សំនួរអំពីឪពុក
ជំពូកទី៦៩
សំនួរអំពីឪពុក
ក្នុងកំឡុងពេលដែលបុណ្យបារាំកំពុងប្រព្រឹត្តទៅ នោះការពិគ្រោះរបស់ព្រះយេស៊ូជាមួយពួកមេដឹកនាំសាសនា មានកាន់តែខ្លាំងឡើង។ ព្រះយេស៊ូទទួលស្គាល់ថា៖ «ខ្ញុំដឹងហើយថា អ្នករាល់គ្នាជាពូជលោកអ័ប្រាហាំ ប៉ុន្តែអ្នករាល់គ្នារកសំឡាប់ខ្ញុំ ពីព្រោះពាក្យខ្ញុំគ្មានកន្លែងដក់នៅក្នុងចិត្តរបស់អ្នករាល់គ្នាទេ ឯខ្ញុំៗនិយាយតែសេចក្ដីណាដែលខ្ញុំបានឃើញនៅឯព្រះវរបិតាខ្ញុំ តែអ្នករាល់គ្នាធ្វើតែការដែលបានឃើញ នៅឯឪពុករបស់អ្នករាល់គ្នាវិញ»។
ថ្វីបើព្រះយេស៊ូមិនបានសម្គាល់ឪពុករបស់ពួកគេ តែទ្រង់បានបញ្ជាក់ថាឪពុករបស់ពួកគេ គឺខុសពីបិតារបស់ទ្រង់។ ពួកមេដឹកនាំសាសនាយូដាឥតដឹងថា ព្រះយេស៊ូចង់មានបន្ទូលអំពីអ្វីទេ នោះពួកគេទូលឆ្លើយថា៖ «គឺលោកអ័ប្រាហាំ ជាឪពុកនៃយើងរាល់គ្នា»។ ពួកគេគិតថាពួកគេមានជំនឿដូចលោកអ័ប្រាហាំ ព្រោះលោកជាមិត្តសំឡាញ់របស់ព្រះ។
ប៉ុន្តែ ព្រះយេស៊ូមានបន្ទូលដែលធ្វើឲ្យគេភ្ញាក់ផ្អើលថា៖ «បើអ្នករាល់គ្នាជាពូជលោកអ័ប្រាហាំពិត នោះនឹងធ្វើតាមលោកជាប្រាកដ»។ ប្រាកដហើយ កូនល្អម្នាក់នឹងធ្វើតាមគំរូឪពុកខ្លួន។ ព្រះយេស៊ូមានបន្ទូលថា៖ «តែឥឡូវនេះ អ្នករាល់គ្នារកចង់សំឡាប់ខ្ញុំវិញ ជាមនុស្សដែលយកសេចក្ដីពិត ដែលបានឮពីព្រះ មកប្រាប់ដល់អ្នករាល់គ្នា លោកអ័ប្រាហាំមិនបានធ្វើដូច្នោះទេ»។ ដូច្នេះ ព្រះយេស៊ូមានបន្ទូលម្ដងទៀតថា៖ «អ្នករាល់គ្នាធ្វើតាមតែឪពុករបស់ខ្លួន»។
ក៏ប៉ុន្តែពួកគេនៅតែឥតយល់អំពីអ្វីដែលព្រះយេស៊ូកំពុងមានបន្ទូលនោះទេ។ ពួកគេនៅអះអាងថា ពួកគេជាកូនពេញច្បាប់របស់លោកអ័ប្រាហាំ ដោយទូលថា៖ «យើងរាល់គ្នាមិនមែនជាកូនសហាយទេ»។ ហេតុនេះហើយបានជាពួកគេអះអាងថា គេជាពួកអ្នកថ្វាយបង្គំពិតដូចលោកអ័ប្រាហាំដែរ ថែមទាំងអួតថា៖ «យើងមានព្រះវរបិតាតែ១ គឺជាព្រះ»។
ក៏ប៉ុន្តែ តើព្រះពិតជាព្រះវរបិតារបស់ពួកគេមែនឬ? ព្រះយេស៊ូមានបន្ទូលតបថា៖ «បើព្រះជាព្រះវរបិតានៃអ្នករាល់គ្នាមែន នោះអ្នកនឹងបានស្រឡាញ់ខ្ញុំ ដ្បិតខ្ញុំចេញពីព្រះមក ហើយក៏មកដល់ មិនមែនមកដោយអាងខ្លួនខ្ញុំទេ គឺព្រះអង្គបានចាត់ឲ្យខ្ញុំមកទេតើ ហេតុអ្វីបានជាអ្នករាល់គ្នាមិនយល់សំដីខ្ញុំ?»។
