មេរៀនទី១
ព្រះអញ្ជើញលោកអ្នកឲ្យធ្វើជាមិត្ដសម្លាញ់របស់លោក
ព្រះទ្រង់ចង់បានអ្នកជាមិត្ដសំឡាញ់របស់ទ្រង់។ តើអ្នកធ្លាប់គិតថា អ្នកអាចជាមិត្ដសំឡាញ់ម្នាក់របស់បុគ្គលដ៏ឧត្ដមបំផុតក្នុងសកលលោកនេះឬទេ? លោកអ័ប្រាហាំដែលបានរស់នៅជាយូរយារមកហើយ បានត្រូវហៅជាមិត្ដសំឡាញ់របស់ព្រះ។ (យ៉ាកុប ២:២៣) អ្នកឯទៀតដែលបានត្រូវរៀបរាប់ក្នុងព្រះគម្ពីរ ក៏មានមិត្ដភាពជាមួយនឹងព្រះដែរ ហើយបានទទួលពរយ៉ាងវិសេស។ សព្វថ្ងៃនេះ មនុស្សពីគ្រប់ភូមិភាគនៅផែនដីនេះ បានទៅជាមិត្ដសំឡាញ់របស់ព្រះ។ លោកអ្នកក៏អាចធ្វើជាមិត្ដសំឡាញ់របស់ព្រះដែរ។
ជាមិត្ដសំឡាញ់ម្នាក់របស់ព្រះ គឺប្រសើរជាងការធ្វើជាមិត្ដរបស់មនុស្សណាម្នាក់ទៅទៀត។ ព្រះទ្រង់មិនដែលធ្វើឲ្យខកចិត្ដដល់មិត្ដសំឡាញ់ដ៏ស្មោះត្រង់របស់ទ្រង់ឡើយ។ (ទំនុកដំកើង ១៨:២៥) ជាមិត្ដសំឡាញ់ម្នាក់របស់ព្រះ គឺប្រសើរជាងមានទ្រព្យសម្បត្ដិ។ នៅពេលដែលបុគ្គលអ្នកមានម្នាក់បានស្លាប់ទៅ នោះអ្នកឯទៀតយកប្រាក់កាសរបស់គាត់។ ក៏ប៉ុន្ដែ អស់អ្នកដែលមានមិត្ដភាពជាមួយនឹងព្រះ គឺមានទ្រព្យសម្បត្ដិដែលគ្មានអ្នកណាអាចហូតយកបានឡើយ។—ម៉ាថាយ ៦:១៩
មនុស្សខ្លះប្រហែលជានឹងខំបញ្ឈប់អ្នកពីការរៀនអំពីព្រះ។ សូម្បីតែមិត្ដភក្ដិខ្លះនិងក្រុមគ្រួសាររបស់អ្នក ក៏ប្រហែលជាធ្វើអ៊ីចឹងដែរ។ (ម៉ាថាយ ១០:៣៦, ៣៧) ប្រសិនបើអ្នកឯទៀតសើចដាក់អ្នកឬគំរាមកំហែងអ្នក សូមសួរខ្លួនអ្នកថា៖ ‹តើខ្ញុំចង់ផ្គាប់ចិត្ដអ្នកណា មនុស្សឬក៏ព្រះ?›។ សូមគិតអំពីរឿងនេះ៖ ប្រសិនបើអ្នកណាម្នាក់បានប្រាប់អ្នកឲ្យឈប់បរិភោគអាហារ តើអ្នកនឹងស្តាប់តាមគាត់ឬទេ? ប្រាកដជាអត់ទេ! អ្នកត្រូវការម្ហូបអាហារដើម្បីឲ្យរស់បាន។ ក៏ប៉ុន្ដែ ព្រះទ្រង់អាចធ្វើឲ្យអ្នករស់នៅជានិរន្ដរ៍បាន! ដូច្នេះកុំឲ្យនរណាម្នាក់បញ្ឈប់អ្នកឲ្យសោះ ពីការរៀននូវរបៀបដែលអ្នកអាចទៅជាមិត្ដសំឡាញ់ម្នាក់របស់ព្រះនោះ។—យ៉ូហាន ១៧:៣
