មេរៀនទី២៩
ព្រះយេហូវ៉ាជ្រើសរើសយ៉ូស្វេ
ក្រោយពីដឹកនាំជនជាតិអ៊ីស្រាអែលអស់ជាច្រើនឆ្នាំ ឥឡូវម៉ូសេជិតស្លាប់ហើយ។ ដូច្នេះ ព្រះយេហូវ៉ាប្រាប់គាត់ថា៖ ‹អ្នកនឹងមិនបាននាំជនជាតិអ៊ីស្រាអែល ចូលទៅក្នុងស្រុកដែលខ្ញុំបានសន្យាទេ។ ប៉ុន្តែ ខ្ញុំនឹងឲ្យអ្នកឃើញស្រុកនោះ›។ បន្ទាប់មក ម៉ូសេបានសុំព្រះយេហូវ៉ាឲ្យជ្រើសរើសអ្នកដឹកនាំថ្មី ដើម្បីថែរក្សាបណ្ដាជន។ ព្រះយេហូវ៉ាមានប្រសាសន៍ទៅម៉ូសេថា៖ ‹ចូរទៅឯយ៉ូស្វេ ហើយប្រាប់គាត់ថា គាត់នឹងធ្វើជាអ្នកដឹកនាំបន្ទាប់›។
ម៉ូសេបានប្រាប់បណ្ដាជនថា បន្តិចទៀតគាត់នឹងស្លាប់ ហើយព្រះយេហូវ៉ាបានជ្រើសរើសយ៉ូស្វេឲ្យដឹកនាំពួកគេចូលទៅក្នុងស្រុកដែលលោកបានសន្យា។ រួចមក ម៉ូសេប្រាប់យ៉ូស្វេថា៖ ‹កុំភ័យខ្លាចឡើយ។ ព្រះយេហូវ៉ានឹងជួយអ្នក›។ មិនយូរក្រោយមក ម៉ូសេឡើងទៅលើកំពូលភ្នំនេបូរ ជាកន្លែងដែលព្រះយេហូវ៉ាបង្ហាញគាត់ឲ្យឃើញទឹកដី ដែលលោកបានសន្យាឲ្យដល់អាប្រាហាំ អ៊ីសាក និងយ៉ាកុប។ ម៉ូសេបានស្លាប់នៅអាយុ១២០ឆ្នាំ។
ព្រះយេហូវ៉ាប្រាប់យ៉ូស្វេថា៖ ‹ចូរឆ្លងទន្លេយ៉ូដាន់ ហើយទៅស្រុកកាណាន។ ខ្ញុំនឹងជួយអ្នក ដូចខ្ញុំបានជួយម៉ូសេដែរ។ អ្នកត្រូវអានច្បាប់របស់ខ្ញុំជារៀងរាល់ថ្ងៃ។ កុំភ័យខ្លាចឡើយ។ ចូរក្លាហាន! ហើយធ្វើតាមអ្វីដែលខ្ញុំបានបង្គាប់អ្នក›។
យ៉ូស្វេបានចាត់អ្នកស៊ើបការណ៍ពីរនាក់ឲ្យទៅក្រុងយេរីខូ។ នៅមេរៀនបន្ទាប់ អ្នកនឹងឃើញអ្វីដែលបានកើតឡើងនៅក្រុងនោះ។ ពេលអ្នកស៊ើបការណ៍ត្រឡប់មកវិញ ពួកគេប្រាប់ថា នេះជាពេលល្អឲ្យយើងចូលទៅស្រុកកាណាន។ នៅថ្ងៃបន្ទាប់ យ៉ូស្វេបានបញ្ជាឲ្យជនជាតិអ៊ីស្រាអែលរើជំរំ។ រួចមក គាត់ប្រាប់ពួកសង្ឃដែលសែងហឹបនៃកិច្ចព្រមព្រៀង ឲ្យដើរនាំមុខទៅទន្លេយ៉ូដាន់។ នៅពេលនោះ ទឹកទន្លេហូរខ្លាំងណាស់។ ប៉ុន្តែ កាលដែលពួកសង្ឃដាក់ជើងទៅក្នុងទឹកភ្លាម ទន្លេក៏ឈប់ហូរ ហើយរីងស្ងួតទៅ! ពួកសង្ឃបានដើរទៅដល់កណ្ដាលទន្លេ ហើយឈរនៅទីនោះ រហូតដល់បណ្ដាជនអ៊ីស្រាអែលទាំងអស់ឆ្លងផុតត្រើយម្ខាង។ អព្ភូតហេតុនេះប្រាកដជាបានរំលឹកបណ្ដាជន អំពីអ្វីដែលព្រះយេហូវ៉ាបានធ្វើនៅសមុទ្រក្រហម មែនទេ?
នៅទីបំផុត ជនជាតិអ៊ីស្រាអែលបានមករស់នៅក្នុងទឹកដីដែលព្រះបានសន្យា។ ពួកគេអាចសង់ផ្ទះ សង់ក្រុង ធ្វើស្រែ ធ្វើចម្ការទំពាំងបាយជូរ និងដាំដំណាំផ្សេងៗ។ នោះជាទឹកដីដែលសម្បូរទៅដោយទឹកដោះនិងទឹកឃ្មុំ។
«ព្រះយេហូវ៉ានឹងនាំមុខអ្នកជានិច្ច ហើយបំពេញសេចក្ដីត្រូវការរបស់អ្នក ទោះជានៅក្នុងទឹកដីហួតហែងក៏ដោយ»។—អេសាយ ៥៨:១១