ជំពូកទី៨៣
សេចក្ដីអញ្ជើញឲ្យពិសាអាហារ
-
មេរៀនមួយអំពីចិត្តរាបទាប
-
ភ្ញៀវដែលបានត្រូវអញ្ជើញបានដោះសា
ក្រោយពីលោកយេស៊ូបានធ្វើឲ្យបុរសដែលមានជំងឺហើមជាសះស្បើយ លោកបន្តនៅផ្ទះរបស់ផារិស៊ីនោះនៅឡើយ។ នៅទីនោះ លោកសង្កេតឃើញថាពួកបុរសដែលជាភ្ញៀវកំពុងរើសយកកន្លែងលេចមុខលេចមាត់ជាងគេ។ រួចមក លោកប្រើឱកាសនោះ ដើម្បីបង្រៀនមេរៀនមួយអំពីចិត្តរាបទាប។
លោកយេស៊ូមានប្រសាសន៍ថា៖ «ពេលដែលមានគេអញ្ជើញអ្នកទៅពិសាភោជនាហារអបអរអាពាហ៍ពិពាហ៍ កុំទៅអង្គុយនៅកន្លែងលេចមុខលេចមាត់ជាងគេឡើយ ក្រែងលោនៅពេលនោះគេបានអញ្ជើញភ្ញៀវណាម្នាក់ដែលមានកិត្ដិយសជាងអ្នក ហើយអ្នកដែលបានអញ្ជើញអ្នកនិងភ្ញៀវនោះមកប្រាប់អ្នកថា៖ ‹សូមឲ្យបុរសនេះអង្គុយនៅទីនេះវិញ› រួចអ្នកត្រូវទៅអង្គុយនៅកន្លែងក្រោយគេបង្អស់ដោយមានសេចក្ដីខ្មាសទៀតផង»។—លូកា ១៤:៨, ៩
បន្ទាប់មក លោកយេស៊ូមានប្រសាសន៍ថា៖ «ពេលដែលមានគេអញ្ជើញអ្នក ចូរទៅអង្គុយនៅកន្លែងក្រោយគេបង្អស់ ហើយពេលបុរសដែលបានអញ្ជើញអ្នកមកដល់ គាត់នឹងប្រាប់អ្នកថា៖ ‹សម្លាញ់ សូមទៅអង្គុយនៅកន្លែងខ្ពស់ជាង› រួចអ្នកនឹងមានកិត្ដិយសនៅមុខភ្ញៀវទាំងអស់»។ នេះមិនគ្រាន់តែបង្ហាញអំពីការមានសុជីវធម៌ប៉ុណ្ណោះទេ តែលោកយេស៊ូពន្យល់ថា៖ «អ្នកណាដែលតម្កើងខ្លួន អ្នកនោះនឹងត្រូវបន្ទាបចុះ តែអ្នកណាដែលបន្ទាបខ្លួន អ្នកនោះនឹងត្រូវតម្កើងឡើង»។ (លូកា ១៤:១០, ១១) ពិតណាស់ លោកយេស៊ូកំពុងលើកទឹកចិត្តអ្នកស្ដាប់លោកឲ្យមានចិត្តរាបទាប។
រួចមក លោកយេស៊ូបង្រៀនមេរៀនមួយទៀតដល់ផារិស៊ីដែលបានអញ្ជើញលោក ពោលគឺរបៀបទទួលការពេញចិត្តពីព្រះពេលដែលអញ្ជើញអ្នកឯទៀតឲ្យពិសាអាហារ។ លោកមានប្រសាសន៍ថា៖ «ពេលដែលអ្នករៀបចំភោជនាហារថ្ងៃត្រង់ឬពេលល្ងាច កុំអញ្ជើញមិត្តភក្ដិ បងប្អូន ញាតិសន្ដាន ឬអ្នកជិតខាងដែលជាអ្នកមានឡើយ។ ប្រហែលជានៅពេលណាមួយពួកគេក៏នឹងអញ្ជើញអ្នកដែរដើម្បីតបស្នង។ ប៉ុន្តែពេលដែលអ្នករៀបចំភោជនាហារ ចូរអញ្ជើញអ្នកក្រ អ្នកខ្វិន អ្នកពិការ អ្នកងងឹតភ្នែក ហើយអ្នកនឹងមានសុភមង្គល ពីព្រោះពួកគេមិនអាចតបស្នងបានឡើយ»។—លូកា ១៤:១២-១៤
