ជំពូកទី៩៤
តម្រូវការដ៏សំខាន់ពីរគឺសេចក្ដីអធិដ្ឋាននិងចិត្តរាបទាប
-
ឧទាហរណ៍អំពីស្ត្រីមេម៉ាយម្នាក់ដែលព្យាយាមឥតឈប់
-
ផារិស៊ីនិងអ្នកយកពន្ធ
លោកយេស៊ូបានប្រាប់អ្នកកាន់តាមលោកនូវឧទាហរណ៍មួយស្តីអំពីការព្យាយាមឥតឈប់ក្នុងសេចក្ដីអធិដ្ឋាន។ (លូកា ១១:៥-១៣) ឥឡូវនេះ លោកប្រហែលជានៅស្រុកសាម៉ារី ឬក៏ស្រុកកាលីឡេ ហើយលោកបានបញ្ជាក់ម្ដងទៀតអំពីសារៈសំខាន់នៃការព្យាយាមឥតឈប់ក្នុងការអធិដ្ឋាន។ លោកធ្វើដូច្នេះដោយលើកឧទាហរណ៍មួយទៀត។
លោកមានប្រសាសន៍ថា៖ «នៅក្រុងមួយមានចៅក្រមម្នាក់ដែលមិនកោតខ្លាចព្រះ ក៏មិនគោរពមនុស្សណាម្នាក់សោះ។ ក៏ប៉ុន្តែនៅក្រុងនោះមានស្ត្រីមេម៉ាយម្នាក់ ដែលទៅរកចៅក្រមនោះម្ដងហើយម្ដងទៀត ដោយពោលថា៖ ‹ខ្ញុំសូមប្ដឹងគូវិវាទរបស់ខ្ញុំ។ សូមរកយុត្ដិធម៌ឲ្យខ្ញុំផង›។ អស់មួយរយៈពេល ចៅក្រមនោះមិនព្រមទេ ប៉ុន្តែក្រោយមក គាត់និយាយប្រាប់ខ្លួនគាត់ថា៖ ‹ពិតមែនតែខ្ញុំមិនកោតខ្លាចព្រះឬគោរពមនុស្សណាម្នាក់សោះ ប៉ុន្តែដោយសារស្ត្រីមេម៉ាយនេះចេះតែរំអុកខ្ញុំ ខ្ញុំនឹងរកយុត្ដិធម៌ឲ្យនាង ដើម្បីកុំឲ្យនាងមករុកកួនរហូតដល់ខ្ញុំទ្រាំលែងបាន›»។—លូកា ១៨:២-៥
ស្តីអំពីមេរៀនក្នុងឧទាហរណ៍នេះ លោកយេស៊ូបានមានប្រសាសន៍ថា៖ «តើអ្នករាល់គ្នាបានឮអ្វីដែលចៅក្រមមិនសុចរិតនោះនិយាយទេ? បើដូច្នេះ ព្រះប្រាកដជានឹងរកយុត្ដិធម៌ឲ្យអ្នករើសតាំងរបស់លោក ដែលស្រែករកលោកទាំងយប់ទាំងថ្ងៃ មែនទេ? លោកក៏នឹងមានចិត្តធ្ងន់ចំពោះពួកគេដែរ»។ (លូកា ១៨:៦, ៧) ដូច្នេះ តើលោកយេស៊ូចង់បញ្ជាក់អ្វីអំពីបិតារបស់លោក?