ព្រះយេស៊ូខំបង្ហាញពួកមេដឹកនាំសាសនា នូវលទ្ធផលអាក្រក់ចំពោះការបដិសេធមិនទទួលស្គាល់ទ្រង់។ ក៏ប៉ុន្តែ ឥឡូវនេះទ្រង់មានបន្ទូលយ៉ាងចំៗថា៖ «អ្នករាល់គ្នាមានអារក្សសាតាំងជាឪពុក ហើយអ្នករាល់គ្នាចូលចិត្តធ្វើតាមតណ្ហា ដែលគាប់ចិត្តដល់ឪពុករបស់អ្នក»។ តើអារក្សជាឪពុកបែបណាទៅ? ព្រះយេស៊ូមានបន្ទូលប្រាប់ថា វាជាអ្នកសំឡាប់គេ និងមានបន្ទូលថា៖ «ដ្បិតវាជាអ្នកកំភូត ហើយជាឪពុកនៃសេចក្ដីនោះឯង»។ ដូច្នេះ ព្រះយេស៊ូបានបញ្ចប់ដោយមានបន្ទូលថា៖ «អ្នកណាដែលកើតអំពីព្រះ នោះក៏ស្ដាប់តាមព្រះបន្ទូលនៃព្រះដែរ ឯអ្នករាល់គ្នា មិនបានកើតមកពីព្រះទេ បានជាមិនស្ដាប់តាមដូច្នេះ»។
ពួកសាសន៍យូដាក្ដៅចិត្តនឹងព្រះយេស៊ូណាស់ ដែលទ្រង់ផ្ដន្ទាទោសពួកគេដូច្នេះ ហើយពួកគេក៏ទូលឆ្លើយទៅទ្រង់វិញថា៖ «តើយើងមិននិយាយត្រូវថា អ្នកជាសាសន៍សាម៉ារី ហើយមានអារក្សចូលទេឬ?»។ ពាក្យថា«សាសន៍សាម៉ារី» គឺប្រើជាការសម្ដែងនូវសេចក្ដីស្អប់ខ្ពើមនិងប្រមាថមើលងាយ ដោយព្រោះសាសន៍យូដាស្អប់ខ្ពើមសាសន៍សាម៉ារីណាស់។
ព្រះយេស៊ូបានធ្វើកន្តើយនឹងពាក្យសំដីដ៏មើលងាយនេះ ថាទ្រង់ជាសាសន៍សាម៉ារីម្នាក់ តែទ្រង់មានបន្ទូលតបថា៖ «ខ្ញុំគ្មានអារក្សចូលទេ ខ្ញុំគោរពប្រតិបត្ដិចំពោះព្រះវរបិតាខ្ញុំ តែអ្នករាល់គ្នាត្មះតិះដៀលខ្ញុំវិញ»។ ព្រះយេស៊ូមានបន្ទូលជាបន្តទាំងសន្យាថា៖ «បើអ្នកណាកាន់តាមពាក្យខ្ញុំ អ្នកនោះមិនត្រូវឃើញសេចក្ដីស្លាប់ នៅអស់កល្បរៀងទៅ»។ ប្រាកដហើយ ព្រះយេស៊ូមិនមែនបានសេចក្ដីថា អស់អ្នកដែលកាន់តាមទ្រង់ នឹងមិនស្លាប់មែនទែននោះទេ។ ផ្ទុយទៅវិញ ទ្រង់មានន័យថា ពួកគេនឹងមិនឃើញនូវសេចក្ដីហិនវិនាសជាអនន្ត ឬ«សេចក្ដីស្លាប់ទី២» ដែលគ្មានដំណើររស់ឡើងវិញនោះ។
ក៏ប៉ុន្តែ ពួកយូដាយល់ពាក្យរបស់ព្រះយេស៊ូតាមន័យត្រង់ៗ។ ដូច្នេះ ពួកសាសន៍យូដាទូលថា៖ «ឥឡូវនេះ យើងដឹងជាប្រាកដថា អ្នកមានអារក្សចូលពិតមែន ព្រោះលោកអ័ប្រាហាំ នឹងពួកហោរា បានស្លាប់អស់ហើយ តែអ្នកថា បើអ្នកណាកាន់តាមពាក្យអ្នក នោះមិនដែលភ្លក់សេចក្ដីស្លាប់ នៅអស់កល្បរៀងទៅវិញ តើអ្នកធំជាងលោកអ័ប្រាហាំ ជាឰយុកោយើង នឹងពួកហោរា ដែលស្លាប់ទៅហើយនោះឬ? . . . តើអ្នកតាំងខ្លួនធ្វើជាអ្វី?»។
