ជំពូកទី៣៤

លោកយេស៊ូជ្រើសរើស១២នាក់ឲ្យធ្វើជាសាវ័ក

លេង

សាវ័ក១២នាក់

ប្រហែលជាមួយឆ្នាំកន្លះមុន យ៉ូហានដែលជាអ្នកជ្រមុជទឹកបានជួយមនុស្សឲ្យស្គាល់លោកយេស៊ូថាជាកូនចៀមរបស់ព្រះ។ ពេលដែលលោកយេស៊ូចាប់ផ្ដើមកិច្ចបម្រើផ្សាយ មានមនុស្សមួយចំនួនដែលមានចិត្តស្មោះបានក្លាយទៅជាអ្នកកាន់តាមលោក ដូចជាអនទ្រេ ស៊ីម៉ូនពេត្រុស យ៉ូហាន យ៉ាកុប ប្រហែលជា (ប្អូនប្រុសរបស់យ៉ូហាន) ភីលីព និងបាថូឡូម៉េ (ដែលគេហៅថាណាថាណែល)។ ក្រោយមកក៏មានអ្នកឯទៀតបានក្លាយទៅជាអ្នកកាន់តាមគ្រិស្តដែរ។—យ៉ូហាន ១:៤៥-៤៧

ឥឡូវដល់ពេលដែលលោកយេស៊ូជ្រើសរើសអ្នកកាន់តាមលោកឲ្យធ្វើជាសាវ័ក។ ពួកគាត់នឹងទៅជាអ្នករួមការងារដ៏ជិតស្និទ្ធរបស់លោក ហើយពួកគាត់នឹងទទួលការបង្ហាត់បង្រៀនពិសេស។ ប៉ុន្តែ មុននឹងលោកយេស៊ូជ្រើសរើសពួកគាត់ លោកបានចេញទៅភ្នំមួយ ប្រហែលជានៅជិតសមុទ្រកាលីឡេ ដែលនៅមិនឆ្ងាយពីក្រុងកាពើណិមឡើយ។ នៅទីនោះ លោកបានចំណាយពេលអធិដ្ឋានពេញមួយយប់ ទំនងជាដើម្បីសុំប្រាជ្ញាពីព្រះ និងសុំពរពីលោក។ នៅថ្ងៃបន្ទាប់ លោកហៅពួកអ្នកកាន់តាមមក ហើយជ្រើសរើស១២នាក់ពីចំណោមពួកគាត់ឲ្យធ្វើជាសាវ័ក។

អ្នកកាន់តាម៦នាក់ដែលលោកយេស៊ូបានជ្រើសរើសឲ្យធ្វើជាសាវ័ក គឺជាអ្នកកាន់តាមដំបូងរបស់លោក ដែលមានឈ្មោះដូចបានរៀបរាប់ខាងលើ។ បន្ទាប់មក លោកយេស៊ូបានជ្រើសរើសម៉ាថាយដែលជាអ្នកយកពន្ធ រួចលោកបានជ្រើសរើសប្រាំនាក់ទៀតគឺយូដាស (ដែលគេហៅថា ថាដេ ជា«កូនរបស់យ៉ាកុប») ស៊ីម៉ូនមកពីក្រុងកាពើណិម ថូម៉ាស់ យ៉ាកុបដែលជាកូនអាល់ផៀស និងយូដាសអ៊ីស្ការីយ៉ុត។—ម៉ាថាយ ១០:២-៤; លូកា ៦:១៦

ឥឡូវនេះ សាវ័កទាំង១២នាក់បានធ្វើដំណើរជាប់ជាមួយនឹងលោក ហើយលោកស្គាល់ពួកគាត់យ៉ាងច្បាស់។ ពួកគាត់ខ្លះជាសាច់ញាតិរបស់លោកយេស៊ូ។ យ៉ាកុបនិងយ៉ូហានដែលជាបងប្អូនបង្កើត គឺត្រូវជាបងប្អូនជីដូនមួយរបស់លោក។ ម្យ៉ាងទៀត មនុស្សខ្លះយល់ថាអាល់ផៀសនិងយ៉ូសែបដែលជាឪពុកចិញ្ចឹមរបស់លោកយេស៊ូត្រូវជាបងប្អូនបង្កើត។ ដូច្នេះ សាវ័កយ៉ាកុបដែលជាកូនអាល់ផៀសក៏ត្រូវជាបងប្អូនជីដូនមួយរបស់លោកយេស៊ូដែរ។

ចំពោះលោកយេស៊ូ គឺមិនពិបាកទេក្នុងការចាំឈ្មោះរបស់ពួកសាវ័កទាំងអស់។ ប៉ុន្តែ តើអ្នកអាចចាំឈ្មោះរបស់ពួកគាត់បានទេ? វិធីមួយដែលជួយអ្នកឲ្យចាំឈ្មោះពួកគាត់គឺ មានឈ្មោះស៊ីម៉ូនពីរនាក់ យ៉ាកុបពីរនាក់ និងយូដាសពីរនាក់។ សាវ័កផ្សេងទៀត គឺអនទ្រេជាប្អូនស៊ីម៉ូន (ពេត្រុស) ហើយយ៉ូហានជាប្អូនយ៉ាកុប (កូនសេបេដេ)។ នោះជាវិធីមួយក្នុងការចាំឈ្មោះរបស់សាវ័កទាំង៨នាក់។ សាវ័កបួននាក់ទៀតមានអ្នកយកពន្ធ (ម៉ាថាយ) ម្នាក់ទៀតឈ្មោះ (ថូម៉ាស់) ដែលក្រោយមកមានចិត្តសង្ស័យ ម្នាក់ទៀតឈ្មោះ (ណាថាណែល) ដែលលោកយេស៊ូហៅពេលគាត់នៅក្រោមដើមឈើ និង (ភីលីព) ដែលជាមិត្តរបស់ណាថាណែល។

សាវ័ក១១នាក់មកពីស្រុកកាលីឡេ ដែលជាស្រុកលោកយេស៊ូ។ ណាថាណែល មកពីភូមិកាណា។ ភីលីព ពេត្រុស និងអនទ្រេ មកពីក្រុងបេតសេដា។ ក្រោយមក ពេត្រុស និងអនទ្រេបានផ្លាស់ទីលំនៅទៅក្រុងកាពើណិមវិញ ទំនងជាកន្លែងដែលម៉ាថាយរស់នៅ។ យ៉ាកុបនិងយ៉ូហានរស់នៅក្នុងក្រុងកាពើណិម ឬក្បែរក្រុងនោះ ហើយពួកគាត់មានរបរជាអ្នកនេសាទ។ ចំណែកឯយូដាសអ៊ីស្ការីយ៉ុតវិញ ដែលក្រោយមកក្បត់លោកយេស៊ូ តាមមើលទៅមានតែគាត់ម្នាក់គត់ដែលរស់នៅស្រុកយូឌា។

លោកយេស៊ូ ជាផ្លូវ ជាសេចក្ដីពិត ជាជីវិត