លោកយេស៊ូច្បាស់ជាមិនមានន័យថា ព្រះយេហូវ៉ាគឺដូចជាចៅក្រមមិនសុចរិតនោះឡើយ។ ផ្ទុយទៅវិញ លោកចង់បញ្ជាក់ថា សូម្បីតែចៅក្រមមិនសុចរិតដែលជាមនុស្សនឹងធ្វើតាមការអង្វរឥតឈប់របស់អ្នកឯទៀត ទម្រាំតែព្រះ លោកប្រាកដជានឹងធ្វើតាមការអង្វររបស់មនុស្សជាមិនខាន។ ដោយសារព្រះគឺសុចរិតហើយល្អ នោះលោកនឹងតបឆ្លើយចំពោះរាស្ត្ររបស់លោកដែលព្យាយាមអធិដ្ឋានឥតឈប់។ យើងអាចយល់ដូច្នេះតាមរយៈប្រសាសន៍បន្ថែមទៀតរបស់លោកយេស៊ូ ដែលថា៖ «ខ្ញុំប្រាប់អ្នករាល់គ្នាថា ព្រះនឹងរកយុត្ដិធម៌ឲ្យពួកគេយ៉ាងឆាប់»។—លូកា ១៨:៨
ជាញឹកញាប់ មនុស្សទន់ទាបនិងក្រីក្រមិនបានទទួលយុត្ដិធម៌ទេ ប៉ុន្តែអ្នកមានអំណាចនិងអ្នកមានប្រាក់ច្រើនតែទទួលបានការយោគយល់វិញ។ ប៉ុន្តែ ព្រះមិនប្រព្រឹត្តដូច្នេះឡើយ។ ដោយយុត្ដិធម៌ នៅពេលដែលពេលកំណត់របស់ព្រះមកដល់ លោកនឹងដាក់ទោសមនុស្សទុច្ចរិត ហើយលោកនឹងផ្ដល់ជីវិតដែលគ្មានទីបញ្ចប់ឲ្យអ្នកបម្រើរបស់លោក។
តើអ្នកណាមានជំនឿដូចស្ត្រីមេម៉ាយនោះ? តើមានមនុស្សប៉ុន្មាននាក់ដែលពិតជាជឿថាព្រះនឹង«រកយុត្ដិធម៌ឲ្យពួកគេយ៉ាងឆាប់»? លោកយេស៊ូទើបតែបានលើកឧទាហរណ៍អំពីសារៈសំខាន់នៃការព្យាយាមឥតឈប់ក្នុងសេចក្ដីអធិដ្ឋាន។ ស្តីអំពីជំនឿលើអានុភាពនៃសេចក្ដីអធិដ្ឋាន លោកបានសួរថា៖ «ពេលដែលកូនមនុស្សមកដល់ តើកូនមនុស្សពិតជានឹងឃើញថាមានជំនឿនៅលើផែនដីទេ?»។ (លូកា ១៨:៨) នេះបង្កប់អត្ថន័យថាពេលដែលគ្រិស្តមកដល់នឹងមិនមានមនុស្សជាច្រើនដែលមានជំនឿបែបនេះទេ។
មនុស្សខ្លះដែលកំពុងស្ដាប់លោកយេស៊ូមានទំនុកចិត្តលើជំនឿរបស់ពួកគេ។ ពួកគេទុកចិត្តថាខ្លួនគេជាមនុស្សសុចរិត ហើយពួកគេមើលងាយមនុស្សឯទៀត។ ចំពោះមនុស្សទាំងនោះ លោកយេស៊ូបានលើកឡើងឧទាហរណ៍មួយទៀត។
លោកមានប្រសាសន៍ថា៖ «មានបុរសពីរនាក់ឡើងទៅវិហារដើម្បីអធិដ្ឋាន។ ម្នាក់គឺជាផារិស៊ី ហើយម្នាក់ទៀតជាអ្នកយកពន្ធ។ បុរសផារិស៊ីនោះបានឈរអធិដ្ឋានក្នុងចិត្តថា៖ ‹ឱព្រះអើយ ខ្ញុំអរគុណលោកដែលខ្ញុំមិនដូចមនុស្សឯទៀត ដែលជាអ្នកគំរាមយកប្រាក់ ជាអ្នកមិនសុចរិត ជាអ្នកផិតក្បត់។ ខ្ញុំក៏អរគុណលោកដែលខ្ញុំមិនដូចអ្នកយកពន្ធម្នាក់នេះដែរ។ ខ្ញុំតមអាហារពីរដងរាល់សប្ដាហ៍ ក៏ជូនមួយភាគដប់នៃរបស់ទាំងអស់ដែលខ្ញុំទទួល›»។—លូកា ១៨:១០-១២
