មេរៀនទី២៣
ពួកគេបានសន្យាចំពោះព្រះយេហូវ៉ា
ប្រហែលពីរខែបន្ទាប់ពីជនជាតិអ៊ីស្រាអែលចាកចេញពីស្រុកអេហ្ស៊ីប ពួកគេបានមកដល់ភ្នំស៊ីណាយ ហើយបោះជំរំនៅទីនោះ។ ព្រះយេហូវ៉ាបានហៅម៉ូសេឲ្យឡើងទៅលើភ្នំនោះ ហើយប្រាប់គាត់ថា៖ ‹ខ្ញុំបានសង្គ្រោះជនជាតិអ៊ីស្រាអែល។ បើពួកគេស្ដាប់បង្គាប់ខ្ញុំ ហើយបន្តធ្វើតាមច្បាប់របស់ខ្ញុំ នោះពួកគេនឹងទៅជារាស្ត្រពិសេសរបស់ខ្ញុំ›។ ម៉ូសេបានចុះពីភ្នំមកវិញ ហើយប្រាប់ជនជាតិអ៊ីស្រាអែលអំពីប្រសាសន៍របស់ព្រះយេហូវ៉ា។ តើពួកគេឆ្លើយយ៉ាងណា? ពួកគេឆ្លើយថា៖ «ពួកយើងព្រមធ្វើតាមប្រសាសន៍ទាំងអស់របស់ព្រះយេហូវ៉ា»។
ម៉ូសេឡើងទៅលើភ្នំស៊ីណាយម្ដងទៀត។ នៅទីនោះ ព្រះយេហូវ៉ាប្រាប់គាត់ថា៖ ‹រយៈពេលបីថ្ងៃទៀត ខ្ញុំនឹងនិយាយជាមួយអ្នក។ ចូរព្រមានបណ្ដាជនកុំឲ្យពួកគេឡើងមកលើភ្នំស៊ីណាយ›។ ម៉ូសេក៏ចុះពីភ្នំមកវិញ ហើយប្រាប់បណ្ដាជនឲ្យត្រៀមខ្លួន ដើម្បីចាំស្ដាប់ប្រសាសន៍ពីព្រះយេហូវ៉ា។
បីថ្ងៃក្រោយមក ជនជាតិអ៊ីស្រាអែលបានឃើញភ្នំនោះ គ្របដណ្ដប់ដោយរន្ទះបាញ់ និងពពកយ៉ាងក្រាស់។ ពួកគេថែមទាំងឮសំឡេងផ្គរលាន់ និងសំឡេងផ្លុំស្នែងយ៉ាងខ្លាំង។ បន្ទាប់មក ព្រះយេហូវ៉ាបានចុះមកលើភ្នំ ទាំងមានភ្លើងឆេះសន្ធោសន្ធៅ។ ខណៈនោះ បណ្ដាជនអ៊ីស្រាអែលក៏ភ័យខ្លាច រហូតដល់ញ័រខ្លួន។ ភ្នំទាំងមូលរញ្ជួយជាខ្លាំង ក៏មានផ្សែងខ្មួលខ្មាញ់ហុយទ្រលោម ឯសំឡេងផ្លុំស្នែងឮកាន់តែខ្លាំងឡើងៗ។ រួចមក ព្រះយេហូវ៉ាមានប្រសាសន៍ថា៖ ‹ខ្ញុំជាយេហូវ៉ា។ អ្នករាល់គ្នាមិនត្រូវគោរពប្រណិប័តន៍ព្រះផ្សេងទៀត ក្រៅពីខ្ញុំឡើយ›។
ម៉ូសេបានឡើងទៅលើភ្នំស៊ីណាយម្ដងទៀត ហើយព្រះយេហូវ៉ាបានឲ្យច្បាប់ដល់គាត់ ដើម្បីឲ្យបណ្ដាជនដឹងអំពីរបៀបគោរពប្រណិប័តន៍លោក និងការប្រព្រឹត្តដែលលោកពេញចិត្ត។ ម៉ូសេបានកត់ទុកច្បាប់ទាំងនោះ រួចអានឲ្យបណ្ដាជនអ៊ីស្រាអែលស្ដាប់។ ពួកគេបានសន្យាថា៖ «យើងខ្ញុំព្រមធ្វើតាមបង្គាប់ទាំងអស់របស់ព្រះយេហូវ៉ា»។ ពិតណាស់ ពួកគេបានសន្យាចំពោះព្រះ។ ប៉ុន្តែ តើពួកគេនឹងធ្វើតាមពាក្យសន្យាឬទេ?
«អ្នកត្រូវស្រឡាញ់ព្រះយេហូវ៉ាជាព្រះរបស់អ្នក ឲ្យអស់ពីដួងចិត្ត អស់ពីជីវិត និងអស់ពីសមត្ថភាពរិះគិត»។—ម៉ាថាយ ២២:៣៧