ជាធម្មតា យើងចង់អញ្ជើញមិត្តភក្ដិ ញាតិសន្ដាន ឬអ្នកជិតខាងមកពិសាអាហារ។ លោកយេស៊ូមិនមានន័យថាការធ្វើដូច្នេះគឺជាការខុសនោះទេ។ ក៏ប៉ុន្តែ លោកចង់បញ្ជាក់ថាយើងអាចទទួលពរជាច្រើន បើយើងរៀបចំអាហារសម្រាប់អ្នកដែលមានសេចក្ដីត្រូវការ ដូចជាអ្នកក្រ អ្នកខ្វិន អ្នកពិការ និងអ្នកងងឹតភ្នែកជាដើម។ លោកយេស៊ូពន្យល់អ្នកដែលអញ្ជើញលោកថា៖ «អ្នកនឹងទទួលការតបស្នង ពេលដែលមនុស្សសុចរិតត្រូវប្រោសឲ្យរស់ឡើងវិញ»។ ឮដូច្នេះ ភ្ញៀវម្នាក់បានយល់ស្របថា៖ «អ្នកណាដែលបរិភោគភោជនាហារក្នុងរាជាណាចក្ររបស់ព្រះ អ្នកនោះនឹងមានសុភមង្គល»។ (លូកា ១៤:១៥) ភ្ញៀវនោះយល់ថានេះជាឯកសិទ្ធិដ៏អស្ចារ្យណាស់។ ទោះជាយ៉ាងនោះក៏ដោយ មិនមែនមនុស្សទាំងអស់ឲ្យតម្លៃទៅលើឯកសិទ្ធបែបនោះឡើយ ដូចដែលលោកយេស៊ូមានប្រសាសន៍ដូចតទៅថា៖
«បុរសម្នាក់បានរៀបចំពិធីពិសាភោជនាហារដ៏ធំមួយ ក៏បានអញ្ជើញភ្ញៀវជាច្រើន។ រួចមក . . . លោកបានចាត់ខ្ញុំបម្រើរបស់លោកឲ្យប្រាប់ភ្ញៀវថា៖ ‹អញ្ជើញមកចុះ អ្វីៗបានត្រូវរៀបចំស្រេចហើយ›។ ប៉ុន្តែពួកគេចាប់ផ្ដើមនិយាយដោះសាគ្រប់គ្នា។ ភ្ញៀវមួយនិយាយថា៖ ‹ខ្ញុំបានទិញចម្ការមួយ ហើយត្រូវទៅពិនិត្យមើលវា ដូច្នេះសូមអភ័យទោសផង›។ ភ្ញៀវមួយទៀតនិយាយថា៖ ‹ខ្ញុំបានទិញគោប្រាំនឹម ហើយនឹងទៅពិនិត្យមើលវា ដូច្នេះសូមអភ័យទោសផង›។ ភ្ញៀវមួយផ្សេងទៀតនិយាយថា៖ ‹ខ្ញុំទើបតែរៀបការប្រពន្ធ ដូច្នេះខ្ញុំមិនអាចទៅបានទេ›»។—លូកា ១៤:១៦-២០
