ជំពូកទី៨
ពួកគាត់រត់គេចពីអ្នកគ្រប់គ្រងអាក្រក់
-
យ៉ូសែប ម៉ារៀនិងកូនតូចយេស៊ូរត់ទៅស្រុកអេស៊ីប
-
យ៉ូសែបនាំក្រុមគ្រួសារទៅរស់នៅក្រុងណាសារ៉ែត
យ៉ូសែបដាស់ម៉ារៀឲ្យភ្ញាក់ឡើងដើម្បីប្រាប់នាងនូវដំណឹងដ៏បន្ទាន់មួយ។ ទេវតារបស់ព្រះយេហូវ៉ាបានលេចមកក្នុងសុបិនរបស់យ៉ូសែប ហើយប្រាប់គាត់ថា៖ «ចូរក្រោកឡើងយកបុត្រតូចនិងម្ដាយរបស់លោក ហើយរត់ទៅស្រុកអេស៊ីប។ អ្នកត្រូវនៅទីនោះរហូតដល់ខ្ញុំប្រាប់ឲ្យត្រឡប់មកវិញ ព្រោះហេរ៉ូឌបម្រុងនឹងស្វែងរកបុត្រតូចនោះដើម្បីបំផ្លាញចោល»។—ម៉ាថាយ ២:១៣
ភ្លាមនោះ យ៉ូសែប ម៉ារៀ និងកូនតូចរបស់ពួកគាត់បានរត់ភៀសខ្លួនទាំងយប់។ ពួកគាត់បានរត់ចេញទាន់ពេល ពីព្រោះហេរ៉ូឌដឹងថាពួកអ្នកចេះហោរាសាស្ត្រទាំងនោះបានបោកបញ្ឆោតគាត់ ហើយមិនត្រឡប់មករាយការណ៍ប្រាប់គាត់ទេ។ ផ្ទុយទៅវិញ ពួកគេបានត្រឡប់ទៅស្រុកខ្លួនវិញ។ ដូច្នេះ ហេរ៉ូឌខឹងយ៉ាងខ្លាំង។ ទោះជាយ៉ាងនោះក៏ដោយ ហេរ៉ូឌនៅតែចង់សម្លាប់កូនតូចយេស៊ូ ដូច្នេះគាត់បានបញ្ជាឲ្យគេសម្លាប់ក្មេងប្រុសទាំងអស់ដែលមានអាយុពីរឆ្នាំចុះក្រោមនៅភូមិបេថ្លេហិមនិងតំបន់ជិតភូមិនោះ។ គាត់ប៉ាន់ស្មានអាយុរបស់កូនតូចយេស៊ូតាមរយៈព័ត៌មានដែលគាត់បានទទួលពីពួកអ្នកចេះហោរាសាស្ត្រដែលមកពីតំបន់ខាងកើត។
ការសម្លាប់ក្មេងប្រុសទាំងអស់គឺជាអំពើសាហាវឃោរឃៅណាស់! យើងមិនដឹងថាក្មេងប្រុសប៉ុន្មាននាក់បានត្រូវគេសម្លាប់នោះទេ ប៉ុន្តែទំនួញនិងទុក្ខសោករបស់ម្ដាយបានសម្រេចបទទំនាយមួយពីព្រះតាមរយៈអ្នកប្រកាសទំនាយម្នាក់ឈ្មោះយេរេមា។—យេរេមា ៣១:១៥
ដំណាលគ្នានោះ យ៉ូសែបនិងក្រុមគ្រួសាររបស់គាត់បានរត់ទៅស្រុកអេស៊ីប ហើយបន្តរស់នៅទីនោះ។ បន្ទាប់មក ទេវតារបស់ព្រះយេហូវ៉ាលេចមកក្នុងសុបិនរបស់យ៉ូសែបម្ដងទៀត ហើយប្រាប់ថា៖ «ចូរក្រោកឡើងយកបុត្រតូចនិងម្ដាយរបស់លោក ហើយទៅស្រុកអ៊ីស្រាអែល ព្រោះអ្នកដែលរកប្រហារជីវិតបុត្រតូចនោះបានស្លាប់បាត់ទៅហើយ»។ (ម៉ាថាយ ២:២០) ឥឡូវ យ៉ូសែបដឹងច្បាស់ថាក្រុមគ្រួសាររបស់គាត់អាចត្រឡប់ទៅស្រុកកំណើតវិញ។ ហេតុការណ៍នេះបានសម្រេចទំនាយមួយទៀតក្នុងគម្ពីរ គឺព្រះបានហៅកូនរបស់លោកពីស្រុកអេស៊ីបមក។—ហូសេ ១១:១
តាមមើលទៅ យ៉ូសែបចង់ឲ្យក្រុមគ្រួសាររបស់គាត់រស់នៅតំបន់យូឌា ជិតភូមិបេថ្លេហិមជាកន្លែងដែលពួកគាត់ធ្លាប់រស់នៅ មុនរត់ទៅស្រុកអេស៊ីប។ ប៉ុន្តែ គាត់បានដឹងថា ឥឡូវកូនដ៏អាក្រក់ម្នាក់របស់ហេរ៉ូឌឈ្មោះអាខេឡាស បានគ្រប់គ្រងជាស្តេចនៅតំបន់យូឌា។ តាមរយៈសុបិន ព្រះបានព្រមានយ៉ូសែបអំពីរឿងនោះ។ ដូច្នេះ យ៉ូសែបនិងក្រុមគ្រួសាររបស់គាត់បានធ្វើដំណើរឆ្ងាយទៅតំបន់ខាងជើង ហើយរស់នៅក្រុងណាសារ៉ែតក្នុងតំបន់កាលីឡេ ឆ្ងាយពីមណ្ឌលសាសនាយូដា។ លោកយេស៊ូបានធំឡើងនៅក្រុងណាសារ៉ែត ហើយនេះបានសម្រេចទំនាយមួយទៀតដែលថា៖ «លោកនឹងត្រូវគេហៅជាអ្នកក្រុងណាសារ៉ែត»។—ម៉ាថាយ ២:២៣
