យើងទាំងអស់គ្នាត្រូវការនូវការណែនាំ
សុវណ្ណមានការព្រួយបារម្ភច្រើនណាស់។ តាំងពីយូរហើយ គាត់ខំរកការងារដែលជាប់លាប់ ដើម្បីចិញ្ចឹមក្រុមគ្រួសារ។ ម្យ៉ាងទៀត គាត់ចង់ឲ្យកូនទទួលការអប់រំល្អ ហើយមានអនាគតភ្លឺស្វាង។ ប៉ុន្ដែតាមមើលទៅ គាត់គ្មានលទ្ធភាពទទួលបានអ្វីៗទាំងនេះទេ។ សុវណ្ណមានសង្ឃឹមតែម្យ៉ាង គឺអាចមានសុខភាពល្អដើម្បីបន្ដធ្វើការ ទទួលប្រាក់ខែល្មមនឹងទិញអាហារសម្រាប់ក្រុមគ្រួសារហើយបង់ថ្លៃជួលផ្ទះ។ ប៉ុន្ដែអ្វីដែលធ្វើឲ្យគាត់បារម្ភបំផុតគឺថា បើមានអ្វីកើតឡើងចំពោះគាត់ តើមាននរណាជួយចិញ្ចឹមក្រុមគ្រួសារ?
ធារ៉ា ប្រពន្ធរបស់សុវណ្ណក៏បារម្ភដែរ។ ថ្មីៗនេះ ពួកគាត់មិនមានទំនាក់ទំនងល្អជាមួយគ្នាទេ។ ពេលសុវណ្ណមកពីធ្វើការវិញ គាត់តែងតែអស់កម្លាំង។ ធារ៉ាចង់ឲ្យសុវណ្ណជួយអប់រំកូនឲ្យមានសុជីវធម៌ ចេះគោរពចាស់ទុំ ប៉ុន្ដែសុវណ្ណតែងតែរវល់ពេក គ្មានពេលជួបជុំជាមួយនឹងក្រុមគ្រួសារទេ។ ធារ៉ាពិបាកចិត្ដដោយសារនាងនិងប្ដីឈ្លោះទាស់ទែងគ្នាជាញឹកញាប់ ហើយនោះមិនគួរឲ្យកូនឃើញទេ។ ម្យ៉ាងទៀត ចុះបើកូនម្នាក់ឈឺ? តើពួកគាត់នឹងបានលុយមកពីណាដើម្បីទិញថ្នាំនិងបង់ថ្លៃព្យាបាល? គ្រាន់តែគិតអំពីរឿងនេះ ធ្វើឲ្យធារ៉ាខ្លោចចិត្ដតែម្ដង!
បញ្ហាមួយទៀត គឺសុវណ្ណនិងធារ៉ាបានសង្កេតឃើញថាមានការផ្លាស់ប្ដូរច្រើនក្នុងសង្គម។ មនុស្សមិនសូវមានពេលសំណេះសំណាលគ្នាដូចពីមុនទេ។ សុវណ្ណនិងធារ៉ាស្រណោះស្ថានភាពកាលពីមុន ពីព្រោះមនុស្សធ្លាប់ជួយយកអាសាគ្នា តែឥឡូវមិនសូវធ្វើដូច្នោះទេ។ ពួកគាត់បានឃើញថា បងប្អូនញាតិមិត្ដរបស់ពួកគាត់ក៏មានបញ្ហាដូចនោះដែរ ព្រមទាំងព្រួយបារម្ភថាជីវិតរបស់ពួកគេនឹងទៅជាយ៉ាងណានៅថ្ងៃមុខ។ តាមមើលទៅ គ្មានអ្នកណាមានសេចក្ដីសុខដ៏ពិតប្រាកដទៀតទេ។ ធារ៉ាធ្លាប់គិតថាបើអាចរកឃើញដំណោះស្រាយចំពោះបញ្ហាទាំងនេះ ហើយមានសេចក្ដីសុខសាន្ដ នោះពិតជាល្អណាស់។ ទោះជាសុវណ្ណនិងធារ៉ាខំប្រឹងខ្លាំងយ៉ាងណាក៏ដោយ ក៏នៅតែមើលទៅដូចជាពួកគាត់ពុំអាចទទួលបាននូវអ្វីៗដែលចិត្ដចង់បាននោះដែរ។
នៅថ្ងៃមួយ សុវណ្ណនិងធារ៉ាបានពិភាក្សាគ្នាអំពីបញ្ហារបស់ពួកគាត់។
សុវណ្ណសួរថា៖ «បើយើងអាចរកឃើញផ្លូវឆ្ពោះទៅរកសុភមង្គលនិងសេចក្ដីសុខសាន្ដ នោះពិតជាល្អណាស់ មែនទេ?»។
«ចាស៎ បង!» ធារ៉ាឆ្លើយ។ នាងបន្ថែមថា៖ «អូនក៏បានគិតអំពីរឿងនោះដែរ។ បើយើងអាចរកឃើញមែន យើងលែងមានបញ្ហាហើយ»។
សុវណ្ណនិយាយតទៅទៀត៖ «ប៉ុន្ដែ មានសាសនានិងទ្រឹស្ដីផ្សេងៗច្រើនណាស់ តើយើងអាចដឹងយ៉ាងដូចម្ដេចថាផ្លូវមួយណាជាផ្លូវឆ្ពោះទៅរកសុភមង្គល? យើងមិនអាចពិសោធមើលសាសនានិងទ្រឹស្ដីទាំងអស់នោះបានទេ! ម្យ៉ាងទៀត សាសនានិងទ្រឹស្ដីសឹងតែទាំងអស់និយាយថាពួកគេដឹងអំពីរបៀបដោះស្រាយបញ្ហាដែលយើងជួបប្រទះក្នុងជីវិត ប៉ុន្ដែបើនិយាយឲ្យត្រង់ទៅ ពួកគេមិនសូវបានជួយធ្វើឲ្យជីវិតមនុស្សទៅជាប្រសើរឡើងទេ។ តាមមើលទៅ ទោះជាខំរកក៏ឥតប្រយោជន៍ដែរ»។
ទោះជាធារ៉ាមានគំនិតដូចសុវណ្ណក៏ដោយ ក៏ក្នុងចិត្ដនាងនៅតែចង់រកជំនួយសម្រាប់ក្រុមគ្រួសារដែរ។ នាងគិតថាត្រូវតែមានវិធីមួយដើម្បីរកផ្លូវនោះឃើញ។
ប្រហែលជាលោកអ្នកក៏មានការព្រួយបារម្ភអំពីបញ្ហាខ្លះៗដែលសុវណ្ណនិងធារ៉ាបានប្រឈមមុខដែរ។ បញ្ហាទាំងនោះមាននៅទូទាំងពិភពលោក។ មនុស្សនៅគ្រប់ប្រទេសចង់មានសុខភាពល្អ សេចក្ដីសុខសាន្ដ និងសុភមង្គលក្នុងជីវិតគ្រួសារ។ ប៉ុន្ដែតាមមើលទៅអ្វីៗទាំងនោះពិបាករកបានណាស់។ តើមានហេតុឲ្យសង្ឃឹមថាលោកអ្នកអាចរកឃើញផ្លូវដែលឆ្ពោះទៅរកសុភមង្គលនិងសេចក្ដីសុខសាន្ដទេ?