ពួកផារិស៊ីត្រូវគេស្គាល់ថាជាអ្នកបង្ហាញឲ្យមនុស្សឯទៀតឃើញថាលូកា ១១:៤២) ប៉ុន្មានខែមុននេះ ពួកគេបានប្រមាថមើលងាយបណ្ដាជនសាមញ្ញដោយនិយាយថា៖ «បណ្ដាជននេះដែលមិនស្គាល់ច្បាប់[តាមទស្សនៈរបស់ពួកផារិស៊ី] ជាពួកមនុស្សដែលត្រូវបណ្ដាសា»។—យ៉ូហាន ៧:៤៩
ខ្លួនដូចជាមនុស្សសុចរិត។ ពួកគេធ្វើដូច្នេះដើម្បីឲ្យមនុស្សស្ងើចសរសើរពួកគេ។ ជាធម្មតា ពួកគេតមអាហារនៅថ្ងៃច័ន្ទនិងថ្ងៃព្រហស្បតិ៍ ជាថ្ងៃដែលនៅផ្សារធំៗមានមនុស្សកកកុញ ហេតុនេះមនុស្សជាច្រើននឹងឃើញពួកគេ។ ពួកផារិស៊ីយកចិត្តទុកដាក់យ៉ាងខ្លាំងចំពោះការឲ្យមួយភាគ១០សូម្បីតែពីជីតូចៗ។ (លោកយេស៊ូបន្តរៀបរាប់អំពីឧទាហរណ៍របស់លោកថា៖ «ប៉ុន្តែអ្នកយកពន្ធដែលកំពុងឈរពីចម្ងាយ មិនទាំងហ៊ានងើបមុខមើលទៅលើមេឃផង ក៏ចេះតែគក់ទ្រូងថា៖ ‹ឱព្រះអើយ សូមប្រោសប្រណីខ្ញុំជាអ្នកប្រព្រឹត្តអំពើខុសឆ្គងផង›»។ ដោយចិត្តរាបទាបអ្នកយកពន្ធទទួលស្គាល់កំហុសរបស់គាត់។ ដូច្នេះ លោកយេស៊ូមានប្រសាសន៍បញ្ចប់ឧទាហរណ៍របស់លោកថា៖ «ខ្ញុំប្រាប់អ្នករាល់គ្នាថា បុរសនេះបានចុះទៅផ្ទះវិញដោយសឲ្យឃើញថាគាត់សុចរិតជាងបុរសនោះ ពីព្រោះអស់អ្នកណាដែលតម្កើងខ្លួន អ្នកនោះនឹងត្រូវបន្ទាបចុះ តែអ្នកណាដែលបន្ទាបខ្លួន អ្នកនោះនឹងត្រូវតម្កើងឡើងវិញ»។—លូកា ១៨:១៣, ១៤
ហេតុនេះ លោកយេស៊ូបានបញ្ជាក់យ៉ាងច្បាស់អំពីសារៈសំខាន់នៃការមានចិត្តរាបទាប។ ឱវាទនេះពិតជាមានប្រយោជន៍សម្រាប់ពួកអ្នកកាន់តាមលោកនៅសម័យនោះ ពីព្រោះពួកគាត់បានធំឡើងក្នុងសង្គមមួយដែលមានពួកផារិស៊ីជាអ្នកចាត់ទុកខ្លួនជាមនុស្សសុចរិត។ ពួកគេគិតតែអំពីមុខមាត់និងឋានៈ។ បន្ថែមទៅទៀត ឱវាទនេះក៏ពិតជាមានប្រយោជន៍សម្រាប់អ្នកកាន់តាមទាំងអស់របស់លោកយេស៊ូនៅសព្វថ្ងៃនេះដែរ។