ជំពូកទី៥៥
ប្រសាសន៍លោកយេស៊ូធ្វើឲ្យមនុស្សជាច្រើនទាស់ចិត្ត
-
បរិភោគសាច់និងផឹកឈាមរបស់លោក
-
មនុស្សជាច្រើនជំពប់ដួល ហើយឈប់កាន់តាមលោក
នៅឯសាលាប្រជុំក្នុងក្រុងកាពើណិម លោកយេស៊ូកំពុងបង្រៀនថាលោកជានំប៉័ងដ៏ពិតពីស្ថានសួគ៌។ នៅទីនោះ លោកច្បាស់ជាបញ្ជាក់ថែមទៀតអំពីអ្វីដែលលោកបានប្រាប់បណ្ដាជនដែលបានត្រឡប់មកពីទិសខាងកើតនៃសមុទ្រកាលីឡេ។ ពួកគេជាអ្នកដែលបានបរិភោគនំប៉័ងនិងត្រីដែលលោកផ្ដល់ឲ្យ។
លោកយេស៊ូបន្តមានប្រសាសន៍ថា៖ «បុព្វបុរសរបស់អ្នករាល់គ្នាបានបរិភោគនំម៉ាណានៅតំបន់ស្ងាត់ជ្រងំ ហើយនៅតែស្លាប់»។ រួចមក លោកពន្យល់ផ្ទុយទៅវិញថា៖ «ខ្ញុំជានំប៉័ងរស់ដែលបានចុះមកពីស្ថានសួគ៌។ បើអ្នកណាបរិភោគនំប៉័ងនេះ អ្នកនោះនឹងរស់ជារៀងរហូត ហើយជាការពិតថា នំប៉័ងដែលខ្ញុំនឹងឲ្យ គឺជាសាច់របស់ខ្ញុំ ដើម្បីឲ្យមនុស្សជាតិអាចរស់»។—យ៉ូហាន ៦:៤៨-៥១
ពេលមុននៅរដូវស្លឹកឈើលាស់នាឆ្នាំ៣០ គ.ស. លោកយេស៊ូបានប្រាប់នីកូដេមថា ព្រះស្រឡាញ់ពិភពលោកដល់ម្ល៉េះបានជាលោកឲ្យបុត្រតែមួយរបស់លោកធ្វើជាអ្នកសង្គ្រោះ។ ឥឡូវ លោកយេស៊ូបញ្ជាក់ថាមនុស្សជាតិត្រូវបរិភោគសាច់របស់លោក ក្នុងន័យថាពួកគេត្រូវបង្ហាញជំនឿលើគ្រឿងបូជាដែលលោកនឹងផ្ដល់ឲ្យ។ នេះហើយជារបៀបដែលពួកគេអាចទទួលជីវិតដែលគ្មានទីបញ្ចប់។
ក៏ប៉ុន្តែ ក្រុមមនុស្សមិនយល់ស្របនឹងប្រសាសន៍របស់លោកយេស៊ូឡើយ ហើយពួកគេសួរគ្នាថា៖ «តើបុរសនេះអាចឲ្យសាច់របស់គាត់ឲ្យយើងបរិភោគដូចម្ដេចបាន?»។ (យ៉ូហាន ៦:៥២) លោកយេស៊ូចង់ឲ្យពួកគេយល់ថាលោកកំពុងមានប្រសាសន៍ក្នុងន័យធៀប មិនមែនក្នុងន័យត្រង់ទេ។ បន្ទាប់មក លោកពន្យល់បន្ថែមទៀតដើម្បីបញ្ជាក់អំពីអត្ថន័យនៃប្រសាសន៍របស់លោក។
លោកមានប្រសាសន៍ថា៖ «ប្រសិនបើអ្នករាល់គ្នាមិនបរិភោគសាច់របស់កូនមនុស្ស ហើយមិនផឹកឈាមរបស់លោក នោះអ្នករាល់គ្នាគ្មានជីវិតក្នុងខ្លួនឡើយ។ អ្នកណាដែលបរិភោគសាច់របស់ខ្ញុំហើយផឹកឈាមរបស់ខ្ញុំ អ្នកនោះមានជីវិតដែលគ្មានទីបញ្ចប់ . . . ព្រោះសាច់របស់ខ្ញុំជាអាហារដ៏ពិត ហើយឈាមរបស់ខ្ញុំជាភេសជ្ជៈដ៏ពិត។ អ្នកណាដែលបរិភោគសាច់របស់ខ្ញុំហើយផឹកឈាមរបស់ខ្ញុំ អ្នកនោះនៅរួបរួមជាមួយនឹងខ្ញុំ»។—យ៉ូហាន ៦:៥៣-៥៦
