ជំពូកទី១
ដំណឹងពីរមកពីព្រះ
-
ទេវតាឈ្មោះកាព្រីយ៉ែលប្រកាសប្រាប់អំពីកំណើតរបស់យ៉ូហានដែលជាអ្នកជ្រមុជទឹក
-
កាព្រីយ៉ែលប្រាប់ម៉ារៀអំពីកំណើតរបស់លោកយេស៊ូ
បិតាដែលនៅស្ថានសួគ៌ណែនាំយើងតាមរយៈគម្ពីរ។ ដូច្នេះ យើងអាចចាត់ទុកគម្ពីរបរិសុទ្ធទាំងមូល ជាដំណឹងមកពីព្រះ។ ប៉ុន្តែ សូមគិតអំពីដំណឹងដ៏ពិសេសពីរដែលបានត្រូវនាំមកជាង២.០០០ឆ្នាំមុន ដោយទេវតាម្នាក់ឈ្មោះកាព្រីយ៉ែលជាអ្នកដែល«ឈរនៅមុខព្រះ»។ (លូកា ១:១៩) តើកាព្រីយ៉ែលបាននាំដំណឹងដ៏សំខាន់នោះដល់អ្នកណាខ្លះ?
ប្រហែលជានៅឆ្នាំ៣ មុនគ.ស. ទេវតាកាព្រីយ៉ែលបាននាំដំណឹងដំបូងទៅប្រាប់សង្ឃម្នាក់របស់ព្រះយេហូវ៉ាឈ្មោះសាការី ដែលរស់នៅជួរភ្នំស្រុកយូឌា មិនឆ្ងាយប៉ុន្មានពីក្រុងយេរូសាឡិម។ សាការីនិងប្រពន្ធគាត់ឈ្មោះអេលីសាបិតមានវ័យចាស់ ហើយពួកគាត់គ្មានកូនទេ។ សាការីបម្រើជាសង្ឃក្នុងវិហាររបស់ព្រះនៅក្រុងយេរូសាឡិម។ កាលដែលសាការីកំពុងបម្រើនៅវិហារ កាព្រីយ៉ែលក៏បានលេចមកឲ្យគាត់ឃើញនៅជិតទីបូជាគ្រឿងក្រអូប។
ហេតុការណ៍នោះបានធ្វើឲ្យសាការីភ័យខ្លាចមែន។ ប៉ុន្តែ ទេវតានោះបានធ្វើឲ្យសាការីមានអារម្មណ៍ស្រួលឡើងវិញ ដោយនិយាយថា៖ «សាការី កុំខ្លាចឡើយ ព្រោះព្រះបានឮការអង្វរសុំរបស់អ្នក ហើយប្រពន្ធរបស់អ្នកនឹងបង្កើតកូនប្រុសមួយឲ្យអ្នក។ អ្នកត្រូវហៅឈ្មោះរបស់កូននោះថា យ៉ូហាន»។ កាព្រីយ៉ែលនិយាយបន្ថែមថា យ៉ូហាន«នឹងទៅជាបុរសដ៏ឧត្តមនៅចំពោះព្រះយេហូវ៉ា»ហើយនឹង«រៀបចំមនុស្សមួយពួកជាស្រេច ទុកសម្រាប់ព្រះយេហូវ៉ា»។—លូកា ១:១៣-១៧
ចំពោះសាការី រឿងនោះហាក់ដូចជាមិនគួរឲ្យជឿសោះ។ ហេតុអ្វី? ពីព្រោះគាត់និងអេលីសាបិតមានវ័យចាស់ហើយ។ ដូច្នេះ ដោយសារគាត់មិនបានជឿ កាព្រីយ៉ែលប្រាប់គាត់ថា៖ «អ្នកនឹងនិយាយមិនរួច ក៏នឹងស្ងៀមរហូតដល់ការទាំងនេះកើតឡើង ដោយសារអ្នកមិនបានជឿពាក្យរបស់ខ្ញុំ»។—លូកា ១:២០
ដំណាលគ្នានោះ មនុស្សដែលនៅខាងក្រៅវិហារកំពុងឆ្ងល់ថា ហេតុអ្វីសាការីនៅក្នុងវិហារយូរម្ល៉េះ? នៅទីបំផុត គាត់ក៏ចេញមក តែគាត់មិនអាចនិយាយបានទេ។ សាការីគ្រាន់តែអាចធ្វើកាយវិការប៉ុណ្ណោះ។ នេះបង្ហាញថា គាត់ពិតជាបានឃើញអ្វីដ៏អស្ចារ្យ ពេលគាត់នៅក្នុងវិហារ។
ក្រោយពីសាការីបានបញ្ចប់កិច្ចការរបស់គាត់នៅឯវិហារ គាត់ត្រឡប់ទៅផ្ទះវិញ។ មិនយូរប៉ុន្មានក្រោយមក អេលីសាបិតក៏មានផ្ទៃពោះ! មុនសម្រាលកូន គាត់នៅក្នុងផ្ទះអស់រយៈពេលប្រាំខែ ដោយមិនជួបមនុស្សឯទៀតទេ។
បន្ទាប់មក កាព្រីយ៉ែលបានលេចមកផ្ដល់ដំណឹងទី២។ តើគាត់ប្រាប់ដំណឹងនោះដល់អ្នកណា? គឺដល់ស្ត្រីក្រមុំវ័យក្មេងម្នាក់ឈ្មោះម៉ារៀ ដែលរស់នៅក្នុងក្រុងណាសារ៉ែតខាងជើងក្រុងយេរូសាឡិម តំបន់កាលីឡេ។ តើទេវតានោះប្រាប់អ្វីដល់នាង? គាត់ប្រាប់ថា៖ «ព្រះពេញចិត្តនឹងនាង។ មើល! នាងនឹងមានផ្ទៃពោះ ក៏នឹងបង្កើតបុត្រមួយ ហើយនាងត្រូវឲ្យនាមបុត្រនោះថា យេស៊ូ។ បុត្រនោះនឹងធំឧត្តម ក៏នឹងត្រូវហៅថាបុត្ររបស់ព្រះដ៏ខ្ពង់ខ្ពស់បំផុត . . . លោកក៏នឹងគ្រប់គ្រងជាស្តេចលើពូជពង្សយ៉ាកុបជារៀងរហូត ហើយរាជាណាចក្ររបស់លោកនឹងមិនសាបសូន្យឡើយ»។—លូកា ១:៣០-៣៣
កាព្រីយ៉ែលច្បាស់ជាចាត់ទុកការនាំដំណឹងទាំងពីរនោះជាឯកសិទ្ធិដ៏អស្ចារ្យមែន! ពេលយើងអានថែមទៀតអំពីយ៉ូហាននិងលោកយេស៊ូ យើងនឹងដឹងច្បាស់អំពីមូលហេតុដែលដំណឹងពីរមកពីព្រះនោះគឺសំខាន់ណាស់។