មូលហេតុទាំងនោះពិតជាមិនសមហេតុសមផលសោះ! តាមធម្មតា បុរសម្នាក់ពិនិត្យចម្ការឬសត្វមុននឹងទិញ ដូច្នេះ មិនមែនជាការបន្ទាន់ឲ្យគាត់ទៅពិនិត្យក្រោយពីទិញហើយនោះឡើយ។ ម្យ៉ាងទៀត បុរសទី៣មិនមែនកំពុងរៀបចំសម្រាប់ពិធីអាពាហ៍ពិពាហ៍ទេ។ គាត់បានរៀបការរួចហើយ ដូច្នេះគ្មានអ្វីរារាំងគាត់មិនឲ្យទទួលសេចក្ដីអញ្ជើញដ៏សំខាន់នោះឡើយ។ ពេលឮការដោះសាទាំងនោះ ម្ចាស់ខឹងយ៉ាងខ្លាំងហើយប្រាប់ខ្ញុំបម្រើថា៖
«ចូរប្រញាប់ចេញទៅផ្លូវទាំងធំទាំងតូចនៅក្នុងក្រុង ហើយនាំអ្នកក្រ អ្នកខ្វិន អ្នកងងឹតភ្នែក និងអ្នកពិការចូលមកទីនេះចុះ»។ ក្រោយពីខ្ញុំបម្រើបានធ្វើដូច្នេះ នៅតែសល់កន្លែងទៀត។ ដូច្នេះ ម្ចាស់ប្រាប់ខ្ញុំបម្រើថា៖ «ចូរចេញទៅផ្លូវទាំងប៉ុន្មាននិងកន្លែងមានរបងជុំវិញ រួចជំរុញគេឲ្យចូលមក ដើម្បីឲ្យផ្ទះរបស់ខ្ញុំបានពេញ។ ព្រោះខ្ញុំប្រាប់អ្នករាល់គ្នាថា ក្នុងចំណោមពួកបុរសដែលខ្ញុំបានអញ្ជើញ ខ្ញុំមិនឲ្យអ្នកណាម្នាក់បរិភោគភោជនាហាររបស់ខ្ញុំឡើយ»។—លូកា ១៤:២១-២៤
ឧទាហរណ៍ដែលលោកយេស៊ូទើបតែមានប្រសាសន៍ បញ្ជាក់យ៉ាងច្បាស់អំពីរបៀបដែលព្រះយេហូវ៉ាចាត់លោកយេស៊ូគ្រិស្តឲ្យអញ្ជើញមនុស្សឯទៀតមកទទួលរាជាណាចក្រនៅស្ថានសួគ៌។ មុនដំបូង ជនជាតិយូដាបានត្រូវអញ្ជើញ ជាពិសេសអ្នកដឹកនាំសាសនា។ ក៏ប៉ុន្តែ ពួកគេភាគច្រើនបានបដិសេធសេចក្ដីអញ្ជើញនោះ ក្នុងអំឡុងពេលដែលលោកយេស៊ូបំពេញកិច្ចបម្រើព្រះ។ ទោះជាយ៉ាងនោះក៏ដោយ មនុស្សឯទៀតនឹងត្រូវអញ្ជើញវិញ។ លោកយេស៊ូបញ្ជាក់យ៉ាងច្បាស់ថានៅថ្ងៃអនាគតនឹងមានសេចក្ដីអញ្ជើញទី២ ចំពោះជនជាតិយូដាដែលមានចិត្តរាបទាប និងអ្នកដែលចូលសាសនាយូដា។ ក្រោយមកនឹងមានសេចក្ដីអញ្ជើញទី៣ ហើយនេះជាសេចក្ដីអញ្ជើញចុងក្រោយ ចំពោះមនុស្សដែលជនជាតិយូដាគិតថាស្មោកគ្រោកចំពោះព្រះ។—សកម្មភាព ១០:២៨-៤៨
អ្វីដែលលោកយេស៊ូមានប្រសាសន៍ គឺពិតជាបានបញ្ជាក់នូវពាក្យសម្ដីរបស់ភ្ញៀវម្នាក់នោះដែលបាននិយាយថា៖ «អ្នកណាដែលបរិភោគភោជនាហារក្នុងរាជាណាចក្ររបស់ព្រះ អ្នកនោះនឹងមានសុភមង្គល»។
