មេរៀនទី១១
ចូរបដិសេធសាសនាមិនពិត!
សាតាំងនិងពួកបិសាចរបស់វាមិនចង់ឲ្យអ្នកបំរើព្រះឡើយ។ ពួកវាចង់បំបែរមនុស្សគ្រប់គ្នាចេញពីព្រះ ប្រសិនបើពួកវាអាចធ្វើបាននោះ។ តើពួកវាខំប្រឹងធ្វើនេះយ៉ាងដូចម្ដេចទៅ? វិធីមួយគឺតាមរយៈសាសនាមិនពិត។ (កូរិនថូសទី២ ១១:១៣-១៥) សាសនាមួយគឺមិនពិត ប្រសិនបើសាសនានោះមិនបង្រៀនសេចក្ដីពិតពីព្រះគម្ពីរ។ សាសនាមិនពិតគឺដូចជាលុយក្លែងក្លាយ លុយនោះប្រហែលជាមើលទៅដូចជាលុយមែនទែន ក៏ប៉ុន្ដែលុយនោះគឺឥតមានតម្លៃទេ។ របស់នេះអាចធ្វើឲ្យអ្នកមានបញ្ហាជាច្រើន។
ភាពមិនពិតខាងសាសនា មិនអាចផ្គាប់ព្រះហឫទ័យរបស់ព្រះយេហូវ៉ា ដែលជាព្រះនៃសេចក្ដីពិត។ នៅពេលដែលព្រះយេស៊ូគង់នៅលើផែនដីនេះនៅឡើយ គឺមានក្រុមសាសនាមួយដែលចង់ធ្វើគុតដល់ទ្រង់។ ពួកគេបានគិតថា របៀបថ្វាយបង្គំរបស់គេគឺជាផ្លូវដ៏ត្រឹមត្រូវ។ ពួកគេបាននិយាយថា៖ «យើងមានព្រះវរបិតាតែ១ គឺជាព្រះ»។ តើព្រះយេស៊ូយល់ស្របឬទេ? អត់ទេ! ទ្រង់បានមានបន្ទូលប្រាប់ពួកគេថា៖ «អ្នករាល់គ្នាមានអារក្សសាតាំងជាឪពុក»។ (យ៉ូហាន ៨:៤១, ៤៤) សព្វថ្ងៃនេះមនុស្សជាច្រើនគិតថា ពួកគេកំពុងតែថ្វាយបង្គំព្រះ ក៏ប៉ុន្ដែពួកគេពិតជាកំពុងតែថ្វាយបង្គំសាតាំងនិងពួកបិសាចរបស់វាទៅវិញ!—កូរិនថូសទី១ ១០:២០
ដូចជាដើមឈើអត់ល្អមានផ្លែមិនល្អ នោះសាសនាមិនពិតក៏ធ្វើឲ្យមនុស្សប្រព្រឹត្ដអំពើអាក្រក់ដែរ។ ពិភពលោកនេះគឺពេញដោយបញ្ហា ដោយសារតែរបស់ដ៏អាក្រក់ដែលមនុស្សធ្វើ។ គឺមានអំពើឥតសីលធម៌ ការវាយគ្នា ការលួច ការជិះជាន់ ការកាប់សម្លាប់ និងការចាប់រំលោភ។ មនុស្សជាច្រើនដែលប្រព្រឹត្ដអំពើអាក្រក់ទាំងនេះ គឺជាអ្នកកាន់សាសនាដែរ ក៏ប៉ុន្ដែសាសនារបស់គេឥតជំរុញទឹកចិត្ដគេឲ្យប្រព្រឹត្ដអ្វីដែលល្អនោះទេ។ ពួកគេមិនអាចជាមិត្ដសំឡាញ់របស់ព្រះបានទេ លុះត្រាតែពួកគេឈប់ធ្វើអំពើអាក្រក់។—ម៉ាថាយ ៧:១៧, ១៨
សាសនាមិនពិតបង្រៀនមនុស្សឲ្យអធិស្ឋានថ្វាយរូបសំណាក។ ព្រះទ្រង់មានបន្ទូលថា កុំអធិស្ឋានថ្វាយរូបសំណាកឡើយ។ សេចក្ដីនេះគឺសមហេតុផល។ តើអ្នកនឹងពេញចិត្ដឬទេ បើបុគ្គលម្នាក់មិននិយាយជាមួយនឹងអ្នកសោះ ក៏ប៉ុន្ដែបែរជានិយាយដាក់រូបថតរបស់អ្នកទៅវិញនោះ? តើបុគ្គលនោះអាចធ្វើជាមិត្ដដ៏ស្មោះរបស់អ្នកបានទេ? អត់ទេ គាត់មិនអាចជាមិត្ដដ៏ស្មោះឡើយ។ ព្រះយេហូវ៉ាចង់ឲ្យមនុស្សនិយាយទូលថ្វាយទ្រង់ មិនមែនទៅឯរូបចម្លាក់ឬរូបថតណាដែលឥតមានជីវិតនោះឡើយ។—និក្ខមនំ ២០:៤, ៥
សាសនាមិនពិតបង្រៀនថា ការសម្លាប់អ្នកដទៃពេលមានសង្គ្រាម នោះមិនខុសទេ។ ព្រះយេស៊ូបានមានបន្ទូលថា មិត្ដសំឡាញ់របស់ព្រះនឹងមានសេចក្ដីស្រឡាញ់ក្នុងចំណោមពួកគេ។ យើងមិនសម្លាប់មនុស្សដែលយើងស្រឡាញ់នោះទេ។ (យ៉ូហាន ១៣:៣៥) គឺជាការខុសចំពោះយើង សូម្បីតែសម្លាប់មនុស្សអាក្រក់នោះ។ នៅពេលដែលពួកសត្រូវរបស់ព្រះយេស៊ូបានមកចាប់ទ្រង់ នោះទ្រង់មិនអនុញ្ញាតឲ្យពួកសិស្សទ្រង់តយុទ្ធដើម្បីការពារទ្រង់នោះទេ។—ម៉ាថាយ ២៦:៥១, ៥២
សាសនាមិនពិតបង្រៀនថា ពួកមនុស្សអាក្រក់នឹងរងទុក្ខក្នុងភ្លើងនរក។ ក៏ប៉ុន្ដែ ព្រះគម្ពីរបង្រៀនថា អំពើបាបនោះបណ្ដាលឲ្យស្លាប់។ (រ៉ូម ៦:២៣) ព្រះយេហូវ៉ាជាព្រះនៃសេចក្ដីស្រឡាញ់។ តើព្រះដ៏ប្រកបដោយសេចក្ដីស្រឡាញ់នឹងធ្វើទារុណកម្មមនុស្សជារៀងរហូតឬ? ប្រាកដជាមិនអ៊ីចឹងទេ! នៅក្នុងសួនមនោរម្យ នឹងមានសាសនាតែមួយទេ ជាសាសនាដែលព្រះយេហូវ៉ាសព្វព្រះហឫទ័យ។ (វិវរណៈ ១៥:៤) សាសនាទាំងអស់ដែលមានមូលដ្ឋានលើពាក្យកុហករបស់សាតាំង នឹងបាត់សូន្យទៅជាពុំខាន។
