មេរៀនទី១៤
មិត្ដសម្លាញ់របស់ព្រះជៀសវាងពីអ្វីដែលអាក្រក់
សាតាំងល្បួងមនុស្សឲ្យធ្វើអំពើអាក្រក់។ បុគ្គលម្នាក់ដែលចង់ធ្វើជាមិត្ដរបស់ព្រះ ត្រូវស្អប់អ្វីដែលព្រះយេហូវ៉ាស្អប់។ (ទំនុកដំកើង ៩៧:១០) ជាបន្ដបន្ទាប់នេះជារបស់ខ្លះៗដែលមិត្ដសំឡាញ់របស់ព្រះត្រូវជៀសវាង:
អំពើបាបខាងកាម។ «កុំឲ្យផិតគ្នាឲ្យសោះ»។ (និក្ខមនំ ២០:១៤) ការរួមដំណេកមុនរៀបការគឺជាការខុសដែរ។—កូរិនថូសទី១ ៦:១៨
ការប្រមឹក។ «ពួកប្រមឹក . . . មិនដែលបានគ្រងនគរព្រះទុកជាមរដកឡើយ»។—កូរិនថូសទី១ ៦:១០
ឃាតកម្ម និងការពន្លូតកូន។ «កុំឲ្យសំឡាប់មនុស្សឲ្យសោះ»។—និក្ខមនំ ២០:១៣
ការលួច។ «កុំឲ្យលួចប្លន់ឲ្យសោះ»។—និក្ខមនំ ២០:១៥
ការភូតភរ។ ព្រះយេហូវ៉ាស្អប់«អណ្ដាតភូតភរ»។—សុភាសិត ៦:១៧
អំពើឃោរឃៅនិងការឥតចេះទប់កំហឹង។ «[ព្រះយេហូវ៉ា]ទ្រង់មានព្រះហឫទ័យស្អប់ . . . ពួកអ្នកដែលចូលចិត្ដខាងសេចក្ដីច្រឡោតវិញ»។ (ទំនុកដំកើង ១១:៥) «កិច្ចការខាងសាច់ឈាម[រួមបញ្ចូល] . . . កំហឹង»។—កាឡាទី ៥:១៩, ២០
ការលេងល្បែងស៊ីសង។ «កុំអោយបងប្អូនទាក់ទងនឹងអស់អ្នកដែលមានឈ្មោះថា . . . មានចិត្ដលោភលន់»។—កូរិនថូសទី១ ៥:១១, ព្រះគម្ពីរភាសាខ្មែរសម្រាយ
ការស្អប់ខាងពូជសាសន៍។ «ត្រូវស្រឡាញ់ពួកខ្មាំងសត្រូវ . . . ហើយត្រូវអធិស្ឋាន ឲ្យអ្នកណាដែលធ្វើទុក្ខបៀតបៀនដល់អ្នករាល់គ្នាវិញ»។—ម៉ាថាយ ៥:៤៣, ៤៤
អ្វីៗដែលព្រះមានបន្ទូលប្រាប់យើងគឺសំរាប់ជាប្រយោជន៍ឲ្យយើង។ គឺមិនតែងតែស្រួលជៀសវាងធ្វើអំពើដ៏អាក្រក់នោះទេ។ ដោយមានជំនួយពីព្រះយេហូវ៉ា និងជំនួយពីស្មរបន្ទាល់របស់ទ្រង់ នោះអ្នកអាចជៀសវាងពីការធ្វើអ្វីដែលមិនផ្គាប់ព្រះហឫទ័យព្រះ។—អេសាយ ៤៨:១៧; ភីលីព ៤:១៣; ហេព្រើរ ១០:២៤, ២៥
