មេរៀនទី៦១
ពួកគាត់មិនព្រមក្រាបគោរពទេ
មួយរយៈក្រោយពីសុបិនឃើញរូបដ៏ធំសម្បើម ស្ដេចនេប៊ូក្នេសាបានធ្វើរូបចម្លាក់មាសដ៏ធំមួយ ហើយដំឡើងរូបនោះនៅឯវាលឌូរ៉ា។ បន្ទាប់មក ស្ដេចកោះហៅមន្ត្រីធំៗទាំងអស់ឲ្យមកជួបជុំគ្នានៅខាងមុខរូបចម្លាក់នោះ រួមទាំងសាដ្រាក់ មេសាក់ និងអាបេឌនេកោ។ រួចស្ដេចបង្គាប់ថា៖ ‹ពេលអ្នករាល់គ្នាឮសំឡេងផ្លុំស្នែង ប៉ី ពិណ និងឃឹម អ្នករាល់គ្នាត្រូវក្រាបគោរពរូបនោះ! អ្នកណាដែលមិនក្រាបគោរព អ្នកនោះនឹងត្រូវបោះទៅក្នុងឡភ្លើង›។ តើយុវជនហេប្រឺទាំងបីនាក់នេះនឹងក្រាបគោរពរូបចម្លាក់ ឬក៏ពួកគាត់នឹងគោរពប្រណិប័តន៍តែព្រះយេហូវ៉ាប៉ុណ្ណោះ?
បន្ទាប់មក ស្ដេចបានបញ្ជាឲ្យគេលេងភ្លេង។ គ្រប់គ្នាបានក្រាបគោរពរូបចម្លាក់ លើកលែងតែសាដ្រាក់ មេសាក់ និងអាបេឌនេកោ។ អ្នកខ្លះដែលបានឃើញ ក៏ជម្រាបស្ដេចថា៖ ‹យុវជនហេប្រឺទាំងបីនាក់នោះ មិនក្រាបគោរពរូបចម្លាក់របស់ស្ដេចទេ›។ ដូច្នេះ ស្ដេចនេប៊ូក្នេសាចាត់គេឲ្យនាំពួកគាត់មកជួប រួចប្រាប់ថា៖ ‹ខ្ញុំទុកឱកាសម្ដងទៀតឲ្យពួកអ្នក។ បើពួកអ្នកមិនក្រាបគោរពទេ ខ្ញុំនឹងបោះពួកអ្នកទៅក្នុងឡភ្លើង។ គ្មានព្រះណាអាចសង្គ្រោះពួកអ្នកពីដៃរបស់ខ្ញុំឡើយ›។ ពួកគាត់ឆ្លើយថា៖ ‹ឱស្ដេចជាម្ចាស់ យើងមិនត្រូវការឱកាសម្ដងទៀតទេ។ ព្រះរបស់យើងអាចសង្គ្រោះយើងបាន។ ប៉ុន្តែ ទោះជាលោកមិនសង្គ្រោះយើងក៏ដោយ ក៏យើងមិនក្រាបគោរពរូបនោះដែរ›។
ស្ដេចនេប៊ូក្នេសាខឹងខ្លាំងណាស់ ក៏បញ្ជាអ្នកបម្រើថា៖ ‹ចូរដុតឡឲ្យក្ដៅជាងធម្មតា៧ដង!›។ រួចស្ដេចប្រាប់ពួកទាហានថា៖ ‹ចូរចងពួកគេទាំងបីនាក់នេះ ហើយបោះទៅក្នុងឡទៅ!›។ ប៉ុន្តែ ដោយសារឡភ្លើងក្ដៅដល់ម្ល៉េះ ពេលពួកទាហាននាំយុវជនទាំងបីនាក់នោះទៅបោះក្នុងឡ ពួកគេក៏ត្រូវអណ្ដាតភ្លើងឆេះស្លាប់នៅនឹងកន្លែង។ ពេលនោះស្ដេចខំមើលទៅក្នុងឡ ក៏ឃើញបុរសបួននាក់កំពុងដើរក្នុងឡនោះ មិនមែនបីនាក់ទេ។ ស្ដេចភ័យរន្ធត់ជាខ្លាំង ហើយសួរពួកមន្ត្រីថា៖ ‹ក្រែងយើងបោះបុរសបីនាក់ចូលទៅក្នុងឡ មែនទេ? ម្ដេចបានជាខ្ញុំឃើញមានបួននាក់ ហើយអ្នកទី៤មើលទៅដូចជាទេវតា!›។
នេប៊ូក្នេសាបានចូលទៅជិតមាត់ឡ ហើយស្រែកថា៖ ‹ឱអ្នកបម្រើរបស់ព្រះដ៏ខ្ពង់ខ្ពស់អើយ ចូរចេញមក!›។ មនុស្សគ្រប់គ្នាភ្ញាក់ផ្អើលណាស់ ពេលឃើញសាដ្រាក់ មេសាក់ និងអាបេឌនេកោ ដើរចេញពីក្នុងឡភ្លើងដោយមិនមានរបួស។ សូម្បីតែស្បែក សក់ក្បាល និងសម្លៀកបំពាក់របស់ពួកគាត់មិនបានឆេះឡើយ ឯខ្លួនប្រាណពួកគាត់វិញក៏គ្មានក្លិនឈ្ងៀមដែរ។
បន្ទាប់មក ស្ដេចនេប៊ូក្នេសានិយាយថា៖ ‹ព្រះរបស់សាដ្រាក់ មេសាក់ និងអាបេឌនេកោ គឺអស្ចារ្យណាស់! លោកបានចាត់ទេវតាឲ្យមកសង្គ្រោះពួកគាត់។ គ្មានព្រះណាដូចព្រះរបស់ពួកគាត់ឡើយ›។
ដូចយុវជនហេប្រឺទាំងបីនាក់ តើអ្នកតាំងចិត្តរក្សាភក្ដីភាពចំពោះព្រះយេហូវ៉ាឬទេ?
«គឺព្រះយេហូវ៉ាជាព្រះរបស់អ្នក ដែលអ្នកត្រូវគោរពប្រណិប័តន៍ ហើយគឺសម្រាប់តែលោកប៉ុណ្ណោះ ដែលអ្នកត្រូវបំពេញកិច្ចបម្រើពិសិដ្ឋ»។—ម៉ាថាយ ៤:១០
