មេរៀនទី៩៣
លោកយេស៊ូត្រឡប់ទៅស្ថានសួគ៌
នៅស្រុកកាលីឡេ លោកយេស៊ូបានជួបពួកអ្នកកាន់តាមលោក។ លោកបានឲ្យពួកគាត់នូវបង្គាប់ដ៏សំខាន់មួយគឺ៖ ‹ចូរទៅបង្រៀនមនុស្សគ្រប់ជាតិសាសន៍ឲ្យក្លាយជាអ្នកកាន់តាមខ្ញុំ។ ចូរបង្រៀនពួកគេនូវអ្វីៗដែលខ្ញុំបានបង្រៀនអ្នករាល់គ្នា ហើយជ្រមុជទឹកឲ្យពួកគេ›។ បន្ទាប់មក លោកបានសន្យាថា៖ ‹សូមចាំថា ខ្ញុំនឹងនៅជាមួយអ្នករាល់គ្នាជានិច្ច›។
ក្នុងអំឡុង៤០ថ្ងៃ ក្រោយពីលោកយេស៊ូបានត្រូវប្រោសឲ្យរស់ឡើងវិញ លោកបានលេចមកជួបពួកអ្នកកាន់តាមរាប់រយនាក់នៅស្រុកកាលីឡេ និងក្រុងយេរូសាឡិម។ លោកបានបង្រៀនពួកគាត់អំពីមេរៀនសំខាន់ៗ និងបានធ្វើអព្ភូតហេតុជាច្រើន។ រួចមក នៅលើភ្នំដើមអូលីវ លោកយេស៊ូបានជួបពួកសាវ័កជាលើកចុងក្រោយ ហើយប្រាប់ថា៖ ‹កុំចាកចេញពីក្រុងយេរូសាឡិម។ ចូរបន្តរង់ចាំអ្វីដែលបិតាបានសន្យា›។
ពួកសាវ័កមិនយល់ប្រសាសន៍របស់លោកទេ។ ពួកគាត់សួរលោកថា៖ ‹តើលោកនឹងធ្វើជាស្ដេចអ៊ីស្រាអែលនៅពេលនេះឬ?›។ លោកយេស៊ូតបថា៖ ‹មិនទាន់ដល់ពេលដែលព្រះយេហូវ៉ានឹងឲ្យខ្ញុំធ្វើជាស្ដេចទេ។ ឆាប់ៗនេះ អ្នករាល់គ្នានឹងទទួលឫទ្ធានុភាពបរិសុទ្ធ ហើយអ្នករាល់គ្នានឹងធ្វើជាសាក្សីបញ្ជាក់អំពីខ្ញុំ។ ចូរទៅផ្សព្វផ្សាយនៅក្រុងយេរូសាឡិម តំបន់យូឌា ស្រុកសាម៉ារី និងរហូតដល់កន្លែងឆ្ងាយបំផុតនៅផែនដី›។
បន្ទាប់មក លោកយេស៊ូបានត្រូវលើកឡើងទៅលើមេឃ ហើយពពកមួយបានមកបាំងលោក។ ពួកអ្នកកាន់តាមបន្តសម្លឹងមើល រហូតដល់លោកបាត់ទៅ។
រួចមក ពួកអ្នកកាន់តាមចុះពីភ្នំដើមអូលីវ ហើយទៅក្រុងយេរូសាឡិម។ ពួកគាត់ជួបជុំគ្នាជាទៀងទាត់នៅបន្ទប់ខាងលើដើម្បីអធិដ្ឋាន។ ពួកគាត់រង់ចាំទទួលការណែនាំថែមទៀតពីលោកយេស៊ូ។
«ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ រួចទីបញ្ចប់នឹងមកដល់»។—ម៉ាថាយ ២៤:១៤
លោកអ្នកក៏ប្រហែលជាចូលចិត្តដែរ
លោកយេស៊ូ ជាផ្លូវ ជាសេចក្ដីពិត ជាជីវិត
មុនបុណ្យថ្ងៃទី៥០មនុស្សរាប់រយនាក់ឃើញលោក
តាំងពីពេលដែលលោកយេស៊ូរស់ឡើងវិញរហូតដល់ពេលដែលលោកត្រឡប់ទៅស្ថានសួគ៌ លោកបានបញ្ជាក់ម្ដងហើយម្ដងទៀតដល់ពួកអ្នកកាន់តាមអំពីអ្វីដែលពួកគាត់នឹងទទួល និងអំពីរបៀបប្រើអំណោយនោះ។