សូមគិតទៅមើល ប្រសាសន៍របស់លោកបានធ្វើឲ្យជនជាតិយូដាខ្ពើមយ៉ាងណា! ពួកគេប្រហែលជាគិតថាលោកយេស៊ូកំពុងប្រាប់ឲ្យពួកគេបរិភោគសាច់ ឬផឹកឈាមរបស់មនុស្ស ដែលខុសច្បាប់របស់ព្រះ។ (លោកុប្បត្តិ ៩:៤; លេវីវិន័យ ១៧:១០, ១១) ប៉ុន្តែ លោកយេស៊ូមិនសំដៅទៅលើការបរិភោគសាច់ ឬផឹកឈាមក្នុងន័យត្រង់នោះទេ។ ផ្ទុយទៅវិញ លោកកំពុងបង្ហាញថាអស់អ្នកដែលចង់ទទួលជីវិតដែលគ្មានទីបញ្ចប់ ត្រូវបង្ហាញជំនឿលើគ្រឿងបូជាដែលលោកនឹងផ្ដល់ឲ្យ កាលដែលលោកបូជារូបកាយដ៏ល្អឥតខ្ចោះ និងបង្ហូរឈាមរបស់លោក។ ទោះជាយ៉ាងនោះក៏ដោយ អ្នកកាន់តាមជាច្រើនមិនយល់សេចក្ដីបង្រៀននេះឡើយ។ ដូច្នេះ អ្នកខ្លះនិយាយថា៖ «សម្ដីនេះគួរឲ្យទាស់ចិត្តណាស់ តើអ្នកណាអាចស្ដាប់បាន?»។—យ៉ូហាន ៦:៦០
លោកយេស៊ូជ្រាបថា ពួកអ្នកកាន់តាមកំពុងរអ៊ូ ដូច្នេះលោកសួរពួកគេថា៖ «តើសម្ដីនេះធ្វើឲ្យអ្នករាល់គ្នាជំពប់ដួលឬ? ចុះយ៉ាងណាវិញ បើអ្នករាល់គ្នាឃើញកូនមនុស្សឡើងទៅកន្លែងដែលលោកនៅពីមុន? . . . ពាក្យដែលខ្ញុំបានប្រាប់អ្នករាល់គ្នាផ្ដើមចេញពីសកម្មពលរបស់ព្រះ ហើយក៏ផ្ដល់ជីវិត។ ប៉ុន្តែមានអ្នករាល់គ្នាខ្លះដែលមិនជឿ»។ ពេលឮដូច្នេះ អ្នកកាន់តាមជាច្រើនបានចេញទៅ ហើយលែងចង់តាមលោកតទៅទៀត។—យ៉ូហាន ៦:៦១-៦៤
ម្ល៉ោះហើយ លោកយេស៊ូសួរសាវ័កទាំង១២នាក់ថា៖ «តើអ្នករាល់គ្នាចង់ទៅដែរឬ?»។ ពេត្រុសឆ្លើយថា៖ «លោកម្ចាស់ តើយើងនឹងទៅឯអ្នកណាវិញ? ប្រសាសន៍របស់លោកនាំឲ្យបានជីវិតដែលគ្មានទីបញ្ចប់ ហើយយើងបានជឿ ក៏បានដឹងថា លោកជាអ្នកបរិសុទ្ធរបស់ព្រះ»។ (យ៉ូហាន ៦:៦៧-៦៩) ពេត្រុសនិងសាវ័កឯទៀតពិតជាបង្ហាញភក្ដីភាពចំពោះលោកមែន ទោះជាពួកគាត់មិនទាន់យល់ច្បាស់អំពីអ្វីដែលលោកយេស៊ូកំពុងបង្រៀនក្ដី!
លោកយេស៊ូពេញចិត្តនឹងចម្លើយរបស់ពេត្រុស រួចមកលោកមានប្រសាសន៍ថា៖ «ខ្ញុំបានជ្រើសរើសអ្នកទាំងដប់ពីរ មែនទេ? ទោះជាយ៉ាងនោះក៏ដោយ មានម្នាក់ក្នុងចំណោមអ្នករាល់គ្នាជាអ្នកបង្កាច់បង្ខូច»។ (យ៉ូហាន ៦:៧០) លោកយេស៊ូកំពុងមានប្រសាសន៍អំពីយូដាសអ៊ីស្ការីយ៉ុត ពីព្រោះមកដល់ពេលនេះ លោកប្រហែលជាសង្កេតឃើញថាយូដាសចាប់ផ្ដើមធ្វើតាមបំណងប្រាថ្នាអាក្រក់របស់គាត់។
យ៉ាងណាមិញ លោកយេស៊ូពេញចិត្តណាស់ដោយសារលោកដឹងថា ពេត្រុសនិងសាវ័កឯទៀតមិនបានធ្វើតាមបណ្ដាជនដោយឈប់កាន់តាមលោក ហើយឈប់ធ្វើកិច្ចការដែលជួយសង្គ្រោះជីវិតដែលលោកកំពុងធ្វើនោះឡើយ។
