្យទ្រង់មានអំណាចលើសេចក្ដីស្លាប់ ដោយមានបន្ទូលថា៖ «អ្នកណាដែលជឿដល់ខ្ញុំ ទោះបើបានស្លាប់ហើយ គង់តែនឹងរស់ឡើងវិញដែរ។ ឯអ្នកណាដែលរស់នៅ ហើយជឿដល់ខ្ញុំ នោះមិនត្រូវស្លាប់ឡើយ»។
ព្រះយេស៊ូមិនមែនចង់ប្រាប់ម៉ាថាថា អស់អ្នកស្មោះត្រង់ដែលរស់នៅគ្រានោះនឹងមិនស្លាប់នោះទេ។ ប៉ុន្តែ ព្រះយេស៊ូចង់មានន័យថា អស់អ្នកដែលមានជំនឿលើទ្រង់អាចទទួលជីវិតជារៀងរហូត។ មនុស្សភាគច្រើននឹងទទួលបានជីវិតបែបនេះ ពីព្រោះពួកគេនឹងត្រូវប្រោសឲ្យរស់ឡើងវិញនៅថ្ងៃចុងបំផុត។ ប៉ុន្តែ អ្នកស្មោះត្រង់ឯទៀតនឹងរួចរស់ជីវិតពីចុងបញ្ចប់នៃរបបលោកីយ៍នេះ ហើយពាក្យបន្ទូលរបស់ព្រះយេស៊ូនឹងសំដៅទៅលើពួកអ្នកទាំងនេះតាមន័យចំៗតែម្ដង។ ពួកគេនឹងមិនត្រូវស្លាប់ឡើយ! ក្រោយពីមានបន្ទូលអំពីការសន្យាយ៉ាងអស្ចារ្យ នោះព្រះយេស៊ូមានបន្ទូលសួរម៉ាថាថា៖ «នាងជឿសេចក្ដីនេះឬទេ?»។
នាងទូលឆ្លើយថា៖ «ព្រះពរព្រះអម្ចាស់ ខ្ញុំម្ចាស់ជឿហើយថា ទ្រង់ជាព្រះគ្រីស្ទ គឺជាព្រះរាជបុត្រានៃព្រះ ដែលត្រូវយាងមកក្នុងលោកីយមែន»។
រួចមក ម៉ាថាក៏ចេញទៅហៅប្អូនស្រីទាំងប្រញាប់ ហើយប្រាប់នាងដោយស្ងាត់ៗថា៖ «លោកគ្រូអញ្ជើញមកដល់ហើយ! លោកហៅរកឯង»។ ម៉ារាក៏ចេញពីផ្ទះទៅរកទ្រង់ភ្លាម។ ពេលអ្នកឯទៀតឃើញនាងចេញទៅ នោះពួកគេក៏នាំគ្នាទៅតាម ដ្បិតពួកគេស្មានថានាងទៅឯផ្នូរ។
ពេលនាងម៉ារាទៅដល់កន្លែងដែលព្រះយេស៊ូគង់នៅ នោះនាងក្រាបនៅទៀបព្រះបាទាទូលថា៖ «ព្រះអម្ចាស់អើយ! បើទ្រង់បានគង់នៅទីនេះ នោះប្អូនខ្ញុំម្ចាស់មិនបានស្លាប់ទេ»។ ព្រះយេស៊ូមានសេចក្ដីរំជួលព្រះទ័យ កាលដែលទ្រង់ឃើញម៉ារាយំ ព្រមទាំងហ្វូងមនុស្សដែលដើរតាមនឹងនាងផង។ ព្រះយេស៊ូមានបន្ទូលសួរថា៖ «អ្នករាល់គ្នាបានយករូបបុគ្គលទៅទុកឯណា?»។
ពួកគេទូលឆ្លើយថា៖ «ព្រះអម្ចាស់! សូមយាងទៅទតមើល!»។
ព្រះយេស៊ូក៏ព្រះកន្សែងដែរ ដូច្នេះពួកសាសន៍យូដានិយាយថា៖ «មើល! លោកស្រឡាញ់គាត់ណាស់ហ្ន៎!»។
មនុស្សខ្លះនឹកចាំកាលពីបីបួនខែមុននេះនៅឯបុណ្យរោងឧបោសថ ព្រះយេស៊ូបានប្រោសបុរសខ្វាក់ពីកំណើតឲ្យមើលឃើញវិញ ហើយពួកគេខ្លះសួរថា៖ «លោកនេះដែលបានប្រោសមនុស្សខ្វាក់ឲ្យភ្លឺ តើពុំអាចនឹងឃាត់មិនឲ្យមនុស្សនេះស្លាប់បានដែរឬ?»។ យ៉ូហាន ៥:២១; ៦:៤០; ៩:១-៧; ១១:១៧-៣៧
▪ នៅទីបំផុត តើព្រះយេស៊ូយាងមកដល់ភូមិបេថានីនៅពេលណា? តើមានស្ថានការណ៍យ៉ាងណានៅទីនោះ?
▪ តើនាងម៉ាថាជឿលើដំណើររស់ឡើងវិញ ដោយមានមូលដ្ឋានទៅលើអ្វី?
▪ តើមរណភាពរបស់ឡាសារមានអានុភាពយ៉ាងណាលើព្រះយេស៊ូ?
