មេរៀនទី៤

របៀបដែលអ្នកអាចរៀនអំពីព្រះ

លេង

អ្នកអាចរៀនអំពីព្រះយេហូវ៉ា ដោយអានព្រះគម្ពីរ។ ជាយូរយារមកហើយ ព្រះបានជ្រើសរើសមនុស្សខ្លះឲ្យសរសេរនូវគំនិតរបស់ទ្រង់។ សេចក្ដីដែលសរសេរទាំងនោះបានត្រូវហៅថា ព្រះគម្ពីរ។ សព្វថ្ងៃនេះយើងរៀនអំពីព្រះដោយអានព្រះគម្ពីរ។ ដោយព្រោះព្រះគម្ពីរមានបន្ទូលឬក៏ជាសាររបស់ព្រះយេហូវ៉ា នោះក៏បានត្រូវហៅថា បន្ទូលរបស់ព្រះដែរ។ យើងអាចជឿលើអ្វីដែលព្រះគម្ពីរចែងមក ពីព្រោះព្រះយេហូវ៉ាមិនចេះកុហកឡើយ។ «ព្រះទ្រង់កុហកពុំបានទេ»។ (ហេព្រើរ ៦:១៨) បន្ទូលរបស់ព្រះមានសេចក្ដីពិត។—យ៉ូហាន ១៧:១៧

ព្រះគម្ពីរជាអំណោយមួយដ៏មានតម្លៃបំផុតពីព្រះជូនដល់យើង។ នេះគឺប្រៀបដូចនឹងសំបុត្រពីបិតាមួយរូបដ៏ប្រកបដោយសេចក្ដីស្រឡាញ់ សរសេរទៅឲ្យបុត្រាបុត្រីរបស់លោក។ ព្រះគម្ពីរប្រាប់យើងអំពីសេចក្ដីសន្យារបស់ព្រះ ដើម្បីកែប្រែផែនដីនេះឲ្យបានជាកន្លែងដ៏អស្ចារ្យដើម្បីរស់នៅ គឺសួនមនោរម្យមួយ។ ព្រះគម្ពីរប្រាប់យើងនូវអ្វីដែលទ្រង់បានធ្វើនៅអតីតកាល ពីអ្វីដែលទ្រង់កំពុងតែធ្វើនៅបច្ចុប្បន្នកាល និងអ្វីដែលទ្រង់នឹងធ្វើនៅនាអនាគតកាល សំរាប់បុត្រាបុត្រីដ៏ស្មោះត្រង់របស់ទ្រង់។ ព្រះគម្ពីរក៏ជួយយើងលៃលកដោះស្រាយបញ្ហារបស់យើង និងរកឃើញនូវសុភមង្គលផងដែរ។—ធីម៉ូថេទី២ ៣:១៦, ១៧

ស្មរបន្ទាល់ព្រះយេហូវ៉ាជាមិត្ដសំឡាញ់របស់ព្រះ ពួកគេនឹងជួយអ្នកឲ្យយល់នូវអ្វីដែលព្រះគម្ពីរបង្រៀន។ អញ្ជើញប្រាប់គេតែម្ដងថា អ្នកចង់រៀនព្រះគម្ពីរ។ ពួកគេមិនគិតលុយពីអ្នកដោយធ្វើអ៊ីចឹងទេ។ (ម៉ាថាយ ១០:៨) បន្ថែមទៅទៀត អ្នកអាចទៅចូលរួមក្នុងកិច្ចប្រជុំគ្រីស្ទាន។ កិច្ចប្រជុំទាំងនេះគឺមាននៅកន្លែងថ្វាយបង្គំ ដែលហៅថា សាលព្រះរាជាណាចក្រ។ ប្រសិនបើអ្នកចូលរួមកិច្ចប្រជុំគ្រីស្ទាន នោះអ្នកនឹងរីកចំរើនយ៉ាងលឿនខាងចំណេះរបស់អ្នកអំពីព្រះ។

អ្នកអាចរៀនអំពីព្រះពីអ្វីៗដែលទ្រង់បានបង្កើតមក។ ជាឧទាហរណ៍ ព្រះគម្ពីរចែងថា៖ «ព្រះបានបង្កើតផ្ទៃមេឃនឹងផែនដី»។ (លោកុប្បត្ដិ ១:១) នៅពេលដែលព្រះយេហូវ៉ាបានបង្កើត«ផ្ទៃមេឃ» នោះទ្រង់បានបង្កើតសុរិយា។ អ៊ីចឹង តើនេះប្រាប់យើងយ៉ាងណាអំពីព្រះ? នេះប្រាប់យើងថា ព្រះយេហូវ៉ាមានព្រះចេស្តាដ៏សម្បើម។ មានតែទ្រង់ទេដែលអាចបង្កើតអ្វីមួយដ៏ខ្លាំងក្លាដូចសុរិយា។ នេះក៏ប្រាប់យើងថា ព្រះយេហូវ៉ាគឺប្រកបដោយប្រាជ្ញា ដ្បិតគឺត្រូវការប្រាជ្ញាដើម្បីបង្កើតសុរិយាដែលផ្ដល់ឲ្យកំដៅនិងពន្លឺដែលមិនចេះរលត់ឡើយ។

របស់ដែលព្រះយេហូវ៉ាបានបង្កើតមក ក៏បង្ហាញថាទ្រង់ស្រឡាញ់យើង។ សូមគិតអំពីផ្លែឈើផ្សេងៗទាំងប៉ុន្មានដែលមាននៅលើផែនដីនេះ។ ព្រះយេហូវ៉ាអាចគ្រាន់តែផ្ដល់នូវផ្លែឈើតែម្យ៉ាងសំរាប់យើង ឬមិនផ្ដល់ឲ្យផង។ ផ្ទុយទៅវិញ ព្រះយេហូវ៉ាបានប្រទានឲ្យយើងនូវផ្លែឈើច្រើនយ៉ាង ដែលមានរូបរាង ទំហំ ពណ៌ និងរសជាតិច្រើនយ៉ាង។ នេះបង្ហាញថាព្រះយេហូវ៉ាជាព្រះដែលមិនគ្រាន់តែប្រកបដោយសេចក្ដីស្រឡាញ់ប៉ុណ្ណោះ ក៏ប៉ុន្ដែមានព្រះទ័យសទ្ធា ហើយចេះយោគយល់ ព្រមទាំងសប្បុរសទៀតផង។—ទំនុកដំកើង ១០៤:២៤