មេរៀនទី៨៩
ពេត្រុសមិនទទួលស្គាល់លោកយេស៊ូ
ពេលនៅបន្ទប់ខាងលើជាមួយពួកសាវ័ក លោកយេស៊ូបានប្រាប់ពួកគាត់ថា៖ ‹នៅយប់នេះ អ្នករាល់គ្នានឹងបោះបង់ខ្ញុំ›។ ពេត្រុសនិយាយថា៖ ‹ទេ! ទោះជាគ្រប់គ្នាបោះបង់លោកក៏ដោយ ក៏ខ្ញុំមិនបោះបង់លោកដែរ!›។ ប៉ុន្តែ លោកយេស៊ូប្រាប់ពេត្រុសថា៖ ‹មុនមាន់រងាវ អ្នកនឹងបដិសេធអស់បីដងថា មិនស្គាល់ខ្ញុំទេ›។
កាលពួកទាហាននាំខ្លួនលោកយេស៊ូទៅផ្ទះកៃផាស សាវ័កភាគច្រើនបានរត់ចោលលោក។ ប៉ុន្តែ មានពីរនាក់ដើរតាមក្រោយក្រុមមនុស្សទាំងនោះ។ ម្នាក់គឺពេត្រុស។ គាត់បានចូលក្នុងទីធ្លាផ្ទះកៃផាស ហើយកំពុងកម្ដៅខ្លួននឹងភ្លើង។ ដោយសារពន្លឺភ្នក់ភ្លើង ស្ត្រីអ្នកបម្រើម្នាក់បានឃើញមុខពេត្រុស ហើយនិយាយថា៖ ‹ខ្ញុំស្គាល់អ្នក! អ្នកនៅជាមួយនឹងយេស៊ូ!›។
ពេត្រុសប្រាប់ថា៖ ‹មិនមែនខ្ញុំទេ! ខ្ញុំមិនដឹងថាអ្នកកំពុងនិយាយអ្វីឡើយ!›។ រួចគាត់ក៏ចេញទៅឯច្រកចូល។ ប៉ុន្តែ ស្ត្រីអ្នកបម្រើម្នាក់ទៀតបានឃើញគាត់ ហើយប្រាប់ក្រុមមនុស្សថា៖ ‹បុរសនេះនៅជាមួយនឹងយេស៊ូ!›។ ពេត្រុសឆ្លើយថា៖ ‹ខ្ញុំមិនស្គាល់យេស៊ូទេ!›។ បុរសម្នាក់និយាយថា៖ ‹អ្នកក៏នៅក្នុងចំណោមពួកនោះដែរ! ព្រោះសម្ដីរបស់អ្នក គឺមកពីស្រុកកាលីឡេដូចយេស៊ូនោះ›។ ប៉ុន្តែ ពេត្រុសស្បថថា៖ ‹ខ្ញុំមិនស្គាល់គាត់ទេ!›។
រំពេចនោះ មាន់រងាវឡើង។ ពេត្រុសឃើញលោកយេស៊ូងាកមើលមុខគាត់ នេះធ្វើឲ្យគាត់នឹកឃើញប្រសាសន៍របស់លោក។ ដូច្នេះ គាត់ចេញទៅក្រៅយំយ៉ាងខ្លាំង។
ក្នុងពេលនោះ ក្រុមប្រឹក្សាជាន់ខ្ពស់បានជួបជុំគ្នានៅផ្ទះកៃផាស ដើម្បីជំនុំជម្រះលោកយេស៊ូ។ ពួកគេបានសម្រេចគ្នាប្រហារជីវិតលោក។ ដូច្នេះ ពួកគេខំមូលហេតុដើម្បីចោទប្រកាន់លោក តែរកមិនបានសោះ។ ចុងក្រោយ កៃផាសសួរលោកយេស៊ូត្រង់ៗថា៖ ‹តើអ្នកជាបុត្ររបស់ព្រះឬ?›។ លោកឆ្លើយថា៖ ‹ត្រូវមែន›។ កៃផាសនិយាយថា៖ ‹យើងមិនត្រូវការភ័ស្តុតាងថែមទៀតទេ។ គាត់បានប្រមាថព្រះហើយ!›។ ក្រុមប្រឹក្សាជាន់ខ្ពស់យល់ស្របថា៖ ‹បុរសនេះត្រូវតែស្លាប់›។ ពួកគេបានទះកំផ្លៀងលោកយេស៊ូ ស្ដោះទឹកមាត់ដាក់លោក គ្របមុខលោក រួចវាយលោក ហើយសួរថា៖ ‹បើឯងជាអ្នកប្រកាសទំនាយមែន ចូរប្រាប់មកថា អ្នកណាបានវាយឯង!›។
លុះព្រឹកឡើង ពួកគេបាននាំលោកយេស៊ូទៅឯសាលតុលាការជាន់ខ្ពស់ ហើយសួរលោកម្ដងទៀតថា៖ ‹តើអ្នកជាបុត្ររបស់ព្រះឬ?›។ លោកឆ្លើយថា៖ ‹ត្រូវមែន›។ ហេតុនេះ ពួកគេបានចោទលោកយេស៊ូពីបទប្រមាថព្រះ ហើយនាំលោកទៅវិមានរបស់ប៉ុនទាសពីឡាត ដែលជាអភិបាលរ៉ូម។ តើមានអ្វីកើតឡើងបន្ទាប់មកទៀត? សូមមើលជាមួយគ្នា។
«នឹងមានវេលាមកដល់ . . . ពេលដែលអ្នករាល់គ្នានឹងខ្ចាត់ខ្ចាយទៅផ្ទះរៀងខ្លួន ហើយនឹងទុកខ្ញុំឲ្យនៅម្នាក់ឯង។ ប៉ុន្តែ ខ្ញុំមិនមែននៅម្នាក់ឯងទេ ពីព្រោះបិតានៅស្ថានសួគ៌នៅជាមួយនឹងខ្ញុំ»។—យ៉ូហាន ១៦:៣២