មេរៀនទី២
ព្រះជាមិត្ដសម្លាញ់ដ៏ល្អបំផុតរបស់យើង
ការក្លាយទៅជាមិត្ដសំឡាញ់របស់ព្រះ គឺជាអ្វីដ៏ល្អបំផុតដែលអាចកើតឡើងចំពោះអ្នក។ ព្រះទ្រង់នឹងបង្រៀនអ្នកឲ្យរកឃើញនូវសុភមង្គលនិងសន្ដិសុខ។ ទ្រង់នឹងរំដោះអ្នកឲ្យរួចពីជំនឿឆ្វេងនិងការប្រព្រឹត្ដដែលមានគ្រោះថ្នាក់។ ទ្រង់នឹងព្រះសណ្ដាប់សេចក្ដីអធិស្ឋានរបស់អ្នក។ ទ្រង់នឹងជួយអ្នកឲ្យមានសន្ដិភាពក្នុងចិត្ដនិងមានទំនុកចិត្ដផងដែរ។ (ទំនុកដំកើង ៧១:៥; ៧៣:២៨) ព្រះទ្រង់នឹងគាំទ្រអ្នកក្នុងកាលដែលមានសេចក្ដីអំពល់។ (ទំនុកដំកើង ១៨:១៨) ហើយព្រះប្រទានឲ្យលោកអ្នកនូវអំណោយរបស់ទ្រង់ ដែលជាជីវិតអស់កល្បជានិច្ច។—រ៉ូម ៦:២៣
កាលដែលអ្នកចូលទៅជិតព្រះ នោះអ្នកនឹងចូលទៅជិតមិត្ដសំឡាញ់របស់ព្រះដែរ។ ពួកគេក៏នឹងទៅជាមិត្ដរបស់អ្នកដែរ។ តាមការពិត ពួកគេនឹងប្រៀបដូចជាបងប្អូនប្រុសស្រីអ្នកអ៊ីចឹង។ ពួកគេនឹងមានចិត្ដសប្បាយបង្រៀនអ្នកអំពីព្រះ ហើយនិងជួយអ្នក ព្រមទាំងលើកទឹកចិត្ដអ្នកទៀតផង។
យើងគឺមិនស្មើនឹងព្រះទេ។ កាលដែលអ្នកស្វែងរកមិត្ដភាពរបស់ព្រះ នោះអ្នកត្រូវតែយល់នូវហេតុការណ៍ដ៏សំខាន់មួយ។ មិត្ដភាពជាមួយនឹងព្រះ គឺមិនមែនជាមិត្ដភាពរវាងមិត្ដដែលស្មើគ្នានោះឡើយ។ ទ្រង់មានព្រះជន្មាយុចាស់ជាង ហើយមានប្រាជ្ញាច្រើនជាង ទ្រង់ក៏ខ្លាំងជាងយើងឆ្ងាយណាស់។ គឺទ្រង់ហើយដែលមានសិទ្ធិគ្រប់គ្រងលើយើង។ ដូច្នេះប្រសិនបើយើងចង់ធ្វើជាមិត្ដសំឡាញ់របស់ទ្រង់ យើងត្រូវតែស្តាប់តាមទ្រង់ និងធ្វើអ្វីៗដែលទ្រង់មានបន្ទូលប្រាប់យើងឲ្យធ្វើនោះ។ ការធ្វើបែបនេះនឹងមានប្រយោជន៍សំរាប់យើងជានិច្ច។—អេសាយ ៤៨:១៨
