មេរៀនទី៦៨
អេលីសាបិតមានកូន
ជាង៤០០ឆ្នាំកន្លងទៅ បន្ទាប់ពីកំពែងក្រុងយេរូសាឡិមបានត្រូវសង់ឡើងវិញ។ នៅជិតក្រុងយេរូសាឡិម មានសង្ឃម្នាក់ឈ្មោះសាការី និងប្រពន្ធឈ្មោះអេលីសាបិត។ ពួកគាត់បានរៀបការអស់ជាច្រើនឆ្នាំ តែគ្មានកូនសោះ។ នៅថ្ងៃមួយ ពេលសាការីកំពុងជូនគ្រឿងបូជានៅបន្ទប់បរិសុទ្ធក្នុងវិហារ ទេវតាកាព្រីយ៉ែលបានលេចមកជួបគាត់។ នេះបានធ្វើឲ្យគាត់ភ័យតក់ស្លុត តែកាព្រីយ៉ែលប្រាប់ថា៖ ‹កុំភ័យខ្លាចឡើយ។ ខ្ញុំនាំដំណឹងល្អពីព្រះយេហូវ៉ាមកប្រាប់អ្នក។ អេលីសាបិតប្រពន្ធរបស់អ្នក នឹងមានកូនប្រុសមួយ។ អ្នកត្រូវដាក់ឈ្មោះកូនថាយ៉ូហាន។ ព្រះយេហូវ៉ាបានជ្រើសរើសយ៉ូហានឲ្យធ្វើកិច្ចការដ៏ពិសេសមួយ›។ សាការីសួរថា៖ ‹តើខ្ញុំអាចជឿដូចម្ដេចបាន? ដោយសារខ្ញុំនិងប្រពន្ធចាស់ណាស់ហើយ មិនអាចមានកូនបានទេ›។ កាព្រីយ៉ែលនិយាយថា៖ ‹ព្រះចាត់ខ្ញុំឲ្យនាំដំណឹងនេះមកប្រាប់អ្នក។ តែដោយសារអ្នកមិនជឿខ្ញុំ អ្នកនឹងមិនអាចនិយាយបាន រហូតដល់កូននោះកើតមក›។
សាការីនៅក្នុងវិហារយូរជាងធម្មតា។ ដូច្នេះ ពេលគាត់ចេញមកវិញ អស់អ្នកដែលរង់ចាំនៅខាងក្រៅ ចង់ដឹងថាមានអ្វីកើតឡើង។ ប៉ុន្តែ សាការីមិនអាចនិយាយបានទេ គ្រាន់តែធ្វើកាយវិការប៉ុណ្ណោះ។ ហេតុនេះ ពួកគេដឹងថាសាការីទើបបានទទួលព័ត៌មានពីព្រះ។
ក្រោយមកអេលីសាបិតមានផ្ទៃពោះ ហើយកើតបានកូនប្រុសមួយ ដូចអ្វីដែលទេវតាបាននិយាយ។ មិត្តភក្តិនិងសាច់ញាតិរបស់នាងនាំគ្នាមកមើលកូននោះ ពួកគេសប្បាយរីករាយជាមួយនឹងនាង។ អេលីសាបិតប្រាប់ថា៖ ‹កូននេះឈ្មោះយ៉ូហាន›។ ពួកគេនិយាយថា៖ ‹ក្នុងញាតិសន្ដានរបស់នាងគ្មានឈ្មោះយ៉ូហានទេ។ ត្រូវដាក់ឈ្មោះកូននេះថាសាការី តាមឈ្មោះឪពុករបស់កូន›។ ប៉ុន្តែ សាការីបានសរសេរអក្សរថា៖ «កូននេះឈ្មោះយ៉ូហាន»។ រំពេចនោះ ស្រាប់តែគាត់អាចនិយាយបានវិញ! ដំណឹងអំពីទារកនេះបានសាយភាយពេញតំបន់យូឌា ហើយមនុស្សម្នាឆ្ងល់ថា៖ ‹តើទារកនេះធំឡើងនឹងទៅជាយ៉ាងណា?›។
បន្ទាប់មក សាការីពេញទៅដោយឫទ្ធានុភាពបរិសុទ្ធរបស់ព្រះ។ គាត់បាននិយាយជាទំនាយថា៖ ‹សូមឲ្យព្រះយេហូវ៉ាទទួលការសរសើរ។ លោកបានសន្យាជាមួយអាប្រាហាំថា លោកនឹងចាត់អ្នកសង្គ្រោះម្នាក់គឺមេស្ស៊ី ឲ្យមករំដោះយើង។ យ៉ូហាននឹងទៅជាអ្នកប្រកាសទំនាយម្នាក់ ហើយគាត់នឹងរៀបចំផ្លូវសម្រាប់មេស្ស៊ី›។
រឿងដ៏អស្ចារ្យមួយទៀត ក៏បានកើតឡើងដល់ម៉ារៀជាសាច់ញាតិរបស់អេលីសាបិតដែរ។ សូមយើងមើលអំពីរឿងនេះក្នុងមេរៀនបន្ទាប់។
«មនុស្សមិនអាចសម្រេចការនេះបានឡើយ ប៉ុន្តែព្រះអាចសម្រេចគ្រប់ការទាំងអស់បាន»។—ម៉ាថាយ ១៩:២៦