មេរៀនទី១៧
ដើម្បីរក្សាចំណងមិត្ដភាពជាមួយនឹងមិត្ដម្នាក់ នោះអ្នកត្រូវតែធ្វើជាមិត្ដម្នាក់ដែរ
មិត្ដភាពគឺមានមូលដ្ឋានលើសេចក្ដីស្រឡាញ់។ ពេលអ្នករៀនបានច្រើនអំពីព្រះយេហូវ៉ា នោះអ្នកនឹងមានសេចក្ដីស្រឡាញ់កាន់តែច្រើនឡើងទៀតចំពោះទ្រង់។ កាលដែលសេចក្ដីស្រឡាញ់របស់អ្នកចំពោះព្រះលូតលាស់ឡើង នោះចិត្ដប្រាថ្នារបស់អ្នកដើម្បីបំរើទ្រង់ នឹងលូតលាស់ឡើងដែរ។ នេះនឹងជំរុញអ្នកឲ្យក្លាយទៅជាសិស្សរបស់ព្រះយេស៊ូគ្រីស្ទ។ (ម៉ាថាយ ២៨:១៩) ដោយចូលរួមជាមួយនឹងក្រុមគ្រួសារដ៏សប្បាយជាស្មរបន្ទាល់ព្រះយេហូវ៉ា នោះអ្នកអាចពិសោធមិត្ដភាពរបស់ព្រះជារៀងរហូតបាន។ តើអ្នកត្រូវតែធ្វើយ៉ាងណា?
អ្នកត្រូវតែបង្ហាញសេចក្ដីស្រឡាញ់ចំពោះព្រះ ដោយគោរពតាមក្រិត្យវិន័យរបស់ទ្រង់។ «នេះហើយជាសេចក្ដីស្រឡាញ់ដល់ព្រះ គឺឲ្យយើងកាន់តាមអស់ទាំងបញ្ញត្ដរបស់ទ្រង់ ឯបញ្ញត្ដទ្រង់នោះមិនមែនជាបន្ទុកដ៏ធ្ងន់ទេ»។—យ៉ូហានទី១ ៥:៣
អនុវត្ដតាមអ្វីដែលអ្នករៀន។ ព្រះយេស៊ូបានមានបន្ទូលប្រាប់រឿងមួយ ដែលពន្យល់អំពីចំណុចនេះ។ បុរសដ៏មានប្រាជ្ញាម្នាក់បានសាងសង់ផ្ទះរបស់គាត់លើថ្ម។ បុរសល្ងីល្ងើម្នាក់បានសាងសង់ផ្ទះរបស់គាត់លើដីខ្សាច់។ ពេលមានព្យុះភ្លៀងមកដល់ នោះផ្ទះដែលបានសាងសង់លើថ្មឥតរលំទេ ក៏ប៉ុន្ដែផ្ទះដែលបានសាងសង់លើដីខ្សាច់ នោះបានរលំអស់រលីង។ ព្រះយេស៊ូបានមានបន្ទូលថា អស់អ្នកដែលឮសេចក្ដីបង្រៀនរបស់ទ្រង់ ហើយធ្វើតាមនោះ គឺដូចជាបុរសមានប្រាជ្ញាដែលបានសាងសង់ផ្ទះលើថ្ម។ ប៉ុន្ដែអស់អ្នកដែលស្តាប់សេចក្ដីបង្រៀនរបស់ទ្រង់ ហើយមិនធ្វើតាមនោះ គឺប្រៀបដូចនឹងបុរសល្ងីល្ងើដែលបានសាងសង់ផ្ទះលើដីខ្សាច់អ៊ីចឹងដែរ។ តើអ្នកចង់ធ្វើដូចជាបុរសមួយណា?—ម៉ាថាយ ៧:២៤-២៧
ពិធីបុណ្យជ្រមុជទឹក។ «[ចូរ]ទទួលបុណ្យជ្រមុជទឹក ហើយលាងបាបអ្នកចេញចុះ ដោយការអំពាវនាវដល់ព្រះនាមព្រះអម្ចាស់»។—កិច្ចការ ២២:១៦
ចូលរួមឲ្យបានពេញលេញក្នុងការបំរើព្រះ។ «ហើយការអ្វីដែលត្រូវធ្វើក៏ដោយ ចូរធ្វើឲ្យអស់ពីចិត្ដ ទុកដូចជាធ្វើថ្វាយដល់ព្រះអម្ចាស់ មិនមែនដល់មនុស្សទេ»។—កូល៉ុស ៣:២៣