មេរៀនទី៦៦
អែសរ៉ាបង្រៀនច្បាប់របស់ព្រះ
ប្រហែល៧០ឆ្នាំកន្លងទៅ តាំងពីជនជាតិអ៊ីស្រាអែលភាគច្រើនត្រឡប់ទៅក្រុងយេរូសាឡិមវិញ។ ប៉ុន្តែ ក៏មានជនជាតិអ៊ីស្រាអែលខ្លះបន្តរស់នៅតំបន់ផ្សេងៗក្នុងចក្រភពពើស៊ីដែរ។ ម្នាក់ក្នុងចំណោមពួកគេ គឺសង្ឃអែសរ៉ា ជាអ្នកបង្រៀនច្បាប់របស់ព្រះយេហូវ៉ា។ ពេលអែសរ៉ាបានឮថា បណ្ដាជននៅក្រុងយេរូសាឡិមមិនធ្វើតាមច្បាប់របស់ព្រះ នោះគាត់ចង់ទៅជួយពួកគេ។ ស្ដេចអើថាស៊ើកសេសនៃស្រុកពើស៊ី ប្រាប់អែសរ៉ាថា៖ ‹ព្រះបានធ្វើឲ្យអ្នកមានប្រាជ្ញា ដើម្បីអ្នកអាចបង្រៀនច្បាប់របស់លោក។ ចូរទៅចុះ! ហើយបើអ្នកណាចង់ទៅ ចូរនាំអ្នកនោះទៅជាមួយផង›។ អែសរ៉ាបានទៅជួបអស់អ្នកដែលចង់ត្រឡប់ទៅក្រុងយេរូសាឡិមវិញ ហើយពួកគាត់បានអធិដ្ឋានសុំព្រះយេហូវ៉ាជួយការពារពួកគាត់ក្នុងអំឡុងពេលធ្វើដំណើរដ៏វែងឆ្ងាយនេះ។ បន្ទាប់មក ពួកគាត់នាំគ្នាចេញដំណើរ។
បួនខែក្រោយមក ពួកគាត់បានទៅដល់ក្រុងយេរូសាឡិម។ ពួកមន្ត្រីនៅទីនោះប្រាប់អែសរ៉ាថា៖ ‹ជនជាតិអ៊ីស្រាអែលមិនស្ដាប់បង្គាប់ព្រះយេហូវ៉ាទេ ហើយបានយកស្ត្រីដែលគោរពបូជាព្រះមិនពិតធ្វើជាប្រពន្ធ›។ ពេលឮដូច្នោះ អែសរ៉ាបានលុតជង្គង់នៅចំពោះមុខបណ្ដាជន ហើយអធិដ្ឋានថា៖ ‹ឱព្រះយេហូវ៉ាអើយ លោកបានធ្វើអ្វីៗច្រើនណាស់សម្រាប់យើង តែយើងបែរជាធ្វើខុសនឹងលោកទៅវិញ›។ រួចមក បណ្ដាជនបានប្រែចិត្ត។ ប៉ុន្តែ នៅមានរឿងខ្លះដែលពួកគេមិនទាន់ធ្វើត្រឹមត្រូវនៅឡើយ។ ដូច្នេះ អែសរ៉ាបានជ្រើសរើសបុរសចាស់ទុំនិងអ្នកសម្រេចក្ដី ឲ្យពិនិត្យមើលរឿងទាំងនោះ។ ក្នុងរយៈពេលបីខែបន្ទាប់ ពួកអ្នកដែលមិនគោរពប្រណិប័តន៍ព្រះយេហូវ៉ាបានត្រូវបណ្ដេញចេញ។
រយៈពេល១២ឆ្នាំបានកន្លងផុតទៅ។ ឥឡូវ កំពែងក្រុងយេរូសាឡិមបានសង់ឡើងវិញ។ អែសរ៉ាបានហៅបណ្ដាជនឲ្យមកទីលានសាធារណៈ ដើម្បីអានច្បាប់របស់ព្រះឲ្យពួកគេស្ដាប់។ ពេលអែសរ៉ាបើករមូរ បណ្ដាជនក៏ក្រោកឡើង។ ពួកគេលើកដៃព្រមគ្នា ខណៈដែលអែសរ៉ាសរសើរតម្កើងព្រះយេហូវ៉ា។ បន្ទាប់មក អែសរ៉ាអាននិងពន្យល់ច្បាប់របស់ព្រះ ហើយពួកគេស្ដាប់យ៉ាងយកចិត្តទុកដាក់។ រួចមក ពួកគេយំ ហើយសារភាពថា ពួកគេមិនបានស្ដាប់បង្គាប់ព្រះយេហូវ៉ាទេ។ នៅថ្ងៃបន្ទាប់ អែសរ៉ាបានអានច្បាប់ថែមទៀតឲ្យពួកគេស្ដាប់។ ពេលពួកគេដឹងថាជិតដល់ពេលត្រូវធ្វើបុណ្យខ្ទម នោះពួកគេចាប់ផ្ដើមរៀបចំភ្លាមៗ។
ក្នុងអំឡុង៧ថ្ងៃនៃបុណ្យខ្ទម បណ្ដាជនរីករាយក្រៃលែង ហើយអរគុណព្រះយេហូវ៉ាដែលឲ្យស្រែចម្ការពួកគេមានភោគផលល្អ។ ពួកគេមិនបានធ្វើបុណ្យខ្ទម តាំងពីសម័យយ៉ូស្វេមកម្ល៉េះ។ បន្ទាប់ពីបុណ្យនោះ បណ្ដាជនមកជួបជុំគ្នា ហើយអធិដ្ឋានថា៖ ‹ឱព្រះយេហូវ៉ា លោកបានសង្គ្រោះយើងពីភាពជាខ្ញុំបម្រើ លោកបានចិញ្ចឹមយើងនៅតំបន់ស្ងាត់ជ្រងំ ហើយឲ្យស្រុកដ៏ល្អនេះមកយើង។ ប៉ុន្តែ ម្ដងហើយម្ដងទៀត យើងនៅតែមិនស្ដាប់បង្គាប់លោក។ លោកបានចាត់អ្នកប្រកាសទំនាយឲ្យមកព្រមានយើង តែយើងមិនព្រមស្ដាប់ឡើយ។ ទោះជាយ៉ាងណាក្ដី លោកបន្តអត់ធ្មត់នឹងយើង លោកនៅតែរក្សាពាក្យសន្យាចំពោះអាប្រាហាំ។ ឥឡូវ យើងសូមសន្យាថា យើងនឹងស្ដាប់បង្គាប់លោក›។ រួចមក ពួកគេបានសរសេរពាក្យសន្យារបស់ខ្លួន ហើយពួកអភិបាល ពួកលេវី និងពួកសង្ឃបានបោះត្រានៅលើពាក្យសន្យានោះ។
«អស់អ្នកដែលឮបណ្ដាំរបស់ព្រះ ហើយធ្វើតាម ទើបមានសុភមង្គល!»។—លូកា ១១:២៨
លោកអ្នកក៏ប្រហែលជាចូលចិត្តដែរ
វីដេអូអំពីគោលសំខាន់ពីសៀវភៅក្នុងគម្ពីរ
គោលសំខាន់ពីសៀវភៅអែសរ៉ា
ព្រះយេហូវ៉ាធ្វើតាមសេចក្ដីសន្យារបស់លោកក្នុងការរំដោះរាស្ត្រលោកពីការនិរទេសទៅបាប៊ីឡូន និងការស្ថាបនាការគោរពប្រណិប័តន៍ពិតឡើងវិញនៅក្រុងយេរូសាឡិម។