ក្នុងការពិគ្រោះទាំងមូលនេះ គឺឃើញជាក់ស្តែងថា ព្រះយេស៊ូកំពុងតែបញ្ជាក់ប្រាប់បុរសទាំងនេះ ថាទ្រង់ជាព្រះមេស្ស៊ីដែលបានសន្យាមកនោះ។ ក៏ប៉ុន្តែ ជាជាងឆ្លើយយ៉ាងត្រង់នឹងសំនួររបស់ពួកគេ ស្តីអំពីអត្តសញ្ញាណរបស់ទ្រង់ នោះព្រះយេស៊ូមានបន្ទូលថា៖ «បើសិនជាខ្ញុំដំកើងខ្លួនខ្ញុំ នោះកិត្ដិសព្ទរបស់ខ្ញុំឥតមានប្រយោជន៍ទេ គឺព្រះវរបិតាខ្ញុំទេតើ ទ្រង់លើកដំកើងខ្ញុំ ដែលអ្នករាល់គ្នាថា ទ្រង់ជាព្រះនៃអ្នក តែអ្នករាល់គ្នាមិនស្គាល់ទ្រង់ទេ ឯខ្ញុំៗស្គាល់ទ្រង់ បើខ្ញុំថាមិនស្គាល់ទ្រង់វិញ នោះខ្ញុំនឹងទៅជាអ្នកភូតភរដូចអ្នករាល់គ្នាដែរ»។
ព្រះយេស៊ូមានបន្ទូលសំដៅទៅលោកអ័ប្រាហាំម្ដងទៀត ដោយមានបន្ទូលថា៖ «លោកអ័ប្រាហាំ ជាឰយុកោអ្នករាល់គ្នា លោកបានត្រេកអរដោយឃើញគ្រាខ្ញុំ លោកក៏បានឃើញមែន ហើយមានសេចក្ដីរីករាយ»។ ត្រូវហើយ ដោយមានជំនឿ នោះលោកអ័ប្រាហាំបានទន្ទឹងចាំការយាងមកនៃព្រះមេស្ស៊ីដែលបានសន្យា។ ពួកសាសន៍យូដាទូលទៅទ្រង់វិញទាំងឥតជឿថា៖ «អាយុអ្នកមិនទាន់ដល់៥០ឆ្នាំផង ហើយអ្នកថា បានឃើញលោកអ័ប្រាហាំដែរឬ?»។
ព្រះយេស៊ូទ្រង់មានបន្ទូលតបថា៖ «ប្រាកដមែន ខ្ញុំប្រាប់អ្នករាល់គ្នាជាប្រាកដថា មុនដែលលោកអ័ប្រាហាំកើតមក នោះមានខ្ញុំហើយ»។ ប្រាកដហើយ ព្រះយេស៊ូសំដៅទៅអត្ថិភាពមុនទ្រង់ប្រសូតជាមនុស្ស ជាបុគ្គលវិញ្ញាណដ៏ខ្លាំងក្លានៅស្ថានសួគ៌។
ពួកសាសន៍យូដារើសដុំថ្មគប់ព្រះយេស៊ូ ពីព្រោះពួកគេក្ដៅចិត្តនឹងព្រះយេស៊ូណាស់ ដែលទ្រង់អះអាងថាមានជីវិតមុនលោកអ័ប្រាហាំនោះ។ ក៏ប៉ុន្តែ ទ្រង់បានពួនហើយភៀសខ្លួនចេញពីព្រះវិហារដោយឥតមានគ្រោះថ្នាក់។ យ៉ូហាន ៨:៣៧-៥៩; វិវរណៈ ៣:១៤; ២១:៨
▪ តើតាមរបៀបណាដែលព្រះយេស៊ូបង្ហាញថា ទ្រង់និងពួកសត្រូវរបស់ទ្រង់មានឪពុកខុសគ្នានោះ?
▪ តើពួកសាសន៍យូដាហៅព្រះយេស៊ូជាសាសន៍សាម៉ារី នោះមានអត្ថន័យយ៉ាងណា?
▪ តើព្រះយេស៊ូចង់មានន័យយ៉ាងណាដែលថា ពួកអ្នកកាន់តាមទ្រង់នឹងមិនឃើញសេចក្ដីស្លាប់នោះ?
